བྱམས་མགོན་མིའི་རྣམ་རོལ་བླ་མ་དམ་པ་སངས་རྒྱས་རྡོ་རྗེ།
བྱམས་མགོན་མིའི་རྣམ་རོལ་བླ་མ་དམ་པ་སངས་རྒྱས་རྡོ་རྗེ་ནི།
ཡབ་མདོས་ཚེ་མཆོག་དང་ཡུམ་པེ་བཟའ་རྫོགས་ལི་གཉིས་ཀྱི་སྲས་སུ་རབ་ཚེས་ཆུ་སྟག་ལ་འཁྲུངས།བཤེས་གཉེན་ཆེན་པོ་ངག་དབང་ཚོགས་གཉིས་རྒྱ་མཚོ་སོགས་བླ་མ་མང་དུ་བསྟེན། མདོ་སྔགས་ཀྱིས་བསྡུས་པའི་གཞུང་ལུགས་རབ་འབྱམས་ལ་སྦྱངས་བ་མཐར་ཕྱིན་པར་གནང་བས་མཁས་བཙུན་བཟང་གསུམ་གྱི་ཡོན་ཏན་མཆོག་མངའ་བའི་སྐྱེས་བུ་ཆེན་པོར་གྱུར། ས་ཡོས་ལོར་རྗེ་ཚོགས་གཉིས་རྒྱ་མཚོའི་བཀའ་ལུང་ལྟར་སྒྲུབ་གྲྭ་བསམ་གཏན་གླིང་དུ་རྡོ་རྗེ་སློབ་དཔོན་དུ་མངའ་གསོལ་ཏེ་སྦྱོར་དྲུག་པ་ཆོས་ཚན་བཅུ་གསུམ་ལ་རིམ་པར་གསང་ཆེན་རྡོ་རྗེ་ཐེག་པའི་ཟབ་རྒྱས་གདམ་པ་མཆོག་གིས་ལེགས་པར་བསྐྱངས། གཞན་དོན་གཉེར་ཅན་འགའ་ལ་ལམ་རིམ་བསྡུས་གྲྭའི་ཟུར་དཔྱད་སྤྱོད་འཇུག་ཕུང་ལྔའི་རྣམ་བཤད་སོགས་ཀྱང་འཆད་ཉན་མཛད། ལྷ་དབང་རྣམས་ལ་བསྙུང་གནས་དང་ལས་རྒྱུ་འབྲས་ཀྱི་རྣམ་བཞག ཚེ་དབང༌། རྟ་ཕྱག་ཁྱུང་གསུམ་གྱི་རྗེས་གནང་སོགས་གང་ལ་གང་འདོད་ཀྱི་དབང་བཀའ་རྗེས་གནང་མང་དུ་གསུངས། ལྕགས་ཡོས་ལོར་འབྲོག་དགེ་སྤྲུལ་སྐུ་འཇམ་དབྱངས་མཁྱེན་རབ་རྒྱ་མཚོ་མཆོག་གདན་ཞུ་བྱས་ཏེ། ཕྱོགས་ཕྱོགས་ནས་འོང་བའི་ཨ་མཁར་སྤྲུལ་སྐུ་འགྲོ་ཕན། རྫ་ནང་བླ་མ་མཁྱེན་ལྡན། རྒྱལ་སྲས་པད་ལོ། འབོ་ཚའི་མཁན་སྤྲུལ་རྣམས་དང༌། ཀ་བཞི་གཏེར་སྟོན་སོགས་འདུས་པ་སྟོང་ཕྲག་དུ་མ་ལ་དུས་འཁོར་དབང་ཆེན་དང་བླ་གྲྭ་རྣམས་ལ་རྒྱུད་སྡེ་རབ་འབྱམས་ཀྱི་དབང་གིས་རྒྱུད་སྨིན་ཅིང་ལམ་སྐྱེ་རུང་གི་ནུས་པ་ཁྱད་པར་ཅན་བཞག་པའི་ཆ་རྐྱེན་བསྐྲུན་ཞིང༌། རྒྱལ་བསྟན་སྤྱི་དང་ཁྱད་པར་ཀུན་མཁྱེན་ཇོ་ནང་པའི་སྒྲུབ་བརྒྱུད་ཀྱི་བསྟན་པ་དར་རྒྱས་སུ་མཛད་པས་སློབ་མའི་ཚོགས་ཀྱང་གླང་བླ་གསལ་བཟང་དང༌། འཕེས་བླ་ཚུལ་རྒྱམ་སོགས་སློབ་ཆེན་མང་དུ་བྱུང༌། ཚེ་དང་སྒྲུབ་པ་སྙོམས་པར