དགུ་པ་བར་ཆད་དྲི་བའི་ཚུལ་ལ་དྲུག
དགུ་པ་བར་ཆད་དྲི་བའི་ཚུལ་ལ་དྲུག་ལས།
དང་པོ་དགོས་པ་ནི་བར་ཆད་མ་དྲིས་པའི་ཉེས་པ་ཁེགས་པ་དང༌། བར་ཆད་ཡོད་མེད་རྟོགས་པའོ། །གཉིས་པ་ཡུལ་གང་ལ་དྲི་བ་ནི། རབ་ཏུ་བྱུང་བ་དང་བསྙེན་རྫོགས་མ་ནོད་པའི་ཕྱིར་མངོན་སུམ་ན་གནས་པ་ལ་སྟེ། རབ་ཏུ་དབྱུང་བའི་ཕྱིར་ཉེ་བར་འོངས་པ་ལ་ཞེས་པ་དང༌། བསྙེན་པར་རྫོགས་པར་བྱེད་པ་དག་གིས་ཞེས་པའི་ཤུགས་ཀྱིས་གྲུབ་བོ། །
གསུམ་པ་རྟེན་གང་གིས་དྲི་བ་ནི།
རབ་ཏུ་འབྱིན་པ་ན་དང་པོར་མཁན་པོས་དྲི་ཞིང༌། བསྙེན་རྫོགས་བྱེད་པ་ན་གསང་སྟེ་སྟོན་པ་དང་ལས་བྱེད་པས་དྲི་བའོ། ། བཞི་པ་དངོས་པོ་གང་དྲི་བ་ནི་བར་ཆད་རྣམས་སོ། །
ལྔ་པ་ཚུལ་ཇི་ལྟར་དྲི་བ་ནི།
འགལ་རྐྱེན་རྣམས་དགག་ཚིག་ཏུ་དྲི་སྟེ་མ་བསད་པ་མ་ཡིན་ནམ་ཞེས་པ་ལྟ་བུའོ། །མཐུན་རྐྱེན་རྣམས་ནི་སྒྲུབ་ཚིག་ཏུ་དྲི་སྟེ་ཆོས་གོས་གསུམ་དང་ལྷུང་བཟེད་ཚང་ངམ་ཞེས་པ་ལྟ་བུའོ། །
དྲུག་པ་དྲིས་ནས་ཇི་ལྟར་སྒྲུབ་པ་ནི།
བར་ཆད་དང་མི་ལྡན་ན་ཁོ་བོས་ཁྱོད་རབ་ཏུ་དབྱུང་བར་བགྱིའོ་ཞེས་སྐབས་དབྱེའོ། །ལྡན་ན་ནི་འོ་ན་སོང་ཞིག་ཅེས་བརྗོད་པར་བྱའོ། ། གཞི་འགྲེལ་ལས། བར་ཆད་ཀྱི་ཆོས་དེ་དག་ཀྱང་རབ་ཏུ་བྱུང་བའི་གཞི་དང་ཕྲན་ཚེགས་ལ་སོགས་པ་ལས་གསུངས་པ་ཐམས་ཅད་གོ་རིམ་བཞིན་དུ་དྲི་བར་བྱའོ། །ཞེས་གསུངས་སོ། །དག་གིས་ཀྱང་ངོ༌། །ཞེས་པའི་ཊཱི་ཀ་ལས། གསང་སྟེ་སྟོན་པ་ཁོ་ནས་འདྲི་ཞིང་ལས་བྱེད་པས་ཀྱང་ཡིན་ན། ཇི་ལྟར་བསྙེན་པར་རྫོགས་པར་བྱེད་པ་དག་གིས་ཀྱང་ངོ་ཞེས་མང་པོའི་ཚིག་ཏུ་བྱ་ཞེ་ན་ཞེས་པ་ནི། ལྐོག་ཏུ་གསང་སྟེ་སྟོན་པ་གཅིག་པུས་འདྲི་ཞིང༌། དགེ་འདུན་གྱི་དབུས་སུ་ལས་བྱེད་པ་གཅིག་པུས་འདྲི་བ་ཡིན་ན། དག་གིས་ཀྱང་ངོ༌། །ཞེས་མང་པོའི་ཚིག་ཏུ་བྱས་པ་འགལ་ཞེ་ན། ཊཱི་ཀ་ལས། ལྐོག་ཏུ་གསང་སྟེ་སྟོན་པས་གང་འདྲི་བར་བྱེད་པ་དེ་ནི་བསྙེན་པར་རྫོགས་པར་བྱེད་པ་དག་གིས་བྱས་པ་ཁོ་ན་ཡིན་པར་རིག་པར་བྱ་སྟེ། དེ་དག་གིས་བསྐོས་པ་ཡིན་པས་དེས་བྱས་པ་ནི་དེ་དག་ལ་ཉེ་བར་གདགས་པའི་ཕྱིར་རོ། །ཞེས་སོ། །དྲིས་ནས་ཇི་ལྟར་བྱ་ཞེ་ན། རྩ་བར། ཤཱཀྱ་དང་མེ་པ་རལ་བ་ཅན་མ་གཏོགས་པ་སེམས་མགུ་བར་མ་གྱུར་བའི་མུ་སྟེགས་ཅན་རབ་ཏུ་དབྱུང་བ་དང་བསྙེན་པར་རྫོགས་པར་མི་བྱའོ། །ཞེས་སོ། །ཤཱཀྱ་སྔོན་མུ་སྟེགས་པ་ཡིན་ཀྱང་དེ་རབ་ཏུ་དབྱུང་དུ་རུང་བ་ནི། འགྲེལ་ཆུང་ལས། ཤཱཀྱའི་རིགས་སུ་གཏོགས་པ་ནི། དགྲ་ལ་ཕྱིར་མི་ནུར་བས་དཔའ་བ་དང༌། ཆང་མི་འཐུང་བ་དང༌། རྫུན་དང་གཡོ་མེད་པས་ན། ཞེས་སོ། །མེ་པ་རལ་པ་ཅན་ནི། མེ་ལ་ལྷར་འཛིན་ཅིང་སྦྱིན་སྲེག་བྱེད་པ་ལ་བརྩོན་པ་ཆ་ལུགས་རལ་པ་རིང་པོ་ཅན་ཏེ། ལྟ་བ་ལས་རྒྱུ་འབྲས་ཁས་ལེན་པའོ། ། སྔོན་མུ་སྟེགས་ཡིན་ཡང་དེ་གཉིས་རབ་ཏུ་དབྱུང་དུ་རུང་བ་ནི། ཊཱི་ཀ་ལས། དེ་ཉིད་བདེན་པ་ཁོ་ནས་ཡིན་གྱིས་སྒྱུས་མ་ཡིན་པས། ཞེས་གསུངས་སོ། །མཚོ་ཊཱིཀ་ལས། མུ་སྟེགས་ཡིན་ཡང་དེ་གཉིས་རབ་ཏུ་དབྱུང་དུ་རུང་བ། ཞེས་ཤཱཀྱ་དང་མེ་པ་རལ་པ་ཅན་གཉིས་ནི་མུ་སྟེགས་པ་ཡིན་ན་སྐྱབས་འགྲོ་རྒྱུད་ལ་མེད་དགོས་ལ། སྐྱབས་འགྲོ་མེད་ན་སྡོམ་པའི་རྟེན་མེད་པར་འགྱུར་ཏེ། མཛོད་རྩ་བ་ལས། སྐྱབས་སུ་མ་སོང་བ་ལ་མེད། །ཅེས་གསུངས་པའི་ཕྱིར་ཟེར་ན་མཚོ་ཊཱིཀ་འོག་ཏུ་བཀོད་པ་ལྟར་སྔོན་མུ་སྟེགས་ཅན་ཡིན་པ་ལས་ཕྱིས་སུ་མུ་སྟེགས་པ་མ་ཡིན་པ་ལྟ་བུ་གསུངས་པ་ལྟར་ཡིན་ན་དེ་གཉིས་ལས་གཞན་པའི་སྔོན་མུ་སྟེགས་པ་ཐམས་ཅད་རབ་ཏུ་བྱུང་ན་གནས་པ་སྦྱིན་ནས་བརྟག་དགོས་པས་ཁྱབ་བ་ཡོད་མེད་དཔྱད་པར་བྱའོ། །