ངན་སོང་སོགས་འབྱུང་མི་རིགས་པར་སྨྲ་མཁན་ལ་ལན།
ཡང་གཞི་གདོད་མ་ནས་ཀ་དག་ཡིན་པ་ལ། སླར་འཁོར་བ་དང་ངན་སོང་སོགས་འབྱུང་མི་རིགས་པར་སྨྲ་མཁན་མང་བར་ལན་འདི་སྐབས་སུ་ཅུང་ཙམ་གླེང་ན། དེ་ཡང་གདོད་མའི་སྤྱི་གཞི་འཁོར་བ་དང་མྱང་འདས་གང་དུའང་མ་གྲུབ་པའི་སྔོན་རོལ་ན། ཀུན་ཏུ་བཟང་པོ་རང་རིག་པའི་ཡེ་ཤེས་རང་ངོ་ཤེས་པས་སངས་རྒྱས་ཏེ་འཁྲུལ་མ་མྱོང་བ་གདོད་མའི་སངས་རྒྱས་ཞེས་བྱ་ལ། གདོད་མའི་ཀ་དག་ཆེན་པོ་དེའི་རང་ངོ་ལ་འཁྲུལ་པའི་དྲི་མ་རྡུལ་ཙམ་ཡང་མེད་ཀྱང་། རང་མདངས་འགག་པ་མེད་པའི་ལྷུན་གྲུབ་ཀྱི་སྣང་བ་ཤར་ཞིང་། དེ་ཉིད་རང་མདངས་ཡིན་པར་མ་ཤེས་པར་ཡུལ་དང་དངོས་པོར་བཟུང་བས་ཁམས་གསུམ་གྱི་སེམས་ཅན་རྣམས་བྱུང་ཞིང་། ཀུན་གཞི་ལས་ཀུན་གཞིའི་རྣམ་ཤེས་དང་། དེ་ལས་ཡིད་དང་སྒོ་ལྔའི་རྣམ་ཤེས་བྱུང་། དེ་ལས་ཉོན་མོངས་པའི་རྟོག་ཚོགས་བརྒྱད་ཁྲི་བཞི་སྟོང་སོགས་འཁྲུལ་པའི་ཕྲེང་བ་ཟད་པ་མེད་པར་ཤར་ཞིང་། གཅིག་ལས་གཅིག་མཆེད་དེ་ལས་དང་ཉོན་མོངས་པའི་སྒྲིབ་པ་ཇེ་མང་དུ་བསགས། དེ་དག་གིས་
འབྲས་བུའི་ཁམས་གསུམ་རིགས་དྲུག་གི་བདེ་སྡུག་སྣ་ཚོགས་ལ་སྤྱོད་ཅིང་ཉམས་སུ་མྱོང་བ་ཡིན་མོད། ལ་ཀ་དག་གི་རིག་པའི་ཡེ་ཤེས་རང་ངོ་རིག་ཅིང་རྟོགས་པ་མངོན་དུ་གྱུར་པ་ཞིག་མ་བྱུང་གི་བར་ལ་ནི། ནམ་ཡང་འཁོར་བ་ལས་ཐར་པའི་དུས་མི་འབྱུང་བ་དང་། ནམ་རིག་པའི་ཡེ་ཤེས་ལ་རང་དབང་ཐོབ་པ་ན་འཁོར་བའི་འཕྲུལ་འཁོར་གཞི་མེད་རྩ་བྲལ་དུ་རང་གྲོལ་བར་འགྱུར་རོ། །འོ་ན་རང་ངོ་རང་གིས་མ་རིག་པར་འཁྲུལ་པའི་བག་ཆགས་གཅིག་ལས་གཅིག་འཕེལ་བས་འཁོར་བའི་གཏིང་རྡོར་གྱུར་ཚར་ནས་དེ་ལས་ཐར་ཞིང་གྲོལ་བའི་གོ་སྐབས་མི་འབྱུང་ངམ་སྙམ་ན་དེ་ཡང་མ་ཡིན་ཏེ། ཁམས་གསུམ་གྱི་སེམས་ཅན་རྣམས་ཐོག་མ་མེད་པ་ནས་ད་བར་དུ་འཁོར་བའི་རྒྱ་མཚོར་འཁྱམས་ཀྱང་། རང་རྒྱུད་ལ་བདེ་གཤེགས་སྙིང་པོའམ་གདོད་མའི་གནས་ལུགས་ཀ་དག་ཆེན་པོའི་སྐུ་གསུམ་ཡེ་ཤེས་ལྔའི་རང་བཞིན་ངོ་བོ་སྟོང་ལ་རང་བཞིན་གསལ་བ་རྣམ་པ་ཅིར་ཡང་འགག་མེད་དུ་འཆར་བའི་སེམས་ཉིད་འོད་གསལ་ཆེན་པོ་དེ་ནི་འགྲོ་བ་ཐམས་ཅད་ཀྱི་རྒྱུད་ལ་རྟག་ཏུ་འབྲལ་བ་མེད་པར་བཞུགས་ཤིང་། དེ་ལ་ནི་འཕོ་འགྱུར་བྲི་གང་འཕེལ་འགྲིབ་སོགས་གང་ཡང་མེད་པས། དམྱལ་བ་མནར་མེད་པའི་སྡུག་བསྔལ་ཉམས་སུ་མྱོང་བའི་གང་ཟག་ལྟ་བུ་ཞིག་ལ་ཡང་ཀ་དག་རིག་པའི་ཡེ་ཤེས་དེ་གསལ་ལམ་མེ་རྗེན་ཧྲིག་གེ་འབྲལ་མེད་དུ་ཡོད་ཀྱང་། རང་གི་རང་ངོ་མ་རིག་པས་ཕན་མ་ཐོགས་པ་ཡིན་ལ། ནམ་རང་ངོ་རིག་ན་དམྱལ་བའི་སྡུག་བསྔལ་གྱི་སྣང་བ་སྐད་ཅིག་དེ་ཉིད་ལ་མ་སྤངས་རང་གྲོལ་དུ་འགྱུར་བ་སྟེ།
དོན་ལ་འཁོར་བ་བདེན་གྲུབ་ཏུ་མེད་ཀྱང་། རང་སྣང་འཁྲུལ་པའི་བག་ཆགས་ཀྱི་རང་གཟུགས་ཀུན་རྫོབ་ལས་སྣང་ཡིན་པའི་ཕྱིར། ཁམས་གསུམ་རིགས་དྲུག་གི་ལས་སྣང་མཐའ་དག་ནི་དཔེར་ན་རང་ཉིད་མལ་དུ་ཉལ་བ་ལས་གཞན་པ་གང་ཡང་མ་བྱས་ནའང་རྨི་ལམ་གྱི་སྣང་བ་བདེ་སྡུག་བསམ་ལས་འདས་པ་མང་པོ་ཉམས་སུ་མྱོང་མོད་ཀྱང་དོན་ལ་བདེན་པར་གྲུབ་པ་གང་ཡང་མེད་པ་ལྟ་བུ་དང་། རང་རང་གི་ལས་དགེ་སྡིག་གང་བྱས་པའི་འབྲས་བུ་མྱོང་བར་འགྱུར་བ་ནི། དཔེར་ན་རྡ་དུ་ར་ཞེས་ཐང་ཕྲོམ་ཟོས་ནས། འཁྲུལ་པའི་སྣང་བ་སྣ་ཚོགས་འཆར་བར་འགྱུར་བ་དེ་དོན་ལ་མ་གྲུབ་ཀྱང་། རྫས་དེའི་སྐྱོན་ཡིན་པ་བཞིན། འཁོར་བའི་བདེ་སྡུག་དོན་དམ་པར་བདེན་པར་གྲུབ་པ་གང་ཡང་མེད་ཀྱང་རང་རང་གི་ལས་ཀྱིས་སྣང་བར་འཆར་བར་ཡིན་ནོ། །གཞན་ཡང་མདོ་རྒྱུད་བསྟན་བཅོས་ཀུན་ནས་རྒྱལ་བུ་དམངས་སུ་འཁྱམས་པའི་དཔེ་དང་ལུང་གི་སྤྲོས་པས་བསྒྲུབས་པ་བཞིན་ནོ། །