་མཛད་ནས་དགུང་གྲངས་དོན་གཉིས་པ་ཆུ་མོ་གླང་གི་ལོར་མངོན་པར་དགའ་བའི་ཞིང་དུ་གཤེགས། མཁན་རབས་གསུམ་པ་མཁས་དབང་ཆེན་པོ་ངག་དབང་བསྟན་འཛིན་བཟང་པོ་མཆོག་ཀྱང་རབ་རྒྱལ་མེ་ཁྱིའི་ལོ་ནས་ལོ་ཁ་ཤས་ཙམ་ལ་རང་དགོན་གྱི་དབྱར་གནས་མཁན་པོར་བཞུགས་ཤིང་སྡོམ་གསུམ་དང་འདུལ་བ་གཞི་གསུམ་གྱི་ཁྲིད་ཀྱང་ཞིབ་རྒྱས་སུ་བསྩལ། མཁན་རབས་བཞི་བ་བདག་གི་འདྲེན་པ་མཚུངས་མེད་མཁན་ཆེན་ཆོས་ཀྱི་རྒྱལ་པོ་ངག་དབང་བློ་བཟང་འཕྲིན་ལས་མཆོག་ནི། ཡབ་སྐལ་བཟང་སྐྱབས་དང་ཡུམ་བཀྲ་ཤིས་སྐྱིད་གཉིས་ཀྱི་སྲས་སུ་བར་ཚེས་མེ་སྦྲུལ་ལོར་སྐུ་འཁྲུངས། ཡི་གེ་འབྲི་ཀློག་སོགས་ལ་སྦྱངས་པ་ཙམ་གྱིས་ཐུགས་སུ་ཆུད། དམ་པའི་མཚན་རྟགས་ལྷན་སྐྱེས་སུ་མངའ་བས་བླ་མ་དམ་པ་བློ་བཟང་ཚུལ་ཁྲིམས་དང་ངག་དབང་བསྟན་པ་རབ་རྒྱས། ངག་དབང་ཚོགས་གཉིས་རྒྱ་མཚོ་སོགས་མཁས་ཤིང་གྲུབ་པའི་བཤེས་གཉེན་མང་པོའི་ཞབས་པད་སྤྱི་བོར་བླངས་ཏེ་མདོ་སྔགས་རིག་གནས་ཀྱིས་བསྡུས་པའི་གཞུང་ལུགས་རབ་འབྱམས་ལ་སྦྱང་བརྩོན་མཐའ་ཆོད་པར་མཛད་པས་བཤད་སྒྲུབ་ཀྱི་རྩལ་ཡོངས་སུ་རྫོགས་ཏེ་དཔལ་ལྡན་རྒྱལ་བ་ཇོ་ནང་པའི་བསྟན་པའི་སྣང་བྱེད་ཆེན་པོར་གྱུར། ཁྱད་པར་གསང་བདག་འབྱུང་བོ་འདུལ་བྱེད་ཀྱི་རྣལ་འབྱོར་བསྒོམ་པས་ཐུན་མོང་སྣང་ཚོད་དུ་བསྐྱེད་རིམ་རགས་པ་མཐར་ཕྱིན་ཏེ། ལྷ་དང་བཅས་པའི་གཟིགས་སྣང་དཔག་ཏུ་མེད་ཅིང་ཆོས་སྐྱོང་རྣམས་བྲན་བཞིན་དུ་འཁོར། དགུང་གྲངས་ཞེ་གཅིག་པ་མེ་བྱའི་ལོར་རང་དགོན་དུ་ཕེབས་ནས་སྤྲུལ་སྐུ་རྣམ་གསུམ་གཙོས་ཆོས་ཚན་གསུམ་ལ་སོ་སོར་བསྡུས་གྲྭའི་སྤྱི་དོན་དང་ཕུང་ལྔའི་རྣམ་བཤད་ལྡོག་ཆ་ངོས་འཛིན་སོགས་ཀྱི་འཆད་ཉན་ཀྱང་མཛད། ལོ་དེར་དབྱར་གནས་ཀྱི་མཁན་པོར་བཞུགས་ཤིང་མདོས་དབོན་སངས་རྒྱས་རྡོ་རྗེ་སོགས་འདུས་པ་བརྒྱ་ཕྲག་ལྷག་ལ་རྟ་མགྲིན་གཞུང་ཁྲིད་གནང༌། རྗེས་སོར་ཡང་དགོན་འདིར་ཕེབས་ནས་རྟ་མགྲིན་སྒྲུབ་ཆེན་སྒྲུབ་དཔོན་ཞག་བདུན