སྦྱང་བྱ་སྦྱང་གཞི་གཅིག་ཡིན་ན་ཧ་ཅང་ཐལ་ཆེས་པའི་སྐྱོན་བསྟན་པ།
བརྒྱད་པ་སྦྱང་བྱ་སྦྱང་གཞི་གཅིག་ཡིན་ན་ཧ་ཅང་ཐལ་ཆེས་པའི་སྐྱོན་བསྟན་པ་ནི། དེ་ལྟར་གསུངས་ཀྱང་དེ་ལ་མི་མཁས་པ། །གསུམ་ལྡན་མར་བཅད་སྐྱོན་ཅན་མང་པོནི། །སྦྱང་བྱ་དང་ནི་སྦྱང་གཞི་གཅིག་ཏུ་འདོད། །སྤྲིན་དང་ནམ་མཁའ་གཅིག་ཏུ་འདོད་དང་མཚུངས། །འདིར་ནི་སྦྱང་གཞི་དྲི་བཅས་དེ་བཞིན་ཉིད། །ཀུན་གཞི་ཡེ་ཤེས་འདུས་མ་བྱས་ཡིན་ལ། །སྦྱང་བྱ་དྲི་མ་འདུས་བྱས་ཡིན་པའི་ཕྱིར། །དེ་གཉིས་གཅིག་གམ་མི་གཅིག་དགོངས་པར་ཞུ། །སྦྱང་གཞི་རྟག་པ་སྦྱང་བྱ་མི་རྟག་པ། །དེ་གཉིས་གཅིག་གམ་མི་གཅིག་དགོངས་པར་ཞུ། །སྦྱང་གཞི་ཟག་མེད་སྦྱང་བྱ་ཟག་པ་ཡིན། །དེ་གཉིས་གཅིག་གམ་མི་གཅིག་དགོངས་པར་ཞུ། །སྦྱང་གཞི་རྣམ་བྱང་སྦྱང་བྱ་ཀུན་ཉོན་མོངས། །དེ་གཉིས་གཅིག་གམ་མི་གཅིག་དགོངས་པར་ཞུ། །དེ་འདྲ་གཞན་ཡང་ཤིན་ཏུ་མང་བར་མཆིས། །རྩ་བར། དེ་ལྟར་གསུངས་ཀྱང་དེ་ལ་མི་མཁས་པ། །ཞེས་པ་ནས། ཤིན་ཏུ་མང་བར་མཆིས། ཞེས་པའི་བར་ཤོ་ལོ་ཀ་གསུམ་དང་རྐང་བ་གསུམ་བྱུང༌། དེའི་ཚིག་དོན་ནི། སྦྱང་གཞི་སོགས་ཆོས་དཔེ་དང་བཅས་ཏེ་དེ༵་ལྟར༵་གསུ༵ངས་ཀྱང༷་དེ༵་ལ༵་མི༵་མཁས༵་པ༵་གསུམ༵་ལྡན༵་མར་༵བཅ༵ད་སྐྱོན༵་ཅན༵་མང༵་པོ༷་ནི༵། སྦྱང༵་བྱ༵་དྲི་མ་དང༵་ནི༵་སྦྱང༵་གཞི༵་ཀུན་གཞི་ཡེ་ཤེས་གཅི༵ག་ཏུ༵་འདོ༵ད་པ་ནི་མི་འཐད་དེ། དཔེར་ན་སྤྲི༵ན་དང༵་ནམ༵་མཁའ༵་གཅིག༵་ཏུ༷་འདོད༵་པ་དང༵་ཀུན་ནས་མཚུང༵ས་པའི་ཕྱིར་རོ། །རྫོགས་ལྡན་ཆོས་མཆོག་གི་ལུགས་འདི༵ར་ནི༵། སྦྱང༵་གཞི༵་གློ་བུར་བའི་དྲི༵་མ་དང་བཅ༵ས་པའི་དེ༵་བཞིན༵་ཉིད༵་ནི་ཀུ༵ན་གཞི༵་ཡེ༵་ཤེས༵་འདུས༵་མ༵་བྱས༵་ཡིན༵་ལ༵། སྦྱང༵་བྱ༵་གློ་བུར་དྲི༵་མ༵་ནི་འདུས༵་བྱས༵་ཡིན༵་པའི༵་ཕྱིར༵་ན་སྦྱང་གཞི་དང་སྦྱང་བྱ་དེ༷་གཉིས༵་གཅིག༵་གམ༵་མི༵་གཅིག༵་དགོང༵ས་པར༷་ཞུ༵། སྦྱང༵་གཞི༵་རྟག༵་པ༵་སྦྱང༵་བྱ༵་མི༵་རྟག༵་པ༵་ཡིན་པའི་ཕྱིར་ན། དེ༵་གཉི༵ས་གཅིག༵་གམ༵་མི༵་གཅིག༵་དགོང༵ས་པར༵་ཞུ། སྦྱང༵་གཞི༵་ཟག་༵མེད༵་སྦྱང༵་བྱ༵་ཟག༵་པ་དང་བཅས་པ༵་ཡིན༵་པས་དེ༵་གཉིས༵་གཅི༵ག་གམ༵་མི༵་གཅི༵ག་དགོང༵ས་པར༵་ཞུ། སྦྱང༵་གཞི༵་རྣ༵མ་བྱང༵་སྦྱང༵་བྱ༵་ཀུ༵ན་ནས་ཉོ༵ན་མོང༵ས་ཡིན་པའི་ཕྱིར་ན་དེ༵་གཉི༵ས་གཅིག༵་གམ༵་མི༵་གཅི༵ག་དགོང༵ས་པར༷་ཞུ༵་དང་དེ་གཉིས་མི་གཅིག་པའི་ཕྱིར། དེ༵་འདྲ༵་གཞ༵ན་ཡང༵་སྦྱང་གཞི་དེ་བཞིན་ཉིད་ནི་ཡེ་ཤེས་དོན་དམ་པའི་རྣམ་པ་ཀུན་དང་ལྡན་ལ་སྦྱང་བྱ་དྲི་མ་ནི་རྫུན་པ་བསླུ་བའི་ཆོས་གནས་ལུགས་སམ་དོན་ལ་ཅི་ཡང་མ་གྲུབ་པ་ཡིན་པས་དེ་གཉིས་མི་འདྲ་བ་སོགས་ཤི༵ན་ཏུ༵་མང༵་བ༵ར་མཆིས༵་པ་ཡིན་ནོ། །