བཞི་བ། ཀརྨ་བའི་དབུ་ཞྭའི་སྐོར།
༡ ཀརྨ་བའི་ཞྭ་ནག་མཐོང་བ་རང་གྲོལ།
ལང་གཤེགས་ལས། རབ་བྱུང་ཆོས་ལ་ཞྭ་ནག་ཅན། །སྟེང་གི་བསྟན་པ་མ་ནུབ་པར། །འགྲོ་བའི་དོན་ལ་རྒྱུན་ཆད་མེད། །ཅེས་དང་། ཨོ་རྒྱན་པད་འབྱུང་གིས། སངས་རྒྱས་ཀུན་གྱིས་བསྔགས་པའི་སྲས་གཅིག་པུ། །རྒྱལ་བའི་དབང་བོ་ཞྭ་ནག་ཅོད་པན་འཛིན། །བོད་ཡུལ་གདུལ་བྱར་དགོངས་ཏེ་ངེས་པར་འབྱོན། །ཞེས་པའི་ལུང་བསྟན་དང་མཐུན་པར། ཀརྨ་དུས་གསུམ་མཁྱེན་པ་རབ་ཏུ་བྱུང་ནས་གཙུག་ཕུད་དོར་ཚེ་དཔལ་འཁོར་ལོ་སྡོམ་པ་དང་མཁའ་འགྲོ་མ་བྱེ་བ་ཕྲག་སུམ་ཅུ་རྩ་གཉིས་ཀྱིས་དབུ་སྐྲ་ཉག་མ་རེ་ལས་བྱས་པའི་ཨིནྡྲ་བྷུ་དྷིའི་ཞྭ་ནག་གི་ཅོད་པན་དབུ་ལ་གསོལ་ཏེ་དབང་བསྐུར། དེ་ནས་བཟུང་སྟེ་དབང་རྟགས་རིགས་ཀྱི་ཅོད་པན་དེ་དབུ་ལ་རང་གྲུབ་ཏུ་ཡོད་ནའང་། སོ་སྐྱེས་ཕལ་བའི་མིག་གི་སྤྱོད་ཡུལ་དུ་མ་གྱུར་བས། དེ་མཚོན་བྱེད་དུ་དབུ་ཞྭ་ནག་པོ་ཞིག་མནབས་ཞེས་ཟླ་ཤེལ་ཕྲེང་བ་དང་། མཁས་པའི་དགའ་སྟོན་སོགས་ཆོས་འབྱུང་མང་བོར་གསུངས་སོ། །སྤྱིར་ཀརྨ་སྐུ་ཕྲེང་རིམ་བྱོན་གྱི་དབུར་ཞྭ་ནག་མཐོང་གྲོལ་འདི་ཉིད་བཞུགས་ཀྱང་། སྐལ་ལྡན་ལས་འཕྲོ་ཅན་མ་གཏོགས་མི་མཐོང་བར་གསུངས་ལ། ད་ལྟ་དངོས་སུ་འཇལ་རྒྱུ་ཡོད་པ་འདི་ཉིད་ཀརྨ་སྐུ་ཕྲེང་ལྔ་བ་རྒྱ་ནག་ལ་ཕེབས་སྐབས། རྒྱལ་བོས་རྒྱུན་དུ་ཁོང་གི་དབུ་ལ་ཞྭ་ནག་པོ་ཞིག་བཞེས་པ་མཇལ་བས། དེ་ལ་དཔེ་བྱས་ཏེ་ཀུན་གྱིས་མཇལ་དུ་ཡོད་པས་མཐོང་གྲོལ་འདི་བཟོས་པ་ཡིན། འདི་ལ་ཡང་གང་ཟག་གི་ལས་སྐལ་སོ་སོའི་དབང་གིས་མཐོང་སྣང་མི་འདྲ་བ་འབྱུང་བ་སྟེ། ལ་ལས་དབུ་ཞྭ་ཉིས་བརྩེགས་དང་། ཁ་ཅིག་འོད་ཀྱི་གོང་བུ། འགའ་རེས་འཇའ་འོད་སྣང་བ་སོགས་སོ། །