་ལ་བཞུགས་ཤིང༌། སེར་སྐྱ་ཁྲི་ཕྲག་གཉིས་ལྷག་ལ་དུས་འཁོར་དབང་ཆེན་ལྷ་དགུ་མི་འཁྲུགས་པ་རྟ་ཕྱག་ཁྱུང་གསུམ་བཅས་ཀྱི་དབང་དང་རྗེས་གནང་ལེགས་བསྩལ་ཞིང༌། དགེ་ཚུལ་སློང་ཡང་བརྒྱ་ཕྲག་ཙམ་གྱིས་བསྒྲུབས། ཉིན་གསུམ་རབ་གནས་འགྲོ་ཕན་རྒྱས་བྱེད་ཀྱི་སྒོ་ནས་སྒྲོལ་མའི་མཆོད་རྟེན་སོགས་སྐུ་གསུང་ཐུགས་རྟེན་རྣམས་ལ་རབ་གནས་དགའ་སྟོན་མཐའ་རྒྱས་དང་བཅས་ཏེ་མཇུག་ལེགས་པར་གྲུབ་པོ། །འདྲེན་མཆོག་ཆོས་ཀྱི་རྒྱལ་པོ་ཉིད་ཀྱང་རབ་གནས་ས་སྟག་ལོར་བསམ་བཞིན་དུ་ཞི་བའི་དབྱིངས་སུ་གཞོལ། ། འཇའ་བླ་མ་ཤེར་དབང་མཆོག་གིས་ཀྱང་རང་དགོན་ལ་དུས་འཁོར་ལྷ་དགུའི་སྒྲུབ་མཆོད་བཙུགས་པ་སོགས་བཀའ་དྲིན་ཤིན་ཏུ་ཆེ་བས་བསྐྱངས། ཉག་བླ་བསོ་རྒྱལ་ལམ་གཏེར་ཆེན་ལས་རབ་གླིང་པའི་རྣམ་འཕྲུལ་ངག་དབང་བཤད་སྒྲུབ་དཔལ་ནི། ཡབ་རྒྱ་སྤྲུལ་ངག་དབང་བསྟན་འཛིན་དང་ཡུམ་ཕྱིར་སྐ་བཟའ་པན་སྒྲོན་གཉིས་ཀྱི་སྲས་སུ་རབ་རྒྱལ་མེ་ཡོས་ལོར་ངོ་མཚར་བའི་ལྟས་དང་བཅས་ཏེ་སྐུ་འཁྲུངས། བླ་མ་དམ་པ་ངག་དབང་བསྟན་པ་རབ་རྒྱས་དང་མདོས་དབོན་སངས་རྒྱས་རྡོ་རྗེ་གཉིས་ལས་ཟབ་ལམ་རྡོ་རྗེ་རྣལ་འབྱོར་སྦྱོར་བ་ཡན་ལག་དྲུག་ལ་ཉམས་ལེན་གནད་སྨིན་མཛད་པས་ཉམས་རྟོགས་ཕུལ་དུ་བྱུང་བ་ཐུགས་ལ་འཁྲུངས་ཏེ་རྟོགས་པའི་དབང་ཕྱུག་ཆེན་པོར་གྱུར། ཆུ་སྦྲུལ་ལོར་དགེ་བའི་བཤེས་གཉེན་ཆེན་པོ་སངས་རྒྱས་རྡོ་རྗེས་ཁོང་གི་རྒྱལ་ཚབ་ཏུ་མངའ་གསོལ་ཏེ་སྦྱོར་དྲུག་པ་ཆོས་ཚན་བཅུ་ལ་རིམ་པར་གདམས་ངག་བདུད་རྩི་མཆོག་གིས་ལེགས་པར་བསྐྱངས། རང་དགོན་དང་འབྲ་ལོ་དགོན་གྱི་ལུང་ཚ་བ་སྒ་མདའ་སོགས་ལ་ཕེབས་ཏེ་རིས་མེད་འགྲོ་བ་ཡོངས་ལ་བདེ་ཆེན་འཆང་དབང་ཞིང་ཁྲིད་སོགས་ཀྱི་ཆོས་སྦྱིན་མི་ཟད་པའི་སྒོ་འཕར་ཡངས་པོར་ཕྱེས་ཏེ་བསྟན་འགྲོའི་དོན་རྒྱ་ཆེར་གྲུབ་པའི་མཐར་རབ་གནས་མེ་ཡོས་ལོར་སྐུ་གཤེགས་སོ། །དཔལ་ལྡན་བླ་མ་དེའི་རྣམ་ཐར་བ་བདག་གི་སྔར་བྲིས་པ་ལས་ཤེས་པར་བྱའོ། །