གསུམ་པ་གང་གིས་སྐྱབས་སུ་འགྲོ་བའི་རྟེན།

གསུམ་པ་གང་གིས་སྐྱབས་སུ་འགྲོ་བའི་རྟེན་ནི།

སྤྱིར་ན་འཇིགས་པ་ལས་ཐར་བར་འདོད་པའི་འགྲོ་བ་གང་ཡང་རུང་བ་སྟེ། སྐབས་འདིར་ནི་དགེ་བསྙེན་གྱི་རྟེན་དུ་རུང་བའོ། ། བཞི་པ་སྐྱབས་འགྲོའི་ངོ་བོ་ནི། བྱེ་བྲག་སྨྲ་བ་ལྟར་ན། ངག་གི་རྣམ་པར་རིག་བྱེད་འཁོར་དང་བཅས་པ་སྟེ། མཛོད་འགྲེལ་ལས། སྐྱབས་སུ་འགྲོ་བ་རྣམས་ཀྱི་རང་བཞིན་ཅི་ཞེ་ན་ངག་གི་རྣམ་པར་རིག་བྱེད་ཀྱི་ངོ་བོ་ཉིད་དག་ཡིན་ནོ། །ཞེས་དང༌། མཛོད་ཀྱི་འགྲེལ་བཤད་ལས། ངག་གི་རྣམ་པར་རིག་བྱེད་ཀྱི་ངོ་བོ་ཉིད་དག་ཡིན་ནོ་ཞེས་བྱ་བ་ནི། ནོད་པའི་དུས་ཀྱི་དབང་དུ་བྱས་ནས་ཡིན་ཏེ། ཁས་ལེན་པའི་བདག་ཉིད་ཡིན་པའི་ཕྱིར་རོ། །འཁོར་དང་བཅས་ན་ནི་ཕུང་པོ་ལྔའི་རང་བཞིན་ཡིན་ཏེ། སེམས་ཀྱིས་ཀུན་ནས་བསླང་པའི་ཚིག་གིས་སྐྱབས་སུ་འགྲོ་ཡི། སེམས་མེད་པར་ནི་མ་ཡིན་ནོ། །ཞེས་སོ། །སྐྱབས་འགྲོ་ལ་ངག་གི་རྣམ་པ་རིག་བྱེད་ཀྱིས་ཁྱབ་ན་གཟུགས་མེད་འཕགས་པ་དང་འགོག་སྙོམས་པའི་རྒྱུད་ལ་སྐྱབས་འགྲོ་མེད་པར་འགྱུར་རོ། །