རང་རང་གི་ལོངས་སྤྱོད་ལ་སྤྱད་པའི་དབང་གིས་ངེས་པ་འཕོ་སྡུད་སྐྱེ་ཚུལ།
ལོ་དག་བསྟུང་སྟེ་དྷྲཱུ་ཝ་འཕོ་ཚུལ།
ལྔ་པ་རང་རང་གི་ལོངས་སྤྱོད་ལ་སྤྱད་པའི་དབང་གིས་ངེས་པ་འཕོ་སྡུད་སྐྱེ་ཚུལ་ལ། ལོ་དག་བསྟུང་སྟེ་དྷྲཱུ་ཝ་འཕོ་ཚུལ། ཕན་ཚུན་ལྟོས་པས་ཞག་དུ་མ་འདྲིལ་བའི་སྤྱི་ནུར་ལ་བརྟེན་ཏེ་ལོ་རེའི་རྀ་ཐུ་འཕོ་ཚུལ། རང་རང་གི་འཁོར་ལོ་རྫོགས་པས་སྟོང་པར་འཇུག་ཚུལ། དེ་ལས་སླར་ཡང་ངེས་པ་སྐྱེ་བའི་ཚུལ་དང་བཞི། དང་པོ་ནི། རྩིས་འགོར་གཟུང་བྱའི་ལོ་དག་པ་གང་དང་གང་ལ་སྦྱིན་བྱའི་རྩིས་འཕྲོ་ཡིན་ན། འདས་མ་ཐག་པའི་ལོ་དེའི་མཐའི་དབོ་ཟླའི་གནམ་གང་ལ་ཤར་བའི་ངེས་པ་གང་ཞིག །ལོ་དག་པ་རང་ཉིད་ཀྱི་ནག་པའི་དྷྲཱུ་ཝ་ཡིན་པས་ཁྱབ་པའི་ཕྱིར། ལོ་གང་གི་ནག་དྷྲཱུ་སྟོང་པའི་ལོ་དེ་ནས་རྩིས་གཞིའི་ལོ་དག་གི་འགོ་འཛིན་ན་རྩིས་འཕྲོ་བསྲེ་སྦྱངས་གང་ཡང་མི་དགོས་ལ། གཞན་དུ་ན་རང་རང་གི་སྟོང་རྩིས་ལས་བརྩམས་ཏེ་བརྩི་བཞིན་པའི་བར་གྱི་འདས་ལོ་དག་པ་ལས་ངེས་པ་གསར་སྤོའི་རྩིས་འཕྲོ་རྣམས་འཚོལ་དགོས་པ་ཡིན་ནོ། །དེ་ལ་རྒྱུད་ཀྱི་འདས་ལོ་ཉིས་བརྒྱ་ཉེར་གཅིག་གི་ཐོག་མའི་རྩིས་འགོ་ཟུགས་པའི་ལོ་དེ་མི་ཟད་པ་མེ་ཁྱི་ཡིན་ལ། དེའི་ནག་དྷྲཱུ་གང་ཡིན་པ་དེ་རྒྱུད་ཀྱི་བྱེད་པའི་རྩིས་འཕྲོ་བཟོ་བའི་གཞིར་གྱུར་བའི་གྲུབ་མཐའི་རྩིས་འཕྲོ་སྟེ། ཟླ་བཤོལ་འཕྲོ་རེ་གཅིག །གཟའ་ཚེས་ཀྱི་རྩིས་འཕྲོ་གཟའ་ཐིག་དང་། ཆུ་ཚོད་ལྔ་བཅུ་སོགས་དང་། ༠རིལ་པོ་གསུམ། ཆ་ཤས་གོ་བདུན། ཉི་མའི་རྩིས་འཕྲོ་སྐར་མ་ཉེར་བཞི་དང་ཆུ་ཚོད་ང་བདུན་སོགས་དང་། ༢༤སྒྲ་གཅན་གྱི་རྩིས་འཕྲོ་ལ་ཟླ་བ་བརྒྱ་ཉེར་གཅིག །གཟའ་ལྔའི་སྤྱི་ཞག་གི་རྩིས་འཕྲོ་རེ་བཞི་ཆ་དགུ་དང་། རི་མཁའ་རི་ཆ་དྲུག་བརྒྱ་ཉེར་གཅིག །བཀྲ་ཤིས་ཀྱི་ཉིན་ཞག་ཀླུ་མེ་ཟླ་བ། ༡༣༨ཕུར་བུའི་གཟུགས་མཁའ་རི་ཟླ། ༡༧༠༡སྤེན་པའི་མེ་མིག་བུག་འབྱུང་། ༥༩༢༣ལྷག་པའི་ཞག་གི་བརྒྱ་ཆ་ཆུ་རི་མདའ་ཐུབ། ༧༥༧༤དཀར་པོའི་ཞག་གི་བཅུ་ཆ་མིག་རི་སྐྱོན་༡༨༧༢རྣམས་སོ། །དེ་རྣམས་ཤིང་བྱའི་ལོ་མཐར་ལྷན་ཅིག་ཏུ་འཚོགས་པའི་ལོ་དག་པའི་ཚོགས་ནི་འདི་ཡིན་ཏེ། ༨༢༧༧༦༡༣༢༧༦༦༩༤༥༡༧༨༧༡༩བུག་གཟུགས་རི་ཀླུ་རི་བོ་ཟླ། །འབྱུང་མཚོ་བུག་རོ་དུས་རི་ལག །འདོད་དུས་རི་འཁོར་གདེངས་ཅན་ཏེ། །རྩིས་ལོའི་གནས་ནི་ཉི་ཤུར་ངེས། །ཞེས་སོ། །དེ་ཉིད་ལ་རང་རང་དྲུག་ཅུ་སྐོར་དང་མཐུན་པར་ངེས་པ་ལ་འཇུག་པའི་ལོ་ཚོགས་ཀྱིས་དོར་ལྷག་ནི་སོ་སོའི་ལོ་དག་པར་འགྱུར་ཏེ། ཇི་ལྟར་
རིགས་པ་ལག་ཏུ་བླངས་སོ། །དེ་ལྟ་བུའི་རྩིས་འགོའི་མེ་ཁྱི་དེ་ནས་བརྩམས་ཏེ་ད་ལྟའི་བར་གྱི་འདས་ལོ་བརྒྱད་བརྒྱ་དང་བརྒྱད་ཅུ་གྱ་ལྔ་ལ་རྩིས་འགོའི་ངེས་པ་བསྣན་ཏེ་བསྒྲུབ་པའམ། ཡང་ན་བརྒྱད་བརྒྱ་གྱ་ལྔ་པོ་སྔར་གྱི་རྩིས་འཕྲོ་གནས་པའི་ལོ་ལ་བསྲེས་ནས་ངེས་བྲལ་གྱི་དྷྲཱུ་ཝ་ཀ་བསྒྲུབས་ཀྱང་རུང་སྟེ། རབ་བྱུང་ཉི་མ་དེའི་རབ་མྱོས་ལྕགས་རྟའི་ལོ་མཐར་ཤར་བའི་ད་ལྟའི་ལྕགས་ལུག་གི་རྩིས་འཕྲོ་སྔར་བཀོད་པ་རྣམས་འཆར་བ་ཡིན་ནོ། །དེ་བཞིན་དུ་ལོ་འོག་མ་རྣམས་ལའང་ལོ་དག་བསྟུང་སྟེ་རྩིས་གཞི་སྤོ་ཚུལ་དང་། གཞན་ཡང་ཁྱིམ་ཞག་དང་ཚེས་ཞག་ལ་ལོངས་སྤྱོད་པའི་གཟའ་ལྔའི་རྩིས་འཕྲོ་རྣམས་ཀྱང་འདིའི་རིགས་པས་དཔག་སྟེ། འཚོལ་ལུགས་ཤེས་པར་བྱའོ། །གལ་ཏེ་འདས་ལོའི་ཐོག་མའི་རྩིས་འཕྲོ་ལ་བརྟགས་པའི་ཚེ་ཡར་ལོག་བྱ་བར་འདོད་ན། ད་ལྟའི་ལོ་ནས་གང་འདོད་གྱེན་དུ་བགྲངས་པའི་ལོ་ཚོགས་ལ་ངེས་བྲལ་གྱི་དྷྲཱུ་ཝ་ཀ་བསྒྲུབས་ཏེ། དེས་ད་ལྟའི་ནག་དྷྲཱུ་ལ་སྦྱངས་པའི་ལྷག་མས་འདས་ལོའི་ཐོག་མའི་རྩིས་འཕྲོ་རྣམས་སྟོན་པར་འགྱུར་རོ། །
ཕན་ཚུན་ལྟོས་པས་ཞག་དུ་མ་འདྲིལ་བའི་སྤྱི་ནུར་ལ་བརྟེན་ཏེ་ལོ་རེའི་རྀ་ཐུ་འཕོ་ཚུལ།
གཉིས་པ་སྤྱི་ནུར་ལ་བརྟེན་ཏེ་ལོ་རེའི་བསྐལ་ལི་འཕོ་ཚུལ་ནི། ཉི་མས་སྐར་ཁྱིམ་འཁོར་བའི་ཡུན་ལ་ཚེས་ཞག་སུམ་བརྒྱ་དོན་གཅིག་གིས་མ་ཆོག་པར། དོན་གཉིས་པའི་ཞག་སྟེང་ནས་ཀྱང་ཞག་གི་བཅུ་གསུམ་ཆ་རེ་བླངས་ནས་སྤྱད་པའི་སྟོབས་ཀྱིས་ལོ་རེ་བཞིན་ཉི་མའི་སྤྱི་ནུར་སྔ་མ་སྔ་མ་ལས་བཅུ་གསུམ་ཆ་རེ་བུ་ལོན་དུ་བླངས་ཏེ་ཞག་ལ་ནོར་དུ་སོང་བས་ལོ་བཅུ་གསུམ་གྱི་མཐར་ཞག་ཏུ་ལོངས་ནས་ཉི་མའི་སྤྱིར་ནུར་སྟོང་པ་ཡིན་ཏེ། ཉི་མའི་སྤྱི་ནུར་ངེས་ཞུགས་ཀྱི་ལོ་ཕྱི་མ་དེའི་སྤྱི་ནུར་ལ་བཅུ་གསུམ་ཆ་བཅུ་གཉིས་པ་དེ་འཆར་བས་ཚེས་ཞག་གཅིག་གི་སྟེང་ནས་བཅུ་གསུམ་ཆ་གཅིག་ཆད་པ་གསལ་པོར་སྟོན་པའི་ཕྱིར་རོ། །དེས་ན་ནག་ཟླའི་འགོར་གཟའ་ཉི་སྤྱི་ནུར་ལྷན་ཅིག་ཏུ་སྟོང་པ་ཞིག་ནས་བརྩི་ན། སྟོང་པའི་ལོ་དེ་ལ་གཟའ་ཉི་གཉིས་ཀ་ལ་སྤྱི་ནུར་མེད་ཅིང་། དེའི་ལོ་ཕྱི་མའི་སྤྱི་ནུར་ནི། ཚེས་ཞག་སུམ་བརྒྱ་དོན་གཉིས། གཟའ་དང་༡༥༠༣༢༢༥༠ཉི་མའི་རྟག་ལོངས་༡༠༥༣༠༠རང་རང་གི་ཆར་གསིལ་བས་བསྒྱུར་ལ་རང་འཁོར་དྲིལ་ལྷག་གིས་ཉི་མ་དང་། ༠གཟའི་སྤྱི་ནུར་༢གཉིས་སོ་
