གསུམ་པ་ཞར་བྱུང་དགེ་འདུན་ཉི་ཤུའི་རྣམ་བཞག་བཤད་པ།
གསུམ་པ་ཞར་བྱུང་དགེ་འདུན་ཉི་ཤུའི་རྣམ་བཞག་བཤད་པ་ལ།
ཐེག་དམན་དགེ་འདུན་ཉི་ཤུ་དང༌། འཕགས་པ་གྲོལ་སྡེའི་ལུགས་ཀྱི་མཚོན་བྱ་དོན་གྱི་དགེ་འདུན་ཉི་ཤུ་བཤད་པ་དང་གཉིས
དང་པོ་ནི།
མདོ་ལུགས་མ་ལས། གདམས་ངག་རྫོགས་ཤིང་ངེས་པར་འབྱེད་པའི་ཡན་ལག་ལམ་ཟིན་པའི་སྐབས་འདིར། ཐེག་དམན་གྱི་གང་ཟག་འདི་རྣམས་ཉི་ཤུའི་གྲངས་ངེས་དང་བཅས་པ་ཕྱོགས་གཅིག་ཏུ་བསྡུས་ནས་སྟོན་པའི་ཤེར་ཕྱིན་གྱི་མདོ་མེད་ཀྱང༌། མདོ་ཉིད་ལས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་ཐེག་པ་གསུམ་ག་རྒྱ་ཆེར་བསྟན་ཞེས་དང༌། མཐར་གྱིས་པའི་སྐབས་སུ་ཡང༌། སྐྱེས་བུ་ཟུང་བཞི་དང༌། གང་ཟག་བརྒྱད་ཅེས་དང༌། གླེང་གཞིའི་སྐབས་སུ་ཡང༌། བྱང་ཆུབ་སེམས་དཔའ་མ་གཏོགས་པའི་འཁོར་རྣམ་བཞི་བསྟན་པ་དང་གཞན་ཡང་ཐོག་མཐའ་བར་གསུམ་ནས། རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་དང༌། རང་བྱང་ཆུབ་དང༌། ཞེས་པ་ཡང་དང་ཡང་དུ་འབྱུང་ཞིང༌། ཉན་ཐོས་དང་རང་སངས་རྒྱས་ཞེས་ཀྱང་ཡང་དང་ཡང་དུ་གསུངས་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་འདིར་ཐེག་པ་གསུམ་ག་རྒྱ་ཆེར་བསྟན་པའི་ཕྱིར་དེ་ལ་སློབ་པའི་གང་ཟག་གསུམ་ཡང་བསྟན་དགོས་པ་ལ། ཐེག་ཆེན་ལ་སློབ་པའི་གང་ཟག་ནི་སྔར་རྒྱལ་སྲས་བཞི་བཅུ་རྩ་ལྔ་མདོ་ཉིད་ལས་གསུངས་པ་སློབ་དཔོན་དབྱིག་གཉེན་དང་འབུམ་ཊཱིཀ་མཁན་པོ་ལ་སོགས་པ་ཤིང་རྟའི་སྲོལ་འབྱེད་ཆེན་པོ་ཚད་མར་གྱུར་པ་དེ་དག་གིས་ལེགས་པར་བཀྲལ་ལ། སྐབས་འདིར་ནི་རྗེ་བཙུན་མི་ཕམ་མགོན་པོས། ཐེག་པ་འོག་མ་གཉིས་ལས། སློབ་པའི་གང་ཟག་ཀུན་ཤེས་ཉིད་ཀྱིས་ཉེར་ཞིར་ཁྲིད་པར་བྱ་རྒྱུ་ཉི་ཤུ་བསྟན་པ་ནི་ཐེག་དམན་གྱི་གང་ཟག་མདོའི་གོང་འོག་བར་གསུམ་དུ་འབྱུང་བ་རྣམས་ཕྱོགས་གཅིག་ཏུ་བསྡུས་ནས། ཞེས་དང༌། ཉ་ཊཱིཀ་ལས། ཆོས་རྗེ་ཀུན་མཁྱེན་ཆེན་པོ་ནི་སེམས་བསྐྱེད་ཉེར་གཉིས་དང་དགེ་འདུན་ཉི་ཤུ་རྒྱས་འབྲིང་བསྡུས་པའི་ཚིག་གིས་ཟིན་པའི་དོན་མིན་གྱི། དང་པོ་ནི་བློ་གྲོས་མི་ཟད་པའི་མདོ་དོན་ནོ། །གཉིས་པ་ནི།ཐེག་དམན་གྱི་དགེ་འདུན་ཞར་ལ་བསྟན་པ་ཡིན། འཕགས་སེང་སོགས་ཀྱིས་མདོ་འདི་དང་སྦྱོར་བ་ནི་ནོར་ཞེས་སོགས་གསུངས་སོ། །ཞེས་གསུངས་པ་ལྟར་བཤད་པར་བྱ་ལ།
