གཉིས་པ་ཆགས་བྲལ་སྔོན་སོང་བཤད་པ།

གཉིས་པ་ཆགས་བྲལ་སྔོན་སོང་བཤད་པ་ལ།

སྤྱི་དོན་དང་མཐའ་རགས་ཙམ་དཔྱད་པ་དང་གཉིས། དང་པོ་ནི། མཛོད་ལས། དེ་ལ་སྐད་ཅིག་བཅོ་ལྔ་ནི། །མ་མཐོང་མཐོང་ཕྱིར་མཐོང་བའི་ལམ། །དབང་པོ་རྣོ་རྟུལ་དེ་དག་ཏུ། །དད་དང་ཆོས་ཀྱི་རྗེས་འབྲང་བ། །བསྒོམ་པས་སྤང་བྱ་མ་སྤངས་ན། །འབྲས་བུ་དང་པོ་ལ་ཞུགས་པ། །རྣམ་ལྔའི་བར་བཅོམ་གཉིས་པ་ལ། །དགུ་པ་ཚུན་ཆད་ཟད་པ་ཡིན། །འདོད་པའམ་ཡང་ན་གོང་མ་ལས། །ཆགས་བྲལ་གསུམ་པ་ལ་ཞུགས་པ། །གང་ཞིག་གང་ལ་ཞུགས་པ་ནི། །བཅུ་དྲུག་པ་ལ་དེ་འབྲས་གནས། །དེ་ཚེ་དབང་པོ་རྣོ་རྟུལ་དག །དད་པས་མོས་དང་མཐོང་བས་ཐོབ། །འབྲས་ཐོབ་འབྲས་བུ་ཁྱད་པར་གྱི། །ལམ་ཐོབ་མེད་པས་དེ་ཡི་ཕྱིར། །འབྲས་གནས་ཁྱད་པར་བྱ་བའི་ཕྱིར། །མི་བརྩོན་པ་ནི་ཞུགས་མ་ཡིན། །ཞེས་གསུངས་ལ། དེའི་དོན་ནི། མདོ་ལུགས་མ་ལས། དབང་པོ་རྣོ་རྟུལ་དེ༷་དག་མཐོང་ལམ་སྐ༷ད་ཅི༷ག་བཅོ༷་ལྔ༷་བཤད་པ་གང་ཡིན་པ་དེ་དག་ལ་གནས་པ་ནི༷་ད༷ད་པས་རྗེས་སུ་འབྲང་བ་ད༷ང་ཆོ༷ས་ཀྱི༷་རྗེ༷ས་སུ་འབྲ༷ང་བ༷འོ། །དེ་གཉིས་འཇིག་རྟེན་པའི་ལམ་གྱིས་སྔོན་སྒོམ་སྤང་མ་སྤངས་པ་དང༌། སྔོན་འདོད་པའི་སྒོམ་སྤང་ལྔའི་བར་དུ་སྤངས་ན་ཡང་འབྲས་བུ་རྣམས་ཀྱི་དང་པོ་རྒྱུན་དུ་ཞུགས་པའི་འབྲས་བུ་ལ་ཞུགས་པའོ། །མྱ་ངན་ལས་འདས་པའི་རྒྱུ་ནི་ལམ་སྟེ་དེ་ནས་དེར་འགྲོ་བའི་ཕྱིར་དེར་ཞུགས་ཤིང་ཕྱིན་ལ་སོན་པས་ན་རྒྱུན་དུ་ཞུགས་པ་ཡིན་ནོ། །གལ་ཏེ་དེ་གཉིས་ཀྱིས་འདོད་པའི་སྒོམ་སྤང་དྲུག་གམ་བདུན་ནམ་བརྒྱད་དག་གཅིག་སྔོན་སྤངས་ན་འབྲས་བུ་གཉིས་པ་ལན་གཅིག་ཕྱིར་འོང་གི་འབྲས་བུ་ལ་ཞུགས་པ་ཡིན་ནོ། །དགུ་པ་སྤངས་པའི་འདོ༷ད་པ༷་ལས་འདོད་ཆགས་དང་བྲལ་བའམ་གོ༷ང