མདོར་བསྟན་པ།
[2] གཉིས་པ་ནི། དེ་ལྟར་གཞི་འཁྲུལ་གྲོལ་གྱི་གནས་ལུགས་ངེས་པར་བྱས་ནས་ལམ་གྱི་རང་བཞིན་བསྟན་པ་ལ། ཐོག་མར་གྲོལ་ལུགས་ཆེན་པོ་གཞིའི་
ངང་དུ་གནས་པ་རང་གི་རིག་པ་རང་བྱུང་གི་ཡེ་ཤེས་ཐུན་མོང་མ་ཡིན་པ་ཉིད་ལམ་འདིའི་ཁྱད་ཆོས་སུ་རྟོགས་ནས། དེ་ཚུལ་བཞིན་ལམ་དུ་བྱེད་པ་ལ་སྟོང་ངོས་ཀ་དག་གིས་རིག་པ་སྤྲོས་བྲལ་དུ་གྱུར་པས་སྟོང་པའི་ཆོས་ཟད་སར་བྱེད་པ་ཁྲེགས་ཆོད་དང་། སྣང་ངོས་ལྷུན་གྲུབ་ཀྱིས་རྡོས་བཅས་འོད་གསལ་དུ་དངས་པས་སྣང་བའི་ཆོས་ཉིད་ཟད་པར་བྱེད་པ་ཐོད་རྒལ་ཏེ་གཉིས་ལས་དེ་དག་གི་ལྟ་སྒོམ་སྤྱོད་པའི་དོན་རྣམས་གོང་དུ་ལན་དུ་མར་སོང་བས་ཡང་ཟློས་ཀྱི་སྤྲོས་པ་མ་བྱས་ལ། ཉམས་སུ་ལེན་ཚུལ་བྱེ་བྲག་ཏུ་བཤད་པ་དག་ཀྱང་སྙིང་ཐིག་གི་ཁྲིད་གཞུང་རྣམས་སུ་གསལ་བས་དེར་མཐུས་པའི་དབང་དུ་བཏང་ནས། སྐབས་འདིར་དེ་དག་ལ་ཉེར་མཁོའི་གོ་དོན་དཀའ་གནད་ཀྱི་རིམ་པ་རྣམས་གོ་སླ་བ་གཙོ་བོར་བཟུང་སྟེ་གོ་རིམ་ས་བཅད་སོགས་ཀྱི་ངེས་པ་སྤངས་པས་ལྷུག་པར་འབྲི་བ་ལ།