དབུ་ཞྭ་འདིའི་མཚོན་དོན་ཡང་། མདོག་མཐིང་ནག་ཏུ་སྣང་བ་ནི། ཆོས་ཉིད་ལ་འགྱུར་བ་མེད་པའི་བརྡ་དང་། སྐུ་གསུམ་ལྷུན་གྱིས་གྲུབ་པའི་བརྡ་རུ་རྩེ་མོ་གསུམ་དུ་སྣང་བ། ཚད་མེད་བཞིས་འགྲོ་བ་རྗེས་སུ་འཛིན་པའི་བརྡ་རུ་ངོ་སྒོ་གྲུ་བཞི་བ་དང་། སྣ་ཚོགས་རྡོ་རྗེ་རྒྱ་གྲམ་གྱིས་མཚན་པ་ནི་འཕྲིན་ལས་བཞིས་གདུལ་བྱའི་དོན་བྱེད་ཚུལ་སྟོན་པ། སྤྲིན་རིས་ཀྱིས་བརྒྱན་པ་ནི། ཐུགས་རྗེ་འཕྲིན་ལས་ཕྱོགས་ལྷུང་མེད་པར་ཀུན་ལ་ཁྱབ་པའི་བརྡ་དང་། ཐབས་ཤེས་ཟུང་དུ་འཇུག་པའི་རང་རྟགས་སུ་ཁྱུང་གཤོག་གིས་མཛེས་པ། ཆོས་སྐུའི་རྒྱལ་སར་དབང་བརྙེས་ཤིང་གཅིག་ཤེས་ཀུན་གྲོལ་གྱིས་མཁྱེན་པའི་རྩལ་རྫོགས་ཏེ་འོད་གསལ་ཁོར་ཡུག་གིས་ཏིང་འཛིན་ལ་དབང་འབྱོར་བའི་རྟགས་སུ་ཉི་ཟླ་ནོར་བུའི་ཏོག་གིས་སྤྲས་པ་སོགས་ཡེ་ཤེས་ཀྱི་རོལ་པ་འགོག་ཏུ་མེད་པ་ཁོ་ནའོ། །ཞྭ་ནག་མཐོང་གྲོལ་འདི་ཉིད་ལ་མཇལ་བས་སྒོ་གསུམ་གྱི་སྡིག་སྒྲིབ་བྱང་བ་དང་། གནས་སྐབས་ཚེ་རིང་ནད་མེད་དང་སྟོབས་འབྱོར་རྒྱས་པ། མཐར་ཐུག་འོད་དཔག་མེད་ཀྱི་ཞིང་དུ་སྐྱེས་པ་སོགས་ཕན་ཡོན་འབྱུང་བར་ཡང་བཤད་དོ། །
ཡང་འཇུ་མི་ཕམ་གྱི་མཐོང་གྲོལ་དབུ་ཞྭའི་འབེལ་གཏམ་མདོར་བསྡུས་ལས། འཇིག་རྟེན་དབང་ཕྱུག་ཀརྨ་ན་རིམ་གྱིས་སྐྱེ་རྒུ་རྣམས་ལ་རྣམ་གྲོལ་གྱི་ས་བོན་བསྐྲུན་པའི་ཕྲིན་ལས་ཀྱི་གཙོ་བོ་མཐོང་གྲོལ་ཞྭ་ནག་ལ་བརྟེན་ནས་མཛད་པ་སྟེ། དེའང་སྤྱན་རས་གཟིགས་ཀྱི་རྣམ་འཕྲུལ་དྲང་སྲོང་དཀོན་པ་སྐྱེས་ཞེས་པ་རྡོ་རྗེ་ལྟ་བུའི་ཏིང་ངེ་འཛིན་བརྙེས་པའི་ཚེ་རྒྱལ་བ་སྲས་དང་བཅས་པའི་དབང་རྟགས། རྡོ་རྗེ་ཅོད་པན་ཡེ་ཤེས་ཀྱི་མཁའ་འགྲོ་མ་བྱེ་བའི་དབུ་སྐྲ་ལས་གྲུབ་པ་སྤྱི་བོར་བཅིངས་པ་དེ་ནས་བརྩམས་བྱང་སེམས་བློ་གྲོས་རིན་ཆེན། གྲུབ་ཆེན་ས་ར་ཧ་བ། དཔལ་ལྡན་དུས་གསུམ་མཁྱེན་པ་སོགས་སྐུའི་སྐྱེ་བ་རིམ་བྱོན་ཐམས་ཅད་ཀྱི་དབུ་ལ་འབྲལ་མེད་དུ་བཞུགས་ཀྱང་། ལས་སྐལ་ལྡན་པ་རེ་རེ་ཙམ་ལས་མཇལ་བར་དཀའ་བས། འཇམ་དབྱངས་སྤྲུལ་བ་ཏཱ་མིང་ཡུང་ལོ་རྒྱལ་བོས་རྒྱལ་དབང་ཀརྨ་པ་ལྔ་བ་དེ་བཞིན་གཤེགས་པ་ལ་གསོལ་བ་བཏབ་སྟེ། ཉིད་ཀྱིས་མཇལ་ཚུལ་དང་མཐུན་པར་མཐོང་གྲོལ་ཞྭ་ནག་འཛམ་གླིང་གཡས་བཞག་ཏུ་གྲགས་པ་ཕུལ་བས། ཡེ་ཤེས་རང་སྣང་གི་ཅོད་པན་དང་དབྱེར་མེད་དུ་བྱིན་གྱིས་བརླབས་ཤིང་མཆོག་དམན་ཀུན་གྱི་སྤྱོད་ཡུལ་དུ་སྣང་བར་མཛད། ཅེས་ཀྱང་གསུངས་སོ། །