་མ༷་ཅི་ཡང་མེད་པ་སྐྱེ་མཆེད་ཀྱི་བར་ལ༷ས་འདོད་ཆ༷གས་དང་བྲ༷ལ་བ་ཡིན་ན་དེ་གཉིས་འབྲས་བུ་གསུ༷མ་པ༷་ཕྱིར་མི་འོང་གི་འབྲས་བུ་ལ༷་ཞུ༷གས་པ༷འོ། །སེམས་བཅུ༷་དྲུ༷ག་པ༷་སྐྱེས་ན་དེ་གཉིས་ད༷ད་པ༷ས་མོ༷ས་པ་ད༷ང་མཐོ༷ང་བ༷ས་ཐོ༷བ་པ་ཞེས་བྱ་བ་དང༌། འབྲས་བུ་དང་དེ་ལ་གནས་ཡིན་གྱི། དད་པ་དང་ཆོས་ཀྱི་རྗེས་སུ་འབྲང་བ་དང༌། ཞུགས་པ་ནི་མ་ཡིན་ནོ། །གལ་ཏེ་རྣམ་པ་ལྔའི་བར་དུ་སྤངས་ཀྱང་སེམས་བཅུ་དྲུག་པ་ལ་རྒྱུན་དུ་ཞུགས་པ་ཁོ་ན་ཡིན་གྱི། ལན་ཅིག་ཕྱིར་འོང་གི་འབྲས་བུ་ལ་ཞུགས་པ་མ་ཡིན་ཞེ་ན། གང་གི་ཕྱིར་འབྲ༷ས་བུ་ཐོ༷བ་ནས་འབྲ༷ས་བུ༷་ཁྱ༷ད་པ༷ར་ཅན་གྱི༷་ལ༷མ་མི་འཐོ༷བ་པ་དེ་ནི་ངེས་སོ། །དེ༷འི༷་ཕྱི༷ར་འབྲ༷ས་བུ་ལ་གན༷ས་པ་ཇི་སྲིད་དུ་ཁྱ༷ད་པ༷ར་དུ་བྱ༷་བ༷འི་ཕྱི༷ར་འབྲས་བུ་གཞན་ཐོབ་པར་བྱ་བ་ལ་མི༷་བརྩོ༷ན་པ༷་དེ་སྲིད་དུ་ཞུ༷གས་པ་མ༷་ཡི༷ན་ནོ། །དེ་བཞིན་དུ་འབྲས་བུ་གཞན་ལ་ཡང་སྦྱར་བར་བྱའོ། །ཞེས་གསུངས་སོ། །དེས་ན། ཆགས་བྲལ་སྔོན་སོང་གི་ཞུགས་འབྲས་རྣམས་ཀྱི་མཚན་ཉིད་བརྗོད་ན། ཆགས་བྲལ་སྔོན་སོང་གི་ཕྱིར་འོང་ཞུགས་པའི་མཚན་ཉིད། མཐོང་ལམ་གྱི་སྔར་འདོད་ཉོན་དྲུག་པ་ལ་ཆགས་བྲལ་བྱས་ནས་མཐོང་ལམ་ལ་གནས་པའི་ཕྱིར་འོང་གི་འབྲས་བུ་ཐོབ་ཕྱིར་དུ་བརྩོན་པའི་འཕགས་པ་དེ་ཡིན་ཏེ། ཉ་ཊཱིཀ་ལས། ཆགས་བྲལ་སྔོན་སོང་གི་ཕྱིར་འོང་ཞུགས་པར་མཚོན། ཕྱིར་འོང་ཆགས་བྲལ་སྔོན་སོང་གི་འབྲས་གནས་ཐོབ་ཕྱིར་བརྩོན་པའི་མཐོང་ལམ་པ། ཞེས་གསུངས་པའི་ཕྱིར་རོ། །ཆགས་བྲལ་སྔོན་སོང་གི་ཕྱིར་འོང་འབྲས་གནས་ཀྱི་མཚན་ཉིད། མཐོང་ལམ་གྱི་སྔར་འདོད་ཉོན་དྲུག་པ་ལ་ཆགས་བྲལ་བྱས་ཟིན་པའི་རྒྱུན་ཞུགས་ཀྱི་རྟོགས་པ་སྔོན་དུ་མ་བཏང་བའི་ཕྱིར་འོང་འབྲས་གནས་དེ་ཡིན་ཏེ། ཉ་ཊཱིཀ་ལས། དེ་འདྲའི་ངང་ནས་མཐོང་ལམ་ཐོབ་ནས་ད་ལྟ་བཅུ་དྲུག་པའི་རྟོགས་པ་ལ་གནས་བཞིན་པའི་གང་ཟག་གང་ཡང་རུང་བ། དེའི་འབྲས་གནས་ཏེ། དེ་དེའི་མཚན་ཉིད་དམ། ཡང་ན་དེ་འདྲ་མཚན་གཞི། ཕྱིར་འོང་ཆགས་བྲལ་སྔོན་སོང་འབྲས་གནས་སུ་མཚོན། རྒྱུན་ཞུགས་སྔོན་དུ་མ་བཏང་བའི་ཕྱིར་འོང་འབྲས་གནས་གང་ཞིགབཅུ་དྲུག་པའི་རྟོགས་པ་ལ་གནས་པའོ་ཞེས་པའོ། །རྒྱལ་བུའི་སྲས་ཀྱིས། འདི་ནི་རྒྱུན་དུ་ཞུགས་པའི་འབྲས་བུ་མ་ཐོབ་པ་ཁོ་ནར་སྐད་ཅིག་མ་བཅུ་དྲུག་པ་ཁོ་ན་ལ་ལན་གཅིག་ཕྱིར་འོང་པ་ཡིན་པར་འགྱུར་རོ། །ཞེས་སོ། །ཆགས་བྲལ་སྔོན་སོང་གི་ཕྱིར་མི་འོང་ཞུགས་པའི་མཚན་ཉིད། མཐོང་ལམ་གྱི་སྔོན་དུ་འདོད་ཉོན་དགུ་བ་ལ་ཆགས་བྲལ་བྱས་ནས་ཕྱིར་མི་འོང་གི་འབྲས་བུ་ཐོབ་ཕྱིར་དུ་བརྩོན་པའི་མཐོང་ལམ་པ་དེ་ཡིན་ཏེ། ཉ་ཊཱིཀ་ལས། དེའི་འབྲས་གནས་ཐོབ་ཕྱིར་བརྩོན་པའི་མཐོང་ལམ་པའོ། །ཞེས་གསུངས་སོ། །ཆགས་བྲལ་སྔོན་སོང་གི་ཕྱིར་མི་འོང་གི་འབྲས་གནས་ཀྱི་མཚན་ཉིད། འབྲས་གནས་དང་པོ་གཉིས་གང་ཡང་སྔོན་དུ་མ་བཏང་བའི་ཕྱིར་མི་འོང་འབྲས་གནས་དེ་ཡིན་ཏེ། ཉ་ཊཱིཀ་ལས། རྒྱུན་ཞུགས་དང་ཕྱིར་འོང་གང་ཡང་སྔོན་དུ་མ་བཏང་བའི་ཕྱིར་མི་འོང་འབྲས་གནས་གང་ཞིག་བཅུ་དྲུག་པའི་རྟོགས་པ་ལ་གནས་པའོ། །ཞེས་གསུངས་སོ། །རྒྱུན་ཞུགས་དང་དགྲ་བཅོམ་པ་གཉིས་ལ་ཆགས་བྲལ་སྔོན་སོང་མེད་པའི་རྒྱུ་མཚན་ནི། ཉ་ཊཱིཀ་ལས། འདིར་ལྔ་མན་སྤངས་པའི་མཐོང་ལམ་པ་དེ་རྒྱུན་ཞུགས་ཞུགས་པ་ཆགས་བྲལ་སྔོན་སོང་དང༌། དེ་བཅུ་དྲུག་པ་ལ་གནས་པ་དེ་དེའི་འབྲས་གནས་ཆགས་བྲལ་སྔོན་སོང་དུ་འདོད་པ་ནི་ཆགས་བྲལ་སྔོན་སོང་གི་དོན་ལ་བློ་ཁ་མ་ཕྱོགས་པའི་གཏམ་སྟེ། དེའི་དོན་ནི་ལམ་དང་གང་ཟག་དེ་དང་དེའི་སྤང་བྱའི་ངོ་སྐལ་དེ་མཐོང་ལམ་གྱི་སྔར་འཇིག་རྟེན་པའི་སྒོམ་ལམ་གྱིས་སྤངས་ནས་དེ་རྗེས་མཐོང་ལམ་ཐོབ་ཅིང་ད་ལྟ་སྐད་ཅིག་བཅོ་ལྔ་བོ་གང་རུང་ངམ་བཅུ་དྲུག་པ་ལ་གནས་པ་ཞིག་སྟེ། རྒྱུན་ཞུགས་སམ་ཕྱིར་འོང་གི་ཞུགས་འབྲས་སྔོན་དུ་མ་བཏང་བར་རིམ་བཞིན། ཕྱིར་འོང་ངམ་ཕྱིར་མི་འོང་གི་ཞུགས་འབྲས་པ་སྟེ་འབྲས་བུ་ཐོད་རྒལ་དུ་ཐོབ་པར་བྱེད་པ་གཅིག་ཡིན་པ་ལ། ལྔ་བ་དེ་རྒྱུན་ཞུགས་ཀྱི་སྤང་བྱ་མིན་པའི་ཕྱིར་དང༌། མཐོང་ལམ་གྱི་སྔར་སྲིད་རྩེའི་མཐོང་སྤང་འཇིག་རྟེན་པའི་སྒོམ་ལམ་གྱིས་སྤོང་བ་མི་སྲིད་དེ། དེས་སྤོང་ན་འོག་ལ་རགས་པ་གོང་མ་ལ་ཞི་བར་བལྟས་ནས་སྤང་དགོས་ཤིང་སྲིད་རྩེ་ལས་གོང་སའི་འཇིག་རྟེན་པ་མེད་པས་སོ། །འཇིག་རྟེན་འདས་ཀྱིས་སྲིད་རྩེ་ལ། །ཆགས་བྲལ་གཞན་ལ་རྣམ་པ་གཉིས། །ཞེས་མཛོད་དོ། །ཞེས་དང༌། དེ་ལྟར་ན་འབྲས་བུ་བར་བ་གཉིས་ཁོ་ན་ལ་ཆགས་བྲལ་སྔོན་སོང་བཤད་ཀྱི་སྔ་ཕྱི་གཉིས་ལ་མེད་དེ། རྒྱུན་ཞུགས་ལ་མེད་པར་སྔར་བཤད་ཟིན་ཅིང༌། དགྲ་བཅོམ་ལ་མེད་དེ།འཇིག་རྟེན་པའི་སྒོམ་ལམ་གྱིས་སྲིད་རྩེའི་སྒོམ་སྤང་སྤོང་མི་སྲིད་པའི་ཕྱིར་དང༌། དེ་མ་སྤངས་པའི་དེ་མི་སྲིད་པའི་ཕྱིར་རོ། །ཞེས་གསུངས་སོ། །ཁམས་འོག་མ་ལ་སྐྱོན་དུ་ལྟ་བའི་འཇིག་རྟེན་པའི་ལམ་དང༌། ཁམས་གོང་མ་སྐྱོན་དེ་དག་ཞི་བར་ལྟ་བའི་འཇིག་རྟེན་པའི་ལམ་ལ་ཚིག་སྡུད་བྱས་ནས་ཞི་རགས་ཀྱི་རྣམ་པ་ཅན་གྱི་ལམ་ཞེས་བྱ་ལ། འཇིག་རྟེན་པའི་རྣམ་གྲོལ་ལམ་དང་བར་ཆད་མེད་ལམ་གཉིས་ལ་རིམ་བཞིན་ཞི་རགས་ཀྱི་རྣམ་པ་ཅན་ཡིན་ཏེ། མཛོད་ལས། འཇིག་རྟེན་པ་ཡི་རྣམ་གྲོལ་དང༌། །བར་ཆད་མེད་ལམ་གོ་རིམ་བཞིན། །ཞི་སོགས་རགས་སོགས་རྣམ་པ་ཅན། །ཞེས་གསུངས་སོ། །