གཉིས་པ་དེ་དག་རྒྱས་པར་བཤད་པ།

གཉིས་པ་དེ་དག་རྒྱས་པར་བཤད་པ་ལ།

ཞུགས་གནས་བརྒྱད་ཀྱི་ངོ་བོ་དང༌།དེ་དག་ལས་ཆགས་བྲལ་སྔོན་སོང་དང༌། འབྲས་བུ་རིམ་གྱིས་པ་དང༌། སྤང་བྱ་ཅིག་ཆར་བ་བཤད་པ་དང་བཞི། དང་པོ་ལ། རྒྱུན་ཞུགས་ཞུགས་པའི་མཚན་ཉིད། རྒྱུན་ཞུགས་ཀྱི་འབྲས་བུ་མ་ཐོབ་པ་ཐོབ་ཕྱིར་དུ་དངོས་སུ་བརྩོན་པའི་རབ་ཏུ་ཕྱེ་བའི་ཞུགས་པ་དེ་ཡིན་ཏེ། ཉ་ཊཱིཀ་ལས། བྱེ་བྲག་སྨྲ་བའི་ལུགས་ལ། དེ་འདྲའི་གང་ཟག་གཉིས་མཚན་གཞི། རྒྱུན་ཞུགས་ཞུགས་པར་མཚོན། རྒྱུན་ཞུགས་འབྲས་བུ་ཐོབ་ཕྱིར་བརྩོན་པའི་འཕགས་པའི་གང་ཟག་གོ །ཀུན་བཏུས་ལྟར་ན། ངེས་འབྱེད་ཆ་མཐུན་སྟན་གཅིག་པ་ནས་བཟུང་སྟེ་སྔར་འདོད་པའི་སྒོམ་སྤང་ཡེ་མ་སྤངས་སམ་ཞེས་སོགས་སྔར་ལྟར་སྦྱར་པ་མཚན་གཞི། དེར་མཚོན། རྒྱུན་ཞུགས་འབྲས་བུ་ཐོབ་ཕྱིར་བརྩོན་པའི་སྦྱོར་ལམ་ཆོས་མཆོག་པའམ་མཐོང་ལམ་པའི་གང་ཟག་གང་རུང་ཡིན་པའོ། །རྒྱལ་བོའི་སྲས་ཀྱིས། ངེས་པར་འབྱེད་པའི་ཆ་དང་མཐུན་པ་སྟན་གཅིག་པ་ནས་བཟུང་སྟེ་དང་པོའི་འབྲས་བུ་མ་ཐོབ་པའི་བར་དུའོ། །ཞེས་པས་སོ། །མཚན་གཞི་ནི། མཐོང་ལམ་གྱི་སྔར་འདོད་ཉོན་གང་ལ་ཆགས་བྲལ་མ་བྱས་པའི་ཉན་ཐོས་སྦྱོར་ལམ་སྟན་གཅིག་པ་ནས་མཐོང་ལམ་སྐད་ཅིག་བཅོ་ལྔ་པོ་གང་རུང་ལ་གནས་པའི་གང་ཟག་གོ །བྱེ་བྲག་སྨྲ་བའི་ལུགས་ལ་བཟོད་པ་བརྒྱད་བར་ཆད་མེད་ལམ་དང༌། ཤེས་པ་བརྒྱད་རྣམ་གྲོལ་ལམ་འདོད་དེ། མཛོད་ལས། བཟོད་དང་ཤེས་པ་གོ་རིམ་བཞིན། །བར་ཆད་མེད་དང་རྣམ་གྲོལ་ལམ། །ཞེས་གསུངས་སོ། །དབྱེ་ན་དབང་པོ་རྣོ་རྟུལ་གྱིས་དད་པའི་རྗེས་འབྲང་གི་རྒྱུན་ཞུགས་ཞུགས་པ་དང་ཆོས་ཀྱི་རྗེས་འབྲང་གི་རྒྱུན་ཞུགས་ཞུགས་པ་དང་གཉིས། ཡང་ན་སྤང་བྱ་རིམ་གྱིས་པའི་རྒྱུན་ཞུགས་པ་དང༌། སྤང་བྱ་ཅིག་ཆར་བའི་རྒྱུན་ཞུགས་པ་གཉིས་སོ། །ས་མཚམས། སྦྱོར་ལམ་སྟན་གཅིག་པ་ནས་བཟུང་སྟེ་བཅོ་ལྔ་པ་ལམ་རྗེས་བཟོད་ཀྱི་བར་རོ། །རྒྱུན་ཞུགས་ཀྱི་མཚན་ཉིད། མཐོང་སྤང་ཀུན་སྦྱོར་གསུམ་སྤངས་བའི་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ལ་གནས་པའི་དམན་པའི་འཕགས་པ་དེ་ཡིན་ཏེ། ཡུམ་ལས། གང་ཟག་འདི་ནི་ཀུན་ཏུ་སྦྱོར་བ་གསུམ་སྤངས་པས་རྒྱུན་དུ་ཞུགས་པ་ཞེས་བྱའོ། །ཞེས་དང༌། ཀུན་བཏུས་འགྲེལ་བ་ཤེས་བྱ་རབ་གསལ་སྣང་བ་ལས། རྒྱུན་དུ་ཞུགས་པ་གང་ཞེ་ན། གང་མཐོང་པའི་ལམ་གྱི་སེམས་ཀྱི་སྐད་ཅིག་བཅུ་དྲུག་པ་ལམ་ལ་རྗེས་ཤེས་ལ་གནས་པ་སྟེ། མྱ་ངན་ལས་འདས་པའི་རྒྱུན་ལ་ཞུགས་ཤིང་སོན་པ་འབྲས་བུ་དང་པོ་རྫོགས་པར་ཐོབ་པའི་གང་ཟག་གོ །ཞེས་གསུངས་སོ། །སྐབས་འདིར་མཐོང་སྤང་ཀུན་སྦྱོར་གསུམ་མཐོང་སྤང་གི་གཙོ་བོ་འཇོག་ཚུལ་ཡོད་དེ། ཀུན་བཏུས་ས་འགྲེལ་ལས། དེ་ལ་ཅིའི་ཕྱིར་ཀུན་སྦྱོར་གསུམ་པོ་མཐོང་སྤང་གི་གཙོ་བོ་ཞེས་བྱ་ཞེ་ན། འཇིག་ཚོགས་ལྟ་བ་ནི་ཕུང་པོ་ལ་བདག་དང་བདག་གིར་ཞེན་ནས་གནས་ལ་དགའ་ཞིང་ཐར་བར་འགྲོ་མི་འདོད་པས་སྡུག་བསྔལ་ལས་མི་འཕགས་པའི་རྒྱུ་ཡིན་པ་དང༌། ཅི་སྟེ་འཕགས་ཀྱང་ཚུལ་ཁྲིམས་བརྟུལ་ཞུགས་མཆོག་འཛིན་ནི་ལམ་ངན་པ་ལ་ཐར་བའི་ལམ་དུ་ཞེན་ནས་ལོག་པས་ངེས་པར་འབྱུང་བའི་རྒྱུ་ཡིན་པ་དང༌། ཐེ་ཚོམ་ནི་ལམ་བཟང་པོ་ལ་སོམ་ཉི་ཟ་བས་ཡང་དག་པས་ངེས་པར་འབྱུང་བ་མ་ཡིན་པའི་རྒྱུ་ཡིན་པའི་ཕྱིར་ཏེ། འགྲོ་མི་འདོད་དང་ལམ་ནོར་དང༌། །ལམ་ལ་ཐེ་ཚོམ་དེ་སྙེད་ཅིག །ཐར་བར་བགྲོད་པའི་གེགས་བྱེད་པ། །དེ་ཡི་ཕྱིར་ན་གསུམ་བསྟན་ཏོ། །ཞེས་གསུངས་པ་ལྟར་རོ། །སྐབས་འདིའི་འཇིག་ལྟ་ཡང་ཀུན་བཏགས་ལ་བྱ་དགོས་སོ། །དབྱེ་ན། དབང་པོ་རྣོ་རྟུལ་དང༌། སྤང་བྱ་ཅིག་ཆར་བ་དང་རིམ་གྱིས་པ་དང༌། སྦྱོར་བའི་སྒོ་ནས་ཙམ་ཁྱད་གཉིས་སོགས་སོ། །སྒྲ་བཤད་ནི། ཀུན་བཏུས་ས་འགྲེལ་ལས། ངེས་ཚིག་གི་ཁྱད་པར་ནི། མྱ་ངན་ལས་འདས་