དྲི་བ་བཅུ་བ་ནི་ཀུན་རྫོབ་རྣམས་གཅིག་དུ་བྲལ་གྱི་རིགས་པས་བདེན་མེད་སྒྲུབ་པའི་རྩ་སྦྱོར་དང་ཚུལ་སྒྲུབ་ཚུལ་ཇི་ལྟར་ཡིན་ཞེས་།

དྲི་བ་བཅུ་བ་ནི་ཀུན་རྫོབ་རྣམས་གཅིག་དུ་བྲལ་གྱི་རིགས་པས་བདེན་མེད་སྒྲུབ་པའི་རྩ་སྦྱོར་དང་ཚུལ་སྒྲུབ་ཚུལ་ཇི་ལྟར་ཡིན་ཞེས་པའོ། །

དེའི་ལན་བཤད་པ་ལ་གཅིག་དུ་བྲལ་གྱི་རིགས་པའི་རྩ་སྦྱོར་འགོད་ཚུལ་དང་ཕྱོགས་ཆོས་དང་ཁྱབ་པ་སྒྲུབ་ཚུལ་སྒྲུབ་ངག་རྣམས་མདོར་བསྡུས་ཙམ་བརྗོད་ན་འདི་ལྟར། དང་པོ་རྩ་སྦྱོར་ནི། ཕྱི་ནང་གི་དངོས་པོ་འདི་རྣམས་ཆོས་ཅན། རང་གི་ངོ་བོ་བདེན་པར་གྲུབ་པ་མ་ཡིན་ཏེ། སྣང་གྲགས་ཀྱི་ཆོས་གང་ཞིག བདེན་པའི་གཅིག་དང་དུ་མ་གང་དུ་ཡང་མ་གྲུབ་པའི་ཕྱིར། ཞེས་པ་དེ་ཡིན་ཏེ། ཐེག་མཆོག་དབུ་མ་ལས། དངོས་རྣམས་ངོ་བོས་མ་གྲུབ་གང་ཕྱིར་འདི། །ཆོས་ཡིན་གཅིག་དང་དུ་མར་མ་གྲུབ་ཕྱིར། །དེ་ལྟར་གཏན་ཚིགས་རྩ་སྦྱོར་འགོད་བྱ་སྟེ། །ཞེས་དང༌། དེའི་ཟིན་བྲིས་ལས། ཕྱི་ནང་གི་དངོས་པོ་འདི་རྣམས་ཆོས་ཅན། རང་གི་ངོ་བོས་གྲུབ་པ་མ་ཡིན་ཏེ། རྒྱུ་མཚན་གང་གི་ཕྱིར་སྙམ་ན། དངོས་པོ་འདི་ཀུན་རྣམ་པར་ཤེས་པའི་ཡུལ་སྣང་གྲགས་ཀྱི་ཆོས་ཡིན་པ་གང་ཞིག་གཅིག་དང་དུ་མ་གང་རུང་དུ་མ་གྲུབ་པའི་ཕྱིར་ཞེས་དེ་ལྟར་གཏན་ཚིགས་སུ་རྩ་སྦྱོར་འགོད་པར་བྱེད་པ། ཞེས་གསུངས་པའི་ཕྱིར་རོ། །གཉིས་པ་ཕྱོགས་ཆོས་སྒྲུབ་པ་ནི། རྩ་སྦྱོར་དེའི་རྟགས་གྲུབ་སྟེ། དང་པོ་གང་ཞིག་ཕྱི་མ་གྲུབ་པའི་ཕྱིར། དང་པོ་གྲུབ་སྟེ། རྣམ་ཤེས་ལ་སྣང་ཞིང་སྒྲ་རྟོག་ལ་གྲགས་པའི་ཡུལ་ཡིན་པའི་ཕྱིར། རྩ་རྟགས་གཉིས་པ་གྲུབ་སྟེ། བདེན་པའྀ་གཅིག་ཏུ་མ་གྲུབ་པ་གང་ཞིག་བདེན་པའི་དུ་མར་མ་གྲུབ་པའི་ཕྱིར། དང་པོ་གྲུབ་སྟེ། ཆ་བཅས་ཡིན་པའི་ཕྱིར་ཏེ། སྣང་གྲགས་