གཉིས་པ་མཐའ་རགས་ཙམ་དཔྱད་པ།

གཉིས་པ་མཐའ་རགས་ཙམ་དཔྱད་པ་ལ།

ཆགས་བྲལ་སྔོན་སོང་གི་ཕྱིར་འོང་དང་ཕྱིར་མི་འོང་གཉིས་ཉ་ཊཱིཀ་ལས། བཅུ་དྲུག་པའི་རྟོགས་པ་ལ་གནས་པའོ། །ཞེས་བཅུ་དྲུག་པ་ལམ་རྗེས་ཤེས་ལ་གནས་དགོས་པ་ལྟ་བུར་གསུངས་པ་ནི་བཅུ་དྲུག་པའི་རྟོགས་པ་ཐོབ་ཟིན་དགོས་ཀྱང་དེ་ལ་གནས་པ་དགོས་པ་མིན་ནམ་དཔྱད་པར་བྱའོ། །ཐེག་མཆོག་དབུ་མའི་ཟིན་བྲིས་ལས། འདིར་བདེན་པ་མཐོང་བ་ཞེས་པ་ཡང་མ་མཐའི་ས་མཚམས་རྒྱུན་དུ་ཞུགས་པ་ནས་འཇོག་པ་ཡིན་ཏེ། ཞེས་དང༌། ཀུན་བཏུས་ས་འགྲེལ་ལས། མཐོང་བའི་ས་ནི་རྒྱུན་ཞུགས་དང༌། ཞེས་གསུངས་པ་ཡང་བརྟག་པར་བྱ་དགོས་ཏེ། ཉ་ཊཱིཀ་ལས། ཆུ་མིག་པ་སོགས། རྒྱུན་ཞུགས་ཞུགས་པ་རྒྱུན་ཞུགས་སུ་སྨྲ་བ་ནི་ནོར་བ་སྟེ། བཅུ་དྲུག་པ་ཐོབ་པར་ཐལ་ཏེ། ཀུན་བཏུས་སུ། རྒྱུན་དུ་ཞུགས་པ་གང་ཞེ་ན། གང་མཐོང་བའི་ལམ་གྱི་སྐད་ཅིག་བཅུ་དྲུག་པ་ལ་གནས་པའི་གང་ཟག་གོ་ཞེས་སོ། །ཞེས་གསུངས་སོ། །ཆུ་མིག་པ་སོགས། ཆགས་བྲལ་སྔོན་སོང་གི་ཕྱིར་འོང་མི་འོང་ཞུགས་པ་དེ་ཕྱིར་འོང་མི་འོང་དངོས་ཡིན་ཏེ། དྲུག་པ་སྤངས་པའི་དང་དགུ་བ་སྤངས་པའི་ཉན་ཐོས་སློབ་པའི་འཕགས་པ་ཡིན་པས་སོ་གསུང་ངོ༌། །ཆགས་བྲལ་སྔོན་སོང་དང་མཐར་གྱིས་པའི་དེ་དང་དེ་ནི་མིན་ཏེ་རྒྱུ་མཚན་སླ་ཞིང་གཞན་དངོས་སུ་མ་བཤད་དོ། །ཞེས་ཆུ་མིག་པའི་དེ་ལྟར་འདོད་པ་དེ་མི་འཐད་པར་གསུངས་མོད།མདོ་ལུགས་མ་ལས། ཕྱིར་འོང་ལ་ཞུགས་གནས་གཉིས་དང༌། བར་ཆད་གཅིག་པ་སྟེ་གསུམ་མོ། །ཞེས་པས་བརྟག་པའི་གནས་ཙམ་མོ། །ཡང་ཉ་ཊཱིཀ་ལས། འོན་ཀྱང་དོན་གྱིས་ཐོབ་སྟེ་ཕྱིར་འོང་ཆགས་བྲལ་སྔོན་སོང་དུས་ཕྱིས་ཕྱིར་མི་འོང་དུ་གྱུར་པ་དང་ལྔ་བ་མན་སྤངས་ནས་མཐོང་ལམ་ཐོབ་རྗེས་སུ་ཕྱིར་འོང་དུ་གྱུར་པ་དང་མཐོང་ལམ་གྱི་སྔར་འཇིག་རྟེན་པའི་ལམ་གྱིས་རྣམ་གསུམ་རྣམ་བཞི་སྤངས་པའི་རྒྱུན་ཞུགས་གང་གསུམ་མམ་བཞིའི་གཉེན་པོ་ཟག་མེད་མ་ཐོབ་པ་དང་ཐོབ་པ་གཉིས་ཀ་དང་ཕྱིར་འོང་འབྲས་གནས་མཐོང་ལམ་གྱི་སྔར་བདུན་བརྒྱད་སྤང་བ་དེའི་གཉེན་པོ་ཟག་མེད་ཐོབ་མ་ཐོབ་གཉིས་བཤད་པས་དེ་ཐོབ་པ་དེ་ཡང་དེ་གཉིས་གང་ཡང་མིན་པས་སོ། །ཞེས་གསུངས་པའི་ནང་ནས་དང་པོ་ལས་གཞན་རྣམས་ལ་བརྟག་པའི་གནས་སོ། །ཡང་ཉ་ཊཱིཀ་ལས། དེས་ན་གནད་དེ་མ་ཤེས་པར། ཆགས་བྲལ་སྔོན་སོང་གི་ཕྱིར་འོང་མི་འོང་དང༌། ཕྱིར་འོང་མི་འོང་གི་ཆགས་བྲལ་སྔོན་སོང་ལ་ཁྱད་པར་མེད་པར་འདོད་པ་ནི་ཞིབ་ཞིབ་འདྲ་བའི་ཐ་སྙད་རྨོངས་པ་མགུ་བར་བྱེད་པ་ཙམ་དུ་ཟད་དོ། །ཞེས་གསུངས་པའི་དོན་ལ་དཔྱད་པར་བྱའོ། །ཡང་ཉ་ཊཱིཀ་ལས། མཐོང་ལམ་གྱི་སྔར་སྲིད་རྩེའི་མཐོང་སྤང་འཇིག་རྟེན་པའི་སྒོམ་ལམ་གྱིས་སྤོང་བ་མི་སྲིད་དེ། དེས་སྤོང་ན་འོག་ལ་རགས་པ་གོང་མ་ལ་ཞི་བར་བལྟས་ནས་སྤང་དགོས་ཤིང་སྲིད་རྩེ་ལས་གོང་སའི་འཇིག་རྟེན་པ་མེད་པས་སོ། །ཞེས་གསུངས་པ་ལ།། ལྷན་ཐབས་ལས། ཚད་མེད་བཞི་མེད་ཀྱང་ཉེར་བསྡོགས་རྫོགས་པར་ཐོབ་ལ་མ་ཉམས་པ་ཡོད་ན་ཚངས་པར་སྐྱེ་ངེས་པའི་ཕྱིར། ཚད་མེད་བཞི་སྨོས་པ་དོན་མེད་པར་འགྱུར་བའི་ཕྱིར་རོ། །དེས་ན་འདོད་ཡོན་མ་སྤངས་བསམ་གཏན་དང་པོའི་ཏིང་ངེ་འཛིན་རྒྱུད་ལ་མ་སྐྱེས་པར་ཚངས་གནས་སུ་སྐྱེ་བ་མིན་ཡང༌། འདོད་པའི་ཏིང་ངེ་འཛིན་ལ་བརྟེན་ནས་ཚད་མེད་བཞི་བསྒོམས་པས། འདོད་ཉོན་སྲབས་ཏེ། ཚད་མེད་བཞི་པོ་ཉིད་ཉེར་བསྡོགས་སུ་འགྱུར་ཏེ་དེ་ལས་དངོས་གཞི་སྐྱེ་ལ། འབྲས་བུ་རྒྱུའི་རྗེས་སུ་འཇུག་པ་ཉིད་ཀྱི་ཕྱིར། དངོས་གཞི་ཡང་ཚད་མེད་དང་མཚུངས་པར་ལྡན་པ་ཁོ་ན་འབྱུང་ངོ༌། །བྱམས་སོགས་གསུམ་གྱིས་ཁོང་ཁྲོ་དང༌། བཏང་སྙོམས་ཀྱིས་འདོད་པའི་འདོད་ཆགས་སྤངས་པས་གཙོ་བོ་བཅོམ་པ་ན་འཁོར་བྲོས་པ་ལྟར་འདོད་ཉོན་གཞན་རྣམས་ཤུགས་ལ་སྤངས་ཏེ།འདོད་པ་ལ་ཆགས་བྲལ་དུ་འགྱུར་བ་ཡིན་པས། འཇིག་རྟེན་པའི་ལམ་གྱིས་ཆགས་བྲལ་བྱེད་ཕྱིན་ཞི་རགས་ཀྱི་རྣམ་པ་ཅན་ཁོ་ན་བསྒོམ་དགོས་ཀྱི་གཞན་མེད་དོ་སྙམ་དུ་སེམས་པ་ནི། ཕྱོགས་གཅིག་ལས་གཞན་མ་རྟོགས་མི་མཐོང་བའོ། །ཞེས་པས་ཚད་མེད་བཞི་དང་སྲིད་རྩེ་ལ་སྐྱོན་དུ་ལྟ་བ་དང་ཐར་བ་དང་དག་ཞིང་སོགས་ཕན་ཡོན་དུ་ལྟ་བའི་སོ་སྐྱེས་ཀྱི་ལམ་དེས་སྲིད་རྩེའི་ཉོན་མོངས་པ་ཆགས་བྲལ་ནུས་པ་མིན་ནམ་དཔྱད་པར་བྱའོ། །ཡང་ཐེག་མཆོག་དབུ་མའི་ཟིན་བྲིས་ལས། སྤྱིར་ཡང་ཞི་རགས་ཀྱི་རྣམ་པ་ཅན་གྱི་ལམ་ལ་བརྟེན་ནས། ཕྱིར་འོང་དང་ཕྱིར་མི་འོང་ཐོབ་པ་ཡང་མི་འཐད་དེ། ལམ་དེས་ནི་ཉོན་མོངས་པ་མངོན་གྱུར་བ་ཙམ་འགོག་ནུས་ཀྱི། ས་བོན་རྩ་བ་ནས་སྤོང་མི་ནུས་པའི་ཕྱིར་རོ། །དེས་ན་འདོད་ཉོན་དྲུག་པ་སྤངས་པའི་ཕྱིར་འོང་དང༌། དགུ་བ་སྤངས་པའི་ཕྱིར་མི་འོང་གཉིས་ཐོབ་པ་ལ་བདེན་པའི་རྣམ་པ་ཅན་འཇིག་རྟེན་ལས་འདས་པའི་ལམ་གྱིས། ཉོན་མོངས་པ་དེ་དང་དེའི་ས་བོན་རྩ་བ་ནས་སྤངས་པ་ཞིག་དགོས་པ་ཡིན་ནོ། །ཞེས་ཞི་རགས་ཀྱི་ལམ་གྱིས་འབྲས་བུ་བར་བ་གཉིས་ཐོབ་པ་མི་འཐད་པ་ལྟ་བུར་གསུངས་ཀྱང་སྤྱིར་ཞི་རགས་ཀྱི་ལམ་གྱིས་ཐོབ་པ་ཡོད་པར་སྣང་སྟེ། ཀུན་བཏུས་ས་འགྲེལ་ལས། ལན་ཅིག་ཕྱིར་འོང་བའི་འབྲས་བུ་ལ་འཇུག་པ་གང་ཞེ་ན།གང་སྔར་རྒྱུན་ཞུགས་ཐོབ་པའི་རྗེས་སུ་འཇིག་རྟེན་པའམ་འཇིག་རྟེན་ལས་འདས་པའི་སྒོམ་པའི་ལམ་གང་རུང་ལ་འདོད་པ་ན་སྤྱོད་པའི་སྒོམ་སྤང་ཉོན་མོངས་པ་རྣམས་ཀྱི་རྣམ་པ་ལྔ་པ་འབྲིང་པོའི་འབྲིང་པོ་སྤངས་པའི་ལམ་ལ་གནས་པའི་གང་ཟག་གོ་ཞེས་པ་སྟེ། ཞེས་དང༌། མཛོད་རང་འགྲེལ་ལས། འབྲས་བུ་བར་བ་གཉིས་ནི་འཕགས་པའི་འཇིག་རྟེན་པའི་ལམ་གྱིས་ཀྱང་ཐོབ་པར་བྱེད་པས་དེ་གཉིས་ལས་ཉམས་པ་སྲིད་དེ། འཇིག་རྟེན་པའི་ལམ་གྱིས་སྤངས་པ་ནི་ལྡོག་པ་སྲིད་པའི་ཕྱིར། ཞེས་དང༌། རྣམ་འགྲེལ་ལས། སྐྱོབ་ལས་དེ་ཉིད་དང་བརྟན་དང༌། །མ་ལུས་ཁྱད་པར་མཁྱེན་པར་གྲུབ། །གཤེགས་པ་རྟོགས་པའི་དོན་ཕྱིར་ཏེ། །དེ་ཕྱིར་ཕྱི་རོལ་པ་དང་སློབ། །མི་སློབ་ལས་ལྷག་དེ་ཡི་ཕྱིར། ཞེས་དང༌། རྣམ་འགྲེལ་འགྲེལ་བཤད་རིན་ཕྲེང་ལས། བཅོམ་ལྡན་འདས་ཆོས་ཅན། ཕྱི་རོལ་པ་དང་སློབ་པ་དང་མི་སློབ་པ་ཉན་རང་དགྲ་བཅོམ་ལས་ལྡོག་སྟེ་རིམ་བཞིན་དེ་ཁོ་ན་ཉིད་མཁྱེན་པ་དང༌། མཁྱེན་པ་བརྟན་པ་དང༌། མ་ལུས་པར་མཁྱེན་པ་དེའི་ཕྱིར། ཞེས་སངས་རྒྱས་ཀྱི་སྤངས་རྟོགས་དང་སློབ་པ་ཉན་ཐོས་ཀྱི་སྤངས་རྟོགས་བརྟན་མི་བརྟན་གྱི་ཁྱད་པར་ཡོད་པར་གསུངས་པ་དག་གིས་གྲུབ་པའི་ཕྱིར་རོ། །