ལྔ་པ་ཆོ་ག་གང་གིས་སྐྱབས་འགྲོ་བླང་བ།

ལྔ་པ་ཆོ་ག་གང་གིས་སྐྱབས་འགྲོ་བླང་བ་ནི།

སྦྱོར་དངོས་མཇུག་གསུམ་སྟེ། སྦྱོར་བ་ཕྱག་མཆོད་དང༌། དངོས་གཞི་རྗེས་ཟློས་ལན་གསུམ་དང༌། མཇུག་བསླབ་བྱ་བཤད་པ་དང་བཀའ་དྲིན་རྗེས་སུ་དྲན་པའི་ཕྱག་བྱ་བའོ། ། དྲུག་པ་སྐྱབས་འགྲོ་སྐྱེ་བའི་རྒྱུ་ནི། ལུས་ཀྱི་རྟེན་འགྲོ་བ་གང་ཡང་རུང་བ། བསམ་པའི་རྟེན་འཇིགས་པ་ལས་ཐར་བར་འདོད་ཅིང་སྐྱབས་གནས་ཤེས་པ། བརྡ་སྤྲོད་པའི་ཆོ་གའི་རིག་བྱེད་དང་གསུམ་ལས་སྐྱེའོ། ། བདུན་པ་སྐྱབས་འགྲོའི་བསླབ་བྱ་ནི། བརྒྱད་དེ། སངས་རྒྱས་ལ་སྐྱབས་སུ་སོང་ནས་ལྷ་གཞན་ལ་ཕྱག་མཆོད་སྤང༌། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་སྤང༌།དགེ་འདུན་ལ་སྐྱབས་སུ་སོང་ནས་མུ་སྟེགས་ཅན་དང་མཐུན་འཇུག་སྤང་བ་སྟེ། སོ་སོའི་བསླབ་བྱ་གསུམ་མོ། །ཐུན་མོང་གི་བསླབ་བྱ་ལྔ་སྟེ། ལུས་སྲོག་བྱ་དགའི་ཆེད་དུ་ཡང་དཀོན་མཆོག་གསུམ་མི་སྤང་བ་དང༌། ན་ཚ་ལ་སོགས་པའི་སྡུག་བསྔལ་ཅི་བྱུང་ཡང་དཀོན་མཆོག་གསུམ་ལ་བསྟེན་པ་མ་གཏོགས་པའི་ཐབས་གཞན་མི་བཙལ་བ་དང༌། དུས་དང་དུས་སུ་མཆོད་པ་རྒྱ་ཆེན་པོ་བྱ་ཞིང་ཅི་ཟ་ཅི་འཐུང་གི་ཕུད་ཀྱིས་མཆོད་པ་དང༌། དུས་རྟག་ཏུ་སྐྱབས་འགྲོ་ལ་བརྩོན་པར་བྱ་ཞིང༌། ཐ་ན་ཉིན་ལན་གསུམ་མཚན་ལན་གསུམ་སྐྱབས་འགྲོ་བྱ་བ་དང༌། ཕྱོགས་གང་དུ་འགྲོ་ཡང་ཕྱོགས་དེའི་སྐྱབས་གནས་ལ་ཁྱད་པར་དུ་ཡང་སྐྱབས་སུ་འགྲོ་བ་ལ་བསླབ་བོ་ཞེས་མཚོ་ཊཱིཀ་ལས་གསུངས་སོ། ། བརྒྱད་པ་སྐྱབས་འགྲོའི་ཕན་ཡོན་ནི་བརྒྱད་དེ། ནང་པ་སངས་རྒྱས་པར་ཚུད་པ་དང༌། སྡོམ་པ་ཐམས་ཅད་ཀྱི་རྟེན་དུ་རུང་བ་དང༌། ཚེ་རབས་སུ་བསགས་པའི་སྡིག་པ་རྣམས་ཟད་ཅིང་བསྲབས་པར་འགྱུར་བ་དང༌། ངན་སོང་དང་ལོག་པར་ལྟུང་བར་མི་སྐྱེ་བ་དང༌། མི་དང་མི་མ་ཡིན་པའི་གནོད་པས་མི་ཚུགས་པ་དང༌། བསམ་པའི་དོན་ཐམས་ཅད་ཆོས་བཞིན་དུ་འགྲུབ་པ་དང༌། བསོད་ནམས་རྒྱ་ཆེན་པོ་འཐོབ་པ་དང༌། མྱུར་དུ་སངས་རྒྱས་ཐོབ་པར་འགྱུར་བའོ། ། གཉིས་པ་རབ་བྱུང་གི་སྡོམ་པའི་ཆོ་ག་བཤད་པ་ལ། སྐབས་འདིའི་བར་ཆད་བཤད་པ་དང༌། རབ་བྱུང་གི་སྡོམ་པའི་ཆོ་ག་དངོས་བཤད་པ་དང་གཉིས། དང་པོ་སྐབས་འདིའི་བར་ཆད་ཀྱི་སྤྱི་དོན་དང་གལ་ཆེ་བ་བྱེ་བྲག་ཏུ་བཤད་པ་དང་གཉིས་ལས། དང་པོ་ནི། རྩ་བར། རབ་ཏུ་དབྱུང་བའི་ཕྱིར་ཉེ་བར་འོངས་པ་ལ་མུ་སྟེགས་ཅན་མ་ཡིན་ནམ་ཞེས་འདྲི་བར་བྱ་ཞིང་བསྙེན་པར་རྫོགས་པར་བྱེད་པ་དག་གིས་ཀྱང་ངོ། །ཞེས་སོགས་སོ། །སྐབས་འདིའི་བར་ཆད་ཀྱི་སྤྱི་དོན་ལ་དགུ་ལས། དང་པོ་བར་ཆད་ཀྱི་དབྱེ་བ་ནི་སྡོམ་པ་སྐྱེ་བ་ལ་བར་དུ་གཅོད་པ་དང༌། སྡོམ་པ་གནས་པ་ལ་བར་དུ་གཅོད་པ་དང༌། སྡོམ་པ་ཁྱད་པར་དུ་འགྲོ་བ་ལ་བར་དུ་གཅོད་པ་དང༌། སྡོམ་ལྡན་མཛེས་པ་ལ་བར་དུ་གཅོད་པ་དང་བཞིའོ། །དང་པོ་ལ། ལུས་ཀྱི་རྟེན་མ་ཡིན་པས་སྡོམ་པ་མི་སྐྱེ་བ་དང༌། ལས་སྒྲིབ་ཀྱི་དབང་གིས་དང༌། གནས་སྐབས་ཀྱི་དབང་གིས་དང༌། བསམ་པའི་དབང་གིས་སྡོམ་པ་མི་སྐྱེ་བ་དང་བཞིའོ། །དང་པོ་ནི། སྤྲུལ་དང་ཕོ་མོ་མ་ནིང་ལྔ་ལྔ་བཅུ། །མཚན་ལན་གསུམ་གྱུར་མཚན་དུག་མཚན་མེད་དང༌། །ཟ་མ་དུད་འགྲོ་མི་མིན་སྒྲ་མི་སྙན། །ལུས་ངག་སྡོམ་པ་འཐོབ་མིན་བཅོ་བརྒྱད་དོ། །གཉིས་པ་ནི། རྐུ་ཐབས་གནས་དང་མུ་སྟེགས་ཅན་ཞུགས་དང༌། །མཚམས་མེད་ལྔ་དང་རྣམ་དག་སུན་ཕྱུང་དང༌། །རྩ་ལྟུང་འཆབ་བཅས་བྱུང་དང་སྔོན་རབ་བྱུང༌། །ཚེ་འདིའི་ལས་སྒྲིབ་རྣམ་པ་བཅུ་ཉིད་དོ། །གསུམ་པ་ནི། རང་རང་སྐབས་ཀྱི་ལོ་གྲངས་མ་ལོན་དང༌། །ཁྱིམ་པའི་ཆ་ལུགས་དག་དང་ལྡན་པ་དང༌། །རབ་བྱུང་འདི་པའི་ཆ་ལུགས་ཡོངས་ཉམས་དང༌། །ཆད་པའི་རྒྱུ་བཟློག་ཁས་མི་ལེན་དང་བཞིའོ། །བཞི་པ་ནི། མུ་སྟེགས་ལྟ་དང་སྐྱེ་ཚེ་ལེན་སེམས་ལོག །འདོད་ཆགས་ཀྱིས་གཟིར་རང་དབང་མེད་གྱུར་དང༌། །ཁྲོས་པས་རང་དབང་མེད་པར་སེམས་འཁྲུགས་དང༌། །གཏི་མུག་དབང་གྱུར་འཐོབ་ཤེས་མེད་དང་ལྔའོ། །ལུང་ཞུ་བ་ལས། གང་ཟག་གསུམ་ནི་བསྙེན་པར་མ་རྫོགས་པ་ཡིན་ཏེ། བདག་ཉིད་ཀྱི་མིང་མི་བརྗོད་པ་དང་མཁན་པོའི་མིང་མི་བརྗོད་པ་དང་བདག་ཉིད་བསྙེན་པར་རྫོགས་པ་མི་ཤེས་པའོ། །ཞེས་སོ། ། གཉིས་པ་བསྡུ་བ་ལ་གཉིས་ལས་ངོ་བོའི་ཆ་ནས་བསྡུ་ན། གཙོ་བོའི་བར་ཆད་དང་གཙོ་བོ་མ་ཡིན་པའི་བར་ཆད་གཉིས་སུ་འདུས་ཏེ། སྡོམ་པ་སྐྱེ་བ་ལ་བར་དུ་གཅོད་པ་དང༌། སྡོམ་པ་སྐྱེ་ཡང་རབ་ཏུ་བྱུང་བར་མི་འོས་པ་རྣམས་སོ། །དུས་ཀྱི་ཆ་ནས་བསྡུ་ན་གཉིས་སུ་འདུས་ཏེ། ཊཱི་ཀ་ལས། བར་ཆད་རྣམ་པ་གཉིས་པོ་རེ་ཞིག་པ་དང་གཏན་དུ་བ། ཞེས་སོ། །རེ་ཞིག་པ་ནི་ཚེ་དེ་ལ་གྲོལ་བའི་སྐབས་ཡོད་པ་སྟེ། སྐྱེ་བའི་བར་ཆད་ལོ་ཉི་ཤུ་མ་ལོན་པ་དང༌། གནས་པའི་བར་ཆད་ཕ་མས་མ་གནང་བ་ལ་སོགས་པའོ། །གཏན་དུ་བ་ནི་ཚེ་དེ་ལ་གྲོལ་བའི་སྐབས་མེད་པའོ། ། མཛེས་པའི་བར་ཆད་ལག་རྡུམ་དང༌། སྐྱེ་བའི་བར་ཆད་མ་བསད་པ་ལ་སོགས་པའོ། །གསུམ་པ་སྐབས་འདིར་བསྟན་པའི་བར་ཆད་ཀྱི་མཚན་ཉིད་ནི་བསྒྲུབ་བྱ་ཡུལ་གྱི་ཆོས་གང་ཞིག་གིས་ཆོས་འདི་བའི་དགེ་སྦྱོང་གི་བྱེ་བྲག་བྱ་རུང་གི་གེགས་བྱེད་པའོ། །བཞི་པ་བྱེད་ལས་ནི་གཉིས་ལས། ཐུན་མོང་གི་བྱེད་ལས་ནི་འབོགས་པ་པོ་ལ་ཉེས་པ་བསྐྱེད་པ་སྟེ། དེ་ཡང་ལྷག་མ་དང་ལྟུང་བྱེད་དང་ཉེས་བྱས་ཅི་རིགས་སུ་སྐྱེད་པའོ། །སོ་སོའི་བྱེད་ལས་ནི་སྡོམ་པ་སྐྱེ་བ་ལ་བར་དུ་གཅོད་པ་ལ་སོགས་པ་བཞི་སྟེ་སྔར་བཤད་ཟིན་ཏོ། །