[༡༦] འབྲེ་ཆེན་ཤེས་རབ་འབར།
དེའི་མཁན་བུ་འབྲེ་ཤེས་རབ་འབར་ནི། སྣེ་བོ་ལས་རབ་ཏུ་བྱུང་ཞིང་བསྙེན་པར་རྫོགས། འདུལ་བའི་སྡེ་སྣོད་ལ་མཁས་པར་སྦྱངས། རྔོག་ལེགས་ཤེས་དང་། ཁུ་སྟོན་བརྩོན་འགྲུས་གཡུང་དྲུང་རྣམ་གཉིས་དང་བསྡེབས་ནས་ཁམས་སུ་བྱོན་ཞིང་ཇོ་བོ་སེ་བཙུན་ལས་ཆོས་མང་དུ་གསན། ཁྱད་པར་དུ་བསྟན་པ་སྔ་དར་གྱི་ཕ་རོལ་ཏུ་ཕྱིན་པའི་བཤད་རྒྱུན་ལ་མཆོག་ཏུ་མཁས། ཕྱིས་རྔོག་ལོ་ཆེན་པོ་ལ་ཡང་ཤེར་ཕྱིན་གྱི་འཆད་ཉན་མཛད་པས་རྔོག་ལོའི་ཐུགས་སྲས་དམ་པར་གྱུར། སྐྱོག་གནས་རྙིང་སོགས་སུ་ཆོས་འཁོར་བསྐོར་ཞིང་ཤེར་ཕྱིན་མདོ་བསྟན་གཉིས་ཀ་ལ་བཤད་པ་རྒྱ་ཆེར་མཛད། ཆོས་འཆད་པའི་ཚེ་ལྷ་རྣམས་ཆོས་ཉན་དུ་འོང་བར་གྲགས་ཤིང་། ཨར་བྱང་ཆུབ་ཡེ་ཤེས་སོགས་སློབ་མ་བསྟན་པའི་བདག་པོ་མཐའ་ཡས་པ་ཐོན་ནོ། །