ཞིང་དག་སྦྱོར་བ་བཤད་པ།
ཞིང་དག་སྦྱོར་བ་བཤད་པ། གཉིས་པ་ལོངས་སྐུའི་རྒྱུ་ཞིང་དག་པའི་སྦྱོར་བ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། དེའི་འོག་ཏུ་སངས་རྒྱས་ཀྱི་ཞིང་ཡོངས་སུ་དག་པའི་སྦྱོར་བ་འཆད་ཚུལ་ཡོད་དེ། སྲིད་ཞི་གཉིས་ཀ་བདེན་སྟོང་རྣམ་པར་སྒོམ་པ་ནི། རང་ཉིད་གང་དུ་འཚང་རྒྱ་འགྱུར་གྱི་རང་གི་སངས་རྒྱས་སུ་འགྱུར་བའི་དེ་ཤེས་པའི་ཆེད་ཡིན་པའི་ཕྱིར། གཉིས་པ་ནི། ས་བརྒྱད་པ་བ་ཆོས་ཅན། སངས་རྒྱས་ཀྱི་ཞིང་ནི་དག་པ་ཉིད་ཀྱི་དེ་ཐོབ་སྟེ། སེམས་ཅན་གྱི་འཇིག་རྟེན་དག་པར་སྒྲུབ་པ་དེ་བཞིན་དུ། སྣོད་ཀྱི་འཇིག་རྟེན་མ་དག་པ་དེ་ལ་དག་པར་སྒྲུབ་པའི་སྦྱོར་བ་ཐོབ་པའི་ཕྱིར། གསུམ་པ་ནི། དེ་ཆོས་ཅན། སངས་རྒྱས་ཀྱི་ཞིང་རྣམ་པར་དག་པའི་དེ་ཐོབ་པ་ཡིན་ཏེ། དགེ་བའི་མཐུས་སེམས་ཅན་དང་སྣོད་ཀྱི་འཇིག་རྟེན་གྱི་སངས་རྒྱས་ཀྱི་ཞིང་རྣམ་པ་གཉིས་ལ་གོ་རིམ་བཞིན་དུ་བཅུད་ཀྱི་ཞིང་བཀྲེས་པ་དང་སྐོམ་པ་
སོགས་ཀྱི་གཉེན་པོར་ལྷའི་ལོངས་སྤྱོད་ཉེ་བར་སྤྱད་པ་དང་། སྣོད་ཀྱི་ཞིང་རྡོ་བ་དང་ཚེར་མ་ཅན་ལ་སོགས་པ་ཉིད་ཀྱིས་མ་དག་པ་གང་ཡིན་པ་དེའི་གཉེན་པོར་གསེར་གྱི་ས་ཕྱོགས་ལ་ཨིནྡྲ་ནཱི་ལས་མིག་མངས་རིས་སུ་བྲིས་པ་ལ་སོགས་པ་དག་པ་བསྐྱེད་པའི་སྒོ་ནས་ཞིང་རྣམ་པར་དག་པའི་སྦྱོར་བ་ཐོབ་པའི་ཕྱིར།