[༡༤] ཀ་ཆུ་བ་གཟུས་རྡོ་རྗེ་རྒྱལ་མཚན།
དེའི་མཁན་བུ་ཀ་ཆུ་བ་གཟུས་རྡོ་རྗེ་རྒྱལ་མཚན་ནི། གཞོན་ནུ་ནས་གཞི་དད་པ་རྐྱེན་གྱིས་སད་དེ་ཡོངས་ཀྱི་དགེ་བའི་བཤེས་གཉེན་ཀླུ་མེས་ཀྱིས་མཁན་པོ་དང་། གྲུ་མེར་གྱིས་ལས་སློབ་བྱས་ཏེ་རབ་ཏུ་བྱུང་ཞིང་བསྙེན་པར་རྫོགས། མཁན་པོའི་དྲུང་དུ་རྒྱ་ཆེར་འགྲེལ་དང་བམ་པོ་ལྔ་བཅུ་པ་ལ་སོགས་འགྲེལ་ཆེན་རྣམས་ལ་སྦྱངས་པས་མཁས་པ་ཆེན་པོར་གྱུར། དུས་ཕྱིས་རང་གི་མཆེད་གྲོགས་རླུང་སྐྱོག་རྣམ་གཉིས་ལའང་འཆད་ཉན་མཛད། རོང་སྐོམ་དང་པོའི་གནས་གཞི་གསོས་ཏེ་གཙུག་ལག་ཁང་བཞེངས་ཤིང་འདུལ་བའི་བཤད་གྲྭ་བཙུགས་པ་སོགས་བཤད་སྒྲུབ་ཀྱི་བྱ་བས་བསྟན་པ་རྒྱ་ཆེར་བསྐྱངས། སློབ་མའང་འཛིན་པ་ཤེར་འོད། སྣེ་བོ། གླེན་ཚུལ་བྱང་། སྤོ་ཆུང་ཚུལ་ཁྲིམས་འབྱུང་གནས་བཅས་ཐུགས་ཟིན་གྱི་བུ་ཆེན་བཞི་སོགས་བསམ་གྱིས་མི་ཁྱབ་པ་བྱུང་ངོ་། །