འཆར་ཚུལ་ཐུགས་རྗེའི་རོལ་པ་བསྟན་པ།
འཆར་ཚུལ་གསུམ་གྱི་གོ་དོན་མདོར་བསྟན།
གསུམ་པ་འཆར་ཚུལ་ཐུགས་རྗེའི་རོལ་པ་ལ་གསུམ་སྟེ། འཆར་ཚུལ་གསུམ་གྱི་གོ་དོན་མདོར་བསྟན། སོ་སོའི་རང་བཞིན་རྒྱས་པར་བཤད། ཀུན་ཏུ་བཟང་པོའི་གྲོལ་ཚུལ་བསྟན་པའོ། །(༡) དང་པོ་ནི། རྩལ་དང་རྒྱན་དང་རོལ་པ་གསུམ་པོ་དེ་ནང་དབྱིངས་ལྷུན་གྲུབ་རིན་པོ་ཆེའི་སྦུབས་གཞི་དང་གཞི་སྣང་ལ་ཡོད་པ་ཉིད། ཕྱི་གསལ་དུ་འཆར་བ་ཡིན་ཏེ། བྱད་ཀྱི་རྣམ་པ་མེ་ལོང་དུ་ཤར་བ་བཞིན་ནོ། །ནང་དབྱིངས་སུ་ཇི་ལྟར་ཡོད་ན། རིག་པའི་ངོ་བོ་སྟོང་པ་ལ་འཆར་ཚུལ་གོ་མ་འགགས་པར་ཡོད་པས་
རྩལ་ཡོད་པའོ། །སྟོང་ཆད་དུ་མ་སོང་བས་ཡེ་ཤེས་ཀྱི་རྒྱན། ལྷུན་གྲུབ་རིགས་ཅན་དུ་མ་སོང་བས་ཟང་ཐལ་དངོས་མེད་ཀྱི་རྒྱན། རང་གདངས་སེམས་སྟོང་དུ་མ་སོང་བས་རིག་པའི་བརྒྱན་པས་རྒྱན་ཡོད་པའོ། །རིག་པ་རང་གདངས་ལ་རོལ་པ་དང་། གདངས་ཡེ་ཤེས་སུ་རོལ་པ་དེ་ལས་ཕྱི་གསལ་དུ་འཆར་བ་ལ་རོལ་པས་རོལ་པ་ཡོད་པའོ། །དེ་གསུམ་ཡང་གཞི་རིག་པ་གཅིག་པས་དོན་གཉིས་སུ་མེད་དོ། །དེ་གསུམ་ལ་རྟོགས་དུས་ཡོན་ཏན་ཞེས་བྱའོ། །རིག་པ་ཉིད་ཀྱི་ཆེ་བ་དེ་ལྟར་སྣང་བའི་ཕྱིར་རོ། །