ཡང་བཤད་ཚུལ་གཞན་ཞིག་ལ། ཀརྨ་ཞྭ་ནག་ནི། ཀརྨ་སྐུ་ཕྲེང་གཉིས་པ་ཀརྨ་ཀྵུ་རྒྱ་ནག་ཡོན་གོང་མའི་དབུ་བླར་བྱོན་སྐབས། གོང་མས་ལས་ཞྭར་ཕུལ་བས། ཕྱིས་སྐུ་ཕྲེང་རིམ་བྱོན་གྱིས་དབུ་ཞྭ་དེ་མནབས་པར་ཡང་གྲགས་ལ། ཡང་། བྱམས་ཆེན་ཆོས་རྗེའི་ཞྭ་ནག་ནི། ཏཱ་མིང་རྒྱལ་བོས་ཁོང་ལ་ཞྭ་ནག་ཅིག་གནང་། ཞེས་དང་།
དེ་ཡང་དགེ་ཆོས་ཀྱིས། ཀརྨ་བའི་ཞྭ་ནག་ནི་ལོ་རྒྱུས་ཤིན་ཏུ་རྒྱས་མོད། ཐད་དུ་བལྟས་ཚེ་སྔོན་བྲིས་པའི་རྒྱ་ནག་གི་བཙུན་པ་རྣམས་ཀྱི་སྐུ་བརྙན་ལ་ཞྭ་དེ་ཀ་རང་འདུག་པས། རྒྱ་ནག་ལས་བྱུང་བར་སེམས་ཞེས་གསུངས་བར་གཞིགས་ན་གང་ལྟར་རྒྱ་ནག་གོང་མས་གནང་བ་བདེན་སྙམ་མོ། །
དེ་ལས་གཞན། ཐུའུ་བཀྭན་གྲུབ་མཐའ་ལས། ཀརྨ་བ་ཚོས། ཞྭ་ནག་པོ་འདི་དུས་གསུམ་མཁྱེན་པ་ལ་མཁའ་འགྲོ་མ་བྱེ་བ་འབུམ་གྱི་དབུ་སྐྲ་ལས་བྱས་ནས་ཕུལ་བ་ཡིན་ཟེར་བ་སོགས་ཆེ་བརྗོད་མང་བོ་སྒྲོགས་པ་ནི་སྒྲོ་བཏགས་ཀྱི་གཏམ་དུ་དོགས་སོ། །ཞེས་ཡང་གསུངས་སོ། །
༢ ཞྭ་དམར།
རབ་བྱུང་དྲུག་པའི་སྐབས་སུ་ཀརྨ་རང་བྱུང་རྡོ་རྗེའི་དངོས་སློབ་རྟོགས་ལྡན་གྲགས་པ་སེང་གེ་ལ། ཧོར་རྒྱལ་བོས་ཞྭ་དམར་བོ་ཞིག་ཕུལ་བས་དེའི་བླ་མ་སློབ་བརྒྱུད་ལ་ཞྭ་དམར་གྲགས། གཞན་ཀརྨ་བར། གསལ་སྟོང་སྒོམ་ཞྭ། སི་ཏུའི་ཞྭ་ཁྲ། དྭགས་པོ་རབ་འབྱམས་པའི་ཞྭ་ལྗང་། ལྡང་ལྷ་པཎ་ཆེན་གྱི་ཞྭ་སེར། ཀརྨ་སྒར་བ་ནས་དར་བའི་སྒར་སྦུགས་སོགས་མང་ངོ་། །
༣ འབྲི་གུང་སྒོམ་ཞྭ།
འབྲི་གུང་སྒོམ་ཞྭ་ནི་འགྲོ་མགོན་ཕག་མོ་གྲུ་བས་ཆོས་རྗེ་སྟག་ལུང་བ་དང་། རྗེ་བཙུན་གླིང་རས་པ། ཆོས་རྗེ་འབྲི་གུང་བ་གསུམ་ལ་སྣམ་ཕྲུག་དམར་བོ་འདོམ་རེ་གནང་ནས་ཁྱེད་གསུམ་གྱིས་སྒོམ་ཞྭ་རེ་བཟོས་ནས་འཁྱེར་ཤོག་གསུངས་པས། ཆོས་རྗེ་འབྲི་གུང་བས་དེ་དོན་དམ་དུ་ཐུགས་སུ་ཆུད་ནས་ཕྲུག་འདོམ་གང་བསྣན་ཏེ། སྒོམ་ཞྭ་སྨུག་ཡོད་མར་གྲགས་པ་བཟོས་པས། ཁོང་གི་རྒྱལ་ཚབ་ཏུ་དབང་བསྐུར་བར་མ་ཟད། ཕག་གྲུའི་གདན་རབས་རིམ་བྱོན་གྱིས་ཀྱང་སྒོམ་ཞྭ་འདི་མནབས་ལ། དབུ་ཞྭ་འདི་ནི་དཔལ་སྦྱིན་གྱིས་ཞུས་པའི་མདོ་སོགས་ལས། ཕྱོགས་ཀྱི་ཆར་བྱང་ཆུབ་སེམས་དཔའ་རིན་ཆེན་དཔལ་ཞེས་བྱ་བས་འགྲོ་བ་འདུལ་བར་ཞྭ་འདི་ལྟ་བུ་གྱོན་པར་འགྱུར་རོ། །གསུངས་ལ། འབྲི་གུང་བ་རང་གི་ཞལ་ལས་ཀྱང་། ངའི་ཞྭ་འདི་རྒྱལ་བའི་བཀའ་རབ་འབྱམས་ལ་བརྟེན་ནས་རྟེན་འབྲེལ་ཏུ་བསྒྲིགས་ཏེ་བརྩམས་པ་ཡིན་གྱི། ངོ་དགའ་དང་པད་ལད་ཚུལ་འཆོས་ཀྱིས་མ་ཡིན་ནོ། །ཞེས་གསུངས་ལ། ཟབ་ཆོས་རིན་པོ་ཆེ་ལས། སྤྱིར་བསྟན་པ་ལ་ཕན་པའི་ཞྭ་གསུམ། གནོད་པའི་ཞྭ་གསུམ། ཕན་གནོད་མེད་པའི་ཞྭ་སོགས་ཡོད་པ་ལས། ཕན་པའི་ཞྭ་གསུམ་ནི་ཇོ་བོ་རྗེའི་རྣ་རིང་དང་། པཎ་ཆེན་ཤཱཀྱ་ཤྲཱིའི་གདུགས་རྩིབས་མ་དང་། ངའི་སྒོམ་ཞྭའོ། །ཞེས་ཀྱང་གསུངས་སོ། །དབུ་ཞྭ་འདིའི་ཁྱད་ཆོས་ཀྱང་། ཟབ་ཆོས་དེ་ཉིད་ལས། དཔག་མེད་བསོད་ནམས་སྟོབས་ལས་བྱུང་བའི་ཞྭ། །འགྲོ་བ་སྨིན་བྱེད་ཡོན་ཏན་རིན་ཆེན་ཞྭ། །དུས་གསུམ་ཀུན་མཁྱེན་རྒྱལ་བའི་བསྔགས་པའི་ཞྭ། །མང་བོའི་དབུས་ན་ཁྱད་འཕགས་གཙུག་ཏོར་ཞྭ། །ང་ཡི་ཞྭ་འདི་ཅིས་ཀྱང་ནུབ་མི་འགྱུར། །ཞེས་སོ། །
ཕན་ཡོན་ཡང་། འབྲི་གུང་བས། ངའི་ཞྭ་འདི་རྟེན་ཁུག་གི་ལྷ་ཁང་ཡིན། རྒྱབ་བརྟེན་དང་སྐྱེལ་མ་ཡིན། བཀའ་རྟགས་ཀྱི་ཕྱག་རྒྱ་ཡིན། ཞེས་དང་། ཞྭ་སྒོམ་ཞྭ་མགོ་ལ་བཞག་ཙམ་གྱིས། །འཕྲལ་ཅིས་ཀྱང་སངས་རྒྱས་འཐོབ་པར་ངེས། །ཞེས་སོགས་རྒྱ་ཆེར་གསུངས་པ་དང་། ཡང་། དབུ་ཞྭ་འདི་ཉིད་ལ་བརྙས་པ་སོགས་བྱས་ན་ཉེས་དམིགས་ཡང་ཚད་མེད་འབྱུང་སྟེ། འབྲི་གུང་བའི་ཞལ་ལས། འདི་གསར་བ་བཟོས་ན་ལྷ་ཁང་དང་མཆོད་རྟེན་བཞེངས་པའི་ཕན་ཡོན་འབྱུང་ཞིང་། བཤིག་ན་ཉེས་པ་ལྷ་ཁང་བཤིག་པ་དང་མཉམ་མོ། །ཞེས་དང། ངའི་ཞྭ་འདི་སྡིག་ཅན་གྱི་མགོ་ལ་མི་བཞག མི་ནག་གི་ལག་ཏུ་མི་བཞག་ཅེས་སོགས་ནན་ཏན་གྱིས་གདམས་པའི་ཕྱིར་རོ། །