ཧོར་མོའི་བསྒྲུབ་མཆོད་བསྡུས་པ་བཀྲ་ཤིས་སྙེ་མ
ཡེ་ཤེས་སྒྱུ་འཕྲུལ་དྲྭ་བ་ལས༔ ཧོར་མོའི་བསྒྲུབ་མཆོད་བསྡུས་པ་བཀྲ་ཤིས་སྙེ་མ་བཞུགས་སོ༔
ཧཱུྃ་མ་བྷྱོ༔ རང་ཉིད་ཡི་དམ་ལྷར་གསལ་མདུན༔ ཁྲག་མཚོའི་རྦ་བརྒལ་མེ་རླུང་དབུས༔ མི་རྟ་ཁྱི་མགོའི་མཁར་གྱི་ནང་༔ ཐན་གྱི་རྔ་མོང་ཀ་བའི་སྟེང་༔ ཤ་ཟ་ཧོར་མོ་སྐུ་མདོག་དམར༔ གཅེར་བུ་རལ་པ་ས་ལ་དྲུད༔ གཡས་སུ་ལྕགས་སྤྱང་མགོ་དགུ་ལ༔ བཙན་མོ་ཆེན་མོ་མུ་ཁ་དམར༔ གཡོན་དུ་འབྲུག་ཆེན་སྒྲ་བརྒྱ་ལ༔ ཀླུ་མོ་ཆེན་མོ་ཤནྟི་སྔོ༔ དེ་མཐར་ཕྱོགས་བཞི་མཚམས་བརྒྱད་ལ༔ ཤ་ཟ་རང་འདྲ་མཆེད་སྡེ་བརྒྱད༔ ཕྱོགས་བཞི་ཕྱོགས་མདོག་མཚམས་བཞི་མཐིང་༔ ཁྲག་གི་རལ་བ་ས་ལ་དྲུད༔ མི་ལྤགས་གཡང་གཞི་སྟོད་དུ་ཀླུབས༔ ཕྱག་གཡས་ཕུར་བུ་གཡོན་སྲིན་བྱ༔ འཁོར་དུ་ཤ་ཟ་འབུམ་གྱིས་བསྐོར༔ སྙིང་པོའི་བྷྱོཿལས་འོད་འཕྲོས་པས༔ དམ་ཚིག་གནས་ནས་སྤྱན་དྲངས་གྱུར༔ ཀྱཻ༔ རང་སྣང་དོན་གྱི་ངོ་བོ་ལ༔ རྣམ་པ་ཁྲག་མཚོ་ཁོལ་མ་ནས༔ ཀུན་ཏུ་བཟང་མོའི་སྤྲུལ་བ་མཆོག༔ ཤ་ཟ་འཁོར་བཅས་གཤེགས་སུ་གསོལ༔ ཧཱུྃ༔ ཉི་ཟླ་བམ་གྱི་གདན་ལ་བཞུགས༔ བསྟན་པ་བསྲུང་ཕྱིར་ཕྱག་ཀྱང་འཚལ༔ ཕྱི་ནང་གསང་བའི་མཆོད་གཏོར་འབུལ༔ དྲག་རྩལ་བདག་མོ་ཁྱོད་ལ་བསྟོད༔ དྲེགས་པའི་ཐུགས་ཀར་བཾ་ཡིག་ལ༔ སྲོག་སྙིང་ངོ་བོ་སྔགས་ཀྱིས་བསྐོར༔ བདག་གི་ཐུགས་ལས་འོད་འཕྲོས་འདྲེས༔ ཁོ་མོའི་སྲོག་སྙིང་བདག་དབང་ཞིང་༔ ཕྲིན་ལས་རབ་འབྱམས་བསྒྲུབ་བསམ་སྟེ༔ ཨ་མ་བྷྱོ་ཛ་རཀྨོ་མཾ་ས་ཁཱ་ཧི་ས་པཱ་རི་ཝ་ར་བཛྲ་ས་མ་ཡ་ཛ་ཛ༔ ཞེས་དང་༔ མ་བྷྱོ་ཛ་རཀྨོ་མ་ཧཱ་ཀྲོ་ཏི་ཤ་ཟ་ཧོར་མོ་ཕེཾ་ཕེཾ་ཛ་ཛ༔ བཟླས་པས་མ་མོའི་སྟོང་སྲོག་ཐོབ༔ ས་མ་ཡཱ༔ ༈ གསོལ་བསྡུས་ནི༔ རྃ་ཡྃ་ཁྃ༔ ཨ་ཨཱཿཧཱུྃ༔ མཆོད་གཏོར་འདོད་ཡོན་རྒྱ་མཚོ་འདིའི༔ ཤ་ཟ་ཧོར་མོ་འཁོར་བཅས་ལ༔ མཆོད་པ་དམ་པ་ལེགས་འབུལ་ལོ༔ བདག་གི་འདོད་དོན་ལྷུན་གྲུབ་མཛོད༔ རྦད་གསད་དུས་གནད་གཞན་དུ་ཤེས༔ ས་མ་ཡཱ༔ འདི་ཡང་བསོད་ལྷས་བསྐུལ་པའི་ངོར་ག་གཱ་ཨ་བྷྱེས་སྨྲས་པ་དགེ །