ཀྱི་ཆོས་ལ་ཐོག་མཐའ་དབུས་སོགས་མདོར་ན་རང་ཉིད་ཡིན་པའི་ཆ་དང་རང་གི་དོན་སྤྱི་ཡོད་པ་ཅན་ཡིན་པའི་ཆ་དང་རང་གི་ངོ་བོའི་ཡོན་ཏན་གྱི་ཆ་གསུམ་རེ་ངེས་ལྡན་ཡིན་པའི་ཕྱིར།དེས་ན་ཆ་བཅས་ལ་གཅིག་ཏུ་བདེན་པར་གྲུབ་པ་འགལ་བ་ཡིན་ནོ། །གོང་གི་རྟགས་གཉིས་པ་དུ་མར་བདེན་པར་མ་གྲུབ་སྟེ། གཅིག་བདེན་པར་མ་གྲུབ་པའི་ཕྱིར། ཁྱབ་སྟེ། དུ་མ་ནི་གཅིག་ཚོགས་པའི་ངོ་བོ་ཡིན་པའི་ཕྱིར། རྟགས་དབུ་མ་རྒྱན་སོགས་ལུང་རིགས་དུ་མས་གྲུབ་པོ། །གསུམ་པ་ཁྱབ་པ་སྒྲུབ་པ་ནི། སྣང་གྲགས་ཀྱི་ཆོས་ལ་བདེན་པའི་གཅིག་དང་དུ་མ་གང་རུང་དུ་མ་གྲུབ་ན་དེ་ལ་རང་བཞིན་གྱིས་གྲུབ་པ་མེད་པས་ཁྱབ་སྟེ། སྣང་གྲགས་ཀྱི་ཆོས་ཀྱི་སྟེང་དུ་ཕན་ཚུན་དངོས་འགལ་དུ་གནས་པའི་ཕྱིར། དེས་ན་གཅིག་ཡིན་ན་དུ་མ་མ་ཡིན་དགོས་དུ་མ་ཡིན་ན་གཅིག་མ་ཡིན་དགོས་པའི་ཕྱིར་རོ། །ཐེག་མཆོག་དབུ་མའི་ཟིན་བྲིས་ལས། དེའི་ངོར་ཁྱབ་པ་སྒྲུབ་པ་ནི། གཅིག་དང་དུ་མ་གང་རུང་དུ་མ་གྲུབ་ན་རང་བཞིན་གྱིས་མ་གྲུབ་པས་ཁྱབ་སྟེ། ཕན་ཚུན་དངོས་འགལ་གྱི་སྤྱོད་ཡུལ་དུ་གྱུར་པ་ལས་ཕུང་པོ་གསུམ་པ་ནམ་ཡང་ཡོད་པ་མ་ཡིན་ཏེ། གཅིག་ཡིན་ན་དུ་མ་མ་ཡིན་དགོས་ལ། དུ་མ་ཡིན་ན་གཅིག་མ་ཡིན་དགོས་པས་གཅིག་ཀྱང་ཡིན་དུ་མའང་ཡིན་པའི་མུ་གསུམ་པ་མི་སྲིད་པའི་ཕྱིར་རོ། །དེས་ན་ཕྱི་ནང་གི་དངོས་པོ་འདི་རྣམས་གཅིག་དང་དུ་མ་གང་རུང་མ་ཡིན་པ་རྫུན་པ་ཡིན་པར་རྒོལ་བ་དེའི་ངོ་བོར་གྲུབ་པ་ཡིན་ནོ། །ཁྱབ་སྒྲུབ་ཀྱི་དཔེ་ནི། མེ་ལོང་ནང་གི་གཟུགས་བརྙན་ཆོས་ཅན། རང་བཞིན་གྱིས་ཡོད་པ་མ་ཡིན་ཏེ། མེ་ལོང་ལས་གཞན་དུ་ཡང་མེད། མེ་ལོང་དང་གཅིག་ཏུ་ཡང་གྲུབ་པ་མ་ཡིན་པའི་ཕྱིར། ཞེས་འགོད་པར་བྱེད་དོ། །དེའི་ཕྱོགས་ཆོས་སྒྲུབ་པ་ནི། མེ་ལོང་ནང་གི་བྱད་