ཞལ་གདམས་ཐར་ལམ་འཇུག་སྒོ། ཨ་རིག་པན་ཆེན་པདྨ་ཚེ་དབང་།

༄༅། །ཞལ་གདམས་ཐར་ལམ་འཇུག་སྒོ་ཞེས་བྱ་བ་བཞུགས། རྨད་བྱུང་དལ་བའི་རྟེན་བཟང་ཕུན་ཚོགས་ཉིད། །ངེས་ལེགས་བྱང་ཆུབ་གསུམ་གྱི་གཞི་ཡིན་པས། །ད་རེས་ལན་གཅིག་ཐོབ་པའི་ལུས་མཆོག་འདི། །དོན་མེད་རྣམ་གཡེང་བྱེད་པར་འོས་སམ་ཅི། །རྣམ་དག་འདུལ་ཁྲིམས་གཙང་མའི་ལྗོན་བཟང་ཉིད། །ལེགས་བྱས་སྦྱིན་པ་རྒྱ་མཚོའི་དྲོད་གཤེར་དང་། །རྨད་བྱུང་སྨོན་ལམ་མཆོག་གིས་ཡོངས་བསྐྱང་ན། །ད་གཟོད་དལ་བའི་རྟེན་འདི་རྙེད་པ་ཡིན། །དུད་འགྲོ་ལ་སོགས་ངན་སོང་གསུམ་གྱི་གྲངས། །ས་ཆེན་རྡུལ་དང་མཉམས་པར་ཕ་མཐའ་ཡས། །དེ་ལ་ལྟོས་ན་མི་ལུས་ཐོབ་པ་འདི། །སེན་མོའི་སྟེང་དུ་ཡོད་པའི་རྡུལ་གྲངས་ཙམ། །མི་ལུས་ཙམ་དང་བྱུར་བོ་ཆེ་ལ་སོགས། །རྣམ་པར་གཡེང་དང་སྡིག་པའི་ལས་ཉིད་ལ། །རྙེད་དཀའི་རྟེན་འདི་ཆུད་ཟོས་མི་འོས་པས། །རང་ནུས་ཅི་ཡོད་རྣམ་དཀར་ལས་ལ་བརྩོན། །ངན་སོང་གསུམ་སོགས་མི་ཁོམས་བརྒྱད་པོ་རུ། །སྐྱེ་བའི་ལུས་རྟེན་དཔག་ཏུ་མེད་ན་ཡང་། །ཆོས་ཀྱི་སྣང་བ་མེད་ཅིང་ལོང་ཁོམ་མེད། །ད་རེས་དེ་འདྲར་མ་གྱུར་སྐལ་བ་བཟང་། །ལན་གཅིག་ཐོབ་པའི་མི་ལུས་འདི་ཉིད་ཀྱང་། །རླུང་གསེབ་མར་མེ་བཞིན་དུ་མི་རྟག་སྟེ། །དགྲ་གཉེན་ཕ་མ་སྲིད་སྡེ་ཡུལ་འཁོར་སོགས། །འཆི་ཞིང་མི་རྟག་དུས་ཀྱི་དབང་དུ་སོང་། །སྐྱེས་མཐའ་འཆི་ཞིང་འདུས་པའི་ཐ་མ་འབྲལ། །ཞེས་སོགས་བདེན་གསུང་རྒྱལ་བས་ཡང་ཡང་དུ། །གསུངས་པའི་ཚུལ་འདི་སེམས་ལ་ངེས་བྱས་ནས། །གཏན་གྱི་འདུན་ཆུས་ད་ནི་སྒྲུབ་རེ་རན། །ད་ལོ་སང་ཕོད་ལ་སོགས་ལོང་ཁོམས་ཀྱི། །ཕྱི་བཤོལ་ངང་རིང་བྱེད་འོས་མ་ཡིན་ཏེ། །འཇིགས་རུང་གཤིན་རྗེ་གདུག་པས་སྲོག་སྡུད་ཚེ། །ཆོས་ལས་སྐྱབས་གཞན་མི་རྙེད་ཚུལ་ལ་སོམ། །མ་ཡི་ལུས་ནས་ཐོག་མ་སྐྱེས་དུས་ཀྱི། །ལུས་ཀྱི་ཤ་རུས་སོ་སོར་འབྲལ་དགོས་ན། །ལོངས་སྤྱོད་གཉེན་དང་འབྲལ་བ་སྨོས་ཅི་དགོས། །དེ་བས་ད་ནི་ཞེན་ཆགས་སྤོངས་བར་གྱིས། །དཔྱིད་དུས་ས་བོན་ཅི་བཏབ་དེ་འདྲ་བར། །སྟོན་དུས་ལོ་ཐོག་སྨིན་པ་ཇི་བཞིན་དུ། །དགེ་སྡིག་དཀར་ནག་ལས་ཀྱི་འབྲས་བུ་ཡང་། །བདེ་སྡུག་བསླུ་མེད་སོ་སོར་སྨིན་པར་ངེས། །བྱ་རྒོད་ནམ་མཁར་འཕུར་བའི་གྲིབ་མ་ཉིད། །རེ་ཞིག་འདི་ཞེས་མངོན་པར་མ་གྱུར་ཀྱང་། །ས་ལ་ནམ་བབ་དུས་ན་ལྷང་ངེར་མངོན། །དེ་བཞིན་དགེ་སྡིག་ལས་ཀྱི་འབྲས་བུ་ཡང་། །ཆུད་མི་ཟ་བར་ནམ་ཞིག་རྐྱེན་ཚོགས་ཚེ། །རང་གིས་མྱོང་བར་འགྱུར་ལ་བསླུ་བ་མེད། །འཁོར་བའི་གནས་རིས་མཐོ་དམན་གར་སྐྱེས་ཀྱང་། །སྡུག་བསྔལ་སྣ་ཚོགས་དུཿཁས་མནར་བས་ན། །སྲིད་པའི་ཕུན་ཚོགས་ཅི་ཙམ་འབྱོར་ན་ཡང་། །ཟག་བཅས་དཔལ་ལ་སྙིང་པོ་གང་ཡང་མེད། །ཚངས་དབང་འཁོར་ལོས་བསྒྱུར་བའི་རྒྱལ་བོ་ཡང་། །འཆི་བའི་སྡུག་བསྔལ་དག་ལས་བཤོལ་ཐབས་མེད། །ཤི་ནས་དབང་མེད་ལས་རྗེས་འབྲང་དགོས་ན། །སྲིད་པའི་ཕུན་ཚོགས་གཞན་རྣམས་སྨོས་ཅི་དགོས། །སྲིད་གསུམ་མི་རྟག་སྒྱུ་མའི་གྲོང་ཁྱེར་བཞིན། །གཡོ་དང་སྡུག་བསྔལ་ངང་ཚུལ་བསམ་བྱས་ནས། །གཏན་གྱི་བདེ་བའི་འདུན་མ་ཐར་བ་ཉིད། །ད་རེས་རྟེན་བཟང་འདི་ལ་སྒྲུབ་རེ་རན། །རྣམ་མང་ཐེག་པའི་ཆོས་སྒོ་མཐའ་ཡས་ཀྱང་། །ཐོག་མར་དཀོན་མཆོག་རིན་ཆེན་རྣམ་གསུམ་ལ། །ཡིད་ཆེས་དད་པས་སྐྱབས་སུ་འགྲོ་བ་ཉིད། །ལམ་གྱི་གཞི་མ་སྔོན་ལ་མེད་ཐབས་མེད། །ཐོག་མེད་དུས་ནས་དྲིན་གྱིས་བསྐྱངས་བ་ཡི། །མ་རྒན་འགྲོ་ཚོགས་ཡལ་བར་དོར་བྱས་ནས། །རང་ཉིད་གཅིག་པུ་ཞི་བདེ་སྒྲུབ་འོས་མིན། །དེས་ན་གཞན་ཕན་དོན་གཉེར་འདུན་པ་གནད། །མདོ་སྔགས་ཆོས་ཚུལ་རྒྱ་མཚོའི་ཡང་བཅུད་མཆོག །མཆོག་དམན་སུས་ཀྱང་ཉམས་འོག་ཆུད་སླ་བ། །དཀྱིལ་འཁོར་རྒྱ་མཆོའི་མངའ་བདག་གུ་རུ་ལ། །སྙིང་ནས་དད་པས་གསོལ་འདེབས་ཐུགས་དམ་བསྐུལ། །ཡིད་ཆེས་དད་པ་བརྟན་པོའི་གུ་རུ་ཉིད། །སྐྱབས་ཀུན་འདུས་པའི་ངོ་བོར་ཐག་བཅད་ནས། །ཡང་སྙིང་བཛྲ་གུ་རུ་གྲངས་མང་བསགས། །ཐོག་མེད་བསགས་པའི་ལས་ཉོན་སྡིག་སྒྲིབ་ཀུན། །བཤགས་དང་མཆོག་ཐུན་དངོས་གྲུབ་མཐའ་དག་ཀུན། །སྩོལ་ལ་བདག་རྒྱུད་བྱིན་གྱིས་རློབས་ཤིག་ཅེས། །ཁྱེད་ཤེས་དད་པས་གསོལ་བ་འདེབས་ལ་འབུངས། །བླ་མ་ཨོ་རྒྱན་རྗེ་ལ་གསོལ་བཏབ་ན། །ཚེ་འདིར་རྐྱེན་ངན་ཀུན་སེལ་ཚེ་རིང་ཞིང་། །མཐུན་རྐྱེན་བསམ་དོན་ཅི་བཞིན་ལེགས་གྲུབ་ནས། །ཕྱི་མར་པདྨ་འོད་ཞིང་སྐྱེ་བར་ངེས། །སྙིགས་ལྔའི་འགྲོ་ལ་ལྷག་པར་རྗེས་བརྩེ་བ། །སྙིང་རྗེའི་མངའ་བདག་འཕགས་མཆོག་སྤྱན་རས་གཟིགས། །བདག་སོགས་སྲིད་པའི་སྡུག་བསྔལ་སྣ་ཚོགས་ལས། །གྲོལ་བར་གསོལ་བ་འདེབས་བཞིན་ཡང་སྙིང་སྒྲོངས། །དེས་ན་རྒྱལ་བ་དངོས་འདྲའི་དམ་པས་ཀྱང་། །ལྷ་གཅིག་རྒྱལ་བ་ཀུན་འདུས་སྤྱན་རས་གཟིགས། །སྔགས་གཅིག་སྙིང་བོ་ཀུན་འདུས་ཡི་གེ་དྲུག །ཆོས་གཅིག་བསྐྱེད་རྫོགས་ཀུན་འདུས་བྱང་ཆུབ་སེམས། །གསུངས་པའི་ཚུལ་ལ་ཡང་ཡང་བསམ་ཞིང་འབད། །བསྐལ་བཟང་རྣམ་འདྲེན་བཞི་བ་གང་དེ་ཡིས། །བདག་ཅག་གངས་ཅན་འགྲོ་བ་མཐའ་དག་ཀུན། །འཕགས་མཆོག་སྤྱན་རས་གཟིགས་ཀྱི་གདུལ་ཞིང་དུ། །ལུང་བསྟན་བྱིན་རླབས་མཛད་པ་བསླུ་མེད་གསུང་། །དེས་ན་བདག་ཅག་བསིལ་ལྡན་བོད་ཀྱི་འགྲོ། །འཕགས་མཆོག་སྤྱན་རས་གཟིགས་ཀྱིས་བྱིན་བརླབས་པས། །མ་མིང་དག་པར་མི་འཐོན་བྱིས་པས་ཀྱང་། །རིག་སྔགས་ཡི་གེ་དྲུག་པ་གཙང་སིང་ཐོན། །བོད་ཀྱི་འགྲོ་བའི་ལྷ་སྐལ་སྤྱན་རས་གཟིགས། །ཆོས་སྐལ་རིག་སྔགས་ཡི་གེ་དྲུག་མ་ཡིན། །ཕྱི་མ་དག་པའི་ཞིང་ཁམས་བདེ་བ་ཅན། །སྐྱེ་བར་འདོད་པས་ལྷ་སྔགས་གཅིག་ཏུ་དྲིལ། །རྩ་གསུམ་རྒྱལ་བ་ཀུན་དང་དབྱེར་མེད་པ། །རིག་སྔགས་འཆང་བའི་སློབ་དཔོན་ཆེན་པོ་ཡང་། །འཕགས་མཆོག་སྤྱན་རས་གཟིགས་དང་དབྱེར་མེད་པས། །བླ་མ་ཡི་དམ་དབྱེར་མེད་གསོལ་འདེབས་འབུངས། །བརྒྱད་ཁྲི་བཞི་སྟོང་ཆོས་ཚུལ་མཐའ་དག་གི། །སྙིང་པོ་གསུང་མཆོག་ཡི་གེ་དྲུག་མ་ཡིན། །འཕགས་མཆོག་སྤྱན་རས་གཟིགས་ཀྱི་སྙིང་པོ་འདི། །རྩེ་གཅིག་དད་པའི་ངང་ནས་ཡིག་དྲུག་སྒྲོངས། །དེ་ལྟར་དད་མོས་རྣམ་དག་ལྷག་བསམ་གྱིས། །རིགས་སྔགས་རྒྱལ་པོ་བགྲང་བའི་དགེ་རྩ་ཀུན། །མ་གྱུར་འགྲོ་བ་ཀུན་ལ་བསྔོ་བ་འདི། །གཞན་ཕན་ཐེག་ཆེན་ལམ་གྱི་རྩ་བ་ཡིན། །རྩ་གསུམ་རྒྱལ་བ་ཡོངས་ཀྱི་བྱིན་རླབས་དང་། །སྤྱན་རས་གཟིགས་དངོས་མཚོར་འཁྲུངས་རྒྱལ་བ་ཡིས། །བྱིན་བརླབས་བདེན་པས་འདི་ཕྱིར་དགའ་བདེ་ལ། །དུས་ཀུན་སྤྱོད་པས་དགེ་ཞིང་ཤིས་གྱུར་ཅིག །ཅེས་པ་འདིའང་མཁན་ཆེན་བླ་མ་དགེ་ལེགས་ཆོས་འཕེལ་མཆོག་གི་ཞལ་གསུང་ལགས།