དྲི་བ་བདུན་པ་ནི། ཐེག་མཆོག་དབུ་མ་ལས། རྒྱུ་མཚན་ནང་ཚན་འཛིན་པ།
དྲི་བ་བདུན་པ་ནི། ཐེག་མཆོག་དབུ་མ་ལས། རྒྱུ་མཚན་ནང་ཚན་འཛིན་པའི་ཆ་རྣམས་ནི། །རྫས་ཡོད། ཅེས་པའི་སྐབས་ཀྱི་རྫས་ཡོད་ཅེས་པ་གང་ལ་ངོས་འཛིན་དང་དེའི་ཚད་དང་མཚན་གཞིར་ཞོག་ཅེས་པའི་ལན།
ཐེག་མཆོག་དབུ་མ་ལས། རྒྱུ་མཚན་ནང་ཚན་འཛིན་པའི་ཆ་རྣམས་ནི། །རྫས་ཡོད། ཅེས་པའི་སྐབས་ཀྱི་རྫས་ཡོད་ཅེས་པ་གང་ལ་ངོས་འཛིན་དང་དེའི་ཚད་དང་མཚན་གཞི་ཞོག་ཅེས་པའོ། །དེའི་ལན་བཤད་པ་ལ་རྫས་ཡོད་ཀྱི་ངོ་བོའི་སྒོ་ནས་ཚད་དང༌། དབྱེ་བ་བཤད་པའི་སྒོས་མཚན་གཞི་བཞག་པའོ། །དང་པོ་ནི། བསྡུ་བ་ལས། གང་ཅི་ཡང་རུང་སྟེ། དེ་ལས་གཞན་པ་དག་ལ་མི་ལྟོས་ཤིང༌། དེ་ལས་གཞན་པ་དག་ལ་མི་བརྟེན་པར་རང་གི་མཚན་ཉིད་འདོགས་པར་བྱེད་པ་དེ་ནི་མདོར་ན་རྫས་སུ་ཡོད་པ་ཡིན་པར་རིག་པར་བྱའོ། །གང་ཅི་ཡང་རུང་སྟེ། དེ་ལས་གཞན་པ་དག་ལ་ལྟོས་ཤིང༌། དེ་ལས་གཞན་པ་དག་ལ་བརྟེན་ནས་རང་གི་མཚན་ཉིད་འདོགས་པར་བྱེད་པ་དེ་ནི། མདོར་ན་བཏགས་པའི་ཡོད་པ་ཡིན་པར་རིག་པར་བྱ་ཡི་རྫས་སུ་ཡོད་པ་ནི་མ་ཡིན་ཏེ།ཞེས་གསུངས་པ་ལྟར། གཟུགས་ཤེས་གཉིས་རང་གྲུབ་བྱེད་ཀྱི་རྫས་གཞན་ལ་བཏགས་མི་དགོས་པར་རང་གྲུབ་བྱེད་ཀྱི་དགོས་རྫས་ཡོད་པས་རྫས་ཡོད་ཅེས་བྱའོ། །ལྡན་མིན་འདུ་བྱེད་རྣམས་རང་གྲུབ་བྱེད་ཀྱི་དགོས་རྫས་མེད་པར་གཟུགས་ཤེས་གང་རུང་གི་གནས་སྐབས་ལ་བཏགས་པ་ཡིན་པས་བཏགས་ཡོད་ཅེས་བྱའོ། །ཀུན་བཏུས་འགྲེལ་བ་ཤེས་བྱ་རབ་གསལ་སྣང་བ་ལས། མཚན་ཉིད་ནི། ཆོས་གང་ཞིག་རང་གི་ངོ་བོ་ཡིད་ཀྱི་དབང་པོའམ་བློའི་ཡུལ་དུ་གྱུར་བ་དེ་བརྗོད་པ་དང་སྒྲ་དང་མིང་ལ་སོགས་པའི་ཐ་སྙད་ལའང་མི་ལྟོས་ཤིང༌། དེ་ལས་གཞན་རྟགས་དང་དཔེ་དང་མཚན་ཉིད་ལ་སོགས་པ་རྣམ་པར་འཇོག་བྱེད་དོན་གཞན་ལ་མི་ལྟོས་པ་ནི་རྫས་སུ་ཡོད་པའོ། །དེའང་བུམ་པ་བློ་ཡུལ་དུ་བྱུང་བ་ལྟོ་ལྟིར་གྱི་གཟུགས་ལ་ལྟོས་པ་ལྟ་བུ་མ་ཡིན་པར་གཟུགས་སོགས་དོན་རང་མཚན་མངོན་སུམ་དུ་མཐོང་བ་ལྟ་བུ་སྟེ། ཞེས་དང༌། ཆོས་གང་ཡིད་ཀྱི་དབང་པོའམ་བློའི་ཡུལ་དུ་གྱུར་བ་དེ་བརྗོད་པ་སྒྲ་དང་མིང་ལ་སོགས་པ་ལ་ལྟོས་ཤིང༌། དེ་ལས་གཞན་གདགས་གཞི་ལ་སོགས་པ་རྣམ་པར་འཇོག་བྱེད་རྒྱུ་མཚན་ལ་ལྟོས་པ་དང་བཅས་པ་ནི་བཏགས་པའི་ཡོད་པའི་མཚན་ཉིད་ཅན་ཏེ། ཕུང་པོ་ལ་གང་ཟག་ཏུ་བཏགས་པའམ། ལྟོ་ལྟིར་བ་ལ་བུམ་པར་བཏགས་པ་ལྟ་བུའོ། །ཞེས་གསུངས་སོ། །རྫས་བཏགས་ཀྱི་ཁྱད་པར་རང་ཉིད་ཚད་མས་ངེས་པ་ལ་ཆོས་གཞན་ཚད་མས་ངེས་པ་ལ་ལྟོས་དགོས་མི་དགོས་ཙམ་གྱིས་འཇོག་པ་ཡོད་ཀྱང་དེའི་སྒོ་ནས་འཇོག་དཀའ་བར་སྣང་ངོ༌། །གཉིས་པ་དབྱེ་བ་བཤད་པའི་སྒོས་མཚན་གཞི་བཞག་པ་ནི། རྫས་ཡོད་ལ་དབྱེ་ན་གཉིས་ཡོད་དེ། གཟུགས་ཀྱི་རྫས་སམ་བེམ་པོའི་རྫས་དང༌། ཀུན་རྫོབ་ཤེས་པའི་རྫས་དང་གཉིས་ཡོད་དེ། ཐེག་མཆོག་དབུ་མའི་ཟིན་བྲིས་ལས། དེ་ལ་རྫས་ཀྱི་དངོས་པོ་ནི་འབྱུང་བའི་རྡུལ་ལ་སོགས་པ་རྣམས་བེམ་པོའི་རྫས་དང༌། ཡུལ་གྱི་རྣམ་པ་ཤེས་པ་ལ་འཆར་ཞིང་རྣམ་པར་རིག་པ་ལ་ནི་ཤེས་པའི་རྫས་ཞེས་འཇོག་གོ ། ཞེས་གསུངས་སོ། །བཏགས་ཡོད་ལ་དབྱེ་ན་གཉིས་ཡོད་དེ། བཏགས་ཡོད་ཀྱི་དངོས་པོ་དང༌། བཏགས་ཡོད་འབའ་ཞིག་པ་གཉིས་ཡོད་པའི་ཕྱིར་ཏེ། ཐེག་མཆོག་དབུ་མའི་ཟིན་བྲིས་ལས། ཆོས་ཁམས་ལ་ཡང༌། མཚན་གཞིའི་ཆོས་དང༌། མཚན་ཉིད་ཀྱི་ཆོས་དང༌། དངོས་པོ་མེད་པ་སྟེ་གསུམ་དུ་འགྱུར་རོ། །དང་པོ་ནི་རྫས་ཡོད་ཀྱི་ཆོས་རྣམས་སོ། །གཉིས་པ་ནི་བཏགས་ཡོད་ཀྱི་ཆོས་རྣམས་སོ། །གསུམ་པ་ནི་བཏགས་ཡོད་འབའ་ཞིག་གོ ། ཞེས་དང༌། སྤྱིར་སྐྱེ་འཇིག་ཅན་ལ་རྫས་ཡོད་དང་བཏགས་ཡོད་གཉིས་སུ་འདོད་པ་ཡིན་ཞིང༌། དེ་ལ་ཡང་དཔེར་ན་བུམ་པ་ལྟ་བུ་ཞིག་རྫས་ཀྱི་སྐྱེ་འཇིག་ཅན་ཡིན་ལ་བུམ་པའི་སྐྱེ་བ་དང་འཇིག་པ་སོགས་ནི་དེའི་གནས་སྐབས་ལ་སྒྲོ་བཏགས་པའི་བརྟགས་ཆ་ཡིན་པའི་ཕྱིར་རྫས་ཡོད་མ་ཡིན་ནོ། །གནས་པ་ལ་ནི་རྫས་ཡོད་དང་བཏགས་ཡོད་དང༌། དོན་དམ་ཞེས་བྱ་བ་རྣམ་པ་གསུམ་དུ་ཡོད་པ་ཡིན་ལ། ཞེས་གསུངས་སོ། །སྐབས་འདིར་དཔྱད་པར་བྱ་བ་འདི་ཡོད་དེ། མངོན་པ་ཀུན་བཏུས་ཀྱི་འགྲེལ་བ་ཤེས་བྱ་རབ་གསལ་སྣང་བ་ལས།རྫས་ཡོད་དང་བཏགས་ཡོད་ཀྱི་འཇོག་ཚུལ་ནི། དོན་བྱེད་ནུས་པ་དང༌། རིགས་པའི་གྲུབ་པ་དང་བརྟན་པ་དང་རང་སྐྱ་ཐུབ་པའི་རྫས་ཡོད་བཞི་ལས། འདིར་ཕྱི་མ་ཁོ་ནས་རྫས་ཡོད་དུ་འཇོག་སྟེ། གཞན་དུ་ན་ཐམས་ཅད་ཀྱང་དོན་བྱེད་ནུས་པ་དང་རིགས་པའི་གྲུབ་པའི་ཕྱིར་རྫས་ཡོད་དུ་ཐལ་ཞིང༌། འཇིག་ཚོགས་ལྟ་བའང་བརྟན་པའི་ཕྱིར་རྫས་ཡོད་དུ་ཐལ་བར་འགྱུར་རོ། །དེ་བཞིན་དུ་བཏགས་ཡོད་ཀྱང་བཞི་ལས། གནས་སྐབས་ལ་བཏགས་པ་ལྡན་མིན་འདུ་བྱེད་ལྟ་བུ་དང༌། མེད་བཞིན་དུ་སྒྲོ་བཏགས་པ་བདག་དང་རི་བོང་གི་རྭ་ལྟ་བུ་དང༌། དེ་ལས་གཞན་པ་ལ་བཏགས་པ་བུམ་པ་ལྟ་བུ་མ་ཡིན་གྱི། ཆ་ལ་བཏགས་པ་གདགས་གཞིའི་ཆོས་ཀྱི་དུམ་བུ་མ་དོར་བ་སྟེ། སློབ་དཔོན་བློ་བརྟན་གྱིས། གང་ཞིག་གང་གི་རྒྱུད་ལོགས་སུ་གྲུབ་པ་རྫས་ཡོད་དང༌། རང་གི་རྒྱུད་ལོགས་སུ་མ་གྲུབ་པ་བཏགས་ཡོད་དུ་བཤད་པ་ལྟར་རོ། །དེ་ལ་རྫས་ཡོད་ནི་ལྔ་ཚན་དང་བོ་གཉིས་དང༌། གཏི་མུག་མེད་པ་དང༌། བག་ཡོད་དང་བཏང་སྙོམས་དང་རྣམ་པར་མི་འཚེ་བ་མ་གཏོགས་པའི་དགེ་བ་བདུན་དང༌། ལྟ་བ་མ་གཏོགས་པ་ཉོན་མོངས་པ་ལྔ་དང་ཉི་ཤུ་རྩ་གཉིས་སྟེ། གཞན་ལ་མ་ལྟོས་པར་རང་རྐྱ་ཐུབ་པའི་ཕྱིར་རོ། །བཏགས་ཡོད་ནི། དགེ་བ་ལྷག་མ་བཞི་དང༌། ཉོན་མོངས་པའི་ལྟ་བ་དང༌། ཉེ་བའི་ཉོན་མོངས་པ་ཉི་ཤུ་དང༌། བཞི་གཞན་འགྱུར་དང་ཉི་ཤུ་རྩ་དགུ་སྟེ། རང་གི་ངོ་བོ་བློ་ཡུལ་དུ་འགྱུར་བ་གདགས་གཞིའི་ཆོས་ངེས་པ་ལ་ལྟོས་པའི་ཕྱིར་རོ། །བསྡུ་བར། ངོ་ཚ་མེད་པ་དང་ཁྲེལ་མེད་པ་དང་མ་དད་པ་དང་ལེ་ལོ་རྫས་ཡོད་དུ་གསུངས་པ་ནི་ནུས་པ་ཆེ་བ་ལ་དགོངས་པའོ། །ཞེས་སེམས་བྱུང་ཉི་ཤུ་རྩ་དགུ་བཏགས་ཡོད་གསུངས་པ་ནི། སྤྱིར་བཏགས་ཡོད་ཡིན་ན་ཀུན་རྫོབ་ཀྱི་ཤེས་པ་ལ་རྫས་ཡོད་ཀྱིས་མ་ཁྱབ་པར་གྱུར་བས་བསྡུ་བ་སོགས་དང་འགལ་བར་སྣང་ལ། སྤྱིར་བཏགས་ཡོད་མ་ཡིན་པར་སེམས་བྱུང་ལ་རྫས་བཏགས་འཇོག་ཚུལ་རྣམ་གྲངས་པ་ཞིག་ཡིན་ན་གོང་གི་ལུང་དེས་སྤྱི་ལ་སྦྱར་ནས་རྫས་བཏགས་གསུངས་པ་མ་ཡིན་ནམ་ཆོས་བཟང་རིགས་པས་རྣམ་པར་དཔྱད་པའི་བློ་གྲོས་ཀྱི་འདབ་མ་རབ་ཏུ་རྒྱས་པའི་སྐལ་བཟང་རྣམས་ཀྱི་བགོ་སྐལ་དུ་བཞག་པའོ།། །།