[༡༧] བྱ་འདུལ་བ་བརྩོན་འགྲུས་འབར།
དེའི་མཁན་བུ་བྱ་འདུལ་བ་འཛིན་པ་བརྩོན་འགྲུས་འབར་ནི། གཙང་རོང་ཡུལ་དུ་ལྕགས་ལུག་ལ་འཁྲུངས། འབྲེ་ཆེན་པོ་ལས་རབ་ཏུ་བྱུང་ཞིང་བསྙེན་པར་རྫོགས། སོག་ཚུལ་ཁྲིམས་བླ་མ་ལས་འདུལ་བ་གསན་པས་མཁས་པར་གྱུར་ཏེ་འདུལ་བ་བྱ་ལ་ཐུག་ཅེས་གྲགས་པ་བྱུང་། གཞན་ཞང་གཡེ་པ་ལས་དབུ་ཚད་དང་། ཟངས་མཁར་ལོ་ཙྭ་བ་ལས་ཡོ་ག །སྟོད་ལུང་པ་ཆེན་པོ་ལས་བཀའ་གདམས་རྣམས་གསན། དེ་རྗེས་ཟུར་ཕུར་བཤད་གྲྭ་བཙུགས། བེ་ཧར་གྱིས་བཙུན་ཆུང་ཞིག་ཏུ་སྤྲུལ་ནས་ཞབས་ཏོག་བྱས་ཤིང་འདུལ་བ་དང་འགལ་བ་ན་བཟའི་སྤུ་ཕྱིར་བསྟན་པ་གཅིག་པུ་ལས་མ་མཐོང་བས་དད་དེ་བྱ་ཊིཀ་ལ་སློབ་གཉེར་བྱེད་པ་རྣམས་ཀྱི་གྲོགས་བྱེད་པར་ཁས་བླངས་ཤིང་ལོ་དགུར་ཚོགས་པ་བསྐྱངས་རྗེས་སྒྲུབ་པ་ལ་བཞུགས་སོ། །སློབ་མ་འགྲོ་དོན་ནུས་པ་བདུན་ཅུ་རྩ་དྲུག་ཙམ་བྱུང་། དགུང་ལོ་དོན་དྲུག་པ་ལ་ཟུལ་ཕུའི་གཟིམས་ཆུང་དུ་སྐུ་གཤེགས། །