དྲིས་ལན་དགུ་པ་ལ་དྲི་ལན་གཉིས་ལས།
དྲིས་ལན་དགུ་པ་ལ་དྲི་ལན་གཉིས་ལས།
དང་པོ་ནི། རྣམ་པའི་དོན་བསྡུའི་སྐབས་སུ་བཤད་པའི་ཟག་བཅས་ཟག་མེད་ཀྱི་དོན་གང་ཡིན་ཞེས་པའོ། །གཉིས་པ་ལན་ནི། སེང་བཟང་ལུགས་ལ་རྣམ་པའི་དོན་བསྡུའི་སྐབས་སུ་ཟག་བཅས་ཟག་མེད་འཇོག་ཚུལ་གསུངས་པ་དེ་རང་ལུགས་ལ་ཁས་མི་ལེན་ནོ། །འགྲེལ་ཆུང་དུ་རྣམ་པའི་དོན་བསྡུ་བཤད་པ་ནི། ཉ་ཊཱིཀ་ལས། དོན་བསྡུ་ནི། རྣམ་པ་རྒྱས་པར་བསྟན་པ་དེ་རྣམས་ལ་སྟེ་དེའི་ནང་ནས་ཐམས་ཅད་ཤེས་པ་ཉིད་ཀྱི་རྣམ་པ་ཉེར་བདུན་ནི། ཉན་ཐོས་དགྲ་བཅོམ་གྱི་རྒྱུད་ལ་ཡོད་པའི་བྱེ་བྲག་གིས་གོ་རིམ་བཞིན་དུ་ཉོན་མོངས་པའི་ཟག་པ་མེད་པ་ཡིན་ཏེ།དེའི་སློབ་ལམ་གྱི་དུས་སུ་མདའ་དུག་ཅན་ལྟར་ཉོན་མོངས་ཆེད་དུ་གཉེར་ནས་སྤོང་བས་སོ། །ཐུབ་དགོངས་སུ། ཉན་ཐོས་ཀྱི་རྣམ་པ་ཟག་མེད་དུ་སེང་བཟང་གིས་བཤད་པ་ནོར་ཏེ། དེའི་ངེས་འབྱེད་ཆ་མཐུན་སོགས་ཡང་ཡོད་ཅེས་གསུང་ངོ༌། །བྱང་སེམས་ཀྱི་རྒྱུད་ལ་ཡོད་པ་བདག་གཉིས་མེད་པར་རྟོགས་པའི་ཆ་ཉེར་བདུན་ཕལ་ཆེར་ནི་ཉོན་མོངས་ཕྲ་མོའི་ཟག་པ་དང་བཅས་པ་ཡིན་ནོ། །ལམ་ཤེས་ཀྱི་རྣམ་པ་སོ་དྲུག་ནི་རྣམ་གྲངས་ཀྱིས་ཟག་བཅས་ཡིན་པས་ཟག་པ་དང་བཅས་པ་ཡིན་པ་ཁོ་ནའོ། །བྱང་པ་རྣམས་ཀྱིས་ཉོན་མོངས་པ་ཕྲ་མོ་སངས་རྒྱས་ཀྱི་ཆོས་སྒྲུབ་པ་ལ་ཕན་པར་མཐོང་ནས་ཤིན་ཏུ་མ་སྤངས་པ་སྟེ་སྤོང་བ་མིན་པའི་ཕྱིར་རོ། །ཟག་པ་ནི་ཉོན་མོངས་ཀྱི་མིང་གི་བྱེ་བྲག་སྟེ་འདི་དག་གིས་ཁམས་དེ་དང་དེ་དག་ཏུ་ཟག་ཅིང་ལྟུང་བར་བྱེད་པ་སྟེ་ཟག་པ་ནི་ལྟུང་བའི་མིང་གི་ཁྱད་པར་རོ། །དེ་བཞིན་དུ། ཀུན་སྦྱོར་དང་འཆིང་བ་དང་བག་ལ་ཉལ་དང་ཉེ་ཉོན་ཀུན་དཀྲིས་སོགས་ཀྱིས་བརྗོད་དོ། །ཞེས་ཆོས་བཤེས་སུ་སྟེ་རྒྱས་པར་ཀུན་བཏུས་ལས་སོ། །རྣམ་པ་འཆད་པ་ན་ཆོས་ཅན། རྣམ་པ་ཐམས་ཅད་མཁྱེན་པ་ཉིད་ཀྱི་རྣམ་པ་མཐར་ཐུག་པ་བརྒྱ་དང་བཅུ་ནི་ཟག་མེད་ཁོ་ན་དག་ཡིན་ཏེ། ཡང་དག་རྫོགས་སངས་རྒྱས་ཀྱི་ཉོན་མོངས་དང་ཤེས་བྱའི་སྒྲིབ་པ་བག་ཆགས་དང་བཅས་ཏེ་རྣམ་པ་ཐམས་ཅད་དུ་སྤངས་པས་ཆོས་ཐམས་ཅད་ལ་མངའ་བསྒྱུར་བའི་ཕྱིར་རོ། །ཞེས་གསུངས་པས་སོ། །སེང་བཟང་ལུགས་ལ་སྐབས་འདིའི་ཟག་པ་ཡིན་ན་ཉོན་མོངས་པ་ཡིན་པས་ཁྱབ་པ་ཡོད་མེད་དང༌། དགྲ་བཅོམ་རྟོགས་པ་སྔོན་སོང་དང་དག་ས་བའི་ལམ་ཤེས་ཀྱི་རྣམ་པ་སོ་དྲུག་སྐབས་འདིའི་ཟག་བཅས་ཟག་མེད་གང་ཡིན་དཔྱད་པར་བྱའོ། །