སོར་སྟོན་ལ། དེའི་སྟེང་དུ་ཚེས་ཞག་སུམ་བརྒྱ་དོན་གཅིག་རང་རང་གི་རྟག་ལོངས་ཀྱིས་བསྒྱུར་ཏེ་དྲིལ་ལྷག་གིས་གཟའ་༠དང་། ཉི་མ་༢༦གཉིས་སོ་སོར་བསྣོན་པའམ། ཡང་ན་དེ་གཉིས་ཀྱི་ལྷག་གྱུར་དོར་ལྷག་གི་གཟའ་༥དང་། ཉི་མ་༠གཉིས་ཀྱིས་ཕྲི་ནའང་རུང་སྟེ། ལོ་གསུམ་པ་དེའི་སྤྱི་ནུར་རོ། །དེ་བཞིན་དུ་ལོ་རེ་བཞིན། སྔ་མ་སྔ་མ་ལ་བསྣོན་ཕྲི་ཅི་རིགས་པར་བྱས་པས་ཕྱི་མ་ཕྱི་མའི་སྤྱི་ནུར་འཆར་རོ། །དེ་ལྟར་བྱས་ནས་ལོ་བཅུ་གསུམ་རེའི་མཐར་ཉི་མའི་སྤྱི་ནུར་ངེས་པ་ལ་འཇུག་ཅིང་། དེའི་དུས་ཀྱི་གཟའ་ཡི་སྤྱི་ནུར་ལ་སྔར་གྱི་ཚེས་ཞག་སུམ་བརྒྱ་དོན་གཉིས་ལས་བསྒྲུབ་པའི་ལོ་གཉིས་པོའི་སྤྱི་ནུར་དེ་ལན་རེ་སྦྱིན་རྗེས། ཡང་བཅུ་གཉིས་ཀྱི་བར་དུ་ཚེས་ཞག་སུམ་བརྒྱ་དོན་གཅིག་ལས་བསྒྲུབ་པ་དེ་ཁོ་ནས་སྔ་མ་སྔ་མར་བསྣོན་ཕྲི་ཅི་རིགས་པ་བྱས་པས་ཕྱི་མ་ཕྱི་མའི་གཟའི་སྤྱི་ནུར་དུ་འགྱུར་ཏེ། ཚུལ་དེ་ཁོ་ནས་སྔར་ནག་ཟླའི་འགོར་གཟའ་ཉིའི་སྤྱི་ནུར་སྟོང་པ་དེ་ནས་ལོ་གྲངས་མཁའ་རི་མེ་རྩེ་ཆུ་རོ་༦༤༣༣༧༠སོང་ཞིང་། དེ་ལ་བཅུ་གསུམ་གྱིས་བགོས་པས་ཉི་རགས་སྟོང་པར་འཇུག་ཐེངས་མཁའ་བུག་ཆུ་བུག་རྒྱ་མཚོ་༤༩༤༩༠དང་། དེ་ལས་ལྔས་བགོས་པས་ནག་ཟླའི་འགོར་ཉི་དྷྲཱུ་དང་མཉམ་དུ་ཉི་རགས་སྟོང་ཐེངས་སྦྲུལ་རྩ་ཀླུ་བུག་༩༨༩༨སོང་མཐར་གཟའ་ཉིའི་རགས་པ་ལྷན་ཅིག་ཏུ་སྟོང་པར་འཇུག་པ་ཡིན་ནོ། །དེ་ལྟར་ལོ་རེའི་གཟའ་ཉིའི་རགས་པ་བཙལ་ཏེ། དེ་ལ་བརྟེན་ནས་ཉི་རྐང་གི་སྤྱི་ནུར་ཁྱིམ་དྲུག་མ་བཟོ་བ་དང་། དེ་རྗེས་བསྐལ་ལི་བཟུང་ནས་སྤྱི་ནུར་སྟེར་གྱིས་རྀ་ཐུ་བསྒྲུབ་པ་ལ་སོགས་པ་ནི་ལག་རྩིས་པ་སྤྱི་ལ་གྲགས་པ་ལྟར་ལག་ཏུ་བླངས་པས་ཆོག་སྟེ་འདིར་མ་སྤྲོས་སོ། །
རང་རང་གི་འཁོར་ལོ་རྫོགས་པས་སྟོང་པར་འཇུག་ཚུལ།
གསུམ་པ་རང་རང་གི་ལོངས་སྤྱོད་རྫོགས་པས་སྟོང་པར་འཇུག་ཚུལ་ནི། རྒྱུད་ལས། སྟོང་པ་སྟོང་པ་ནམ་མཁའ་ཀླུ་དང་ལག་པ་ཐུབ་པ་རི་བོང་ཅན་རྣམས་རྫོགས་ལྡན་དུས་ཀྱི་ཚད། ༡༧༢༨༠༠༠། གསུམ་ལྡན་ལ་ནི་ནམ་མཁའ་མཁའ་སྟོང་རོ་དང་དགུ་དང་ཉིན་བྱེད་ལོ་ཡི་གྲངས་སུ་རབ་ཏུ་གྲགས། ༡༢༩༦༠༠༠། སྟོང་པ་སྟོང་པ་མཁའ་དང་རིག་བྱེད་རོ་དང་ལག་འགྲོ་ཞེས་པ་གཉིས་ལྡན་ལོར་ནི་ཡང་དག་སྟེ། ༨༦༤༠༠༠། སྟོང་པ་ནམ་མཁའ་མཁའ་མིག་
ཡོན་ཏན་ཆུ་གཏེར་རྣམས་ཀྱི་ལོ་ཡི་གྲངས་ནི་རྩོད་པའི་དུས་ལ་འགྱུར། ༤༣༢༠༠༠། ལོ་ནི་འདི་དག་རྣམས་ཀྱིས་དུས་ཀྱི་མཐའ་རུ་གཟའ་ཚོགས་རྒྱུ་བ་ཁྱིམ་ནི་སྟོང་པ་དག་ལ་གནས། །ཞེས་དང་། འགྲེལ་ཆེན་ལས། དུས་བཞི་པོ་རྣམས་ཀྱི་ལོའི་གྲངས་ཏེ། མི་རྣམས་ཀྱི་ལོ་ཁྲི་ཕྲག་གཉིས་ལྷག་པའི་འབུམ་ཕྲག་བཞི་བཅུ་རྩ་གསུམ་སྟེ། ཞེས་པས། དུས་བཞི་བསྡོམས་པའི་གྲངས་ས་ཡ་ཕྲག་བཞི་དང་སུམ་འབུམ་ཉི་ཁྲིའི་མཐར་སྟོང་པར་འཇུག་ཚུལ་གསུངས་པ་ནི། བྱེད་པ་ཉིད་ཀྱི་དབང་དུ་བྱས་ནས་གསུངས་པར་ཟད་ལ། འདིར་རྣམ་པར་དག་པ་གྲུབ་མཐའི་རྩིས་ལས་བརྩམས་ཏེ་གཟའ་ཐམས་ཅད་ཉ་ཁྱིམ་གྱི་མཐར་དུས་གཅིག་ཏུ་ངེས་པ་ལ་འཇུག་པའི་སྟོང་འཇུག་གི་དཀྱིལ་འཁོར་ནི་འདི་ཡིན་ཏེ། མཁའ་མཁའ་དུས་མཁའ་བུག་མཁའ་ལག །མཁའ་དབང་ཀླུ་མཚོ་མཁའ་ཚེས་གཟུགས། །དབང་མེ་མིག་རོ་བུག་སྐར་མ། ༢༧༩༦༢༣༥༡༡༥༠༤༨༥༠༢༠༩༠༦༠༠། ལོ་གནས་ཉི་ཤུ་རྩ་གཉིས་ཏེ། །གཟའ་ཀུན་དུས་གཅིག་ཟད་བྱེད་མཐར། །ངེས་འཇུག་སྟོང་ཆེན་དཀྱིལ་འཁོར་ཡིན། །ཞེས་སོ། །དེའང་རྒྱུད་འགྲེལ་ལས། སྟོང་འཇུག་གི་དཀྱིལ་འཁོར་ལ་དུས་བཞི་སོ་སོའི་ཚད་གསུངས་པའི་རིགས་པ་ཁྱེར་ཏེ། འདི་ལའང་དུས་བཞིའི་རུང་མཐུན་བརྩི་ན། མཁའ་མཁའ་མེ་དབང་ཆུ་མཁའ་གཟུགས། །དེ་ཉིད་རྒྱལ་བ་དབང་རི་མདའ། །འབྱུང་རི་དྲག་པོ་ཀླུ་བུག་འདོད། ༡༣༩༨༡༡༧༥༥༧༥༢༤༢༥༡༠༤༥༣༠༠། དུས་བཞི་ཆེན་པོའི་ཚད་ཡིན་ནོ། །དེ་ལ་འབྱུང་བས་བགོས་ཐོབ་པ། །གནས་བཞི་སྟེང་ནས་རྒྱ་མཚོ་དང་། །མེ་དང་མིག་དང་གཟུགས་ཀྱིས་བསྒྱུར། །རིམ་བཞིན་རྫོགས་ལྡན་༡༡༡༨༤༩༤༠༤༦༠༡༩༤༠༠༨༣༦༢༤༠གསུམ་ལྡན་དང་། ༨༣༨༨༧༠༥༣༤༥༡༤༥༥༠༦༢༧༡༨༠། གཉིས་ལྡན་༥༥༩༢༤༧༠༢༣༠༠༩༧༠༠༤༡༨༡༢༠རྩོད་དུས་ཚད་༢༧༩༦༢༣༥༡༡༥༠༤༨༥༠༢༠༩༠༦༠ཡིན་ཏེ། །བཞི་ཀ་བསྡོམས་པས་སྔར་སྨོས་པའི། །སྟོང་ཆེན་དཀྱིལ་འཁོར་འཆར་བར་འགྱུར། །ཞེས་སོ། །སྟོང་ཆེན་རེ་ལ་རབ་བྱུང་གྲངས། །ཕྱོགས་ཚེས་མཁའ་རི་གཟུགས་ཡིད་མཚོ། །ཀླུ་དབང་སྐྱོན་རྩ་མེ་མཁའ་རོ། །བཟང་པོ་ཆུ་གཏེར་རྫོགས་པར་འགྲོ། ༤༦༦༠༣༩༡༨༥༨༤༡༤༡༧༠༡༥༡༠མཆན། དེ་ལ་སྤྱི་སྟོང་རྩིས་ལ་འཇུག་པའི་སྒོ་ནི། ཞག་གསུམ་སྣ་མཉམ་ཚུལ་གྱི་ངེས་པ་ལ་ལྟོས་དགོས་
ཏེ། ཁྱིམ་ཚེས་གཉིས་སྣ་མ་མཉམ་ན་ཟླ་བཤོལ་གྱི་རྩི་འཕྲོ་དང་། ཉིན་ཚེས་གཉིས་སྣ་མ་མཉམ་ན་སྤྱི་ཞག་གི་རྩི་འཕྲོ་མི་སྟོང་ཞིང་། རྩིས་གཞི་དེ་གཉིས་མ་སྟོང་ན་བརྩི་བྱ་གཟའ་སོ་སོའི་ངེས་པ་སྟོང་པར་འཇུག་མི་སྲིད་པའི་ཕྱིར་དང་། ཉིན་ཚེས་གཉིས་ཀའང་ཁྱིམ་ཞག་དང་སྣ་མ་མཉམ་ན་ལོ་མཚམས་དང་མི་འགྲིགས་པའི་ཕྱིར། དེས་ན་གཟའ་རྣམས་ཀྱི་ནག་དྷྲཱུ་སྟོང་པ་ལ་ཞག་གསུམ་པོ་ལོ་མཚམས་སུ་སྣ་མཉམ་པ་ཞིག་ངེས་པར་དགོས་ཤིང་། དེའི་སྟེང་དུ་རང་རང་གིས་དྷྲཱུ་བའི་འཁོར་ཚད་དང་། དེ་ཡང་ཟད་བྱེད་ཀྱི་ལོ་མཐར་སོ་སོའི་དཀྱིལ་འཁོར་འཁོར་ཚད་དུས་གཅིག་ཏུ་འགྲིག་པ་ཞིག་དགོས་ཏེ། སྟོང་ཆེན་གྱི་དཀྱིལ་འཁོར་ནི་སོ་སོར་སྟོང་པ་ཙམ་ལ་བཞག་པ་མ་ཡིན་པའི་ཕྱིར་ཏེ། གཟའ་ཀུན་དུས་གཅིག་ལ་ཟད་པ་མེ་སྟག་དང་རབ་བྱུང་མེ་ཡོས་ཀྱི་ལོ་མཚམས་སུ་སྟོང་པར་ཞུགས་པ་ལ་འཇོག་དགོས་པའི་ཕྱིར་རོ། །དེ་ལ་ཞག་གསུམ་སྣ་མཉམ་ཚུལ་གྱི་གོ་བ་རགས་པ་ཙམ་ཞིག་འགོད་ན། ཁྱིམ་ཚེས་ནི། ཚེས་ཞག་རེ་བདུན་ན། ཁྱིམ་ཞག་རེ་ལྔ། དེ་བཞིན་དུ་ཚེས་ཟླ་རེ་བདུན་ན་ཁྱིམ་ཟླ་རེ་ལྔ། ཚེས་ལོ་རེ་བདུན་ན་ཁྱིམ་ལོ་རེ་ལྔར་བྱས་ཏེ་སྣ་མཉམ་ཞིང་། ཉིན་ཚེས་གཉིས་ནི་ཚེས་ཞག་ཉི་མ་འདོད་ཟླ་ལ་ཉིན་ཞག་འབྱུང་འདོད་དྲག་པོ་འབྱུང་ཞིང་། དེའི་འགྲོས་ཀྱིས་ཟླ་བ་དང་ལོ་ལའང་འགྲེ་མོད་ཀྱི། འོན་ཀྱང་དུས་དེར་ཁྱིམ་ཞག་དང་སྣ་མ་མཉམ་པས། དེ་དང་བསྒྲིག་པ་ལ་ཚེས་ཟླ་ཉི་མ་འདོད་ཟླའི་ཚོགས་གཟུགས་མཁའ་ལག་གི་བར་དུ་ཟློས་པ་ན། ཁྱིམ་ཟླར་འདྲིལ་འགྲོ་སྟེ། དེ་ལྟར་ཟློས་པའི་ཚེས་ཟླ་དེ་ཉིད་ཉི་མས་ཚེས་ལོར་དྲིལ་བའི་ཚོགས་ལ་ཚེས་ཞག་ལས་ཁྱིམ་ཞག་གློ་བུར་དུ་སྒྲུབ་པའི་རིགས་པས་གནས་གཉིས་འོག་མ་མིག་གིས་བསྒྱུར་ལ་རི་རོས་ཕྱེ་ནོར་གྱིས་སྟེང་ནས་སྦྱངས་པས་ཞག་གསུམ་སྣ་མཉམ་པའི་ལོ་ནམ་མཁའ་མིག་ཀླུ་མེ་སྐྱོན་འཆར་ཏེ་མཚོན་པ་ཙམ་མོ། །དེ་ལྟར་ངེས་པའི་སྒོ་ནས། གཟའ་སོ་སོའི་སྟོང་རྩིས་ཀྱི་རི་མོ་བྱ་ཚུལ་རྣམས་ཕྱོགས་རེ་ཙམ་མ་ཡིན་པར། ཞག་དང་ཟླ་བ་དང་ལོ་མཚམས་རྣམས་སུ་རང་རང་གི་ལོངས་སྤྱོད་རྣམ་པར་དག་ཚུལ་སོ་སོའི་འཁོར་ཚད་དང་སྦྱར་ཏེ་རེ་རེ་ནས་རྒྱས་པར་བཤད་ན་དགེ་མོད་ཀྱང་ཡི་གེས་འཇིགས་པས་འདིར་ཅུང་ཟད་
བསྡུས་ཏེ་བཤད་ན། དེ་ཡང་རྒྱུད་དུ་ཟད་བྱེད་ཀྱི་ལོ་མཐར་གཟའ་ཐམས་ཅད་ལྷན་ཅིག་ཏུ་ངེས་པ་ལ་འཇུག་ཚུལ་གསུངས་པའི་གནད་ཀྱིས། རབ་བྱུང་ནས་ཟད་བྱེད་ཀྱི་ལོ་མཐར་འཁོར་བའི་སོ་སོའི་སྟོང་འཇུག་གི་ལོ་ཚོགས་རྣམས་སྟོང་རྩིས་ཀྱི་དཀྱིལ་འཁོར་དུ་འགྱུར་བའི་ཕྱིར་དང་། གནས་སྐབས་སུ་རྩིས་འཕྲོ་འཚོལ་བའི་ལོ་དག་བརྟགས་པ་སོགས་ལའང་ཉེ་བར་མཁོ་བའི་ཕྱིར། དྲུག་ཅུ་སྐོར་དང་མཐུན་པའི་སོ་སོའི་འཁོར་ཚད་ཙམ་ཞིག་སྡོམ་ཚིག་ཏུ་བཀོད་པ་ནི་འདི་ལྟ་སྟེ། ཉི་མའི་ཚེས་དྷྲཱུ་ཟླ་བཤོལ་བཅས། །མཁའ་ཀླུ་རི་བོའི་ལོ་མཐར་འཁོར། ༧༨༠། རིལ་པོ་ཆ་ཤས་ངེས་པ་ནི། །མཁའ་ཟུང་མིག་ཀླུ་མེ་མཐར་འཁོར། ༣༨༢༢༠། གཟའ་ཚེས་ངེས་པ་ནམ་མཁའ་ལག །མིག་དང་མཁའ་རོ་ཀླུ་མེར་འཁོར། ༣༨༦༠༢༢༠། སྒྲ་གཅན་ཚེས་ཀྱི་ངེས་པ་ནི། །མཁའ་མཁའ་རི་བུག་ཀླུ་མཐར་འཁོར། ༨༩༧༠༠། དམར་པོའི་ཉིན་ཞག་ངེས་པ་ནི། །མཁའ་མཚོ་མེ་ཆུ་ཀླུ་ལག་དང་། །དུས་མིག་གཟུགས་ཀྱི་ལོ་མཐར་འཁོར། ༡༢༦༢༨༤༣༤༠། སྒྲ་མཁན་ཉིན་ཞག་མཁའ་ཉི་ཆུ། །ཚེས་ཀླུ་བུག་མེའི་ལོ་མཐར་འཁོར། ༣༩༨༡༥༤༡༢༠། སྤེན་པ་མཁའ་སྐྱོན་བུག་མཁའ་དབང་། །ཀླུ་དུས་བུག་མིག་ལོ་མཐར་འཁོར། ༢༩༦༨༥༠༩༡༨༠། པ་སངས་རྐང་འཛིན་མཁའ་མཚོ་དབང་། །མེ་ཆུ་མཁའ་འདོད་མཚོ་མཐར་འཁོར། ༤༡༣༠༤༣༥༤༠། ལྷག་པ་མཁའ་མིག་དུས་མེ་བུག །དྲག་དབང་ཀླུ་ཆུའི་ལོ་མཐར་འཁོར། ༤༨༥༡༡༩༣༦༢༠། ཞེས་སོ། །དེ་ལྟར་དྲུག་ཅུ་སྐོར་གྱི་མཚམས་སུ་སྟོང་པར་འཇུག་ཐེངས་རེ་རེའི་ཡུན་ལ་རང་རང་ལོ་མཚམས་སུ་སྟོང་པར་འཇུག་ཐེངས་ཇི་ཙམ་བྱེད་པའི་སྡོམ་ནི། ཉི་མ་སྒྲ་གཅན་ལན་བཅུ་གཉིས། །ཚོགས་དང་ཆ་ཤས་ལན་གཉིས་ཏེ། །རེས་གཟའ་དང་ནི་མིག་དམར་དང་། །ཞི་གཟའ་གཉིས་བཅས་ལན་དྲུག་རེ། །ཕུར་སྤེན་རྣམ་གཉིས་ལན་གསུམ་མོ། །ཞེས་སོ། །ཡང་སྔ་མ་སྔ་མ་དང་བསྒྲིགས་ཏེ་མཐའ་ངེས་པ་ཐམས་ཅད་ལྷན་ཅིག་ཏུ་སྟོང་པར་འཇུག་ཚུལ་གྱི་སྡོམ་ནི། མཁའ་ཀླུ་རི་བོ་ཞེ་དགུས་བསྒྱུར། །ཉི་མ་ཟླ་རྐང་བཅས་པ་འཁོར། །དེ་ཉིད་གཟུགས་ཕྱོགས་ཀྱིས་བསྒྱུར་བས། །ཟླ་རྐང་ཉི་བཅས་རེས་གཟའ་འཁོར། །དེ་ཉིད་འབྱུང་གཟུགས་ཟླ་བས་བསྒྱུར། །ལྔ་བསྡུས་སྒྲ་གཅན་
ལྷན་ཅིག་འཁོར། །དེ་ཉིད་བུག་མིག་ལག་པས་བསྒྱུར། །ལྔ་སྒྲ་མིག་དམར་བཅས་པ་འཁོར། །དེ་ཉིད་ལག་པ་མིག་རིས་བསྒྱུར། །ལྔ་སྒྲ་དམར་ཕུར་ལྷག་གིས་འཁོར། །དེ་ཉིད་བུ་ག་རི་བོས་བསྒྱུར། །ལྔ་སྒྲ་དྲག་གསུམ་ངེས་པས་འཁོར། །དེ་ཉིད་ཐུབ་པ་ཕྱོགས་ཀྱིས་བསྒྱུར། །ལྔ་སྒྲ་དྲག་གསུམ་དཀར་པོ་འཁོར། །དེ་ཉིད་མེ་རོ་རྒྱ་མཚོས་བསྒྱུར། །ལྔ་སྒྲ་གཟའ་ལྔར་བཅས་པ་རྣམས། །ལྷན་ཅིག་ཟད་པའི་ལོ་མཐར་འཁོར། །དེ་ནས་རིམ་པ་གཞན་མེད་ཀྱིས། །སླར་ཡང་རབ་བྱུང་ནས་རྩོམ་སྟེ། །ཟད་པའི་ལོ་མཐར་ངེས་པའི་ཚོགས། །ལྷན་ཅིག་སྔར་བཞིན་འཁོར་བར་འགྱུར། །ཞེས་སྨྲས་པ་ལྟར་ལག་ཏུ་བླངས་པས་རྟོགས་པར་འགྱུར་རོ། །
སླར་ཡང་ངེས་པ་སྐྱེ་བའི་ཚུལ།
བཞི་པ་སླར་ཡང་ངེས་པ་སྐྱེ་བའི་ཚུལ་ནི། དེ་ལྟར་གཟའ་རྣམས་ཀྱི་ངེས་པ་ཟད་པ་མེ་སྟག་གི་དབོ་ཟླའི་གནམ་སྟོང་ལ་ཉ་ཁྱིམ་གྱི་མཐར་རྣམ་པར་དག་པ་ལས། སླར་ཡང་རབ་བྱུང་གི་ལོའི་ནག་ཟླའི་ཚེས་གཅིག་ནས་རྩིས་ལ་འཇུག་པ་ན། རང་རང་གི་དྷྲཱུ་ཝ་ཀ་སྟོང་པའི་གནས་རྣམས་སུ་ནག་ཟླ་མ་རྫོགས་ཀྱི་བར་དེ་སྲིད་དུ། སོ་སོའི་ཞག་གཅིག་གི་རྟག་ལོངས་ཚེས་གྲངས་དང་མཐུན་པར་བརྩེགས་པ་རྣམས་ཞག་རེ་བཞིན་བསྣན་ལ། རྐང་རྩིས་ཚུལ་བཞིན་དུ་བྱས་པས་ནག་ཟླའི་ཚེས་གཅིག་གི་རྀ་ཐུ་ལ། གཟའ་གཅིག་དང་། ཆུ་ཚོད་བཅོ་ལྔ་སོགས་དང་། ཉི་སྐར་ཐིག་དང་། ཆུ་ཚོད་བཅོ་ལྔ་སོགས་དང་། རེས་འགྲོགས་ཟླ་སྐར་ལ་སྐར་གནས་ཐིག་དང་། ཆུ་ཚོད་ང་བཞི་སོགས་དང་། སྦྱོར་བའི་གནས་སུ་གཅིག་དང་། ཆུ་ཚོད་དགུ་སོགས་དང་། བྱེད་པར་གཅིག་ཡིག་རྣམས་འབྱུང་ཞིང་། ནག་ཟླ་རྫོགས་ནས་ཟླ་བའི་ངེས་པ་སྐྱེ་བའི་ཕྱིར་སླ་བར་ཟད་དོ། །དེ་ལྟར་ཡང་རྒྱུད་ལས། སླར་ཡང་ཐ་སྐར་ལ་སོགས་དག་དང་རབ་བྱུང་ཞེས་དང་དེ་བཞིན་ནག་པའི་ཟླ་བ་ལ་སོགས་དང་། གཟའ་དང་སྦྱོར་བ་ཚེས་དང་བྱེད་པ་རྣམས་ཀྱང་དེ་བཞིན་དང་པོ་དག་སྟེ། ཞེས་དང་། འགྲེལ་ཆེན་ལས། གཟའ་ཉི་མ་དང་། སྦྱོར་བ་སེལ་བ་དང་། ཚེས་དཀར་པོའི་ཕྱོགས་ཀྱི་ཚེས་གཅིག་དང་། བྱེད་པ་བ་བཾ་ཞེས་པ་དང་པོ་དག་སྟེ། ཞེས་གསུངས་པ་དང་འགྲིགས་པ་ཡིན་ནོ། །འོ་ན་རི་མོ་འདིའི་དབང་དུ་བྱས་ན། གཟའི་ཆུ་ཚོད་བཅོ་ལྔ་རྫོགས་ནས་ཚེས་གཅིག་ཟད་པ་དང་། ཟླ་བའི་
ཆུ་ཚོད་དྲུག་རྫོགས་ནས་བྲ་ཉེའི་སྟེང་དུ་སླེབ་པ་དང་། ཉི་མས་ཐ་སྐར་གྱི་སྟེང་དུ་སླེབས་ནས་ཞག་བཞི་མ་ལོངས་ཙམ་ཞིག་སོང་བར་སྣང་བས་རྒྱུད་འགྲེལ་དང་ཇི་བཞིན་པར་བསྒྲིགས་པར་མི་ནུས་ཏེ། རྒྱུད་འགྲེལ་གྱི་དགོངས་པ་ནི། ནག་པོའི་ཚེས་གཅིག་གི་ཐོག་མ་དེར་ཞག་གསུམ་སྣ་མཉམ་པས་དུས་དེའི་ཉིན་ཞག་དེ་དང་ཚེས་ཞག་གི་ཚེས་གཅིག་གཉིས་ལྷན་ཅིག་ཏུ་འགོ་རྩོམ་པ་དང་། གཟའ་རྣམས་ཀྱང་ཐ་སྐར་གྱི་སྟེང་ནས་དང་པོར་སྤྱོད་པ་ཞིག་ཏུ་གནས་པའི་ཕྱིར་ཞེ་ན། སྐྱོན་མེད་དེ། འདིར་ཚེས་གཅིག་གི་རྀ་ཐུའི་རི་མོར་གཟའ་སྐར་ལ་སོགས་པའི་གནས་སུ་དང་པོ་ཁོ་ན་འཆར་བས་དེ་ལ་དགོངས་ནས་འཇིག་རྟེན་གྱི་གྲགས་པ་ལྟར་མ་དཔྱོད་པའི་ངོར་རགས་རྩིས་ཙམ་དུ་གསུངས་པར་ཟད་པའི་ཕྱིར་དང་། སོ་སོའི་རྟག་ལོངས་རྣམས་ངེས་པ་ལ་ཞུགས་ཀྱང་། རྐང་པ་རྣམས་རང་གི་རྐང་པའི་འགོ་རྩོམ་པ་དེ་དང་། དེ་ནས་འཁོར་ཕྱེད་སོང་མཚམས་མ་གཏོགས་རྐང་རྒྱུན་གྱི་ནོར་བུ་ལོན་ཁ་དག་པ་ནམ་དུའང་མི་སྲིད་པའི་ཕྱིར། འདི་ལས་གཞན་གང་དུའང་བསྒྲིག་ཏུ་མེད་པས་ཞིབ་རྩིས་ཀྱི་ཐ་སྙད་ཀྱིས་རགས་རྩིས་སུ་གསུངས་པ་རྣམས་བཤིག་པར་བྱ་བ་མ་ཡིན་ནོ། །གཞན་དུ་ད་ལྟའི་ལག་རྩིས་པ་རྣམས་སྦྱོར་བའི་གནས་སུ་ཐིག་ཤར་ན་སེལ་བར་འདོད་པ་རྣམས་ལ་ནི་འགྲེལ་ཆེན་གྱི་ལུང་དང་འདིའི་ས་རིས་གོ་བསྟུན་ཏེ་བརྟགས་པས་གནོད་པར་མཐོང་སྟེ། རྣམ་དཔྱོད་དང་ལྡན་པ་རྣམས་ཀྱིས་དཔྱད་པར་མཛོད་ཅིག་གུ། །དཔལ་ལྡན་རྒྱུད་འགྲེལ་སྐབས་གསུམ་སྐྱེད་ཚལ་དུ། །རྣམ་དཔྱོད་བརྩོན་པའི་དྲོད་གཤེར་གྱིས་སྨིན་པའི། །ཟད་མེད་འདོད་པའི་འབྲས་སྟེར་སྐར་རྩིས་ཀྱི། །ལེགས་བཤད་ཡོངས་འདུའི་སྙེ་མ་འདི་ན་ཤར། །༡ཚུལ་འདི་མཁས་མཆོག་རྣམས་ཀྱིས་གསལ་མཛད་ཕྱིར། །དེ་བས་ལྷག་པ་བདག་ལྟས་ཅི་བྱར་ཡོད། །དེ་ལྟར་མོད་ཀྱི་རྣམ་དཔྱོད་བགྲོད་པ་ཡིས། །རབ་འབྱམས་ཤེས་བྱའི་ཕ་རོལ་མཐར་སོན་པ། །༢བདག་ཉིད་ཆེན་པོ་ཆགས་པ་ཆོས་འཕེལ་གྱི། །གསུང་གིས་བསྐུལ་ངོར་དྷརྨ་ཤྲཱིས་སྦྱར། །ནོངས་པ་གྱུར་གང་དམ་པ་རྣམས་དང་ནི། །ཁྱད་པར་བསྐུལ་བ་པོ་ལ་བཟོད་པར་གསོལ། །༣འདིར་འབད་རབ་དཀར་དགེ་བ་གང་
