མཚན་ཉིད་གསུམ་གྱི་རྣམ་བཞག་སྤྱིར་བསྟན་པ།
མཚན་ཉིད་གསུམ་གྱི་རྣམ་བཞག་སྤྱིར་བསྟན་པ།
དེ་ནས། རྩ་བར། དེས་ན་མཚན་ཉིད་གསུམ་ལས་གཞན་དབང་ནི་འཁྲུལ་སྣང་ཅན་གྱི་ཤེས་པ་ཡིན་ལ། ཀུན་བརྟགས་དེ་ལ་སྣང་བའི་འཁྲུལ་བ་ཡིན་ཞིང༌། ཡོངས་གྲུབ་ནི་ཤེས་པ་དེ་གཟུང་འཛིན་གཉིས་ཀྱི་འཁྲུལ་བས་སྟོང་ཞིང་རང་རིག་གི་ངོ་བོས་མི་སྟོང་པ་འདི་ཡིན་པས། ཀུན་བརྟགས་བརྡའ་དང་ཐ་སྙད་ཀྱིས་བཞག་པ་ཙམ་མ་གཏོགས་གཏན་ནས་མེད་པ་དང༌། ཞེས་གསུངས་ཏེ། ཀུན་བརྟགས་ཞེས་པ་དེ་མིང་གི་བརྡ་དང་ཐ་སྙད་ཀྱི་སྒོ་ནས་བཞག་པ་ཙམ་མ་གཏོགས་ཞེས་གསུངས་པ་ལས། དེས་བཞག་པ་ཙམ་ཡང་མེད་ཅེས་གསུངས་པ་མ་རེད། འོ་ན་གང་ཞེ་ན། མིང་དང་ཐ་སྙད་ཀྱིས་བཞག་པ་ཙམ་ལས་རང་གི་མཚན་ཉིད་ཀྱིས་གྲུབ་པའི་ངོ་བོ་དེ་མེད་ཅེས་པའི་དོན་རེད། དེ་ཡང༌། མདོ་སྡེ་དགོངས་པ་ངེས་འགྲེལ་གྱི་སྐབས་སུ། མིང་དང་བརྡས་རྣམ་པར་བཞག་པ་ཙམ་ཡིན་གྱི་རང་གི་མཚན་ཉིད་ཀྱིས་རྣམ་པར་བཞག་པ་མ་ཡིན་པས། དེའི་ཕྱིར། དེ་ནི་མཚན་ཉིད་ངོ་བོ་ཉིད་མེད་པ་ཞེས་བྱའོ། །ཞེས་དེ་ལྟར་གསུངས་པ་ནང་བཞིནརེད། དེས་ན། གཏན་ནས་མེད་པ་དང༌། ཞེས་གསུངས་པ་རེད། དེ་ནས། རྩ་བར། གཞན་དབང་ཀུན་རྫོབ་ཏུ་ཡོད་དོན་དམ་དུ་མེད་པ་དང༌། ཞེས་གསུངས་ཏེ། གཞན་དབང་ལ་སོགས་པ་དེ་ནི་དོན་དམ་པར་མེད་པ་ཡིན་ཡང༌། ཀུན་རྫོབ་ལ་ཀུན་རྫོབ་ཀྱི་ཀུན་རྫོབ་དང༌། ཀུན་རྫོབ་ཀྱི་དོན་དམ་གཉིས་ཡོད་པའི་རྒྱུ་མཚན་གྱིས། ཡང་དག་ཀུན་རྫོབ་ཀྱི་ངོར་ཕལ་ཆེར་ཡོད་པར་དེ་ལྟར་སྦྱར་བ་རེད། དེས་ན། གཞན་དབང་དེ་ཀུན་རྫོབ་ཏུ་ཡོད་དོནདམ་དུ་མེད་ཅེས་གསུངས་པ་རེད། དེ་ནས། རྩ་བར། ཡོངས་གྲུབ་དོན་དམ་དུ་ཡོད་པ་སྟེ། ཀུན་བརྟགས་མཚན་ཉིད་ངོ་བོ་ཉིད་མེད་པ་དང༌། ཞེས་གསུངས་ཏེ། མཚན་ཉིད་ངོ་བོ་ཉིད་མེད་ཅེས་པའི་མཚན་ཉིད་དེ་ནི། མདོ་སྡེ་དགོངས་པ་ངེས་འགྲེལ་གྱི་སྐབས་སུ། རང་གི་མཚན་ཉིད་ཀྱི་རྣམ་པར་གནས་པ་མ་ཡིན་པས། དེའི་ཕྱིར། དེ་ནི་མཚན་ཉིད་ངོ་བོ་ཉིད་མེད་པ་ཉིད་ཅེས་བྱའོ། །ཞེས་གསུངས་པ་ནངབཞིན་ཡིན་པ་དེ་ལྟར་རེད། དེ་ནས། རྩ་བར། གཞན་དབང་སྐྱེ་བ་ངོ་བོ་ཉིད་མེད་པ་དང༌། ཞེས་གསུངས་ཏེ། གཞན་དབང་སྐྱེ་བ་ངོ་བོ་ཉིད་མེད་པའི་རྒྱུ་མཚན་ནི། མདོར་ན། མདོ་སྡེ་དགོངས་པ་ངེས་འགྲེལ་གྱི་སྐབས་སུ། རྐྱེན་གཞན་གྱི་སྟོབས་ཀྱིས་བྱུང་བ་ཡིན་གྱི། བདག་ཉིད་ཀྱིས་ནི་མ་ཡིན་པས། དེའི་ཕྱིར། དེ་ནི་སྐྱེ་བ་ངོ་བོ་ཉིད་མེད་པ་ཉིད་མེད་ཅེས་བྱའོ། །ཞེས་གསུངས་པ་ནང་བཞིན་ཡིན་པ་དེ་ལྟར་རེད། དེ་ནས། རྩ་བར། ཡོངས་གྲུབ་གཟུང་འཛིན་གྱི་ངོ་བོར་མེད་པས། དོན་དམ་ངོ་བོ་ཉིད་མེད་པའོ། །ཞེས་གསུངས་ཏེ། ཡོངས་གྲུབ་དེ་ནི། གཟུང་བ་ཡུལ་དང་འཛིན་པ་ཡུལ་ཅན་ལ་སོགས་པ། མདོར་ན་ཀུན་བརྟགས་དང་གཞན་དབང་གང་གི་ངོ་བོར་མེད་པ་སྟེ། སྤྲོས་པ་མཐའ་དག་དང་བྲལ་བའི་སྟོང་པ་ཉིད་ཡིན་པ་དང༌། སྤྲོས་པ་མཐའ་དག་མེད་པས་དོན་དམ་པའི་ངོ་བོ་ཉིད་མེད་པ་ཡིན་པ་དེ་འདྲ་རེད། ཁོ་རང་དོན་དམ་ཡིན་པ་དང༌། སྤྲོས་པ་མཐའ་དག་གི་ངོ་བོས་སྟོང་པའི་རྒྱུ་མཚན་གྱིས་དོན་དམ་ངོ་བོ་ཉིད་མེད་པ་ཞེས་དེ་ལྟར་གསུངས་བཞག་པ་རེད། ཡིན་ན་ཡང༌། གཞན་དབང་དེ་དོན་དམ་པར་ངོ་བོ་ཉིད་མེད་པ་ཡིན་ཞེས་སྐབས་རེར་འཇོག་ཚུལ་ཞིག་ཡོད་པ་རེད། དེ་ཡང༌། མདོ་སྡེ་དགོངས་པ་ངེས་འགྲེལ་གྱི་སྐབས་དེ་ན། དོན་དམ་པ་ངོ་བོ་ཉིད་མེད་པ་གང་ཡིན་ཞེ་ན། རྟེན་ཅིང་འབྲེལ་བར་འབྱུང་བའི་ཆོས་གང་དག་སྐྱེ་བ་ངོ་བོ་ཉིད་མེད་པ་ཉིད་ཀྱིས་ངོ་བོ་ཉིད་མེད་པ་དེ་དག་ནི། དོན་དམ་པའི་ངོ་བོ་ཉིད་མེད་པ་ཉིད་ཀྱིས་ངོ་བོ་ཉིད་མེད་པ་ཡང་ཡིན་ནོ། །ཞེས་གསུངས་པ་ལྟར། དེའི་དབང་དུ་བྱས་ན། གཞན་དབང་ཡང་དོན་དམ་པ་ངོ་བོ་ཉིད་མེད་པ་ཡིན་ཞེས་ཟེར། དེའི་རྒྱུ་མཚན། གཞན་དབང་ཁོ་རང་དོན་དམ་པ་མ་ཡིན་པ་སྟེ། དོན་དམ་པ་མ་ཡིན་པའི་རྒྱུ་མཚན་གྱིས་དོན་དམ་པ་ངོ་བོ་ཉིད་མེད་ཅེས་དེ་ལྟར་གསུངས་པ་རེད། གཞན་ཡང༌། ཡོངས་གྲུབ་དོན་དམ་པ་ངོ་བོ་ཉིད་མེད་ཅེས་གསུངས་པ་དེ། སྤྱིར་ཡོངས་གྲུབ་དོན་དམ་པའི་ངོར་གྲུབ་ཀྱང༌། སྤྲོས་པ་མཐའ་དག་གི་ངོ་བོ་ཉིད་མེད་པའི་རྒྱུ་མཚན་གྱིས་ཡོངས་གྲུབ་དེ། དོན་དམ་ངོ་བོ་ཉིད་མེད་ཅེས་འཇོག་ཚུལ་ཞིག་ཚུལ་གཉིས་རྣམ་འབྱེད་ཀྱི་སྐབས་འདིར། དོན་དམ་ངོ་བོ་ཉིད་མེད་པ་དེ། ཡོངས་གྲུབ་གཟུང་འཛིན་གྱི་ངོར་མེད་པས་དོན་དམ་ངོ་བོ་ཉིད་མེད་པ་པའོ། །ཞེས་གསུངས་པ་དེ་ཡང་དེ་འདྲའི་སྒོ་ནས་གསུང་གིན་ཡོད་པ་རེད། དེ་ནང་བཞིན་དུ། འཕགས་པ་ཐོགས་མེད་ཀྱི་མངོན་པ་ཀུན་བཏུས་དང༌། སློབ་དཔོན་དབྱིག་གཉེན་གྱི་སུམ་ཅུ་པའི་རྩ་བ་དེ་དག་གི་སྐབས་སུ། དོན་དམ་པ་ངོ་བོ་ཉིད་མེད་ཟེར་བ་དེ་ཡོངས་གྲུབ་ལ་སྦྱར་ནས་གསུང་གིན་ཡོད་པ་དེ་འདྲ་རེད། དེ་ནས། མདོ་སྡེ་དགོངས་པ་ངེས་འགྲེལ་གྱི་དབང་དུ་བྱས་པ་ཡིན་ན། དོན་དམ་པ་ངོ་བོ་ཉིད་མེད་པ་དེ། དང་པོ་གཞན་དབང་ལ་སྦྱར་ནས་གསུངས་པའི་སྐབས་དེར་འདི་ལྟར་གསུངས་ཏེ། ཆོས་རྣམས་ཀྱི་དོན་དམ་པ་ངོ་བོ་ཉིད་མེད་པ་ཉིད་གང་ཞེ་ན། རྟེན་ཅིང་འབྲེལ་བར་འབྱུང་བའི་ཆོས་གང་དག་སྐྱེ་བ་ངོ་བོ་ཉིད་མེད་པ་ཉིད་ཀྱིས་ངོ་བོ་ཉིད་མེད་པ་དེ་དག་ནི་དོན་དམ་པའི་ངོ་བོ་ཉིད་མེད་པ་ཉིད་ཀྱིས་ངོ་བོ་ཉིད་མེད་པ་ཡང་ཡིན་ནོ། །དེའི་ཅིའི་ཕྱིར་ཞེ་ན། དོན་དམ་ཡང་དག་འཕགས་ཆོས་རྣམས་ལ་རྣམ་པར་མི་རྟོག་པའི་དམིགས་པ་གང་ཡིན་པ་དེ་ནི། ངེས་དོན་དམ་པ་ཡིན་པར་ཡོངས་སུ་བསྟན་ལ། གཞན་གྱི་དབང་གི་མཚན་ཉིད་དེ་ནི་རྣམ་པར་མི་རྟོག་པའི་དམིགས་པ་མ་ཡིན་པས། དེའི་ཕྱིར་དོན་དམ་པའི་ངོ་བོ་ཉིད་མེད་པ་ཉིད་ཅེས་བྱའོ། །ཞེས་སོགས་ཀྱི་སྐབས་སུ་དོན་དམ་པ་ངོ་བོ་ཉིད་མེད་པ་དེ། གཞན་དབང་ལ་སྦྱར་ནས་གསུངས་བཞག་པ་དེ་ལྟར་རེད། དེ་ནས། མདོ་སྡེ་དགོངས་པ་ངེས་འགྲེལ་གྱི་སྐབས་སུ། ཡོངས་གྲུབ་དེ་དོན་དམ་པ་ངོ་བོ་ཉིད་མེད་པ་ལ་སྦྱར་ནས་གསུངས་ཚུལ་ནི། གཞན་ཡང་ཆོས་རྣམས་ཀྱི་ཡོངས་སུ་གྲུབ་པའི་མཚན་ཉིད་གང་ཡིན་པ་དེ་ཡང་དོན་དམ་པ་ངོ་བོ་ཉིད་མེད་པ་ཉིད་ཅེས་བྱའོ། །དེའི་ཅིའི་ཕྱིར་ཞེ་ན། དོན་དམ་ཡང་དག་འཕགས་ཆོས་རྣམས་ཀྱི་ཆོས་བདག་མེད་པ་གང་ཡིན་དེ་ནི། དེ་དག་གི་ངོ་བོ་ཉིད་མེད་པ་ཉིད་ཅེས་བྱ་སྟེ། དེ་ནི་དོན་དམ་པ་ཡིན་ལ། དོན་དམ་པ་ནི་ཆོས་ཐམས་ཅད་ཀྱི་ངོ་བོ་ཉིད་མེད་པ་ཉིད་ཀྱིས་རབ་ཏུ་ཕྱེ་བ་ཡིན་པས། དེའི་ཕྱིར་དོན་དམ་པ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་ཡོངས་གྲུབ་ལ་སྦྱར་ནས་གསུངས་ཚུལ་ཏེ། གསུངས་ཚུལ་གཉིས་ཡོད་པ་རེད། ཡིན་ན་ཡང༌། མངོན་པ་ཀུན་བཏུས་དང་སུམ་ཅུ་པའི་སྐབས་སུ། དོན་དམ་པ་ངོ་བོ་ཉིད་མེད་པ་དེ་ཡོངས་གྲུབ་ལ་སྦྱར་ནས་གསུངས་པ་མ་གཏོགས། གཞན་དབང་སོགས་ལ་མ་སྦྱར་བ་དེ་འདྲ་རེད། དེ་འདྲ་ཡིན་དུས། མདོ་སྡེ་དགོངས་པ་ངེས་འགྲེལ་གྱི་སྐབས་སུ་འཁོར་ལོ་བར་ཐ་གསུམ་གྱི་དགོངས་པ་བཀྲལ་ཡོང་སྐབས་སུ། ཆོས་རྣམས་ཀྱི་ངོ་བོ་ཉིད་མེད་པ་ཉིད་རྣམ་པ་གསུམ་པོ་འདི་ལྟ་སྟེ། མཚན་ཉིད་ངོ་བོ་ཉིད་མེད་པ་ཉིད་དང༌། སྐྱེ་བ་ངོ་བོ་ཉིད་མེད་པ་ཉིད་དང༌། དོན་དམ་པ་ངོ་བོ་ཉིད་མེད་པ་ཉིད་ལ་དགོངས་ནས་ཆོས་ཐམས་ཅད་ངོ་བོ་ཉིད་མེད་པའོ་ཞེས་བསྟན་ཏོ། །ཞེས་གསུངས་ནས། དེའི་རྗེས་སུ། ངོ་བོ་ཉིད་མེད་པ་གསུམ་དེ་རྒྱས་པར་གསུངས་པ་དང༌། དེ་ནས་ཡང་ཤེར་ཕྱིན་གྱི་མདོ་ལ་སོགས་ཀྱི་སྐབས་སུ་མ་སྐྱེས་པ། མ་འགགས་པ། གཟོད་མ་ནས་ཞི་བ་ཞེས་གསུངས་པ་དེའི་དགོངས་པ་ཡང་མདོ་སྡེ་དགོངས་པ་ངེས་འགྲེལ་གྱི་སྐབས་སུ། གང་ལྟར་གསུངས་པ་རེད་ཟེར་ན། ངའི་དགོངས་ཏེ་བཤད་པ་ཟབ་མོ་ཡང་དག་པ་ཇི་ལྟ་བ་བཞིན་མི་ཤེས་ཏེ། ཆོས་དེ་ལ་མོས་པ་ཡོད་ཀྱང་ཆོས་འདི་དག་ཐམས་ཅད་ངོ་བོ་ཉིད་མེད་པ་ཁོ་ན་ཡིན་ནོ། །ཆོས་འདི་དག་ཐམས་ཅད་ནི་མ་སྐྱེས་པ་ཁོ་ནའོ། །མ་འགགས་པ་ཁོ་ནའོ། །གཟོད་མ་ནས་ཞི་བ་ཁོ་ནའོ། །རང་བཞིན་གྱིས་ཡོངས་སུ་མྱ་ངན་ལས་འདས་པ་ཁོ་ནའོ་ཞེས་ཆོས་ཀྱི་དོན་ལ་སྒྲ་ཇི་བཞིན་ཁོ་ནར་མངོན་པར་ཞེན་པར་བྱེད་དེ། དེ་དག་གཞི་དེས་ན་ཆོས་ཐམས་ཅད་ལ་མེད་པར་ལྟ་བ་དང༌། མཚན་ཉིད་མེད་པར་ལྟ་བ་འཐོབ་པར་འགྱུར་ཏེ། མེད་པར་ལྟ་བ་དང༌། མཚན་ཉིད་མེད་པར་ལྟ་བ་ཐོབ་ནས་ཀྱང་ཐམས་ཅད་ལ་མཚན་ཉིད་ཐམས་ཅད་ཀྱིས་སྐུར་པ་འདེབས་ཏེ། ཆོས་རྣམས་ཀྱི་ཀུན་བརྟགས་པའི་མཚན་ཉིད་ལ་སྐུར་པ་འདེབས། ཆོས་རྣམས་ཀྱི་གཞན་གྱི་དབང་གི་མཚན་ཉིད་དང༌། ཡོངས་སུ་གྲུབ་པའི་མཚན་ཉིད་ལ་ཡང་སྐུར་པ་འདེབས་སོ། །དེ་ཅིའི་ཕྱིར་ཞེ་ན། དོན་དམ་ཡང་དག་འཕགས་འདི་ལྟར་གཞན་གྱི་དབང་ཉིད་དང༌། ཡོངས་སུ་གྲུབ་པའི་མཚན་ཉིད་ཡོད་ན་ནི། ཀུན་བརྟགས་མཚན་ཉིད་ཀྱང་རབ་ཏུ་ཤེས་པར་གྱུར་ན། དེ་ལ་གང་དག་གཞན་གྱི་མཚན་ཉིད་དང༌། ཡོངས་སུ་གྲུབ་པའི་མཚན་ཉིད་ལ་མཚན་ཉིད་མེད་པར་མཐོང་བ་དེ་དག་གིས་ནི་ཀུན་བརྟགས་པའི་མཚན་ཉིད་ལ་ཡང་སྐུར་པ་བཏབ་པ་ཡིན་པའི་ཕྱིར་ཏེ། དེ་ལྟ་བས་ན་དེ་དག་གི་ནི་མཚན་ཉིད་རྣམ་པ་གསུམ་ཆར་ལ་ཡང་སྐུར་པ་འདེབས་པ་ཞེས་བྱའོ། །ཞེས་གསུངས་པ་ལྟར། དེ་འདྲའི་སྒོ་ནས་གསལ་བར་ཤེར་ཕྱིན་གྱི་མདོའི་སྐབས་སུ། གསུངས་ལུགས། གསུངས་སྟངས་དེ། དེ་ལྟ་བུའི་སྒོ་ནས་བཤད་དགོས་པ་རེད། དེའི་རྒྱུ་མཚན་གྱིས། མདོ་སྡེ་དགོངས་པ་ངེས་འགྲེལ་གྱི་སྐབས་སུ་ཆོས་ཐམས་ཅད་མ་སྐྱེས་པ་ཞེས་གསུངས་པའི་དགོངས་པ་དེ། མཚན་ཉིད་ངོ་བོ་ཉིད་མེད་པ་ལ་དགོངས་ནས། ངས་ཆོས་ཐམས་ཅད་མ་སྐྱེས་པ། མ་འགགས་པ། གཟོད་མ་ནས་ཞི་བ། རང་བཞིན་གྱིས་ཡོངས་སུ་མྱ་ངན་ལས་འདས་པའོ་ཞེས་བསྟན་ཏོ། །དེའི་ཅིའི་ཕྱིར་ཞེ་ན། དོན་དམ་ཡང་དག་འཕགས་འདི་ལྟར་རང་གི་མཚན་ཉིད་ཀྱིས་མེད་པ་གང་ཡིན་པ་དེ་ནི་མ་སྐྱེས་པ་ཡིན། མ་སྐྱེས་པ་གང་ཡིན་པ་དེ་ནི་མ་འགགས་པ་ཡིན་ཞེས་སོགས་རྒྱ་ཆེར་གསུང་གིན་ཡོད་པ་དེ་ལྟར་རེད། དེའི་འོག་ཏུ་ཡང༌། མདོ་སྡེ་དགོངས་པ་ངེས་འགྲེལ་གྱི་སྐབས་སུ། དོན་དམ་པ་ངོ་བོ་ཉིད་མེད་པ་ཆོས་བདག་མེད་པའི་རབ་ཏུ་ཕྱེ་བ་ལ་དགོངས་ནས། ངས་ཆོས་ཐམས་ཅད་མ་སྐྱེས་པ། མ་འགགས་པ། གཟོད་མ་ནས་ཞི་བ། རང་བཞིན་གྱིས་ཡོངས་སུ་མྱ་ངན་ལས་འདས་པའོ་ཞེས་བསྟན་ཏོ། །ཞེས་སོགས་དེ་ལྟར་གསུངས་པ་རེད། དེ་དག་ནི་ཤེར་ཕྱིན་གྱི་མདོའི་དགོངས་པ་ལྟར་བཤད་པ་རེད། ཡིན་ན་ཡང༌། མངོན་པ་ཀུན་བཏུས་ཀྱི་སྐབས་སུ། ཀུན་བརྟགས་པའི་ངོ་བོ་ཉིད་ལ་མཚན་ཉིད་ངོ་བོ་ཉིད་མེད་པ། གཞན་དབང་ལ་སྐྱེ་བ་ངོ་བོ་ཉིད་མེད་པ། ཡོངས་སུ་གྲུབ་པ་ལ་དོན་དམ་ངོ་བོ་ཉིད་མེད་པ་ཞེས་བྱའོ། །ཞེས་གསུངས་པ་དང༌། ཡང༌། མ་སྐྱེས་པ། མ་འགགས་པ། གཟོད་མ་ནས་ཞི་བ། རང་བཞིན་གྱིས་ཡོངས་སུ་མྱ་ངན་ལས་འདས་པའོ། །ཞེས་པའི་དགོངས་པ་གང་ཡིན་ཞེ་ན། དེ་ལས། ཇི་ལྟར་ངོ་བོ་ཉིད་མེད་པ་དེ་ལྟར་མ་སྐྱེས་སོ། །ཇི་ལྟར་མ་སྐྱེས་པ་དེ་ལྟར་མ་འགགས་སོ། །ཇི་ལྟར་མ་སྐྱེས་པ་དང་མ་འགགས་པ་དེ་ལྟར་གཟོད་མ་ནས་ཞི་བའོ། །དེ་ལྟར་རང་བཞིན་གྱི་མྱ་ངན་ལས་འདས་པའོ། །ཞེས་སོགས་ཀྱི་སྐབས་སུ་དོན་དམ་པ་ངོ་བོ་ཉིད་མེད་པ་དེ་ཡོངས་གྲུབ་གཅིག་པུ་ལ་སྦྱར་བ་དེ་དང༌། དེ་ནས་མ་སྐྱེས་པ་སོགས་སུ་གསུངས་པའི་དགོངས་གཞི་དེ་ཡང་མདོ་སྡེ་དགོངས་པ་ངེས་འགྲེལ་ནང་བཞིན་དུ། འཕགས་པ་ཐོགས་མེད་ཀྱིས་ཀྱང་དེ་ལྟར་གསུངས་ཡོད་པ་རེད། ཡང༌། མདོ་སྡེ་དགོངས་པ་ངེས་འགྲེལ་གྱི་སྐབས་སུ་མཚན་ཉིད་གསུམ་ལས་ཀུན་བརྟགས་ངོས་བཟུང་བའི་སྐབས་སུ་འདི་ལྟར་གསུངས་ཏེ། རྣམ་པར་མི་རྟོག་པའི་སྤྱོད་ཡུལ་ཀུན་བརྟགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་ལ། གཟུགས་ཀྱི་ཕུང་པོ་ཞེས་ངོ་བོ་ཉིད་ཀྱི་མཚན་ཉིད་དམ། བྱེ་བྲག་གི་མཚན་ཉིད་དུ་མིང་དང་བརྡར་རྣམ་པར་བཞག་པ་དང༌། གཟུགས་ཀྱི་ཕུང་པོ་སྐྱེའོ་ཞེའམ། འགག་གོ་ཞེའམ། གཟུགས་ཀྱི་ཕུང་པོ་སྤང་བ་དང༌། ཡོངས་སུ་ཤེས་པ་ཞེས་ངོ་བོ་ཉིད་ཀྱི་མཚན་ཉིད་དམ། བྱེ་བྲག་གི་མཚན་ཉིད་དུ་མིང་དང་བརྡར་རྣམ་པར་གཞག་པ་གང་ལགས་པ་དེ་ནི་ཀུན་བརྟགས་མཚན་ཉིད་ལགས་ཏེ། ཞེས་ཀུན་བརྟགས་ཀྱི་ངོ་བོ་དེ་དེ་འདྲའི་སྒོ་ནས་གསུངས་བཞག་པ་དེ་ལྟར་རེད། གཞན་དབང་གི་ངོ་བོ་ཡང༌། མདོ་སྡེ་དགོངས་པ་ངེས་འགྲེལ་གྱི་སྐབས་སུ་འདི་ལྟར་གསུངས་ཏེ། རྣམ་པར་རྟོག་པའི་སྤྱོད་ཡུལ་ཀུན་བརྟགས་པའི་མཚན་ཉིད་ཀྱི་གནས་འདུ་བྱེད་མཚན་མ་གང་ལགས་པ་དེ་ནི་གཞན་གྱི་མཚན་ཉིད་ལགས་ཏེ། ཞེས་གཞན་དབང་གི་མཚན་ཉིད་གསུམ་ལྡན་གྱི་སྒོ་ནས་དེ་ལྟར་གསུངས་པ་རེད། ཡོངས་གྲུབ་ཀྱི་ངོ་བོ་ཡང༌། མདོ་སྡེ་དགོངས་པ་ངེས་འགྲེལ་གྱི་འདི་ལྟར་གསུངས་ཏེ། རྣམ་པར་རྟོག་པའི་སྤྱོད་ཡུལ་ཀུན་བརྟགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་དེ་ཉིད་ཀུན་བརྟགས་པའི་མཚན་ཉིད་དེར་ཡོངས་སུ་མ་གྲུབ་ཅིང༌། ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཉིད་ཆོས་བདག་མ་མཆིས་པ་དེ་བཞིན་ཉིད་རྣམ་པར་དག་པའི་དམིགས་པ་གང་ལགས་པ་དེ་ནི་ཡོངས་སུ་གྲུབ་པའི་མཚན་ཉིད་ལགས་ཏེ། ཞེས་ཡོངས་གྲུབ་ཀྱི་ངོ་བོ་དེ་ལྟར་གསུངས་པ་རེད། སྐབས་འདིར། ངས་མདོ་སྡེ་དགོངས་པ་ངེས་འགྲེལ་གྱི་ལུང་སོགས་རྒྱས་པར་མ་བཤད་ན་ཡང་ཆོག་མོད། འོན་ཀྱང༌། ལུང་ཙམ་སྐྱོར་བ་དེ་ཡིས་ཀྱང་གཞན་སྟོང་དབུ་མ་ཆེན་མོ་ལ་མོས་པ་ཡོད་མཁན་རྣམས་ཀྱིས་གཞན་སྟོང་དབུ་མ་ཆེན་མོའི་ལྟ་གྲུབ་དེ། མདོ་སྡེ་དགོངས་པ་ངེས་འགྲེལ་སོགས་ལ་བརྟེན་ནས་དྲང་ངེས་འབྱེད་ཀྱིན་ཡོད་པ་དེ་ཤེས་པའི་དགོས་པ་ཡོད་པ་དེ་འདྲ་རེད། དེས་ན། མདོ་སྡེ་དགོངས་པ་ངེས་འགྲེལ་གྱི་དོན་དམ་ཡང་དག་འཕགས་ཞུས་ཀྱི་ལུང་དེ་དག་རྣམ་པ་ཐམས་ཅད་ཀྱི་ཐུགས་ལ་ངེས་ཆ་ཡོད་པ་ཞིག་བྱེད་རྒྱུ་དེ་གལ་ཆེ་བར་མཐོང་ནས། སྐབས་འདིར་ངས་ལུང་དེ་དག་མར་བཀླགས་པ་ཙམ་ཞིག་དེ་འདྲ་ཡིན། དེའི་ཚིག་དོན་ཞིབ་པར་བཤད་ན་ཧ་ཅང་ཉོག་འགྲོ་བས་དེ་ཙམ་གྱིས་ཆོག་པར་བྱས་པཡིན།