གཞི་སྣང་ལྷུན་གྲུབ་ཀྱི་རང་བཞིན།
གཉིས་པ་གཞི་སྣང་ལྷུན་གྲུབ་ཀྱི་རང་བཞིན་ལའང་དྲུག་(དཔྱད་)སྟེ། ངོ་བོ་ནི། གཞི་ཀ་དག་གི་རང་གདངས་ལྷུན་གྲུབ་གཏིང་གསལ་གྱི་རིག་གདངས་འཁོར་འདས་གང་དུའང་རྒྱ་ཆད་མེད་པ་རང་གསལ་ཟང་ཐལ་ཆེན་པོ་སྟེ། བཤད་རྒྱུད་ལས། རང་གི་རིག་པ་ངོ་བོ་དངོས་མེད་ཀྱི་ཡེ་ཤེས་ཡེ་དག་ཟང་ཐལ་དུ་གནས་ལ། རྡོས་པ་ཅན་གྱི་ཆོས་མིན་པས་ཡོན་ཏན་གྱི་སྒོ་ཡངས་པ་ནི་ཆོས་ཐམས་ཅད་ཀྱི་འབྱུང་གནས་ཏེ། ངོ་བོ་རྒྱ་མ་ཆད་པའོ། །ཞེས་སོ། །ངེས་ཚིག་ནི། གཞི་རིག་པའི་རང་གདངས་ནང་གསལ་ཡིན་པས་གཞི་སྣང་སྟེ། དེ་ཉིད་ལས། དེ་ཡི་རང་སྣང་ཡིན་པས་ན། །ངོ་བོ་ཉིད་ཀྱི་སྣང་བ་འོ། །ཞེས་སོ། །མཚོན་དཔེ་ལ། ངོ་བོ་དང་རྣམ་གྲངས་གཉིས་ལས། ངོ་བོའི་མཚོན་དཔེ་ལ། ངོ་བོ་ཉིད་ཀྱི་སྣང་བའི་མཚོན་དཔེ་ནི། ནང་དབྱིངས་སུ་ཡོད་ཀྱང་། ཕྱི་གསལ་དུ་མེད་པས་ནམ་མཁའ་སྤྲིན་མེད་ལྟ་བུའི་ངང་ནས། ངོ་བོ་ཉིད་ཀྱི་སྐུའི་མཚོན་དཔེ། ཕྱག་རྒྱའི་སྐུ་ལྔ་འཆར་ཞིང་ཡོད་པ་ཉི་མའི་སྙིང་པོའམ་གནམ་གང་གི་ཟླ་བ་ལྟ་བུ་སྟེ། བཤད་རྒྱུད་ལས། དཔེ་ཇི་ལྟ་བུ་ཞེ་ན། ནམ་མཁའ་དང་ཉི་མ་ལྟ་བུའོ། །རིགས་ཀྱི་བུ་ངོ་བོ་ཉིད་ཀྱིས་སྣང་བ་ནི། ནམ་མཁའ་སྤྲིན་དང་བྲལ་བ་ལྟ་བུའོ། །ངོ་བོ་ཉིད་ཀྱི་སྐུ་ནི་ཉི་མའི་སྙིང་པོ་ལྟ་བུའོ། །ཞེས་སོ། །རྣམ་གྲངས་ཀྱི་མཚོན་དཔེ་ནི། གཞི་སྣང་གི་ལྡོག་ཆོས་རྣམས་ཏེ། དཔེ་དུ་མར་མཚོན་ཡང་དོན་གཅིག་ཏུ་འདུ་བ། ཉི་མའི་དཀྱིལ་འཁོར་གཅིག་པུ་ལ། ཟླུམ་པས་སྒོ་ང་ལྟ་བུ། གསལ་བས་སྒྲོན་མེ་ལྟ་བུ། ཚ་བས་མེ་ལྟ་བུ་ཞེས་སྨོས་ཀྱང་། དབྱིབས་
