དྲུག་པ་རྒྱུ་མཚན་ཕལ་དང་མིང་ནི་ཀུན་བརྟགས་ཡིན། །ཞེས་པའི་སྐབས་ནས་བསྟན་པའི་མིང་གི་དོན་ཇི་ལྟར་ཡིན་ཞེས་པའི་ལན།
དྲུག་པ་རྒྱུ་མཚན་ཕལ་དང་མིང་ནི་ཀུན་བརྟགས་ཡིན། །ཞེས་པའི་སྐབས་ནས་བསྟན་པའི་མིང་གི་དོན་ཇི་ལྟར་ཡིན་ཞེས་པའི་ལན།
ཞེས་པའི་སྐབས་ནས་བསྟན་པའི་མིང་གི་དོན་ཇི་ལྟར་ཡིན་ཞེས་པའོ། །དེའི་ལན་ནི། སྔར་གོང་དུ་བཤད་པ་ལྟར་ཆོས་ལྔའི་ཡ་གྱལ་གྱི་མིང་གི་ངོ་བོ་ནི་རྒྱུ་མཚན་ལ་བརྟགས་པའི་བླ་དང་ཚིག་སྤྱི་སྣང་བ་ནི་མིང་དུ་བརྗོད་དེ། དཔེར་ན་བུམ་པ་འཛིན་པའི་རྣམ་རྟོག་གི་འཛིན་སྟངས་ཀྱི་བཟུང་བྱ་དེ་ལ་བུམ་པ་ཞེས་པའི་མིང་འདོགས་ཤིང༌། དེ་ཡང་རྣ་བར་ཚོར་བ་དེ་མ་ཡིན་པར་དེའི་སྒྲ་སྤྱི་བློ་ལ་སྣང་བ་ལྡན་མིན་འདུ་བྱེད་ཞིག་ཡིན་ཏེ། ལང་ཀར་གཤེགས་པ་རིན་པོ་ཆེའི་མདོ་༼མདོ་སྡེ་ཆ་པོད་ཤོག་གྲངས་༢༧༦༽ལས། གང་རྒྱུ་མཚན་དེ་ཉིད་ལ་བུམ་པ་ཞེས་བྱ་བ་ལ་སོགས་པའི་མིང་ཡོད་པས་འདི་ནི་དེ་བཞིན་གྱི་གཞན་དུ་མ་ཡིན་ནོ་ཞེས་བྱ་བ་དེ་ནི་མིང་ཞེས་བྱ་བ་སྟེ། མིང་མང་པོ་བཏགས་ནས་རྒྱུ་མཚན་རྣམས་གསལ་བར་བྱེད་པའོ། །ཞེས་དང༌། ས་བཟང་གི་ཀུན་བཏུས་འགྲེལ་བ་ལས། མིང་ནི་གཟུགས་ཞེས་བྱ་བ་དང༌། ལྷས་བྱིན་ཞེས་བྱ་བ་ལ་སོགས་པ་ཆོས་དང་གང་ཟག་གི་ཚིག་བླ་དྭགས་རྣམས་སོ། །ཞེས་གསུངས་སོ། །སྤྱིར་རང་ལུགས་ལ་མིང་ནི་བློ་ལ་རྣམ་པར་སྣང་བ་སྒྲ་སྤྱི་ལྡན་མིན་འདུ་བྱེད་དོན་གྱི་ངོ་བོ་སྟོན་པར་བྱེད་པ་ཞིག་ཡིན་ཏེ། ལྡན་མིན་འདུ་བྱེད་ཉེར་གསུམ་བཤད་པའི་སྐབས་སུ་ས་བཟང་གི་ཀུན་བཏུས་འགྲེལ་བ་ལས། མིང་གི་ཚོགས་གང་ཞེ་ན།ཤེས་བྱའི་ཆོས་རང་གི་མཚན་ཉིད་འཛིན་པ་ཕུང་བོ་ལ་སོགས་པ་རྣམས་ཀྱི་ངོ་བོ་ཉིད་བརྗོད་དུ་མེད་ཀྱང་མིག་དང་རྣ་བ་ཞེས་སོགས་ཆོས་ཀྱི་ངོ་བོ་ལྔ་དང་མི་ཞེས་སོགས་གང་ཟག་གི་ངོ་བོ་ཉིད་དུ་སྒྲོ་བཏགས་ནས་བརྗོད་པ་ཉིད་ཀྱི་ཚིགས་བླ་དྭགས་ཏེ། བརྡས་ཐ་སྙད་འདོགས་པའི་གནས་སྐབས་ལ། བརྗོད་བྱ་རྗོད་བྱེད་ལ་བློ་གཞོལ་བར་བྱེད་པས་ན་མིང་ཞེས་བྱ་ཞིང༌།ཞེས་པ་ནས། མིང་གིས་ནི་སྒྲ་དང་དོན་གྱི་ངོ་བོ་ཙམ་རིག་པར་བྱེད་ལ། ཞེས་དང༌། བསྟན་བཅོས་ཀྱི་ངོ་བོ་བཤད་པའི་སྐབས་སུ་དེ་ལས། ངོ་བོ་ནི་བྱེ་བྲག་ཏུ་སྨྲ་བའི་ལུགས་ཀྱིས་མིང་གི་ཕྲེང་བ་ལྡན་མིན་འདུ་བྱེད་ཀྱིས་བསྡུས་པར་འདོད་ཅིང༌། མདོ་སྡེ་བ་སྒྲ་རང་གི་མཚན་ཉིད་གཞུང་ལུགས་ཀྱི་ཚད་དང་མཉམ་པ་གཟུགས་ཀྱི་ཕུང་བོས་བསྡུས་པར་འདོད་དེ། ཆོས་ཀྱི་ཕུང་པོ་བརྒྱད་ཁྲི་ནི། །གང་དག་ཐུབ་པས་གསུངས་དེ་རྣམས། །ཚིག་གམ་མིང་ཡིན་དེ་དག་ཀྱང༌། །གཟུགས་སམ་འདུ་བྱེད་དག་ཏུ་འདུས། །ཞེས་པ་ལྟར་རོ། །ཐེག་ཆེན་པའི་ལུགས་ཀྱིས༼ཐེག་བསྡུས་དང་བཤད་སྦྱར།༽རྐྱང་བ་དང་ཚིགས་སུ་བཅད་པའི་སྒྲར་སྣང་བ་འདོད་པའི་དོན་གྱི་རྗེས་སུ་འཇུག་པ་ཉན་པ་པོའི་རྣམ་པར་རིག་པའི་ཚོགས་ཞེས་པར་འདོད་ཅིང༌། དབུས་མཐའི་འགྲེལ་བཤད་དུའང༌། འཇིག་རྟེན་ལས་འདས་པའི་ཡེ་ཤེས་ཐོབ་པར་བྱེད་པའི་སྒྲའི་ཁྱད་པར་དུ་སྣང་བའི་རྣམ་པར་རིག་པའི་ཚོགས། ཞེས་དང༌།ཐེག་མཆོག་དབུ་མ་ལས། མིང་ནི་ཀུན་བརྟགས་ཡིན། ཞེས་དང༌། ཐེག་མཆོག་དབུ་མའི་ཟིན་བྲིས་ལས། མིང་ཚིག་ཡི་གེ་ལ་སོགས་པ་ཡང་སྒྲ་སྤྱི་ཙམ་བློ་ལ་ཤར་བ་ལ་དེར་བཏགས་པའི་ཕྱིར་རོ། །ཞེས་གསུངས་སོ། །ཐེག་མཆོག་དབུ་མའི་ཟིན་བྲིས་ལས། མིང་དོན་གཉིས་གོ་གཅིག་པ་ནི་མ་ཡིན་ཏེ། དེ་ལྟ་ན་མེ་ཞེས་བརྗོད་པ་ན་ཚ་ཞིང་བསྲེག་པའི་དངོས་པོ་དེ་དང་གཅིག་ཡིན་པས་ཁ་ཚིག་པར་ཐལ་བ་དང༌། ཞེས་མིང་སྒྲ་རང་མཚན་པ་མ་ཡིན་པར་སྒྲ་སྤྱི་ཡིན་ན་མིང་དེ་དོན་དེ་ཡིན་ན་མེ་ཞེས་བརྗོད་པའི་ཚེ་ཁ་ཚིག་པར་ཐལ་བ་བཏང་ཚུལ་ལ་དཔྱད་དགོས་ཏེ། མིང་སྒྲ་སྤྱི་ཡིན་ན་ཁ་ནང་དུ་ཡོད་དགོས་པའི་ངེས་པ་མེད་ལ། མིང་སྒྲ་རང་མཚན་པ་ཡིན་ན་དེ་ལྟར་སྐྱོན་གཏོང་ལུགས་ཡོད་ཀྱང་དེ་སྒྲ་རང་མཚན་པ་མ་ཡིན་པའི་ཕྱིར་རོ། །མིང་འདི་ལ་ད་དུང་དཔྱད་རྒྱུ་ཞིག་སྣང་མོད་དྲི་བ་བཅུ་གསུམ་པའི་ལན་གྱི་སྐབས་སུ་འཆད་པར་འགྱུར་རོ།། །།