འཇམ་པའི་དབྱངས་ལ་བསྟོད་པ་བློ་གྲོས་མཆོག་སྟེར།
༄༅། །འཇམ་པའི་དབྱངས་ལ་བསྟོད་པ་བློ་གྲོས་མཆོག་སྟེར་བཞུགས། ༀ། ཡེ་ཤེས་སྐུ་ཅན་བགྲེས་རྒུད་བྲལ་བའི་དཔལ། །སྲིད་ཞི་ཀུན་ཁྱབ་མཉམ་ཉིད་བདེ་བ་ཆེ། །མཁའ་ཁྱབ་སྒྱུ་འཕྲུལ་དྲྭ་བའི་རོལ་གར་མཁན། །མགོན་པོ་འཇམ་པའི་དབྱངས་ལ་ཕྱག་འཚལ་བསྟོད། །གསུང་གི་དབང་ཕྱུག་གཞོམ་མེད་ནཱ་དའི་སྒྲ། །བརྗོད་མེད་རྗོད་པ་ཀུན་གྱི་རྒྱུ་ཡི་མཆོག །སྒྲ་ཀུན་རྗེས་ཞུགས་བསམ་འདས་ཆོས་སྒོ་འབྱེད། །མགོན་པོ་འཇམ་པའི་དབྱངས་ལ་ཕྱག་འཚལ་བསྟོད། །ཡེ་ཤེས་སེམས་དཔའ་ཐུགས་མཆོག་འགྱུར་བ་མེད། །གཉུག་མའི་སེམས་ཏེ་འདུས་མ་བྱས་པའི་དབྱིངས། །འོད་གསལ་རང་བཞིན་མཁྱེན་བརྩེ་གཏིང་མཐའ་མེད། །མགོན་པོ་འཇམ་པའི་དབྱངས་ལ་ཕྱག་འཚལ་བསྟོད། །ཡོན་ཏན་དཔག་ཡས་སྒྲིབ་བྲལ་ཟག་མེད་དབྱིངས། །སྟོབས་སོགས་བྲལ་སྨིན་ཉི་དང་མཁའ་བཞིན་དུ། །ཡེ་ནས་འབྲལ་མེད་རྟག་བརྟན་རྡོ་རྗེའི་བདག །མགོན་པོ་འཇམ་པའི་དབྱངས་ལ་ཕྱག་འཚལ་བསྟོད། །འབད་རྩོལ་ཀུན་རྟོག་གཡོ་བའི་སྤྲོས་པ་ཡིས། །གོས་མིན་ལྷུན་གྱིས་གྲུབ་པའི་ཕྲིན་ལས་རྒྱུན། །སྲིད་པ་ཇི་སྲིད་ཕན་བདེའི་འདོད་པ་འཇོ། །མགོན་པོ་འཇམ་པའི་དབྱངས་ལ་ཕྱག་འཚལ་བསྟོད། །ལྷ་ཡི་ཡང་ལྷ་རྒྱལ་ཀུན་ཡེ་ཤེས་སེམས། །བདུད་ཀྱི་བདུད་ཆེན་འཇིགས་རུང་མཐར་བྱེད་གཤེད། །གང་ལ་གང་འདུལ་རྣམ་འཕྲུལ་ཚད་བཟུང་བྲལ། །མགོན་པོ་འཇམ་པའི་དབྱངས་ལ་ཕྱག་འཚལ་བསྟོད། །བདག་གིས་འཇམ་དཔལ་མགོན་ཁྱོད་རྗེས་དྲན་ནས། །སྒོམ་བཟླས་ལེགས་མཆོད་རྩེ་གཅིག་གསོལ་འདེབས་ན། །རྨོངས་དང་འཆི་བདུད་རྒྱུ་ལམ་ཀུན་བཅད་ནས། །མི་འགྱུར་རྟག་པ་དམ་པའི་མཆོག་སྩོལ་ཅིག །ༀ་ཨ་ར་པ་ཙ་ན་དྷཱིཿཧཱུྃ། རིག་སྟོང་རིག་པའི་དབྱིངས་སུ་ཆོས་ཐམས་ཅད། །མཉམ་པ་ཉིད་གྱུར་གཟུངས་སྤོབས་བྱེ་བའི་གཏེར། །ལེགས་འབྱེད་བློ་གྲོས་ཡེ་ཤེས་སྣང་བ་ཅན། །སྨྲ་བའི་ཉི་མ་མཆོག་ཏུ་བདག་གྱུར་ཅིག །རྒྱལ་ཀུན་ཐུགས་གསུང་སྐུ་ཡི་བདག །རྒྱལ་སྲས་རིགས་གསུམ་སེམས་དཔའ་ལ། །བསྟོད་ཅིང་གསོལ་བ་འདེབས་པའི་སྒོ། །རིགས་འདུས་པདྨའི་མྱུ་གུས་བྲིས། །དགེ་བས་བདག་གཞན་འགྲོ་བ་ཀུན། །སྒོ་གསུམ་འཁྲུལ་པའི་སྦུབས་རྒྱ་ལས། །ཡོངས་གྲོལ་གཉུག་མའི་རྡོ་རྗེ་གསུམ། །མངོན་གྱུར་གདོད་མའི་མགོན་གྲུབ་ཤོག །