གཉིས་པ་མཐའ་རགས་ཙམ་དཔྱད་པ།

གཉིས་པ་མཐའ་རགས་ཙམ་དཔྱད་པ་ལ།

མངོན་ཤེས་ཡིན་ན་བདག་རྐྱེན་བསམ་གཏན་གྱི་དངོས་གཞི་ལ་བརྟེན་པས་ཁྱབ་པར་ཐལ། གོང་དུ་མངོན་ཤེས་དང་ཐེག་ཆེན་མངོན་ཤེས་གཉིས་ཀྱི་མཚན་ཉིད་ཀྱི་ཟུར་ལ་རིམ་བཞིན་བསམ་གཏན་གྱི་དངོས་གཞི། བསམ་གཏན་བཞི་བ་ཞེས་གསུངས་པའི་ཕྱིར། འདོད་ན། དེ་མི་རིགས་ཏེ། དེའི་བདག་རྐྱེན་ལ་ཉེར་བསྡོགས་ཡོད་པའི་ཕྱིར། དེར་ཐལ། མདོ་ལས། དགེ་སློང་དག་ལམ་ནི་རྣམ་པ་བཞི་སྟེ།མངོན་པར་ཤེས་པ་བུལ་ལ་དཀའ་བའི་ལམ་དང༌། མངོན་པར་ཤེས་པ་མྱུར་ལ་དཀའ་བའི་ལམ་དང༌། མངོན་པར་ཤེས་པ་བུལ་ལ་སླ་བའི་ལམ་དང༌། མངོན་པར་ཤེས་པ་མྱུར་ལ་སླ་བའི་ལམ་མོ། །ཞེས་དང༌། མཛོད་ལས། བསམ་གཏན་དག་གིས་ལམ་རྣམས་སླ། །ས་གཞན་དག་གི་དཀའ་བ་ཡིན། །ཞེས་གསུངས་པའི་ཕྱིར་ཞེ་ན་འདོད་དགོས་པར་སྣང་ངོ༌། །ཡང་གཞི་གྲུབ་ན་མངོན་ཤེས་མེད་པའི་སྐྱེ་བོ་ལ་ལྐོག་ཏུ་གྱུར་པའི་ཡུལ་ཡིན་པས་ཁྱབ་པ་ཡོད་མེད་དང་མངོན་ཤེས་མེད་པའི་སྐྱེ་བོ་གང་རུང་ལ་ལྐོག་གྱུར་ཡིན་ན་མངོན་ཤེས་མེད་པའི་སྐྱེ་བོ་ལ་ལྐོག་གྱུར་ཡིན་པས་ཁྱབ་པ་ཡོད་མེད་དང༌། མངོན་ཤེས་མེད་པའི་སྐྱེ་བོ་གང་རུང་ལ་མངོན་གྱུར་ཡིན་ན་མངོན་ཤེས་མེད་པའི་སྐྱེ་བོ་ལ་མངོན་གྱུར་ཡིན་པས་ཁྱབ་པ་ཡོད་མེད་སོགས་དཔྱད་པར་བྱའོ། །ཡང་ཉ་ཊཱིཀ་ལས། བྱེ་བྲག་ཐེག་ཆེན་གྱི་དེའི་མཚན་ཉིད། རང་གི་བདག་རྐྱེན་བསམ་གཏན་བཞི་བ་ཤིན་ཏུ་དག་པ་ལ་བརྟེན་ནས་སྔར་བཤད་དེ་འདྲའི་ཡུལ་མངོན་སུམ་དུ་གྱུར་པའི་ཏིང་ངེ་འཛིན་དང་ཤེས་རབ་དང་དེ་གཉིས་དང་མཚུངས་པར་ལྡན་པའི་བློ། ཞེས་གསུངས་པ་ལ་འོ་ན་ཐེག་ཆེན་གྱི་མངོན་ཤེས་ཡིན་ན་དེ་འདྲའི་ཏིང་ངེ་འཛིན་དང་ཤེས་རབ་མཚུངས་པར་ལྡན་པའི་བློ་ཡིན་པས་ཁྱབ་པར་ཐལ་ལོ། །འདོད་ན།དེ་འདྲའི་ཏིང་ངེ་འཛིན་དང་ཤེས་རབ་གཉིས་ཆོས་ཅན། དེ་འདྲའི་ཏིང་ངེ་འཛིན་དང་ཤེས་རབ་གཉིས་དང་མཚུངས་ལྡན་ཡིན་པར་ཐལ། ཐེག་ཆེན་གྱི་མངོན་ཤེས་ཡིན་པའི་ཕྱིར། ཁྱབ་པ་ཁས་ཟེར་ན་ཞིབ་ཆ་ཅུང་ཟད་དགོས་སོ། །ཉ་ཊཱིཀ་ལས་ཟག་ཟད་ཀྱི་མངོན་ཤེས་ཀྱི་མཚན་ཉིད་བཤད་སྐབས་སུ། ཟག་པ་ཟད་པ་ཤེས་པ་ཞེས་ཀུན་བཏུས་སོ། །ཡང་ན་ཕྱི་མ་ལ་སྐྱེ་བ་ལས་ངེས་པར་འབྱུང་བའི་ཐབས་ཤེས་པ་ཞེས་རྒྱན་ཏེ། ཞེས་དང༌། བྱང་སེའི་ཟག་པ་ཟད་པའི་མངོན་པར་ཤེས་པ་ནི། ཆགས་སོགས་ཉོན་མོངས་པ་དང་གཟུང་རྟོག་སོགས་ཤེས་བྱའི་སྒྲིབ་པ་སྤོང་བར་བྱེད་པའི་མངོན་ཤེས་ཏེ། ཞེས་དང༌། མདོ་སྡེ་རྒྱན་ས་འགྲེལ་ལས། ཟག་པ་ཟད་པའི་མངོན་པར་ཤེས་པ་ནི་ཟག་པ་ཉོན་མོངས་པ་ཐམས་ཅད་ཟད་པ་ཐོབ་པ་དང་དེ་ཐོབ་པར་བྱེད་པའི་ཐབས་དང་ཐབས་མ་ཡིན་པ་རྣམས་ཀྱང་ཡང་དག་པ་ཇི་ལྟ་བ་བཞིན་དུ་ཤེས་པ་སྟེ། ཞེས་གསུངས་པ་ལ་ཟག་ཟད་ཀྱི་མངོན་ཤེས་ཡིན་ན་ཟག་པ་ཟད་པ་མངོན་སུམ་དུ་རྟོགས་པས་ཁྱབ་པ་ཡོད་མེད་དང་རང་རྒྱུད་ལྡན་གྱི་གང་ཟག་གི་ཉོན་མོངས་པ་ཟད་པ་དགོས་པ་ཡིན་མིན་དཔྱད། ཡང་ཟག་ཟད་ཀྱི་ས་མཚམས་ཉ་ཊཱིཀ་ལས། གཉིས་ཀའི་ཆ་ལས་རྣམ་གྲོལ་ལ་ཡོད་དེ། ཉོན་སྒྲིབ་ལ་ཟག་པར་འདིར་བཤད་ཀྱི་ཤེས་སྒྲིབ་ལ་མིན་ནོ། །ཞེས་དང༌། རྗེས་མཐུན་པ་ས་དང་པོ་ནས་ཡོད་དོ། །ཞེས་དང༌། དྲུག་པའི་ངོ་བོ་རྫོགས་པ་ཙམ་ས་བརྒྱད་པ་ནས་ཡོད་དེ། ཞེས་ས་དང་པོར་ཟག་ཟད་མངོན་ཤེས་རྗེས་མཐུན་པ་ཡོད་ལ་ས་བརྒྱད་པར་ངོ་བོ་རྫོགས་པར་གསུངས་པ་ལ། ས་དང་པོར་ཉོན་སྒྲིབ་སྤངས་པ་ཡོད་མེད་དང༌། དེ་ཡོད་ན་ཟག་ཟད་མངོན་ཤེས་དེ་ལ་མ་ཐོབ་པའི་རྒྱུ་མཚན་ཡོད་མེད་ཀྱི་སྒོ་ནས་དཔྱད་པར་བྱའོ། །གཉིས་ཀའི་ཆ་ལས་གྲོལ་བ་ཞེས་པ་ནི། ཀུན་བཏུས་ས་འགྲེལ་ལས། གཉིས་ཀའི་ཆ་ལས་རྣམ་པར་གྲོལ་བ་གང་ཞེ་ན། ཤེས་རབ་ཀྱིས་ཉོན་མོངས་པའི་སྒྲིབ་པ་སྤངས་པས་གང་ཟག་པ་ཟད་པ་དང༌། དངོས་གཞི་ཐོབ་ཅིང་སྙོམས་འཇུག་གི་སྒྲིབ་པའང་སྤངས་པས་རྣམ་པར་ཐར་བ་བརྒྱད་ལ་བསམ་གཏན་དུ་བྱེད་ནུས་ཤིང་ཡོན་ཏན་གྱི་རྒྱན་དང་ལྡན་པའི་གང་ཟག་གོ །དེ་དག་ཀྱང༌། འགོག་ཐོབ་གཉིས་ཀ་ལས་རྣམ་གྲོལ། །ཤེས་རབ་ཀྱིས་ནི་གཅིག་ཤོས་སོ། །ཞེས་པ་ལྟར་ཏེ། སྙོམས་འཇུག་གི་སྒྲིབ་པ་ནི་༼དབུས་མཐའི་ཊཱི་ཀར། ༽ཉོན་མོངས་ཅན་མ་ཡིན་པའི་མི་ཤེས་པར་བཤད་པས་ཤེས་བྱའི་སྒྲིབ་པའི་ཁྱད་པར་ཡིན་ལ། ཐེག་དམན་ལའང་དེ་དག་༼ཐམས་ཅད་སྤངས་བ་མེད་ཀྱང༌།༽ཅི་རིགས་པ་སྤངས་པ་ཡོད་དོ། །ཞེས་སོ། །ཡང་ཉ་ཊཱིཀ་ལས། ཐེག་ཆེན་ཚོགས་ལམ་ཆེན་པོ་ཡན་ཆད་ན་དང་པོ་ལྔ་ཅི་རིགས་པར་ཡོད། ཅེས་ཐེག་ཆེན་གྱི་དབང་དུ་བྱས་ན་མངོན་ཤེས་དང་པོ་ལྔའི་ས་མཚམས་ཚོགས་ལམ་ཆེན་པོ་ནས་བཞག་པའི་རྒྱུ་མཚན་གང་ཡིན་དཔྱད་པར་བྱའོ། །བཞི་བ་སྤང་བྱ་ཐམས་ཅད་སྤོང་བའི་རྒྱུ་ལམ་ལ་གདམས་པ་ལ་སྤང་བྱ་ཀུན་བཏགས་ཀྱི་གཉེན་པོ་མཐོང་ལམ་ལ་གདམས་པ་དང༌། སྤང་བྱ་ལྷན་སྐྱེས་ཀྱི་གཉེན་པོ་སྒོམ་ལམ་ལ་གདམས་པ་གཉིས་ཡོད་ལ། དེ་གཉིས་སྐབས་གཉིས་པ་སོགས་ཀྱི་སྐབས་སུ་རྒྱས་པར་འབྱུང་བས་སྐབས་དེར་བཤད་པར་བྱའོ། །སྐབས་འདིར་མདོ་ལུགས་མ་ལས། ཉི་ཁྲི་སྣང་བ་ལ་སོགས་ཀྱིས་སྐབས་འདིའི་མདོ་རྣམས་སྐད་ཅིག་མ་བཅུ་དྲུག་ཏུ་ཕྱེ་ནས་བཤད་དེ་ཤེས་བྱེད་ཁུངས་མ་ནི་མ་མཐོང་ངོ༌། །ཞེས་གསུངས་ཀྱང༌། ཉི་ཁྲི་ལྔ་སྟོང་པའི་བཤད་པ་ལས། སྡུག་བསྔལ་ལ་ཆོས་ཤེས་པའི་བཟོད་པ་ནི། དེ་ནས་ཚེ་དང་ལྡན་པ་རབ་འབྱོར་གྱིས། ཕྲེང་བདུན་ན། མི་དམིགས་སོ། །ཞེས་དང༌། སྡུག་བསྔལ་ལ་ཆོས་ཤེས་པ་ནི། རབ་འབྱོར་འདི་ལྟ་སྟེ་དཔེར་ན། ཤོག་གུ་གསུམ་དང་ཕྲེང་ཅིག་ན། ཆོས་སུ་བརྟགས་པ་ལ་བསླབ་པར་བྱའོ། །སྡུག་བསྔལ་ལ་རྗེས་སུ་ཤེས་པའི་བཟོད་པ་ནི། རབ་འབྱོར་ཕྲེང་བཅུ་བཞི་བ་རྗེས་སུ་མི་མཐོང་ངོ༌། །ཞེས་སོགས་སྐད་ཅིག་བཅུ་དྲུག་ལ་མདོ་སོ་སོར་སྦྱར་བས་དཔྱད་པར་བྱའོ། །

སྨྲས་པ། ཆོས་ཚུལ་ཟབ་མོའི་དོན་སྟོན་གདམས་ངག་བཅུ། །མ་འདྲེས་གསལ་བར་ཟ་འོག་རི་མོ་བཞིན། །ཚུལ་བཞིན་བསྟན་པའི་ལེགས་བཤད་ལྷ་ཡི་ཆར། །སྐལ་ལྡན་ཆོས་ཀྱི་ཞིང་སར་འདོད་པར་འཇོ། །ཞེས་བར་སྐབས་ཀྱི་ཚིགས་སུ་བཅད་པའོ།། །།