པའི་རྒྱུན་ལ་རིམ་གྱིས་ཞུགས་པས་ན་རྒྱུན་དུ་ཞུགས་པ་དང༌། ཞེས་གསུངས་སོ། །ས་མཚམས། ཅིག་ཆར་བའི་རྒྱུན་ཞུགས་བཅུ་དྲུག་པ་ལམ་རྗེས་ཤེས་ནས། དགྲ་བཅོམ་ཐོབ་ཁའི་བར་དུ་ཡོད། འབྲས་བུ་རིམ་གྱིས་པའི་རྒྱུན་ཞུགས་བཅུ་དྲུག་པ་ལམ་རྗེས་ཤེས་ནས་ཕྱིར་འོང་ཐོབ་ཁའི་བར་དུ་ཡོད་དོ། ། ཕྱིར་འོང་ཞུགས་པའི་མཚན་ཉིད། ཕྱིར་འོང་གི་འབྲས་བུ་མ་ཐོབ་པར་དེ་ཐོབ་ཕྱིར་དུ་བརྩོན་པའི་སྦྱོར་བ་ལ་གནས་པའི་རབ་ཏུ་ཕྱེ་བའི་ཞུགས་པ་དེ་ཡིན་ཏེ། ཀུན་བཏུས་ས་འགྲེལ་ལས། ལན་ཅིག་ཕྱིར་འོང་བའི་འབྲས་བུ་ལ་འཇུག་པ་གང་ཞེ་ན། གང་སྔར་རྒྱུན་ཞུགས་ཐོབ་པའི་རྗེས་སུ་འཇིག་རྟེན་པའམ་འཇིག་རྟེན་ལས་འདས་པའི་སྒོམ་པའི་ལམ་གང་རུང་ལ་འདོད་པ་ན་སྤྱོད་པའི་སྒོམ་སྤང་ཉོན་མོངས་པ་རྣམས་ཀྱི་རྣམ་པ་ལྔ་པ་འབྲིང་པོའི་འབྲིང་པོ་སྤངས་པའི་ལམ་ལ་གནས་པའི་གང་ཟག་གོ་ཞེས་པ་སྟེ། རྣམ་པ་ལྔ་ཡི་བར་བཅོམ་པ། །གཉིས་པ་ལ་ནི་ཞུགས་པ་ཡིན། །ཞེས་གསུངས་པ་ལྟར་རོ། །མཚན་གཞི་ནི། ཕྱིར་འོང་གི་འབྲས་བུ་མ་ཐོབ་པར་དེ་ཐོབ་ཕྱིར་དུ་བརྩོན་པའི་འདོད་ཉོན་དང་པོའི་དངོས་གཉེན་ལ་གནས་པའི་འཕགས་པ་ལྟ་བུའོ། །དབྱེ་ན། ཆགས་བྲལ་སྔོན་སོང་གི་ཕྱིར་འོང་ཞུགས་པ་དང་འབྲས་ བུ་རིམ་གྱིས་པའི་ཕྱིར་འོང་ཞུགས་པ་གཉིས་སོ། །ཕྱིར་འོང་འབྲས་གནས་ཀྱི་མཚན་ཉིད། འདོད་ཉོན་དྲུག་པ་སྤངས་པའི་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ལ་གནས་པའི་འཕགས་པ་དེ་ཡིན་ཏེ། ཀུན་བཏུས་ས་འགྲེལ་ལས། ལན་ཅིག་ཕྱིར་འོང་བའི་གང་ཟག་གང་ཞེ་ན། གང་སྒོམ་པའི་ལམ་གང་ཡང་རུང་བ་ལ་འདོད་པ་ན་སྤྱོད་པའི་སྒོམ་སྤང་ཉོན་མོངས་པ་རྣམས་ཀྱི་རྣམ་པ་དྲུག་པ་འབྲིང་པོའི་ཆུང་ངུ་སྤངས་པའི་ལམ་ལ་གནས་པའི་གང་ཟག་གོ་ཞེས་པ་སྟེ། རྣམ་པ་དྲུག་པ་ཟད་གྱུར་པ། །དེ་ནི་ལན་ཅིག་ཕྱིར་འོང་བའོ། །ཞེས་གསུངས་པ་ལྟར་རོ། །སྒྲ་བཤད་ནི། ཀུན་བཏུས་ས་འགྲེལ་ལས། སྤང་བྱ་ལྷག་མ་སྤང་བའི་ཆེད་དུ་འདོད་ཁམས་སུ་ལན་ཅིག་སྐྱེ་བས་ན་ལན་ཅིག་ཕྱིར་འོང་བ་དང༌། ཞེས་གསུངས་སོ། །ས་མཚམས་ནི། འབྲས་བུ་ཐོད་རྒལ་བའི་ཕྱིར་འོང་ནི་ཐེག་དམན་གྱི་མཐོང་ལམ་བཅུ་དྲུག་པ་ལམ་རྗེས་ཤེས་ནས་འདོད་ཉོན་དགུ་བ་སྤངས་ཁའི་བར་རོ། །འབྲས་བུ་རིམ་གྱིས་པའི་ཕྱིར་འོང་ནི། འདོད་ཉོན་དྲུག་པ་ཆགས་བྲལ་བྱས་པའམ་སྤངས་པ་ནས་འདོད་ཉོན་དགུ་བ་སྤང་ཁའི་བར་རོ། ། ཕྱིར་མི་འོང་ཞུགས་པའི་མཚན་ཉིད། ཕྱིར་མི་འོང་གི་འབྲས་བུ་མ་ཐོབ་པར་དེ་ཐོབ་ཕྱིར་དུ་བརྩོན་པའི་སྦྱོར་བ་ལ་གནས་པའི་རབ་ཏུ་ཕྱེ་བས་ཞུགས་པ་ཡིན་ཏེ། ཀུན་བཏུས་ས་འགྲེལ་ལས། ཕྱིར་མི་འོང་བའི་འབྲས་བུ་ལ་འཇུག་པ་གང་ཞེ་ན། གང་ཕྱིར་འོང་ཐོབ་ནས་འཇིག་རྟེན་པའམ་འཇིག་རྟེན་ལས་འདས་པའི་སྒོམ་པའི་ལམ་གང་ཡང་རུང་བ་ལ་འདོད་པ་ན་སྤྱོད་པའི་སྒོམ་སྤང་ཉོན་མོངས་པ་རྣམ་པ་བདུན་པ་ཆུང་ངུའི་ཆེན་པོ་དང་བརྒྱད་པ་ཆུང་ངུའི་འབྲིང་པོ་སྤངས་བའི་ལམ་ལ་གནས་པའི་གང་ཟག་གོ །ཞེས་གསུངས་སོ། །མཚན་གཞི་ནི། ཕྱིར་མི་འོང་གི་འབྲས་བུ་མ་ཐོབ་པར་དེ་ཐོབ་ཕྱིར་དུ་བརྩོན་པའི་འདོད་ཉོན་བདུན་པའི་དངོས་གཉེན་དུ་གནས་པའི་འཕགས་པ་ལྟ་བུའོ། །ཕྱིར་མི་འོང་འབྲས་གནས་ཀྱི་མཚན་ཉིད། འདོད་ཉོན་ཐ་མའི་ཆ་མཐུན་ལྔ་སྤངས་པའི་རབ་ཏུ་ཕྱེ་བའྀ་དགེ་སྦྱོང་ཚུལ་གྱི་འབྲས་བུ་ལ་གནས་པའི་འཕགས་པ་དེ་ཡིན་ཏེ། ཡུམ་བརྒྱད་སྟོང་པ་ལས། གང་ཟག་འདི་ནི་ཐ་མའི་ཆ་དང་མཐུན་པའི་ཀུན་ཏུ་སྦྱོར་བ་ལྔ་སྤངས་པས་ཕྱིར་མི་འོང་བ་ཞེས་བྱའོ། །ཞེས་དང༌། ཀུན་བཏུས་ས་འགྲེལ་ལས། ཕྱིར་མི་འོང་བའི་གང་ཟག་གང་ཞེ་ན། གང་སྒོམ་པའི་ལམ་གང་ཡང་རུང་བ་ལ་འདོད་པ་ན་སྤྱོད་པའི་སྒོམ་སྤང་ཉོན་མོངས་པ་རྣམ་པ་དགུ་པ་ཆུང་ངུའི་ཆུང་ངུའང་སྤངས་པའི་ལམ་ཡོངས་སུ་རྫོགས་པ་ལ་གནས་པའི་གང་ཟག་གོ །དེ་དག་ཀྱང༌། ཉེས་ཆ་བདུན་དང་བརྒྱད་ཟད་པ། །ཚེ་གཅིག་བར་ཆད་གཅིག་པ་དང༌། གསུམ་པ་ལ་ནི་ཞུགས་པ་ཡིན། །དེ་དགུ་ཟད་པ་ཕྱིར་མི་འོང༌། །ཞེས་པ་ལྟར་རོ། །ཐ་མའི་ཆ་མཐུན་ལྔ་ཡོད་དེ། འདོད་པའི་ཀུན་སྦྱོར་གསུམ་དང་འདོད་པ་ལ་འདུན་པའི་འདོད་ཆགས། གནོད་སེམས་དང་ལྔ་བོ་དེ་ཡིན་ཏེ། ཀུན་བཏུས་ས་འགྲེལ་ལས། ཀུན་སྦྱོར་ལྔ་བོ་ཕྱིར་མི་འོང་གི་སྤང་བྱའི་གཙོ་བོ་ཡིན་ལ་དེ་དག་དངོས་སུ་བསྡུས་ནས་བསྟན་པའི་ཤུགས་ལ་གཞན་རྣམས་ཀྱང་མཚོན་པའི་ཕྱིར་རོ། །དེ་ལ་ཅིའི་ཕྱིར་ཀུན་སྦྱོར་ལྔ་པོ་སྤང་བྱའི་གཙོ་བོ་ཞེས་བྱ་ཞེ་ན། འཇིག་ལྟ་དང་མཆོག་འཛིན་དང་ཐེ་ཚོམ་གསུམ་ནི་འགྲོ་བ་ཐ་མ་ངན་སོང་གསུམ་ལས་མི་འདའ་བའི་རྒྱུ་ཡིན་པ་དང༌། འདོད་ཡོན་ལ་འདུན་པ་དང་གནོད་སེམས་ནི་ཁམས་ཐ་མར་འདོད་ཁམས་ལས་མི་འདའ་བའི་རྒྱུ་ཡིན་པའི་ཕྱིར་རོ། །ཡང་ཕྱི་མ་གཉིས་ཀྱིས་འདོད་ཁམས་ལས་མི་འདའ་ཞིང༌།ཅི་སྟེ་འདས་ཀྱང་དང་པོ་གསུམ་གྱིས་ཟློག་པར་བྱེད་པས་ཀྱང་གཙོ་བོ་ཞེས་བྱ་སྟེ། གཉིས་ཀྱིས་འདོད་ལས་མི་འདའ་ལ། །གསུམ་པོ་ཡིས་ནི་ཟློག་པར་བྱེད། །ཅེས་པ་ལྟར་རོ། །སྒྲ་བཤད་པ་ནི། ཀུན་བཏུས་ས་འགྲེལ་ལས། སྤང་བྱ་ཟད་པའི་ཕྱིར་ལན་ཅིག་ཀྱང་མི་སྐྱེ་བས་ན་ཕྱིར་མི་འོང་བ་དང༌། ཞེས་གསུངས་སོ། །དགྲ་བཅོམ་ཞུགས་པའི་མཚན་ཉིད། དགྲ་བཅོམ་པའི་འབྲས་གནས་ཐོབ་ཕྱིར་དུ་བརྩོན་པའི་རབ་ཏུ་ཕྱེ་བའི་ཞུགས་པ་དེ་ཡིན་ཏེ། ཀུན་བཏུས་ས་འགྲེལ་ལས། དགྲ་བཅོམ་པའི་འབྲས་བུ་ལ་འཇུག་པ་གང་ཞེ་ན། གང་ཕྱིར་མི་འོང་ཐོབ་ནས་སྲིད་པའི་རྩེ་མོའི་སྒོམ་སྤང་ཉོན་མོངས་པའི་རྣམ་པ་བརྒྱད་པ་ཆུང་ངུའི་འབྲིང་པོ་མན་ཆད་སྤངས་པའི་ལམ་ལ་གནས་པའི་གང་ཟག་གོ །དེའང་སྲིད་རྩེའི་བར་ཆ་བརྒྱད་ཟད་པ། །དགྲ་བཅོམ་ཉིད་ལ་ཞུགས་པ་ཡིན། །ཞེས་གསུངས་པ་ལྟར་རོ། །འོན་ཀྱང་ཀུན་བཏུས་ས་འགྲེལ་གྱི་ལུང་འདི་ནི་ཀུན་བཏུས་ཀྱི་གཞུང་གི་དངོས་ཟིན་གྱི་འབྲས་བུ་མཐར་གྱིས་པའི་དབང་དུ་བྱས་པའོ། །དགྲ་བཅོམ་འབྲས་གནས་ཀྱི་མཚན་ཉིད། གོང་མའི་ཆ་མཐུན་ལྔ་སྤངས་བའི་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ལ་གནས་པའི་དགེ་འདུན་དེ་ཡིན་ཏེ། ཀུན་བཏུས་ས་འགྲེལ་ལས། དགྲ་བཅོམ་པ་གང་ཞེ་ན། གང་རྡོ་རྗེ་ལྟ་བུའི་ཏིང་ངེ་འཛིན་ལ་བརྟེན་ནས་སྲིད་པའི་རྩེ་མོའི་སྒོམ་སྤང་ཉོན་མོངས་པའི་རྣམ་པ་དགུ་བ་ཆུང་ངུའི་ཆུང་ངུའང་སྤངས་པའི་རྣམ་གྲོལ་ལམ་ཡོངས་སུ་རྫོགས་པ་ལ་གནས་ཤིང་ཟད་པ་ཐོབ་པ་དང་ཤེས་པའི་གང་ཟག་གོ །ཞེས་པ་སྟེ། དགུ་བའི་བར་ཆད་མེད་ལམ་ཡང༌། །དེ་ནི་རྡོ་རྗེ་ལྟ་བུ་ཡིན། །དེ་ཟད་ཐོབ་དང་ཟད་པ་ཤེས། །དེ་ཚེ་དེ་མི་སློབ་དགྲ་བཅོམ། །ཞེས་པ་ལྟར་རོ། །ལུང་འགལ་སྤང་བ་ནི། གང་གི་ཚེ་འདི་ཁམས་གསུམ་ན་སྤྱོད་པའི་ཉོན་མོངས་པའི་རྣམ་པ་ཐམས་ཅད་སྤངས་པས་དགྲ་བཅོམ་པར་འགྱུར་བ་ཡིན་ན། ཅིའི་ཕྱིར་ལུང་དུ། ཁམས་གོང་མ་གཉིས་འགྲུབ་པའི་ཆ་དང་མཐུན་པའི་ཀུན་ཏུ་སྦྱོར་བ། གཟུགས་དང་གཟུགས་མེད་ལས་སྐྱེས་པའི། །འདོད་ཆགས་གཉིས་རྒོད་ང་རྒྱལ་རྨོངས། །ཞེས་པ་ལྔ་སྤངས་པས་དགྲ་བཅོམ་པ་ཞེས་བྱའོ་ཞེས་གསུངས་པ་དང་མི་འགལ་ལམ་ཞེ་ན། མི་འགལ་ཏེ། ལྔ་པོ་དེ་དག་དགྲ་བཅོམ་གྱི་སྤང་བྱའི་གཙོ་བོ་ཡིན་ལ་དེ་དངོས་སུ་བསྡུས་ནས་བསྟན་པས་ཕལ་བ་ཐམས་ཅད་ཀྱང་སྤངས་པར་ཤུགས་ལས་འགྲུབ་པའི་ཕྱིར་རོ། །དེ་ལ་ཅིའི་ཕྱིར་གོང་མའི་ཆ་མཐུན་ལྔ་བོ་སྤང་བྱའི་གཙོ་བོ་ཞེས་བྱ་ཞེ་ན། གོང་མའི་འདོད་ཆགས་དག་ནི་དེ་དག་ཏུ་སྐྱེ་བ་ཉེ་བར་ལེན་རྒྱུ་ཡིན་པ་དང༌། རྒོད་པས་སྲེད་པ་དང༌། ང་རྒྱལ་གྱིས་ང་རྒྱལ་དང༌། མ་རིག་པས་ཐེ་ཚོམ་ཤས་ཆེ་བའི་བསམ་གཏན་པ་ཉིད་དུ་ཀུན་ནས་ཉོན་མོངས་པར་བྱེད་པ་དང༌། དེ་གསུམ་ནི་གོང་མ་དག་ལས་གོང་དུ་ཡོངས་སུ་མི་གཏོང་བའི་རྒྱུ་ཡིན་པའི་ཕྱིར་རོ། །ཞེས་གསུངས་པའི་ཕྱིར་རོ། །སྒྲ་བཤད་པ་ནི། ཀུན་བཏུས་ས་འགྲེལ་ལས། ཉོན་མོངས་པའི་དགྲ་མ་ལུས་པར་བཅོམ་ཞིང་མཆོད་པར་འོས་པས་ན་དགྲ་བཅོམ་པ་ཞེས་བྱའོ། །ཞེས་གསུངས་སོ། །འབྲས་བུ་བཞི་ཁམས་གང་དུ་ཐོབ་པ་ནི། ཀུན་བཏུས་ས་འགྲེལ་ལས། ཁམས་གང་དུ་ཐོབ་ཚུལ་ནི། འདོད་པར་གསུམ་ཐོབ་ཐ་མ་ནི། །གསུམ་དུའོ་གོང་ན་མཐོང་ལམ་མེད། །མི་སྐྱོ་ལུང་ལས་འདིར་རྩོམ་ཞིང༌། །དེར་མཐར་ཕྱིན་ཅེས་འབྱུང་ཕྱིར་རོ། །ཞེས་པ་ལྟར་འབྲས་བུ་དང་པོ་གསུམ་འདོད་ཁམས་སུ་ཐོབ་ཅིང་དགྲ་བཅོམ་ནི་ཁམས་གསུམ་ཅར་དུ་ཐོབ་པོ། །དེ་ལ་རྒྱུན་ཞུགས་དང་ཕྱིར་འོང་གཉིས་འདོད་པ་ལ་འདོད་ཆགས་དང་མ་བྲལ་བ་ལ་གོང་མར་མི་ཐོབ་པར་རིགས་མོད། ཕྱིར་མི་འོང་གོང་མར་མི་ཐོབ་པའི་རྒྱུ་མཚན་གང་ཞེ་ན། དེའི་རྒྱུ་མཐོང་ལམ་མེད་པའི་ཕྱིར་ཏེ་གཟུགས་མེད་ན་ཉན་པ་མེད་ཅིང༌། འོག་མ་ལ་མི་དམིགས་པའི་ཕྱིར་དང་གཟུགས་ཁམས་ན་ལམ་སྒོམ་པའི་རྒྱུ་འཁོར་བ་ལ་སྐྱོ་བ་མེད་པའི་ཕྱིར་དང༌། ལུང་ལས་ཀྱང༌། མྱ་ངན་ལས་འདས་པ་ལྔ་འདིར་རྩོམ་ཞིང་དེར་མཐར་ཕྱིན་པར་འགྱུར་རོ། །ཞེས་གསུངས་པའི་ཕྱིར་རོ། །དགེ་སྦྱོང་ཚུལ་དང་འབྲས་བུ་ནི། ཀུན་བཏུས་ས་འགྲེལ་ལས། དགེ་སྦྱོང་ཚུལ་ནི་དྲི་མེད་ལམ། །འབྲས་བུ་འདུས་བྱས་འདུས་མ་བྱས། །དེ་རྣམས་བརྒྱད་ཅུ་རྩ་དགུ་སྟེ། །གྲོལ་ལམ་ཟད་པ་རྣམས་དང་བཅས། །ཞེས་པ་ལྟར་ཉོན་མོངས་ཞི་བར་བྱེད་པའི་དགེ་སྦྱོང་གི་ཚུལ་ནི་ཟག་པ་མེད་པའི་ལམ་ཡིན་ལ། དེའི་འབྲས་བུ་གྲོལ་ལམ་རྣམས་ནི་འདུས་བྱས་དང་ཉོན་མོངས་པ་ཟད་པའི་ཆ་རྣམས་ནི་འདུས་མ་བྱས་ཡིན་ཞིང༌། དེ་དག་ལ་ཕྱེ་ན་མཐོང་སྤང་སྤོང་བའི་བར་ཆད་མེད་ལམ་དང་རྣམ་གྲོལ་ལམ་བརྒྱད་དང༌། སྒོམ་སྤང་སྤོང་བའི་ལམ་བརྒྱད་ཅུ་རྩ་གཅིག་སྟེ་བརྒྱད་ཅུ་རྩ་དགུའོ། །འདིར་ནི་གྲངས་དེ་ལྟར་གཅིག་མཐའ་གཅིག་ཏུ་ངེས་པར་