དང་འོད་དང་འོད་ཟེར་གྱི་ལྡོག་པ་ཐ་དད་རང་བརྗོད་ཀྱིས་དོན་སོ་སོ་བ་མེད་པ་ལྟར་གོ་བར་བྱའོ། །ཡང་དེ་ཉིད་ལས། བཅོམ་ལྡན་འདས་ཀྱིས་བཀའ་སྩལ་པ། རྡོ་རྗེ་འཛིན་པ་ཉོན་ཅིག །ངས་གཞི་སྣང་ཆེན་མོ་མཚོན་པའི་དཔེ་དང་བརྡ་བཤད་པར་བྱའོ། །མི་གཡོ་བ་རྒྱ་མཚོའི་གཏིང་ལྟ་བུའོ། །སྟོང་པ་དང་ཡོངས་ལ་ཁྱབ་པ་ནི་ནམ་མཁའ་ལྟ་བུའོ། །དྲི་མ་མེད་པ་མན་ཤེལ་ལྟ་བུའོ། །དག་ཅིང་གསལ་ལ་མ་འདྲེས་རིག་པ་མེ་ལོང་དང་གཟུགས་བརྙན་ལྟ་བུའོ། །སྣ་ཚོགས་སུ་སྣང་ཡང་དྲི་མས་མ་གོས་པ་པདྨ་བཞིན་ནོ། །འགྱུར་བ་མེད་པ་རྡོ་རྗེའམ་གླང་པོ་ཆེ་བཞིན་ནོ། །ཐམས་ཅད་འབྱུང་བ་ས་གཞི་ལྟ་བུའོ། །དངོས་སུ་མི་སྣང་ཡང་བྱིན་རླབས་འབྱུང་བ་ཡིད་བཞིན་གྱི་ནོར་བུ་བཞིན་ནོ། །རང་གི་ངོ་བོ་གསལ་ལ་མི་འགག་པ་ཉི་མའི་སྙིང་པོ་བཞིན་ནོ། །རྒྱུན་ཆད་པ་མེད་པ་ཆུ་བོ་བཞིན་ནོ། །བརྟན་པ་རི་བོ་བཞིན་ནོ། །གཅིག་ཉིད་དུ་མར་སྣང་བ་ཉི་ཟླ་བཞིན་ནོ། །གཅིག་ཉིད་ཀུན་ལ་ཁྱབ་པ་ཆུའི་ལྦུ་བ་ལ་བྱད་ཀྱི་གཟུགས་སྣང་ཤར་བ་བཞིན་ནོ། །ཆོས་ཉིད་ལ་ཆོས་སྐུ་ཤར་བ་ནི་མེ་ལོང་ལ་ཉི་མ་ཤར་བ་བཞིན་ནོ། །ཆོས་ཉིད་ལ་ཆོས་སྐུས་ཁྱབ་པ་ནི་འོ་མ་དང་མར་བཞིན་ནོ། །ཆོས་ཉིད་ཀྱི་སྙིང་པོར་རིག་པར་གནས་པ་ནི་ནམ་མཁའ་དང་ཉི་མ་བཞིན་ནོ། །ཆོས་ཉིད་མི་རྟོག་པ་ལ་ཆོས་སྐུའི་རྩལ་ཡོད་པ་སྤུ་གཅོད་པ་ན་གྲིའི་ལྟག་པ་དང་སོ་བཞིན་ནོ། །མ་འདྲེས་པར་ཡོངས་སུ་རྫོགས་པ་ནི་ཟ་འོག་གི་གུར་ཁྱིམ་དང་གཟུགས་བརྙན་བཞིན་ནོ། །སྣ་ཚོགས་གཉིས་སུ་མེད་པ་ནི་ཤིང་དང་གྲིབ་མ་བཞིན་ནོ། །གཞི་ལས་རྩལ་འཕྲོ་ཞིང་འདུ་བ་ནི་རྒྱ་མཚོ་དང་ཆུ་བྲན་བཞིན་ནོ། །
ཆོས་ཉིད་ལ་ཆོས་སྐུའི་བརྒྱན་པ་མཛེས་པ་ནི། གཡུ་ཡི་མཎྜལ་ལ་གསེར་གྱི་མེ་ཏོག་བཀྲམས་པ་བཞིན་ནོ། །ཆོས་སྐུ་ལ་ཡེ་ཤེས་ནང་གསལ་དུ་གནས་པ་ནི་ཤེལ་དང་དེའི་ནང་གི་འོད་ལྔ་གསལ་བ་བཞིན་ནོ། །གཞི་ལ་སྐུ་གསུམ་རྫོགས་པ་ནི་ཉི་མའི་སྙིང་པོ་ལ་འོད་ཟེར་མི་འགག་པ་བཞིན་ནོ། །ངོ་བོ་རང་བཞིན་ཐུགས་རྗེའི་དཔེ་ནི་རྨ་བྱའི་སྒོ་ངའམ། ཉི་མའམ་ནམ་མཁའི་སྤྲིན་དང་ཆར་བཞིན་ནོ། །ཡང་ན་མན་ཤེལ་བཞིན་ནོ། །འཁོར་འདས་གཉིས་སྐྱོན་དང་ཡོན་ཏན་དུ་འཆར་ཡང་རིག་པའི་ངོ་བོ་གཅིག་པས་ན་ག་པུར་བཞིན་ནོ། །གནས་ལུགས་དང་སྣང་ཚུལ་ནི་མར་མེ་དང་མེ་ལོང་བཞིན་ནོ། །རིག་པ་དང་ཡེ་ཤེས་ནི་གསེར་དང་དེའི་སེར་པོ་བཞིན་ནོ། །ཆོས་ཉིད་དང་ཆོས་སྐུ་གཙོ་བོར་མཚོན་པའི་དཔེའོ། །ཞེས་གསུངས་སོ། །རྣམ་གྲངས་བསྟན་པའང་གཞི་དང་གཞི་སྣང་གི་ཆའི་མིང་དུ་གདགས་པ་ཡིན་ནོ། །ངོ་བོ་ཉིད་ཀྱི་སྐུ། ངོ་བོ་ཉིད་ཀྱི་སྣང་བ། སྣང་བ་ཆེན་པོ། བཅོས་མིན་གྱི་སྐུ། རིག་པ་རང་བྱུང་གི་ཡེ་ཤེས། ཐིག་ལེ་ཉག་གཅིག་ཀུན་བྱེད། ཀུན་བྱེད་མེ་ལོང་ལྟ་བུ། མཚན་རྫོགས་རྡོ་རྗེ་འཆང་གི་ཞིང་ཁམས་གཞི་ཇི་བཞིན་མའི་དྲུག་པ་རྡོ་རྗེ་འཆང་། སངས་རྒྱས་ཐམས་ཅད་ཀྱི་མེས་པོ། ཐོག་མའི་མགོན་པོ་འོད་མི་འགྱུར་བ། གཞོན་ནུ་བུམ་པའི་སྐུ། རང་བཞིན་ལྷུན་གྲུབ་ཀྱི་སངས་རྒྱས་། དང་པོའི་སངས་རྒྱས། སངས་རྒྱས་འོད་དཔག་མེད། རྒྱལ་བ་འོད་ཀྱི་ཕུང་པོ་ཆེན་པོ། སངས་རྒྱས་ཐམས་ཅད་ཀྱི་མེས་པོ་ཐོག་མ་གཞིའི་ཀུན་ཏུ་བཟང་པོ་ཞེས་པ་དང་། ངོ་བོ་འཆར་གཞི་ལ་ལྟོས་ནས། ངོ་བོ་རང་བཞིན་ཐུགས་རྗེ་གསུམ། ཡེ་ཤེས་མིག་གཅིག །གཉིས་
མེད། ཉག་ཅིག །ཟང་ཐལ། རྩ་བ། བརྗོད་བྱ། ཤེས་བྱ། གཤིས། རྒྱུ། ས་བོན། ཀ་དག །རིན་པོ་ཆེ། འབྱེད་པ་མེད་པའི་ཤེས་རབ། ཆོས་ཐམས་ཅད་ཀྱི་འབྱུང་གནས་ཏེ་རྣམ་གྲངས་སུམ་ཅུ་རྩ་གསུམ་ནི་གཞི་སྣང་གི་མིང་སྟེ། བཤད་རྒྱུད་ལས། ངས་བསྟན་རྒྱུད་ལུང་ཐམས་ཅད་ནས། །གཞི་བརྗོད་ཚིག་ཚོགས་མང་གིས་ཀྱང་། །མདོར་བསྡུས་ངས་བཤད་ཁྱོད་ཀྱིས་ཟུང་། །འཁོར་འདས་ཀྱི་ཆོས་ཐམས་ཅད་ཀྱི་ངོ་བོར་གྱུར་པས་ན་ངོ་བོ་ཉིད་ཀྱི་སྐུའོ། །དེའི་རང་སྣང་མིན་པས་ན་༼གཞན་ཡིན་པས་ན་༽ངོ་བོ་ཉིད་ཀྱི་སྣང་བའོ། །དེ་ཡང་རང་གདངས་ཆེན་པོ་མི་འགག་པས་སྣང་བ་ཆེན་པོའོ། །འཁོར་འདས་ཀྱི་ཐ་སྙད་ལས་སྒྲོལ་བས་ན་ཆོས་ཀྱི་སྐུའོ། །ཡོན་ཏན་དུ་ཕྱིས་འབྲས་བུ་ཆོས་སྐུར་གསལ་བས་འབྲས་བུའི་མིང་རྒྱུ་ལ་བཏགས་པས་ཆོས་སྐུའོ། །བཅོས་མིན་གྱི་སྐུའོ། །ཡོན་ཏན་དུ་ཕྱིས་འཁོར་འདས་གསལ་ཞིང་སྣང་བ་དང་། འབྲས་བུའི་མིང་དུ་བཏགས་པས་ཆོས་སྐུའོ། །མ་རིག་པ་དང་བེམ་པོ་ལས་ལོག་སྟེ། ཡང་དག་པའི་ཤེས་པའི་ངོ་བོར་གནས་པས་ན་རིག་པའོ། །རྒྱུ་རྐྱེན་ལས་འདས་པས་ན་རང་བྱུང་ངོ་། །བློ་བུར་དུ་བྱུང་བ་མེད་༼མིན་ཏེ༽དེ་ཡེ་ནས་གནས་པའི་རིག་པའི་བདག་ཉིད་དུ་གྱུར་པས་ན་ཡེ་ཤེས་སོ། །རང་སྣང་ལས་གཞན་སྣང་མེད་ཅིང་། ངོ་བོ་མི་འགྱུར་བས་ན་སྣང་བ་རང་གདངས་ཆེན་པོར་གསལ་བའི་ཐིག་ལེ་ཉག་གཅིག་གོ། དེའི་གོང་ན་གཞན་མེད་པས་ཆེན་པོའོ། །དེ་ལས་སྔ་བ་མེད་པས་སྔོན་བྱུང་ངོ་། །ཐམས་ཅད་དེ་ལས་ཤར་ཞིང་སྣང་བས་ཀུན་བྱེད་དོ། །འཁོར་འདས་ཐམས་ཅད་དེ་ལས་སྣང་བས་གཞིའོ། །ངོ་བོ་གསལ་ལ་མི་འགག་པ་ཟང་ཐལ་
ཏེ་སྒྲིབ་པ་མེད་པས་ཀུན་གཞི་མེ་ལོང་ལྟ་བུའོ། །ཡུལ་ཆོས་ཉིད་སྟོང་པ་དང་རིག་པ་འདུས་མ་བྱས་སྟོང་པ་དང་། སྟོང་པ་དབྱེར་མེད་གསལ་བ་ཟང་ཐལ་བའི་ངང་ན་སྐུ་གཉིས་ནང་གསལ་དུ་བཞུགས་ཤིང་འདུ་འབྲལ་མེད་དེ། དོན་དབྱེར་མེད་མི་ཕྱེད་པས་རྡོ་རྗེ་འཆང་ངོ་། །སྐུ་ལྔ་ངོ་བོ་ཉིད་ཀྱི་སྐུ་དང་དྲུག །ཡེ་ཤེས་ལྔ་མི་སྣང་བའི་ཡེ་ཤེས་དང་དྲུག །ཡུལ་ལྔ་བདག་མེད་པའི་ཀློང་དང་དྲུག །རིགས་ལྔ་༼པའི་ཡང་༽ཨའི་རིགས་དང་དྲུག །འོད་ལྔ་རང་བཞིན་གྱི་འོད་དང་དྲུག །འབྱུང་བ་ལྔ་རང་བྱུང་གི་འབྱུང་བ་དང་དྲུག །ཡུལ་ལྔ་ཆོས་ཉིད་ཀྱི་ཡུལ་དང་དྲུག །ཉོན་མོངས་པ་ལྔ་ཁོང་ཁྲོ་བ་དང་དྲུག །འགྲོ་བ་རིགས་དྲུག་རྣམས་དོན་གཉིས་སུ་མེད་པར་བཞུགས་ཤིང་ཕྱིས་ཡོན་ཏན་དུ་འཆར་བ་མི་འགག་པས་དྲུག་པ་རྡོ་རྗེ་འཆང་ངོ་། །གཟུགས་ཀྱི་སྐུའི་སངས་རྒྱས་གྲངས་ལས་འདས་པ་ཐམས་ཅད་དེའི་དོན་རྟོགས་པ་ལས་ཤར་ཞིང་བྱུང་བས་ན། སངས་རྒྱས་ཐམས་ཅད་ཀྱི་མེས་པོའོ། །རང་གི་ངོ་བོ་དྲི་མ་མེད་ཅིང་ཡེ་ཤེས་ཀྱི་རང་གདངས་ཆེན་པོ་མ་འགགས་པར་གསལ་བ་དང་། དེ་ཀུན་གྱི་གོང་དུ་གྱུར་པ་དང་། རིག་པ་རང་༼ཆས་སུ་མི་འགྱུར་༽སྣང་དང་བཅས་པ་མི་འགྱུར་བས་ཐོག་མའི་སངས་རྒྱས་འོད་མི་འགྱུར་བའོ། །ཡོན་ཏན་གྱི་བྱེ་བྲག་ཅིར་ཡང་སྣང་བ་ལ། རང་གི་ངོ་བོ་ལ་དབྱེ་བ་མེད་པས་ཐམས་ཅད་གཉིས་མེད་ཆེན་པོར་རོ་གཅིག་པས་ཀུན་ཏུ་བཟང་པོའོ། །ཆོས་ཉིད་གསལ་བའི་རང་གདངས་ལ། ཡེ་ཤེས་དག་པའི་ཟེར་གདངས་ཤར། འགག་མེད་འོད་ཀྱི་གཞལ་མེད་ཁང་ན། སྙིང་པོ་སྐུ་ལྔ་ནང་ན་གསལ་བས་ན་བུམ་པའི་སྐུའོ། །བགྲེས་པ་མི་མངའ་བས་
གཞོན་ནུའོ། །རིག་པ་དང་ཡེ་ཤེས་འདུ་འབྲལ་མེད་པས་ཐབས་འགག་པ་མེད་པའི་ཡེ་ཤེས་དང་། ཤེས་རབ་འགྱུར་བ་མེད་པའི་ཆོས་ཉིད་དོ། །ཆོས་ཉིད་ཀྱི་ཀློང་དུ་རིག་པ་གནས་༼གྲུབ་ཅིང་༽ཤིང་། རིག་པའི་༼ཡེ་ཤེས་ཀྱི་གདངས་ལྔ་གྲུབ་པས་རང་བཞིན་ལྷུན་གྱིས་གྲུབ་པའི་སངས་རྒྱས་སོ། །༽ཀློང་དུ་འོད་ལྔ་གསལ་ལ། འོད་ལྔའི་ནང་དུ་སྐུ་ལྔ་ཡོན་ཏན་གྲུབ་པས་ན་རང་བཞིན་ལྷུན་གྲུབ་ཀྱི་སངས་རྒྱས་སོ། །ངོ་བོ་ཆོས་ཉིད་དང་ཆོས་སྐུ་དབྱེར་མི་ཕྱེད་པའི་ངང་ན། རང་བཞིན་འོད་ཀྱི་བུམ་པ་ལྔ་གསལ་ཏེ། ཐུགས་རྗེའི་སྙིང་པོ་སྐུ་ལྔ་ཕྱག་རྒྱ་མ་སྐྱེས་པའི་ཚུལ་དུ་གནས་པས་ན། ངོ་བོ་རང་བཞིན་ཐུགས་རྗེ་གསུམ་མོ། །ཀྱཻ་རྡོ་རྗེ་འཛིན་པ་ལེགས་པར་ཟུངས་ཤིག །གཞན་ཐམས་ཅད་ཐ་སྙད་ཡིན་ལ། ཡང་དག་པའི་དོན་དེ་ལྟར་གནས་པས་ན་དང་པོའི་གནས་ལུགས་སོ། །རང་བྱུང་གི་ཡེ་ཤེས་ཡིན་པས་ན། དང་པོའི་སངས་རྒྱས་རྒྱུ་མེད་པ་དང་། སངས་རྒྱས་ཐོག་མ་ཐ་མ་མེད་པའོ། །གཟིགས་སྣང་ལས་འདས་པའི་གསལ་ལ་མི་འགག་པ་ཡེ་ཤེས་མིག་གཅིག་གོ། གཉིས་སུ་སྣང་བ་ནི་རྟག་ཆད་དང་ཡོད་མེད་དང་། བཟང་ངན་དང་། ཆེ་ཆུང་དང་། མཐོ་དམན་དང་། ཡངས་དོག་དང་། གཟུང་འཛིན་དང་། དགག་བསྒྲུབ་དང་། དག་དང་མ་དག་པ་དང་། ཕྱི་ནང་༼ཡངས་དོག་༽དང་། སྤང་ཐོབ་དང་། བླང་དོར་ཡིན་མིན་གཉིས་ཀྱི་ཆོས་དེ་བཞིན་ཉིད་དུ་གཉིས་སུ་སྣང་བ་མེད་པས་ན་གཉིས་མེད་དོ། །མི་མཐུན་པར་སྣང་བ་མེད་པས་ན་གཅིག་གོ། སྒྲིབ་པ་མེད་པས་ན་ཟང་ཐལ་ལོ། །འཁོར་འདས་ཐམས་ཅད་དེ་ལས་བྱུང་ཞིང་དེ་ལ་ཐུག་པས་ན་རྩ་བའོ། །བརྗོད་མེད་བསམ་གྱིས་མི་ཁྱབ་ཀྱང་།
དོན་ཡང་དག་པ་དེ་ལས་མི་འདའ་བས་བརྗོད་པའོ། །ཤེས་བྱའོ། །མ་བཅོས་པར་ངང་གིས་གནས་པས་གཤིས་སོ། །ཐམས་ཅད་དེ་ལས་བྱུང་བས་ན་རྒྱུའོ། །གཞི་ཆེན་པོ་དེ་ལས་ཐམས་ཅད་བསྐྱེད་ཅིང་འབྲེལ་བས་ན་ས་བོན་ནོ། །ཀ་དག་པའི་ཡེ་ཤེས་ཡིན་ཏེ། དྲི་མར་གྱུར་པ་མི་གནས་པར་རྣམ་པར་དག་པའོ། །འཁོར་འདས་ཐམས་ཅད་དེ་ལས་བྱུང་བས་ན་རིན་པོ་ཆེའོ། །རིགས་ཀྱི་བུ་གཞན་ཡང་འདི་ལྟ་སྟེ། སྣ་ཚོགས་སུ་ཤར་ཞིང་སྣང་ཡང་ངོ་བོ་མི་རྟོག་པས་འབྱེད་པ་མེད་པའི་ཤེས་རབ་བོ། །རང་གི་ངོ་བོ་རིག་པ་དངོས་མེད་ཀྱི་ཡེ་ཤེས། ཡེ་དག་ཟང་ཐལ་དུ་གནས་ལ། དེ་རྡོས་པ་ཅན་གྱི་ཆོས་མ་ཡིན་པས། ཡོན་ཏན་གྱི་སྒོ་ཡངས་པ་ནི་ཆོས་ཐམས་ཅད་ཀྱི་འབྱུང་གནས་ཏེ། ངོ་བོ་རྒྱ་མ་ཆད་པའོ། །ཀྱེ་རྡོ་རྗེ་འཛིན་པ་ངས་བསྟན་པའི་རྒྱུད་ལུང་དུ་ཚིག་དེ་རྣམས་གང་བྱུང་ཡང་གཞི་མཚོན་པའི་ཚིག་ཏུ་ཤེས་པར་གྱིས་ཤིག །ཅེས་གསུངས་སོ། །