བཞིན་མེ་ལོང་དང་ངོ་བོ་གཅིག་པ་མ་ཡིན་ཏེ། མེ་ལོང་ནི་ངོས་བརྡར་བརྡར་པོར་ཡིན་ལ། བྱད་བཞིན་ནི་མིག་སྣ་སོགས་མཐོ་དམན་གྱི་རྣམ་པར་ཡོད་པས་དེ་གཉིས་མཚན་ཉིད་མི་མཚུངས་པའི་ཕྱིར། མེ་ལོང་ནང་གི་གཟུགས་བརྙན་མེ་ལོང་ལས་གཞན་དུ་ཡོད་པ་ཡང་མ་ཡིན་ཏེ། གཅིག་གི་གོ་སར་དངོས་པོ་གཉིས་གནས་པ་མེད་པའི་ཕྱིར། ཚུལ་དེ་ལྟར་སྒྲུབ་པ་ལས་མེ་ལོང་ནང་གི་གཟུགས་བརྙན་དེ་བདེན་མེད་ཡིན་པས་དོན་རྒོལ་བ་དེའི་ངོར་མངོན་སུམ་དུ་གྲུབ་པ་ཡིན་ལ། དེའི་ཕྱིར་དཔེ་དེ་ལ་བརྟེན་ནས་གཅིག་དང་དུ་མ་གང་རུང་དུ་མ་གྲུབ་ཀྱང༌། སྣང་ཙམ་དུ་འཆར་བ་འདི་ཀ་བདེན་མེད་ཡིན་ནོ་ཞེས་བདེན་མེད་ཀྱི་ཐ་སྙད་རྟགས་ཀྱི་སྒྲུབ་པར་འདོད་པ་ཡིན་ནོ། །དེའི་ཕྱིར་འདི་ནི་ཐ་སྙད་འབའ་ཞིག་སྒྲུབ་པའི་གཏན་ཚིགས་སོ། །དེ་རྣམས་ནི་རྗེས་ཁྱབ་ཡིན་ལ། ལྡོག་ཁྱབ་སྒྲུབ་པ་ནི། གཅིག་དང་དུ་མ་གང་རུང་དུ་མེད་ན་རྫས་ཀྱི་དངོས་པོར་ཡོད་པ་མ་ཡིན་ཞིང་ཅི་སྟེ་རྫས་དངོས་སུ་ཡོད་ན་གཅིག་དང་དུ་མ་གང་རུང་ལས་གཞན་དུ་མ་དམིགས་པའི་ཕྱིར། དེའི་རྒྱུ་མཚན་ཡང༌། དེ་གཉིས་ཕན་ཚུན་སྤངས་ཏེ་འགལ་བ་ཅན་ཡིན་པའི་ཕྱིར། དེས་ན་གཅིག་དང་དུ་མ་གང་རུང་དུ་མ་གྲུབ་ན། རང་བཞིན་གྱིས་མ་གྲུབ་པས་ཁྱབ་པ་ཡིན་ཏེ། རང་བཞིན་གྱིས་གྲུབ་ན་གཅིག་དང་དུ་མ་གང་རུང་དུ་གྲུབ་དགོས་པའི་ཕྱིར་ཞེས་པས་ལྡོག་ཁྱབ་སྒྲུབ་པར་འདོད་པ་ཡིན་ནོ། །ཞེས་གསུངས་ལ།དེ་དག་སྣང་གྲགས་ཀྱི་ཆོས་གཞིར་བཞག་པའི་དབང་དུ་བྱས་པའོ། །ཡང་སྒྲུབ་ངག་འགོད་པ་ལ་ཐེག་མཆོག་དབུ་མའི་ཟིན་བྲིས་ལས། གང་གཅིག་དང་དུ་མ་གང་རུང་དང་བྲལ་ན་རང་བཞིན་གྱིས་མེད་པས་ཁྱབ། དཔེར་ན་མེ་ལོང་གི་ནང་གི་གཟུགས་བརྙན་བཞིན། ཕྱི་ནང་གི་དངོས་པོ་འདི་ཡང་གཅིག་དང་དུ་མ་གང་རུང་དང་བྲལ་