མི་འདོད་དེ། གཅིག་ཅར་བ་ལ་སྒོམ་ལམ་དགུ་ལས་མེད་ཅིང་མཐོང་ལམ་ཡང་བར་ཆད་མེད་ལམ་བཞིར་འདུ་བའི་ཕྱིར་རོ། །ཞེས་གསུངས་སོ། །ཚེ་དུ་ལ་འགྲུབ་པ་ནི། ཀུན་བཏུས་ས་འགྲེལ་ལས། ཚེ་དུ་ལ་འགྲུབ་ཚུལ་ནི། མྱུར་བ་སྲིད་པ་གསུམ་གྱིས་ཐར། །ཞེས་པ་ལྟར་ས་བོན་འདེབས་པ་དང་མྱུ་གུ་སྐྱེ་བ་དང་འབྲས་བུ་སྨིན་པ་གསུམ་འབྱུང་བ་བཞིན་དུ་ཚེ་དང་པོ་ལ་ཚོགས་ལམ་དང་གཉིས་པ་ལ་སྦྱོར་ལམ་དང་གསུམ་པ་ལ་འཕགས་ལམ་རྣམས་བསྐྱེད་ནས་གྲོལ་བ་སྲིད་ཅིང༌། བུལ་བ་ལ་ནི་ངེས་པ་མེད་དེ་ཕྱིར་མི་འོང་དུ་གྱུར་ནས་ཀྱང་སྐྱེ་བ་མང་པོ་ལེན་པ་ལྟ་བུའོ། །མཛོད་ལས་དགེ་སྦྱོང་ཚུལ་གྱི་འབྲས་བུ་ལ་བཞི་རུ་རྣམ་པར་བཞག་པའི་རྒྱུ་མཚན་ནི། རྒྱུ་མཚན་རྣམ་པ་ལྔ་ལྔས་བཞག་པ་ཡིན་ཏེ། རྒྱུ་མཚན་ལྔ་བོ་དེ་དག་ནི་འབྲས་གནས་བཞི་ལ་སྲིད་ཀྱི་གཞན་ལ་མི་སྲིད་པའི་ཕྱིར་རོ། །འབྲས་གནས་བཞི་བོ་གང་རུང་འཇོག་པ་ལ་སྔོན་དུ་རང་རང་གི་ཞུགས་ལམ་བཏང་བ་དང༌། རང་གི་ཞུགས་ལམ་ལས་གཞན་རང་རང་གི་འབྲས་གནས་ཀྱི་ལམ་ཐོབ་པ་དང༌། རང་གི་སྤང་བྱ་ཟད་པ་ཕྱོགས་གཅིག་ཏུ་སྡོམ་པ་ཐོབ་པ་དང༌། ཤེས་པ་བརྒྱད་ཚན་ཚང་བར་ཐོབ་པ་དང༌། བདེན་བཞི་མི་རྟག་བཅུ་དྲུག་མངོན་སུམ་དུ་རྟོགས་པའི་ཡེ་ཤེས་རྣམ་པ་བཅུ་དྲུག་ཐོབ་པ་དགོས་པའི་ཕྱིར་ཏེ། མཛོད་ལས། འབྲས་བུ་བཞི་རྣམ་བཞག་པ་ནི། །རྒྱུ་ལྔ་དག་ནི་སྲིད་ཕྱིར་རོ། །འབྲས་ལ་སྔོན་དུ་བཏང་བ་དང༌། །གཞན་ཐོབ་པ་དང་ཟད་སྡོམ་དང༌། །ཤེས་པ་བརྒྱད་ཚན་ཐོབ་པ་དང༌། །རྣམ་པ་བཅུ་དྲུག་ཐོབ་པའོ། །ཞེས་གསུངས་སོ། །འབྲས་བུ་དེ་དག་ནི་དབང་པོ་ཉེར་གཉིས་ལས་དུས་ཐོབ་ནི། མཛོད་ལས། འབྲས་བུ་ཐ་མ་གཉིས་དགུས་འཐོབ། །གཉིས་ནི་བདུན་དང་བརྒྱད་དང་དགུས། །བཅུ་གཅིག་དག་གིས་དགྲ་བཅོམ་ཉིད། །འགའ་ཞིག་སྲིད་ཕྱིར་བཤད་པ་ཡིན། །ཞེས་བྱེ་བྲག་སྨྲ་བའི་ལུགས་ལ་དེ་ལྟར་གསུངས་སོ། །