ཐོབ་དེས། །བདག་དང་འགྲོ་བའི་མི་ཤེས་རྨོངས་མུན་ཚོགས། །མེ་ཏོག་མདའ་ཅན་དཔུང་དང་ལྷན་ཅིག་ཏུ། །བཅོམ་ནས་རྫོགས་པའི་སངས་རྒྱས་ཉིད་གྱུར་ཅིག །༤སྐར་རྩིས་ཀྱི་སྤྱི་དོན་ལེགས་བཤད་ཡོངས་འདུའི་སྙེ་མ་ཞེས་བྱ་བ་འདི་ནི་དྲེགས་ལྡན་མཐའ་དག་གི་གཙུག་གི་ནོར་བུ་ལ་ཞབས་བརྟེན་གྱིས་པདྨོའི་གེ་སར་རྣམ་པར་འགོད་པས་འཆི་མེད་བདག་པོའི་ཁེངས་པ་འཕྲོག་པར་མཛད་ཅིང་། སྟོབས་བཅུ་མངའ་བའི་བསྟན་པ་རིན་པོ་ཆེ་ནོར་འཛིན་གྱི་གཞི་ལ་སྟོབས་ཀྱིས་འཛིན་པའི་མི་རྗེ་ཆོས་ཀྱི་རྒྱལ་པོ་ཤེས་བྱ་ཐམས་ཅད་ལ་ཆགས་ཐོགས་མེད་པའི་ཀུན་མཁྱེན་ཆེན་པོ་དཔལ་སངས་རྒྱས་རྒྱ་མཚོ་ཕྱོགས་ཐམས་ཅད་ལས་རྣམ་པར་རྒྱལ་བ་གང་གི་ཞབས་རྡུལ་ལ་རེག་པ་ལས་ཕྱི་ནང་གི་རིག་པའི་གནས་གྲངས་མེད་པ་ལ་མངའ་དབང་འབྱོར་བའི་བཤེས་གཉེན་དམ་པ་ཆགས་པ་ཆོས་འཕེལ་གྱི་གསུང་གིས་བསྐུལ་བའི་ངོར། རྡོ་རྗེ་འཆང་གཏེར་ཆེན་བླ་མ་རིགས་ཀྱི་ཅོད་པན་དུ་ཐོབ་པའི་སྨྱོས་ཀྱི་བན་ཆུང་དྷརྨ་ཤྲཱིས་སློབ་དཔོན་མཁས་པ་རྣམས་ཀྱི་དྲིན་ལས་ཅུང་ཟད་ངེས་པ་རྣམས་སུག་བྲིས་སུ་སྦྱར་བ་སྟེ། འོག་མིན་ཨོ་རྒྱན་སྨིན་གྲོལ་གླིང་གི་ཆོས་གྲྭ་ཆེན་པོར་མགོ་ཟླའི་དགུན་ཆོས་ཀྱི་ཐོག་ཏུ་གྲུབ་པར་བགྱིས་པ་ཤུ་ུབྷཾ། མངྒ་ལཾ།། །།ཨེ་མ། ལྔ་རིག་དབྱིག་འཛིན་བརྒལ་དཀའི་གཏམ། །རྣ་བར་ཐོས་པས་ཞུམ་པའི་སེམས། །མྱ་ངན་ཟུག་རྔུ་གོམས་པའི་མཐུས། །ཡན་ལག་ཆུ་ཕྲན་ལ་ཡང་སྡང་། །༡དེ་ཕྱིར་བག་མེད་དབང་གྱུར་ནས། །ཤེས་རབ་དང་བཅས་ཐར་པའི་སྲོག །བཏང་བར་བྱས་འདི་འབྱུང་པོའི་གདོན། །ཡིད་ཀྱི་ཁོང་བུར་ཞུགས་དོགས་ཤིང་། །༢དེས་ན་བསྟན་འགྲོའི་ཕན་བདེ་ལ། །ལྷག་པར་སྤྲོ་བ་དང་བཅས་པས། །ཐོས་བསམ་ལ་འབད་བརྩོན་འགྲུས་ཀྱི། །བསོད་ནམས་རིན་ཐང་བརྗོད་པས་ཕོངས། །༣དེ་བས་ནོར་འཛིན་ཡངས་པའི་ཁྱོན། །སྨྲ་མཁས་པད་ཚལ་རྒྱས་པའི་ཆེད། །སྐར་རྩིས་ལེགས་བཤད་ཉལ་འགྲོའི་རྒྱུན། །རྣམ་དཀར་ཡུར་བའི་ལམ་ནས་དྲངས། །༤དེ་ཡི་བསོད་ནམས་འདོད་རྒུའི་ནོར། །དུམ་དྲུག་ས་འདིར་མ་ཆུད་པར། །དྲག་པོའི་དཔུང་དུ་བརྫུས་པའི་ཟོལ། །བཅུ་གཉིས་གླིང་དུ་ཁྱབ་ལ་སྨོན། །༥དེ་མཐུས་ས་གསུམ་སྐྱེ་རྒུའི་ཚོགས། །རྫོགས་ལྡན་གསར་པ་ལ་གུས་པའི། །ངོ་མཚར་འབྱུང་གནས་ཐུབ་བསྟན་ཉིད། །ངེས་པས་ཆོས་ལ་ལྷག་པར་སྤྲོ། །༦དེ་སྐབས་ལུང་རྟོགས་གདུགས་དཀར་པོ། །མཁའ་དབྱིངས་ཀུན་ཁྱབ་ཕྲིན་ལས་ཅན། །དཔུང་པས་བཏེགས་པའི་བྱེད་པོ་རུ། །འགྲོ་བའི་བླ་མར་བདག་གྱུར་ཅིག །༧ཅེས་རྣམ་དཀར་བྱེད་པོས་སོ།། །།