གཉིས་པ་རང་ལུགས།
གཉིས་པ་རང་ལུགས་ནི།
རང་གི་རྟེན་གཏན་ཚིགས་ལ་བརྟེན་ནས་དངོས་སུ་སྒྲོ་འདོགས་གཅོད་པའི་ངེས་པ་དང་མངོན་སུམ་གཉིས་གང་ཡང་མ་ཡིན་ཞིང༌།རང་ཡུལ་བདེན་པ་ལ་མཐའ་གཅིག་ཏུ་གསར་དུ་ཞེན་པའི་བློ་ཡིན་པ་དེ། ཡིད་དཔྱོད་ཀྱི་མཚན་ཉིད། རང་གི་རྟེན་གཏན་ཚིགས་ལ་བརྟེན་ནས་དངོས་སུ་སྒྲོ་འདོགས་ཆོད་པའི་ངེས་པ་དང་བྲལ་ཞེས་པས་རྗེས་དཔག་དང་ཡིད་དཔྱོད་ཀྱི་གཞི་མཐུན་ཡོད་པ་གཅོད། མངོན་སུམ་མ་ཡིན་ཞེས་པས་མངོན་སུམ་དང་ཡིད་དཔྱོད་ཀྱི་གཞི་མཐུན་ཡོད་པ་གཅོད། རང་ཡུལ་བདེན་པ་ཞེས་པས་ལོག་ཤེས་དང་དེའི་གཞི་མཐུན་གཅོད། མཐའ་གཅིག་ཏུ་ཞེས་པས་ཐེ་ཚོམ་དང་དེའི་གཞི་མཐུན་གཅོད། གསར་དུ་ཞེས་པས་བཅད་ཤེས་དང་དེའི་གཞི་མཐུན་གཅོད་པའོ། །དེ་ལ་དབྱེ་ན་རྒྱུ་མཚན་ཅན་གྱི་ཡིད་དཔྱོད་དང༌། རྒྱུ་མཚན་མེད་པའི་ཡིད་དཔྱོད་གཉིས་ཡོད་པའོ། །དང་པོ་ནི། བྱས་པའི་རྟགས་ཀྱིས་སྒྲ་མི་རྟག་པར་དཔྱོད་ཚེ་སྒྲ་མི་རྟག་པ་ཚད་མས་མ་ངེས་ཀྱང་ཚིག་སྤྱི་ཙམ་གྱིས་སྒྲ་མི་རྟག་པ་ལ་གོ་བ་ལེགས་པར་ཆགས་པའི་བློ་ལྟ་བུའོ། །གཉིས་པ་ནི། བྱས་པ་སོགས་རྒྱུ་མཚན་ལ་མ་བརྟེན་པར་སྒྲ་མི་རྟག་པ་མཐའ་གཅིག་ཏུ་ཡིན་ནོ་སྙམ་པའི་བློ་ལྟ་བུའོ། །