འཇམ་དཔལ་སྨྲ་བའི་སེང་གེའི་རྒྱུན་ཁྱེར་ཤེས་རབ་གསལ་བའི་སྒྲོན་མེ།
དག་སྣང་མཚོ་རྒྱལ་དགོངས་པའི་གསང་མཛོད་ལས༔ འཇམ་དཔལ་སྨྲ་བའི་སེང་གེའི་རྒྱུན་ཁྱེར་ཤེས་རབ་གསལ་བའི་སྒྲོན་མེ་ཞེས་བྱ་བ་བཞུགས་སོ༔
རྗེ་བཙུན་འཇམ་པའི་དབྱངས་ལ་འདུད༔ མཁྱེན་རབ་སྨྲ་བའི་སེང་གེ་ཡི༔ རྒྱུན་གྱི་ཉམས་ལེན་བྱེད་འདོད་པས༔ སྦྱོར་དངོས་རྗེས་གསུམ་ཚང་བར་བྱ༔ དང་པོ་སྦྱོར་བའི་ཆོས་ལ་གསུམ༔ ཧྲཱིཿ མཆོག་གསུམ་ལྷ་དང་དྲང་སྲོང་ཐམས་ཅད་ཀྱི༔ མཁྱེན་རབ་གཅིག་བསྡུས་རྗེ་བཙུན་འཇམ་པའི་དབྱངས༔ ཁྱེད་ལ་བདག་སོགས་འགྲོ་ཀུན་བྱང་ཆུབ་བར༔ སྒོ་གསུམ་གུས་པ་ཆེན་པོས་སྐྱབས་སུ་མཆི༔ གཏི་མུག་དྲག་པོས་འཁོར་བར་འཁྱམས་པ་ཡི༔ ལས་ཉོན་སྡུག་བསྔལ་རྒྱ་མཚོའི་གཏིང་ཟབ་ཏུ༔ མནར་བའི་འགྲོ་ཀུན་བྱང་ཆུབ་མཆོག་ཐོབ་ཕྱིར༔ སྨོན་འཇུག་སེམས་མཆོག་དམ་པ་བསྐྱེད་པར་བགྱི༔ ཤེས་རབ་མཆོག་སྩོལ་བླ་མ་ལྷག་པའི་ལྷ༔ བྱང་ཆུབ་བར་དུ་སྙིང་གི་དཀྱིལ་དུ་བཟུང་༔ ཚོགས་གཉིས་རྫོགས་ཕྱིར་ཕྱག་འཚལ་མཆོད་པ་འབུལ༔ ཉེས་སྒྲིབ་ཀུན་བཤགས་དུས་གསུམ་དགེ་ཚོགས་ལ༔ རྣམ་དཀར་བློ་ཡིས་ཡི་རང་ཆོས་འཁོར་བསྐུལ༔ བརྟན་པར་བཞུགས་གསོལ་དགེ་རྩ་བྱང་ཆུབ་བསྔོ༔ དེ་ཡིས་སྔོན་འགྲོའི་ཆོས་རྣམས་རྫོགས༔ དངོས་གཞི་ལྷ་རུ་འདི་བཞིན་བསྐྱེད༔ ཧྲཱིཿ འཁོར་འདས་ཆོས་ཀུན་ཡེ་སྟོང་སྤྲོས་དང་བྲལ༔ མ་རྟོགས་བདག་འཛིན་འཁྲུལ་བའི་སེམས་ཅན་ལ༔ ཚད་མེད་སྙིང་རྗེའི་རང་གདངས་རང་སེམས་ཉིད༔ ཐུགས་སྲོག་ཧྲཱིཿཡིག་དམར་པོའི་འཕྲོ་འདུ་ལས༔ ཕྱི་སྣོད་དག་པའི་ཞིང་མཆོག་པདྨ་བརྩེགས༔ མཚན་ཉིད་ཀུན་རྫོགས་བཀོད་ལེགས་ཕོ་བྲང་དབུས༔ ལྷ་དང་དྲང་སྲོང་ལྷ་མི་ཁྲོམ་ལྟར་འཚོགས༔ པད་ཟླའི་གདན་ལ་སྐད་ཅིག་དྲན་རྫོགས་སུ༔ ཧྲཱིཿཡིག་གནས་གྱུར་རྗེ་བཙུན་འཇམ་པའི་དབྱངས༔ དམར་སེར་མཛེས་འཛུམ་ཞལ་གཅིག་ཕྱག་གཉིས་པ༔ རྡོ་རྗེ་སྐྱིལ་ཀྲུང་ལོངས་སྤྱོད་རྫོགས་སྐུའི་ཆས༔ གཡས་པས་ཤེས་རབ་རལ་གྲིས་འཁྲུལ་རྟོག་གཅོད༔ གཡོན་པས་ཨུཏྤལ་ཡུ་བ་ཐུགས་ཀར་འཛིན༔ འདབ་མ་སྙན་གྱི་ཐད་ཀར་ཁ་ཕྱེ་བའི༔ གེ་སར་ཟེའུ་འབྲུར་སྟོང་ཕྲག་བརྒྱ་པ་ཡི༔ གླེགས་བམ་དབྱངས་གསལ་ཡི་གེས་རང་སྒྲ་སྒྲོག༔ ཐུགས་ཀར་པདྨ་དམར་པོ་འདབ་བརྒྱད་སྟེང་༔ བཻ་ཌཱུར་རལ་གྲི་ཚོན་གང་ཡུ་བར་ཧྲཱིཿ དེ་མཐར་རང་གི་གསང་སྔགས་ཡི་གེའི་གཟུགས༔ གུར་གུམ་མདངས་ལྡན་ཤིན་ཏུ་ཕྲ་བ་ནི༔ གཡས་སུ་འཁོར་ཞིང་དེ་ལས་འོད་འཕྲོས་པས༔ ཕྱོགས་བཅུའི་རྒྱལ་བ་སྲས་བཅས་ཐམས་ཅད་དང་༔ པཎྚི་ཏ་དང་རིག་བྱེད་མཁན་པོ་སོགས༔ ཤེས་བྱའི་ཆོས་ལ་དབང་བ་ཐམས་ཅད་ཀྱི༔ བློ་གྲོས་དཔལ་ཀུན་འོད་ལྔའི་རྣམ་པར་བསྡུས༔ ཐུགས་སྲོག་ཧྲཱིཿདང་ཕྱག་མཚན་ལ་ཐིམ་པས༔ མཁྱེན་རབ་ཉི་མ་འབུམ་གྱི་འོད་འཕྲོས་ཤིང་༔ ཉོན་མོངས་དུག་ལྔའི་རྟོག་ཚོགས་དབྱིངས་སུ་དག༔ རང་བྱུང་སྔགས་ཀྱི་རྒྱལ་པོ་འདི་ཉིད་བཟླ༔ ཨོཾ་ཝ་གི་ཤྭ་རི་མུཾ༔ སླར་ཡང་རང་སྔགས་གཟུངས་ཀྱི་ཡི་གེ་ལས༔ འོད་ཟེར་ལྔ་ལྡན་རིགས་དྲུག་གནས་སུ་འཕྲོས༔ མཐའ་ཡས་འགྲོ་བའི་ལས་ཉོན་སྡིག་སྒྲིབ་སྦྱངས༔ ཕྱི་སྣོད་ཞིང་ཀུན་པདྨོ་བཀོད་པ་དང་༔ ནང་བཅུད་འགྲོ་ཀུན་འཇམ་དབྱངས་གཞོན་ནུའི་སྐུ༔ སྒྲ་གྲགས་སྔགས་ལ་དྲན་རྟོག་བདེ་བ་ཆེ༔ འཁོར་འདས་མཉམ་ཉིད་ལྷ་དང་རོ་གཅིག་ངང་༔ སྨྲ་བ་བཅད་དེ་བསྙེན་པ་འབྲུ་འབུམ་དྲུག༔ བཟླས་པས་རྟགས་མཚན་དངོས་ཉམས་རྨི་ལམ་དུ༔ ལྷ་དང་ཞལ་མཇལ་གསུང་ཐོས་རིག་རྩལ་བརྡོལ༔ ཉི་ཟླ་ཤར་དང་ནོར་འབྲུའི་གཏེར་ཁ་རྙེད༔ ཡི་གེ་འབྲི་ཀློག་མ་བསླབ་ཆོས་ཀྱང་ཤེས༔ དངོས་གཞིའི་རིམ་པ་དེ་ལྟར་ཉམས་སུ་ལོངས༔ ས་མ་ཡཱ༔ རྗེས་ལ་མཎྜལ་འབུལ་ཞིང་བསྟོད་པ་བྱ༔ ལྷར་སྣང་དམིགས་མེད་ཐུགས་སྲོག་ཧྲཱིཿལ་བསྡུ༔ དེ་ཡང་སྤྲོས་བྲལ་སྟོང་པའི་ངང་ལ་བཞག༔ རྒྱུན་གྱི་སྤྱོད་ལམ་དོན་དང་ལྡན་པའི་ཕྱིར༔ ཡི་གེ་འབྲི་ཀློག་རྟེན་གསུམ་བཞེངས་པ་དང་༔ ཕྱག་འཚལ་མཆོད་པ་འབུལ་དང་འཇམ་དཔལ་གྱི༔ མཚན་ཡང་དག་པར་བརྗོད་པ་གླུར་བླངས་སོགས༔ ཁ་འདོན་ཆོས་སྤྱོད་ཆག་མེད་ནན་ཏན་བྱ༔ དེ་ནས་དགེ་བ་བསྔོ་བ་འདི་བཞིན་ནོ༔ ཨེ་མ་ཧོ༔ དུས་གསུམ་ཀུན་ཏུ་བསགས་པའི་དགེ་རྩ་དང་༔ མཁྱེན་རབ་ལྷ་ལ་བསྒོམ་བཟླས་བྱས་པའི་མཐུས༔ སྐྱེ་བ་འདི་ནས་བྱང་ཆུབ་མ་ཐོབ་བར༔ རྗེ་བཙུན་འཇམ་པའི་དབྱངས་དང་མི་འབྲལ་བར༔ རྟག་ཏུ་ལུང་བསྟན་དབུགས་དབྱུང་མཛད་པ་དང་༔ མཐར་ཐུག་མཁའ་ཁྱབ་འགྲོ་བ་མ་ལུས་པ༔ འདྲེན་པའི་དེད་དཔོན་མཆོག་ཏུ་འགྱུར་བར་ཤོག༔ ཤིས་པ་བརྗོད་པའི་རིམ་པ་ནི༔ ཨེ་མ་ཧོ༔ ཤེས་རབ་ཆེན་པོས་སྲིད་པའི་སྡུག་བསྔལ་གྲོལ༔ སྙིང་རྗེ་ཆེན་པོས་ཞི་ལ་མི་གནས་ཤིང་༔ རབ་འབྱམས་རྒྱལ་བའི་ཐུགས་ཀྱི་མཛོད་འཛིན་པ༔ རྗེ་བཙུན་འཇམ་པའི་དབྱངས་ཀྱི་བཀྲ་ཤིས་ཤོག༔ མེ་ཏོག་འཐོར་ཞིང་རྒྱུན་དུ་དགེ་ལ་བརྩོན༔ བྱ་སླ་ཚེགས་ཆུང་ཉམས་ལེན་རྒྱུན་ཁྱེར་འདི༔ དག་སྣང་ཆོས་ཀྱི་མ་ཚང་ཁ་སྐོང་ཕྱིར༔ ལས་ཀྱི་འཕྲོ་ལྡན་བུ་ལ་གཏད་དོ་རྒྱ༔ ཉམས་བླངས་བདག་གཞན་དོན་གཉིས་མཐར་ཕྱིན་ཤོག༔ གུ་ཧྱ༔ ཞེས་པ་འདི་སྐལ་ལྡན་ལུང་རིག་གླིང་པས་དགོངས་པ་མཉམ་བཞག་གི་སྒྲོམ་ནས་ལེགས་པར་ཕབ་པ་དགེ་ལེགས་འཕེལ༔ སརྦ་མངྒ་ལཾ།