ལྔ་པ། སྙིང་ནས་སྒྲུབ་ལ་སྐུལ་བའི་ལེའུ།
ཡང་དེ་ཉིད་དུས་གང་ལའང་སྙིང་པོ་མེད་པར་མཐོང་ནས། གཅིག་པུར་སྒྲུབ་ལ་བརྩོན་པའི་མགུར་གསུངས་པ། །མ་རིག་ནམ་མཁའ་བཞིན་དུ་རྒྱ་ཆེ་ལ། །གཟུང་འཛིན་མཚན་མོའི་མུན་རུམ་ཤིན་ཏུ་ནག །མི་ཤེས་ཉོན་མོངས་ཐོག་མཐའ་བར་མེད་པས། །རྨོངས་པ་ཁྱོད་ལ་ད་རུང་གྲོས་ཤིག་འདེབས། །ད་རེས་ཚེ་འདིར་ཐར་ལམ་སྙེགས་བཞིན་དུ། །སྒྲུབ་ལ་མི་བརྩོན་རྣམ་གཡེངས་འདུ་འཛིས་གཡེངས། །འཁྲུལ་སྣང་ཚེ་འདིའི་བྱ་བས་ཅི་བྱར་ཡོད། །ད་རེས་སྙིང་པོའི་དོན་ལ་སྒྲུབ་པར་འཚལ། །ཚེ་འདིའི་དགའ་བདེ་རྨི་ལམ་སྣང་བ་འདྲ། །ཅིས་ཀྱང་མི་ཕན་ངེས་པར་འདོར་ནས་འགྲོ། །ཟས་ནོར་འབྱོར་པས་བདག་ལ་ཅི་བྱར་ཡོད། །ད་རེས་ཟབ་དོན་ཆོས་ལ་སྒྲུབ་པར་འཚལ། །འདུས་ཀྱང་འབྲལ་ཏེ་ཚོང་ཁང་མགྲོན་པོ་འདྲ། །གཅིག་གིས་གཅིག་འཆིང་མཛའ་བཤེས་གཉེན་འདུན་དང་། །འཁོར་འདབས་མང་པོས་བདག་ལ་ཅི་བྱར་ཡོད། །ད་རེས་འབྲལ་མེད་དོན་ལ་སྒྲུབ་པར་འཚལ། །ངོ་མཚར་སྙན་གྲགས་བསྟོད་བཀུར་རྨི་ལམ་འདྲ། །འཁྲུལ་པས་བྱིས་པ་བསླུ་ཞིང་བློ་སེམས་འཕེལ། །གཞན་གྱི་བཀུར་སྟི་སྲི་ཞུས་ཅི་བྱར་ཡོད། །ད་རེས་འོད་གསལ་དོན་ལ་སྒྲུབ་པར་འཚལ། །ཚེ་འདིའི་བྱ་བ་གང་དང་ཅི་ཡང་རུང་། །བྱས་པ་དོན་མེད་ཐམས་ཅད་སྡུག་བསྔལ་རྒྱུ། །བྱ་བྱེད་འཁྲུལ་པས་བདག་ལ་ཅི་བྱར་ཡོད། །ད་རེས་བྱར་མེད་དོན་ལ་སྒྲུབ་པར་འཚལ། །ཀུན་གྱི་ནང་ནས་གཅིག་པུར་འགྲོ་དུས་ན། །གང་དང་ཅིས་ཀྱང་ཕན་པ་ཅུང་ཟད་མེད། །ཚེ་འདིའི་སྣང་བས་བདག་ལ་ཅི་བྱར་ཡོད། །གྲོས་མོ་ཆེ་ལ་ཕན་པ་སྒྲུབ་པར་འཚལ། །སུ་ཉེ་ཅི་འབྱོར་གང་དང་ཅི་ཡོད་ཀྱང་། །རྗེས་སུ་འབྲང་བ་དགེ་སྡིག་གཉིས་ལས་མེད། །གཉེན་བཤེས་ནོར་རྫས་མང་བས་ཅི་བྱར་ཡོད། །སྐྱས་མོ་ཆེ་ལ་ཕན་པའི་དམ་ཆོས་འཚལ། །ཕྱི་རོལ་ཡུལ་ལ་བདེ་སྐྱིད་གྲངས་མང་ཞིང་། །ལུས་སེམས་དགའ་བདེའི་སྣང་བ་རྒྱ་ཆེ་ཡང་། །འཆི་བའི་དུས་ན་བདག་ལ་ཅི་བྱར་ཡོད། །བེམས་རིག་བྲལ་དུས་ཕན་པའི་གདིང་ཞིག་འཚལ། །ན་ཡང་མི་འཚེར་ཤི་ཡང་མི་འགྱོད་ལ། །འཆི་ཀར་མི་འགྱོད་ཟབ་དོན་(༣༣)སྙིང་པོའི་ཆོས། །རང་རིག་གོམས་པའི་ཆོས་ཉིད་ནམ་མཁའ་ལ། །གནས་ལུགས་དོན་གྱི་བཙན་ས་ཟིན་པར་འཚལ། །ཡང་འཁོར་ཡང་སྐྱེ་གཏན་དུ་མི་ཁོམ་པས། །ད་རེས་ཚེ་འདིར་ཆོས་ཉིད་ས་བཟུང་ནས། །ཆོས་སྐུ་མི་འགྱུར་གདོད་མའི་མཁའ་དབྱིངས་སུ། །རང་རིག་ཆོས་སྐུའི་གོ་འཕང་ཐོབ་པར་འཚལ། །གྲོས་འདི་སྙིང་ནས་ཡིན་གྱིས་གུས་པས་ཉོན། །གཅིག་པུར་སྒྲུབ་ལ་བརྩོན་དང་དངོས་གྲུབ་འབྱུང་། །རིག་པའི་ངང་ལ་སྐྱོངས་དང་ངེས་ཤེས་སྐྱེ། །ཟབ་དོན་གནད་ཀྱི་མན་ངག་དྲིལ་བ་ལགས། །བདག་གི་སེམས་འདི་རྣམ་གཡེང་ལ་སྐྱོ་བས། །གཅིག་པུར་ཞི་བ་སྒྲུབ་ལ་མོས་པའི་ཕྱིར། །རང་ལ་གྲོས་སུ་གདམས་པའི་རིམ་པ་འདི། །སྐལ་བཟང་རྣམས་ཀྱིའང་སྙན་དུ་ཕུལ་བ་ལགས། །དགེ་བ་འདི་ཡིས་བདག་བློ་ཞི་བའི་ཚལ། །ཟབ་གཏེར་ཡོན་ཏན་འབྱོར་པས་ཡོངས་གང་ཞིང་། །མཁའ་འགྲོ་དམ་ཅན་རྒྱ་མཚོ་འདུ་བའི་གནས། །སྦས་ཡུལ་རིན་ཆེན་སྒོ་བཞི་འབྱེད་པར་ཤོག །རང་ལ་གྲོས་སུ་གདམས་པ་རྡོ་རྗེའི་མགུར་ལས། སྙིང་ནས་སྒྲུབ་ལ་སྐུལ་བའི་ལེའུ་སྟེ་ལྔ་པའོ།། །།
རང་ལ་གྲོས་སུ་གདམས་པ་རྡོ་རྗེའི་མགུར་ཞེས་བྱ་བ་ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་གངས་རི་ཐོད་དཀར་གྱི་མགུལ། ཨོ་རྒྱན་རྫོང་གི་གནས་ཀུན་ཏུ་བཟང་པོའི་ཁང་བཟང་ཟླ་བ་ཆུ་ཤེལ་གྱིས་འཚེར་བའི་གནས་སུ་སྨྲས་སོ། །ཤུ་བྷཾ།། །།