མཁན་རབས་དང་པོ་རྫོགས་ཆེན་མཁན་པོ་འོད་ལུ་ནི།
ཡབ་འབྲོག་རུ་ཨ་གྲོའི་རིགས་ཀྱི་མགར་བ་ཉི་ལོ་དང་། མ་ཡུམ་སྤུ་རིས་གཉིས་ཀྱི་སྲས་སུ་རབ་བྱུང་བཅོ་ལྔ་པའི་ནང་ཁམས་རྫོགས་ཆེན་འབྲོག་རུ་ལྷ་སྡེར་སྐུ་འཁྲུངས། མཚན་འོད་ཟེར་མཐའ་ཡས་སུ་འབོད། རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེ་ལས་རབ་ཏུ་བྱུང་ཞིང་གདན་ས་ཆེན་མོའི་ཀློག་གྲྭ་ལ་ཞུགས། བཅའ་རྡུང་དབྱངས་རོལ་སོགས་མཐོང་བརྒྱུད་ཀྱི་ཕྱག་བཞེས་མཐའ་དག་ལ་མཁས་པའི་ཚད་དུ་གྲགས། དགུང་གྲངས་ཉི་ཤུའི་དུས་དཔལ་སེང་གེ་རིའི་ཆོས་གྲྭ་ཆེན་མོར་མཁན་ཆེན་གཞན་ཕན་ཆོས་ཀྱི་སྣང་བ་ལས་བསྙེན་པར་རྫོགས་ཤིང་། རྒྱ་གཞུང་བཅུ་གསུམ་ཆ་ལག་དང་བཅས་པ་གཙོ་བོར་གྱུར་པའི་མདོ་སྔགས་རིག་གཞུང་ཀུན་ལ་གསན་བསམ་ཉམས་བཞེས་མཛད། ཕྱོགས་ཀྱི་བུ་དགོན་དུ་མར་མཁན་ཚབ་ཏུ་ཕེབས་ནས་འདུལ་བ་གཞི་གསུམ་གྱི་ཕྱག་བཞེས་སྤེལ་བ་སོགས་མཛད། གཡུ་ཁོག་དཔོན་བླ་དགེ་འདུན་རྒྱ་མཚོས་གཡུ་དགོན་དུ་རྒྱུན་བཞུགས་ཀྱི་བཤད་གྲྭ་བཙུགས་པའི་དུས་རྗེ་འདི་ཉིད་གདན་དྲངས་པ་ལྟར་མཁན་རབས་དང་པོའི་ཆོས་ཁྲིར་བཞུགས་ཏེ་མདོ་སྔགས་རིག་གཞུང་དུ་མ་འཆད་ཁྲིད་མཛད། སླར་ཡང་རུ་དམ་རྫོགས་ཆེན་དུ་དགོན་གཞུང་ལས་ཐོག་མཁན་པོའི་ལོ་གསུམ་གྱི་འགན་བཞེས་མཐར་སྐུ་གཤེགས་པར་ཐོས་སོ།།