བའི་ཕྱིར། རང་བཞིན་གྱིས་མེད་ཅེས་སྒྲུབ་པའི་ངག་ཏུ་བཀོད་པས། ཕྱི་རྒོལ་གྱི་བློ་ངོར་ཕྱི་རོལ་ཀྱི་དངོས་པོ་རང་བཞིན་གྱིས་མ་གྲུབ་པར་ངེས་པའི་རིགས་ཤེས་རྗེས་དཔག་སྐྱེ་བར་འདོད་པ་ཡིན་ནོ། །སྤྱིར་སྒྲུབ་ངག་འཕགས་པ་ཐོགས་མེད་ཀྱི་སའི་དངོས་གཞི་སྒྲུབ་ངག་ཡན་ལག་ལྔ་ལྡན་དུ་གསུངས་ཏེ། དམ་བཅའི་ཡན་ལག གཏན་ཚིགས་ཀྱི་ཡན་ལག དཔེའི་ཡན་ལག ཉེ་བར་སྦྱོར་བའི་ཡན་ལག་མཇུག་སྡུད་ཀྱི་ཡན་ལག་བརྗོད་པ་སྟེ་ལྔའོ། །དེ་བཞིན་དུ་བཀོད་ན་ཕྱི་ནང་གི་དངོས་པོ་འདི་རྣམས་ཆོས་ཅན། རང་བཞིན་གྱིས་མ་གྲུབ་སྟེ།༼དམ་བཅའ༽ བདེན་པའི་གཅིག་དང་དུ་མ་གང་རུང་མ་གྲུབ་པའི་ཕྱིར།༼གཏན་ཚིགས།༽ དཔེར་ན་མེ་ལོང་ནང་གི་གཟུགས་བརྙན་བཞིན།༼དཔེ།༽ དེ་གཅིག་དང་དུ་མ་གང་རུང་དང་བྲལ་བ་དེ་བཞིན་དུ། ཕྱི་ནང་གི་དངོས་པོ་འདི་ཡང་གཅིག་དང་དུ་མ་གང་རུང་དང་བྲལ་བའོ། །༼ཉེ་སྦྱོར།༽དེའི་ཕྱིར་ཕྱི་ནང་གི་དངོས་པོ་འདི་རྣམས་རང་བཞིན་གྱིས་མ་གྲུབ་པ།༼མཇུག་སྡུད།༽ཞེས་འགོད་པ་ལྟ་བུའོ། །འདི་ལ་ཕྱོགས་གང་རུང་ཆོས་གྲགས་ཀྱིས་ཉེ་སྦྱོར་དང༌། དམ་བཅའ་དང་མཇུག་སྡུད་གསུམ་ལྷག་པའི་སྐྱོན་དང༌། ཁྱབ་པ་བརྗོད་པ་ཆད་པས་མི་འཐད་ཅིང་དེས་ན་སྒྲུབ་ངག་ཡན་ལག་གཉིས་ལྡན་ཉིད་གཙོ་བོར་བཞེད་དོ། །འོན་ཀྱང་ཐེག་པ་ཆེན་པོ་དབུ་མའི་ལུགས་འདི་དོན་ལ་རྟོན་པ་ཡིན་པའི་ཕྱིར། རྒོལ་བའི་ངོར་རྟགས་ལ་བརྟེན་ནས་རིགས་ཤེས་རྗེས་དཔག་སྐྱེ་ཐུབ་པ་དང༌། བརྗོད་བྱའི་དོན་དང་མ་འབྲེལ་བའི་སྐྱོན་མེད་པ་ཙམ་བྱུང་ན། ཡན་ལག་ལྷག་ཆད་ཀྱི་སྐྱོན་ཕྲན་བུ་ལ་ལྟོས་པ་མེད་པས། དོན་གྱི་གཙོ་བོ་རྣམ་པ་གཉིས་པོ་དེ་གྲུབ་ན། རྗོད་བྱེད་ཀྱི་ཚིག་རྒྱས་བསྡུས་ལ་ཁྱད་པར་མེད་པའི་ཕྱིར།སྒྲུབ་ངག་ཡན་ལག་གཉིས་ལྡན་ནས་ལྔ་ལྡན་གྱི་བར་ཅི་འདོད་དུ་སྦྱོར་དུ་རུང་ངོ༌། །ཞེས་གསུངས་སོ། །སྒྲུབ་ངག་ཡན་ལག་ལྔ་ལྡན་ལ་དཔྱད་པར་བྱ་བ་འདི་ཡོད་དེ། དབུ་མ་བའི་ལུགས་ལ་ལྷག་པའི་སྐྱོན་ཡོད་དམ་མེད། དང་པོ་ལྟར་ན་སྒྲུབ་ངག་ཡན་ལག་གཉིས་ལྡན་ནས་ལྔ་ལྡན་བར་སྦྱར་བར་བྱ་བ་མི་འཐད་དེ། དེ་གཉིས་ལྡན་ལས་གཞན་རྣམས་ལྷག་ཆད་ཀྱི་སྐྱོན་ཅི་རིགས་རེ་ལྡན་པའི་ཕྱིར། གཉིས་པ་ལྟར་ན་སྒྲུབ་ངག་ཡན་ལག་ལྔ་ལྡན་ལ་ཆོས་གྲགས་ཀྱིས་སྐྱོན་མ་བརྗོད་པར་ཐལ་བ་དང༌། དམ་བཅའ་སོགས་བརྗོད་པ་དགོས་པ་ཡོད་པར་ཐལ་བ་ཡོད་དམ་དཔྱད་པར་བྱའོ། །དེས་ན་རང་ལུགས་ལ་སྒྲུབ་ངག་གམ་གཞན་དོན་རྗེས་དཔག་ཡང་དག་གི་མཚན་ཉིད་ནི་རྣམ་འགྲེལ་འགྲེལ་བཤད་རིན་ཆེན་ཕྲེང་བ་ལས་འདི་ལྟར་གསུངས་ཏེ། ཇི་སྐད་དུ། ཚད་མ་མདོར། གཞན་དོན་རྗེས་སུ་དཔག་པ་ནི། །རང་གི་མཐོང་དོན་རབ་གསལ་བྱེད། །ཅེས་གསུངས་པའི་དོན། གཞན་ལ་བསྟན་བྱ་ཕྱིར་རྒོལ་གྱི་དོན་ནམ་ཆེད་ཡིན་པས་གཞན་དོན་འབྲས་བུ་རྗེས་དཔག་གི་རྒྱུ་ཡིན་པས་རྗེས་དཔག་ཏུ་བཏགས་སོ། དགོས་པ་ནི། རྗེས་དཔག་བསྐྱེད་ནུས་ཀྱི་སྦྱོར་ངག་བྱེ་བྲག་ཏུ་རྟོགས་པའི་ཆེད་ཡིན་པས་སོ། །ཤཱཀྱ་བློས། རང་གི་རྒོལ་བ་གང་གིས་བསྒྲུབ་པ་དགོས་པའོ། །མཐོང་བ་ནི་རྣམ་པར་ངེས་པ་སྟེ་ཚད་མས་ཁོང་དུ་ཆུད་པའོ། །དོན་ནི་ཚུལ་གསུམ་པའི་རྟགས་ཞེས་སོ། །སྒྲ་རྟག་གམ་མི་རྟག་ཐེ་ཚོམ་ཟ་ནས་དྲིས་པ་ན། སྔ་སྒོལ་ཡང་དག་གིས་གང་བྱས་མི་རྟག་བུམ་པ་བཞིན། སྒྲ་ཡང་བྱས་སོ་ཞེས་པའི་སྒྲུབ་ངག་མཚན་གཞི། གཞན་དོན་རྗེས་དཔག་ཏུུ་མཚོན། སྔ་རྒོལ་རང་གིས་མཐོང་བའི་ཚུལ་གསུམ་པའི་རྟགས་ཕྱི་རྒོལ་ལ་སྟོན་པའི་སྒྲུབ་ངག་ཡན་ལག་གཉིས་ལྡན་ཅེས་པའོ། །ཞེས་གསུངས་སོ། །རྒྱས་པར་རྣམ་འགྲེལ་ལེའུ་བཞི་བའི་རྩ་འགྲེལ་དག་ལས་ཤེས་པར་བྱའོ།། །།