གཉིས་པ་བར་ཆད་དུ་འགྱུར་པའི་ལྡོག་པ་ནས་སྤྱིར་བཏང་ལ་དངོས་པོ།

གཉིས་པ་བར་ཆད་དུ་འགྱུར་པའི་ལྡོག་པ་ནས་སྤྱིར་བཏང་ལ་དངོས་པོ་གཙོ་སྟེ།

གླེང་གཞི་ལས། བར་ཆད་གེགས་ཡིན་གྱི་ཁས་ལེན་པ་གེགས་མ་ཡིན། ཞེས་གསུངས་ཏེ།དེའི་གནད་ཀྱིས་འདིར་ཡང་བར་ཆད་གེགས་ཡིན་གྱི་དེར་འདུ་ཤེས་པ་གེགས་མ་ཡིན་ཞེས་སྦྱར་ཏེ། རྒྱུ་མཚན་མཚུངས་པ་ཡིན་པའི་ཕྱིར་རོ། །དམིགས་བསལ་ནི་དངོས་པོ་ལ་ལོ་ཉི་ཤུ་མ་ལོན་ཡང་ལོན་པར་འདུ་ཤེས་ན་འདུ་ཤེས་གཙོ་བོ་སྟེ། གཅིག་ཤོས་ལ་ནི་ལོན་པར་འདུ་ཤེས་ཉིད་ནའོ། །ཞེས་དང༌། ཊཱི་ཀ་ལས། ལོ་ཉི་ཤུ་མ་ལོན་པ་ལ་ལོ་ཉི་ཤུ་ལོན་པ་ཉིད་དུ་ཤེས་ན་བསྙེན་པར་རྫོགས་པ་འཆགས་ཏེ། འདི་ལ་ནི་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །ཞེས་སོ། །འོན་ཀྱང་དངོས་པོ་ལ་ལོ་ཉི་ཤུ་ལོན་ན་ནི་མ་ལོན་པར་འདུ་ཤེས་ན་ཡང་དངོས་པོ་གཙོ་བོ་སྟེ། རྣམ་པ་ཐམས་ཅད་དུ་ལོ་ཉི་ཤུ་ལོན་པ་ལ་ནི་བསྙེན་པར་རྫོགས་པ་འཆགས་སོ། །ཞེས་དང༌། ཊཱི་ཀ་ལས། དེའི་ཚེ་འདུ་ཤེས་གཙོ་ཆེར་བྱེད་པ་པོ་ཉིད་མེད་དེ། འདི་ལྟར་བསྙེན་པར་རྫོགས་པར་བྱེད་པ་དག་ལོ་ཉི་ཤུ་མ་ལོན་པ་ཉིད་དུ་འདུ་ཤེས་སུ་ཟིན་ཀྱང༌། གང་ཟག་ལོ་ཉི་ཤུ་ལོན་པ་ལ་བསྙེན་པར་རྫོགས་པ་འཆགས་ཏེ། ལོ་ཉི་ཤུ་ལོན་པའི་ཞིང་ཉིད་ལ་ཉམས་པར་བྱ་བ་མི་ནུས་པའི་ཕྱིར་རོ། །ཞེས་སོ། །