སྣང་སྟོང་གི་ལམ་བསྒོམ་པ་ཉིན་མཚན་ཁ་སྦྱོར་དུ་བྱེད་པའི་གདམས་ངག་འོད་གསལ་འཁོར་ལོ།

སྣང་སྟོང་གི་ལམ་བསྒོམ་པ་ཉིན་མཚན་ཁ་སྦྱོར་དུ་བྱེད་པའི་གདམས་ངག་འོད་གསལ་འཁོར་ལོ་ཞེས་བྱ་བ་བཞུགས་སོཿ

དེ་ལ་འདིར་ཉིན་མོ་འོད་གསལ་གྱི་གདངས་གཉིས་ཀྱིས་སྣང་བ་ལ་མཉམ་པར་བཞག་ཀྱངཿ མཚན་སྣང་དང་བསྲེ་མ་ཤེས་ན་དུས་སུ་མི་སྟོངས་པའི་ཕྱིརཿ དེའི་ཐབས་ལ་རྒྱས་པར་ནི་རྨི་ལམ་གྱི་རྣལ་འབྱོར་དང་འོད་གསལ་གྱི་རྣལ་འབྱོར་གཉིས་ཡིན་ཀྱང་འདིར་ཐོད་རྒལ་སྤྱི་ལ་བསྟུན་ནས་འཁྱེར་བདེ་བར་ལམ་དུ་བྱེད་ནཿ དང་པོ་གཉིད་འོད་གསལ་དུ་སྦ་བ་ནིཿ ཕྱི་ནང་གསང་གསུམ་སྟེཿ ཕྱི་ལྟར་ན་འདུན་པའི་སྒོ་ནས་འོད་གསལ་འཆར་པ་ངོས་ཟིན་པར་བྱའོ་སྙམ་དུཿ ཐོག་མར་གཡུ་འབྲུག་ཐུར་དབབ་ཀྱིས་ནམ་མཁའི་རྣལ་འབྱོར་སྒོམ་པ་ཞེས་བྱ་སྟེཿ རླུང་སྦྱོར་བསྒོམ་ནས་གསལ་སྟོང་མི་རྟོག་པའི་ཡེ་ཤེས་ལ་མཉམ་པར་བཞག་གོཿ དེའི་ངང་ལས་གཉིད་པའམཿ ཡང་ན་ནང་ལྟར་དུ་གཏུམ་མོའི་མེ་སྦར་བ་ལ་སྟེཿ ལུས་དབུས་སུ་རྩ་གསུམ་འཁོར་ལྔ་གསལ་ཞིངཿ ལྟེ་བའི་འོག་གི་སོར་བཞིའི་ཐད་དུ་ཨ་ཤད་དམ་ཐིག་ལེ་དམར་པོ་གསལ་བ་ལས་མེ་འབར་བས་སྤྱི་བོའི་ཧཾ་ལ་རེག་པས་ཧཾ་ལས་བདུད་རྩིའི་ཐིག་པ་བབས་པ་དང་བསྣོལ་མའི་རྒྱུད་ལ་སེམས་བཟུང་བ་ནི་སེང་ཕྲུག་རྩལ་སྦྱོང་གི་གནད་ཅེས་བྱའོཿ དེའི་བདེ་སྟོང་གི་འོད་གསལ་འཆར་བར་འགྱུར་བས་དེ་ལས་མ་ཡེངས་པར་གཉིད་དུ་ཕྱོགས་པ་དངཿ གསང་བ་ཉི་ཟླ་ཁ་སྦྱོར་གྱི་དགོངས་པས་སྦྱང་བ་ནིཿ དེ་ནས་མེ་དང་ཐིག་ལེ་ཆེར་མཆེད་དེཿ ལུས་ཡུལ་གྱི་དངོས་འཛིན་ཐམས་ཅད་བསྲེགས་ཤིང་འོད་ལུས་ཀྱི་ནང་དུ་སྙིང་ཀའི་འཁོར་ལོར་དཀར་དམར་རམ་མེ་ཆུ་ཁ་སྦྱོར་དུ་ཡོད་པའི་དབུས་སུ་སེམས་ཀྱི་ངོ་བོ་ཕྱི་གསལ་ནང་གསལ་གྱི་ཐིག་ལེ་ཤེལ་སྒོང་ལྟ་བུ་གཅིག་བསྒོམ་པ་ལས་མ་ཡེངས་པར་སེམས་བཟུང་བས་འོད་གསལ་སྣང་སྟོང་རིག་གསུམ་དབྱེར་མེད་པའི་བདག་ཉིད་འཆར་བའི་འཕྲུལ་གསང་བླ་ན་མེད་པའོཿ གཉིས་པ་ཤེས་བྱ་བུམ་བར་བསྡུ་བ་ནིཿ ཕྱི་ནང་གསང་གསུམ་ལསཿ ཕྱི་དབྱིངས་སྣང་འོད་ཟེར་གྱི་དྲྭ་བར་གཟུད་པའི་མན་ངག་ནིཿ ནམ་ཕྱེད་གྱེན་དུ་ལངས་ཏེཿ དྲང་སྲོང་གི་འདུག་སྟངས་སུ་བྱས་ལ་ལུས་པོ་ཉེད་ཉེད་པོར་གཅུན་ཏེཿ སྟེང་རླུང་མནན་པས་བདེ་ཆེན་དང་ལོངས་སྤྱོད་འཁོར་ལོའི་རྩ་འདབས་སུ་ཡེ་རླུང་འཕྲོས་པ་དབུ་མར་བསྡུཿ འོག་རླུང་བསྐུམ་སྟེཿ སྙིང་གར་རླུང་བཟུང་བས་བདེ་སྐྱོང་དང་སྤྲུལ་འཁོར་གྱི་རྩ་འདབ་ཀྱི་ཡེ་རླུང་དབྱིངས་རྣམ་དག་གི་སྒྲོན་མའི་ཆ་ཐམས་ཅད་དབུ་མར་བསྡུས་ལཿ སྙིང་གསེར་གྱི་རྩ་ཆེན་གྱི་དྲྭ་ཕྱེད་མིག་མང་རིས་སུ་བྲིས་པའི་དབྱིངས་ཀྱིས་གང་བར་མོས་ཤིངཿ གཉིད་དུ་ཕྱོགས་པས་རླུང་ལྔ་དབྱིངས་སུ་འཆིང་ནས་རང་བཞིན་གསལ་བའི་འོད་གསལ་ཟིན་པར་འགྱུར་རོཿ གཉིས་པ་ཐིག་ལེ་རང་མལ་དུ་བསྐྱལ་བའི་མན་ངག་མགྲོན་པོའི་རང་ཡུལ་སྙོགས་པ་ལྟ་བུ་ནིཿ རྩ་ཁམས་ཀྱི་ཐིག་ལེ་རྣམས་འཁོར་དབུས་ཀྱི་ཨེ་ཡཾ་བཾ་ལཾ་རཾ་རྣམས་ལ་འདུསཿ དེ་དག་གི་འོད་ཀྱིས་ལུས་ཐམས་ཅད་ཁྱབ་པར་དམིགས་ལཿ ཀུན་ཀྱང་ཡས་མན་སྡུད་རིམ་གྱིས་སྙིང་ཀའི་ཨེ་ལ་ཁ་སྦྱོར་ཞིང་ཐིག་ལེ་སྟོང་པའི་སྒྲོན་མ་རྨ་བྱའི་སྒོ་ང་ལྟ་བུ་ནང་སྟོང་པཿ ཕྱིའི་འོད་ཟེར་གྱིས་ལུས་ཐམས་ཅད་ཁྱབ་པ་ཞིག་དབྱིངས་རང་མལ་གྱི་དྲྭ་བའི་ཁྱིམ་དུ་གནས་པར་བསྒོམ་ལཿ དེ་ལས་མ་ཡེངས་པར་བྱས་པས་ཐུགས་རྗེ་ཀུན་ཁྱབ་ཀྱི་ཡེ་ཤེས་ཟིན་པར་འགྱུར་རོཿ གསུམ་པ་སྐུ་རྡོ་རྗེ་བུམ་པ་རིན་པོ་ཆེའི་དགོངས་པའམ་བརྫུས་སྐྱེས་པདྨོའི་མངལ་གནས་ཀྱི་དགོངས་པས་འོད་གསལ་མ་བུ་སྤྲོད་པ་ཞེས་བྱ་སྟེཿ ཐིག་ལེའི་ཁང་བའི་དཀྱིལ་དུ་བླ་མ་ཀུན་བཟང་ཡབ་ཡུམ་ཆོས་སྐུའི་ཆ་ལུགས་ཅན་གཅིག་བསྒོམ་པའི་ཐུགས་ཀར་ཨཿམཐིང་ཀ་འོད་དང་འོད་ཟེར་འབར་བ་གཅིག་གསལ་ལཿ ལུས་ཀྱིས་དབྱིངས་མི་བསྒྲིབཿ དབྱིངས་ཀྱིས་ཏི་ལ་ཀ་མི་བསྒྲིབཿ ཐིག་ལེས་སྐུ་མི་བསྒྲིབཿ སྐུས་ཡི་གེ་མི་བསྒྲིབ་པས་མི་བསྒྲིབ་རྣམ་བཞིའི་འོད་ཟེར་གྱི་གོང་བུརཿ ལུག་རྒྱུད་ཀྱི་རྣམ་པར་ཕྲ་ཞིང་འཁྱོགས་པ་མར་མེ་བཞིན་པར་སེམས་བཟུང་ལ་གཉིད་པས་ཟུང་འཇུག་ངོ་བོ་ཉིད་སྟོང་པ་ཆེན་པོའི་འོད་གསལ་ཟིན་པར་འགྱུར་རོཿ འདི་ལ་ཅིའི་ཕྱིར་ཤེས་བྱ་བུམ་པར་བསྡུ་བ་ཞེ་ནཿ ཕྱིའི་སྣང་བའི་ཁམས་གསུམ་སྒོ་གསུམ་ལས་མེད་པར་ཐག་ཆོད་ཅིངཿ གཉིད་ཀྱི་ཅུང་ཟད་ནོན་པ་ནཿ ཕྱི་ཡུལ་གྱི་རྟོག་པ་ནང་དུ་བསྡུས་པའི་ཕྱིར་དངཿ ཡེ་ཤེས་རླུང་ལུས་ལ་བྱེར་བ་ཐམས་ཅད་རྩ་བའི་རླུང་འོད་ཟེར་ལྔ་བ་ལ་བསྡུ་བའི་ཕྱིར་དངཿ ཐིག་ལེ་མ་ལ་བསྡུ་བའི་ཕྱིར་དངཿ སྐུ་ནང་གསལ་གཞོན་ནུ་བུམ་པ་ཡེ་ཤེས་གཞིར་གནས་ཨ་ཡིག་གི་བསྡུས་པ་ལ་ཤེས་བྱའི་བློ་ཡིད་དམིགས་པ་བསྡུ་བའི་ཕྱིར་རོཿ གསུམ་པ་ཐོ་རངས་འབྱུང་ཁམས་དག་སྦྱོར་ནིཿ མལ་ནས་ལངས་ཏེ་རླུང་རོ་ལན་གསུམ་སྤྲུགས་པའི་རྗེས་སུ་ཆོས་སྐུའི་བཞུགས་སྟངས་ཀྱིས་གནས་པའི་སྙིང་ཀའི་བུམ་སྐུ་ལས་ཨ་མཐིང་གཅིག་སྨིན་མཚམས་ཐད་ཀྱི་ནམ་མཁའ་ལ་སྤྲོས་པ་ཀུན་ཏུ་བཟང་མོ་གཅེར་བུ་མཉམ་བཞག་གི་ཕྱག་རྒྱ་ཅན་ཞིག་དུ་བསྒོམ་པའི་ཐུགས་ཀའི་འོད་ཀྱིས་འབྱུང་བ་ནམ་མཁའི་ཁམས་ཐམས་ཅད་འོད་མཐིང་གི་རྣམ་པར་ཁྱབ་སྟེཿ འོད་དེ་ཇེ་ཆུང་ལ་འུབ་འདུས་ནས་བཟང་མོའི་ཐུགས་ཀར་ཐིམ་པས་ནམ་མཁར་འཛིན་པའི་རྟོག་སྒྲིབ་ཐམས་ཅད་ཡུམ་ཆེན་མོའི་རང་བཞིན་དུ་སངས་རྒྱས་པར་མོས་ཤིངཿ སྐུ་ལ་ཅི་གནས་སུ་སེམས་བཟུང་བའི་བྱིན་རླབས་ཀྱིས་ཟླ་བ་གཅིག་ན་ཆོས་ཀྱི་དབྱིངས་ཀྱི་ཡེ་ཤེས་འཆར་རོཿ ཡང་དེ་གྲུབ་པ་ནཿ སངས་རྒྱས་སྤྱན་དངཿ མ་ཀིཿ གོས་དཀརཿ དམ་ཚིག་སྒྲོལ་མ་རྣམས་ཀྱི་ཐུགས་ཀ་ནས་རང་མདོག་གི་འོད་ཟེར་འཕྲོས་པས་འབྱུང་བ་ལྷག་མ་འོད་དུ་སྡུད་དེཿ ཡུམ་བཞི་ལ་ཐིམ་ཞིངཿ དེའི་རང་བཞིན་དུ་སངས་རྒྱས་པར་བསྒོམ་པས་ཞག་བཅོ་ལྔ་རེ་ནས་སོ་སོའི་རྟོག་སྒྲིབ་དབྱིངས་སུ་དག་སྟེཿ ཡུམ་ལྔའི་གོ་ལ་སྦྱོར་བས་འབྱུང་བ་རང་ཟད་ཀྱི་དགོངས་པ་འུབ་ཆུབ་ཆེན་པོ་ཞེས་བྱ་སྟེ་གནད་ཤིན་ཏུ་ཟབ་མོའོཿ བར་སྐབས་དང་ཐུན་མཐའ་ཐམས་ཅད་དུ་མི་དམིགས་པར་འཇོག་པ་ཀུན་ལ་དགོས་པ་དངཿ དེ་དག་གི་ཆོས་དབྱིངས་ཡེ་ཤེས་བཞི་ལྡན་གྱི་འོད་གསལ་མངོན་དུ་གྱུར་པ་ཡིན་ནོཿ ས་མ་ཡཱཿ བར་སྐབས་སུ་འཆི་བ་སྦྱངས་པའི་མན་ངག་ནིཿ འཕོ་བའི་གདམས་པ་ལྟར་སྲོད་ཐུན་ལ་ནམ་རེས་བྱེད་དགོས་པས་ཟུར་བ་མེད་དོཿ དེ་དག་གི་གནད་བསྡུས་ནཿ ནུབ་མོ་ཉལ་ཁ་གཅིག་པོ་ལཿ རང་སེམས་ཀྱི་ངོ་བོ་འོད་ཀྱི་ཐིག་ལེ་ཤིན་ཏུ་འཚེར་བའི་དཀྱིལ་ན་ཨཱཿས་མཚན་པ་ཡོད་པ་གཅིག་བསྒོམ་ལཿ ཧིག་གིས་རང་བཞིན་སྤྲུལ་སྐུའི་ཞིང་ལྔའམ་སྤྱི་བོར་བླ་མ་གསལ་བའི་ཐུགས་ཀར་བརྒྱང་བ་དངཿ བཅོམ་ལྡན་རིགས་ལྔའི་ཡེ་ཤེས་དང་བླ་མའི་ཐུགས་རྣམ་པར་མི་རྟོག་པའི་ངོ་བོཿ རང་སེམས་འོད་ཀྱི་ཐིག་ལེ་ཕྱིར་འོང་ནས་ཚངས་བུག་ནས་ཞུགས་ཏེ་སྙིང་ཀར་གནས་པའི་འོད་ཀྱིས་ལུས་ཕྱི་ནང་ཐམས་ཅད་གསལ་བ་མར་མེ་ལྟ་བུའི་སྙིང་པོ་སྙིང་ཀའི་ཐིག་ལེ་ལ་སེམས་བཟུང་བསཿ འཕོ་བའི་འཆི་སྦྱང་དངཿ གཉིད་འོད་གསལ་དུ་སྦ་བ་དངཿ ཤེས་བྱ་བུམ་སྡུད་གསུམ་གྱི་གནད་འདུས་ལཿ ཐོ་རངས་དེ་ལས་ཐིག་ལེ་གཉིས་པ་ཞིག་སྨིན་མཚམས་སུ་ཆད་དེཿ དེའི་འོད་ཟེར་གྱིས་ཁམས་གསུམ་སྣོད་བཅུད་འབྱུང་བཞི་དང་བཅས་པ་འུབ་ཀྱི་བསྡུས་ནས་ཐིག་ལེ་ལ་གཞུགས་པ་དངཿ དེ་རྩ་བའི་ཐིག་ལེ་ལ་ཐིམཿ དེ་ཡི་གེ་མེད་པ་ཆོས་ཀྱི་དབྱིངས་ཀྱི་རང་བཞིན་དུ་མི་དམིགས་པར་མཉམ་པར་བཞག་པས་ཆོས་དབྱིངས་ཀུན་ནས་བཟླུམ་པའི་ཐིག་ལེ་ཆེན་པོ་སྤྲོས་པའི་གྲྭ་ཟུར་དང་བྲལ་བ་མངོན་དུ་གྱུར་བའི་གནད་དོཿ དེ་སྐད་དུ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱིས་གསང་ཆེན་ངེས་པའི་རྒྱུད་བཅུ་བདུན་གྱི་བུ་ཡིག་བརྒྱ་རྩ་སོགས་ནས་ཟུར་སོ་སོར་བྱུང་བ་ཁོང་སྙིང་བསྡེབ་ནས་ཕྱོགས་གཅིག་ཏུ་བཀོད་པའོཿ དེ་ལྟར་འཁྲུལ་བ་བཙན་ཐབས་སྦྱོངས་བ་དངཿ སྣང་སྟོང་འོད་གསལ་འཁོར་ཡུག་འདྲེས་པའི་ལམཿ བསྒོམ་པའི་རྒྱལ་པོ་ཉིན་མཚན་ཁ་སྦྱོར་འདིསཿ མ་ལུས་འཆིང་གྲོལ་མེད་པའི་བྱང་ཆུབ་ཤོགཿ ས་མ་ཡཱཿ ཅེས་ཀྱང་དུས་མཐའི་སྔགས་མིང་ག་གཱ་ཨ་བྷྱེ་ནས་དག་པར་ཕབ་པའི་ཡི་གེ་པ་ནི་ཝ་ཀི་ཤྭ་རིའོ། །དགེའོ། །དགེའོ། །དགེའོ། །།