ཐུན་གཏོར།
༄༅།། ཐུན་གཏོར་ནི། དམར་གཏོར་ཤ་ཁྲག་གིས་བརྒྱན་པ་བཤམས་ཤིང་དགྲ་བགེགས་འགུགས་བསྟིམ་སྤྱི་ལྟར་བྱ། རཾ་ཡཾ་ཁཾ༔བརྗོད་པས་སྟོང་པར་བསམ། སྟོང་པའི་ངང་ལས་གཏོར་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་རྫས་ཤ་ལྔ་བདུད་རྩི་ལྔ་ཞུ་བ་ལས། ངོ་བོ་ཟག་མེད་ཡེ་ཤེས་ཀྱི་བདུད་རྩི་ལ། རྣམ་པ་དགྲ་བགེགས་ཀྱི་ཤ་ཁྲག་རུས་པའི་ཕུང་པོ་སྟོང་གསུམ་གང་བ་འདོད་རྒུ་ཡིད་བཞིན་འབྱུང་བ་ཅན་དུ་གྱུར་པར་བསམ། རྩ་སྔགས་མཐར། ས་པཱ་རི་ཝ་ར་ཨེ་དཾ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི༔ ལན་གསུམ་གྱིས་ཕུལ༔ བཛྲ་པུཥྤེ་སོགས་ནས་ཤཔྟ་པཉྩ་ཨ་མྲྀ་ཏ་མ་ཧཱ་རཀྟ་ཁཱ་ཧི། ཞེས་མཆོད་ལ། བསྟོད་ཅིང་ཕྲིན་ལས་བཅོལ་བ་ནི། མཚན་ཐོས་ཙམ་གྱིས་བདུད་དགྲའི་འཇིགས་པ་ལས། །སྐྱབས་མཛད་མཆོག་ཐུན་དངོས་གྲུབ་སྩོལ་བའི་ལྷ། །རྒྱལ་ཀུན་ཕྲིན་ལས་དབང་ཕྱུག་འོད་ཟེར་ཅན། །གཙོ་འཁོར་སྤྲུལ་བར་བཅས་ལ་ཕྱག་འཚལ་བསྟོད། །གཟུང་འཛིན་དགྲ་བགེགས་མ་ལུས་དབྱིངས་སྒྲོལ་བའི། །ཤ་ཁྲག་རུས་པ་དོན་སྙིང་ནང་རོལ་ཚོགས། །རྨད་བྱུང་མཆོད་པའི་སྤྲིན་དུ་བྱིན་བརླབས་པའི། །དམ་རྫས་དམར་གྱི་གཏོར་མ་ཆེན་པོ་འདི། །དཔའ་མོ་འོད་ཟེར་ཅན་མ་འཁོར་བཅས་ལ། །འབུལ་ལོ་དགྱེས་པར་བཞེས་ནས་བདག་ཅག་གི། །ནད་གདོན་ཀུན་ཞི་ཚེ་བསོད་ཡོན་ཏན་རྒྱས། །མོས་པ་དབང་འདུས་ལོག་འདྲེན་ཚར་གཅོད་མཛོད། །ཁྱད་པར་བསྟན་དང་འགྲོ་བའི་བདེ་སྐྱིད་ལ། །བར་ཆད་རྩོམ་པའི་གཟུགས་ཅན་གཟུགས་མེད་ཀུན། །མངོན་སྤྱོད་རོལ་པ་དྲག་པོའི་ཕྲིན་ལས་ཀྱིས། །མིང་ལྷག་མེད་པར་ཐལ་བ་རྡུལ་དུ་རློགས། །མདོར་ན་རྣལ་འབྱོར་དཔོན་སློབ་འཁོར་བཅས་ཀྱི། །ཆོས་དང་སྲིད་ཀྱི་འདོད་པའི་དོན་འབྲས་ཀུན། །ཇི་ལྟར་ཡིད་ལ་རེ་ཞིང་སྨོན་པ་བཞིན། །གེགས་མེད་ལྷུན་གྱིས་འགྲུབ་པའི་ཕྲིན་ལས་མཛོད། །ཅེས་སོ།། དགེའོ།།