དེ་ཡང་རྩ་བ་ལྟར་དགེ་འདུན་ཉི་ཤུའི་གྲངས་ཙམ་དང༌། དེ་དག་རྒྱས་པར་བཤད་པ་དང་གཉིས།
དང་པོ་ནི། མདོ་ལུགས་མ་ལས། དབང་པོ་རྟུལ་དང་རྣོན་པོ་དག།དད་དང་མཐོང་ཐོབ་རིགས་ནས་རིགས། །བར་ཆད་གཅིག་པར་སྐྱེས་ནས་དང༌། །བྱེད་དང་བྱེད་མིན་འོག་མིན་འགྲོ །འཕར་གསུམ་སྲིད་རྩེའི་མཐར་ཐུག་འགྲོ །གཟུགས་ཀྱི་ཆགས་བཅོམ་མཐོང་བ་ཡི། །ཆོས་ལ་ཞི་ལུས་མངོན་སུམ་བྱེད། །བསེ་རུ་དང་ནི་ཉི་ཤུའོ། །ཞེས་ཚིགས་སུ་བཅད་པ་གཉིས་པོ་འདིས་རྣམ་པའི་དབྱེ་བ་ཉི་ཤུ་པོ་འདིར་ཐེག་དམན་གྱི་གང་ཟག་འདུས་པར་གསུངས་སོ། ། ཉི་ཤུར་ཇི་ལྟར་དབྱེ་ཞེ་ན་དབ༷ང་པོ༷་རྟུ༷ལ་པོ་ད༷ང༌། དབང་པོ་རྣོ༷ན་པོ༷་གཉིས་ད༷ང༌། དེའི་སྟེང་དུ། ད༷ད་པས་མོས་པ་ད༷ང༌། མཐོ༷ང་བས་ཐོ༷བ་པ་གཉིས་སྟེ་བཞིའོ། །དེའི་སྟེང་དུ་ལྷའི་རི༷གས་ན༷ས་རི༷གས་སུ་སྐྱེ་བ་དང༌། མིའི་རིགས་ནས་རིགས་སུ་སྐྱེ་བ་གཉིས་ཏེ་དྲུག་གོ །དེའི་སྟེང་དུ་ཚེ་གཅིག་བ༷ར་ཆ༷ད་གཅི༷ག་པ་སྟེ་བདུན་ནོ། །དེའི་སྟེང་དུ་བ༷ར་མ་དོར་མྱ་ངན་ལས་འདའ་བ་དང༌། སྐྱེ༷་ན༷ས་འདའ་བ་ད༷ང༌། མངོན་པར་འདུ་བྱེ༷ད་པ་ད༷ང་བཅས་པས་འདའ་བ་དང༌། མངོན་པར་འདུ་བྱེ༷ད་པ་མ་ཡིན་པར་འདའ་བ་དང་བཞི་སྟེ་བཅུ་གཅིག་གོ །དེའི་སྟེང་དུ། འོ༷ག་མི༷ན་དུ་འགྲོ༷་བ་དང་བཅུ་གཉིས་སོ། །དེའི་སྟེང་དུ། འཕ༷ར་བ་གསུ༷མ་སྟེ་བཅོ་ལྔའོ། །དེའི་སྟེང་དུ། སྲི༷ད་རྩེ༷འི་མཐ༷ར་ཐུ༷ག་འགྲོ༷་བ་དང་བཅུ་དྲུག་གོ །དེའི་སྟེང་དུ་གཟུ༷གས་ཀྱི༷་ཆ༷གས་བཅོ༷མ་དང་བཅུ་བདུན་ནོ། །དེའི་སྟེང་དུ་མཐོ༷ང་བ༷འི༷་ཆོ༷ས་ལ༷་ཞི༷་བ་ཐོབ་པ་དང་བཅོ་བརྒྱད་དོ། །དེའི་སྟེང་དུ་ལུ༷ས་ཀྱི་མངོ༷ན་སུ༷མ་དུ་བྱེད་པ་དང་བཅུ་དགུའོ། །དེའི་སྟེང་དུ་བསེ༷་རུ༷་ལྟ་བུུ་སྟེ་རང་སངས་རྒྱས་ད༷ང་ཉི༷་ཤུ༷འོ༷། །ཞེས་དང༌། ཉ་ཊཱིཀ་ལས། དེས་ན་ཤཱནྟི་དང་བུདྡྷ་ཤྲཱིས། རྩ་བ་ཇི་བཞིན་པར་ཉི་ཤུར་བགྲང་ཞིང་དེ་རྗེ་བཙུན་གྱི་དགོངས་པའོ། །ཞེས་གསུངས་སོ། །