ལུགས་གཞན་དགག་པ།

གཉིས་པ་ལུགས་གཞན་དགག་པ་ལ། རང་བཞིན་གསུམ་སེམས་ཙམ་ཁོ་ནའི་ཆོས་སྐད་ཡིན་པར་འདོད་པ་ལ་སྒྲུབ་བྱེད་མེད་ཅིང་གནོད་བྱེད་ཡོད་པར་བསྟན་པ། གྲུབ་མཐའི་རྣམ་བཞག་མ་ཤེས་པའི་དབང་གིས་དབུ་སེམས་ཀྱི་ལུགས་ཕྱིན་ཅི་ལོག་འདོད་པ་ལྟ་ངན་དུ་བསྟན་པ། དོན་དམ་མེད་ན་ཀུན་རྫོབ་མེད་པར་འགྱུར་བ་སོགས་ཧ་ཅང་ཐལ་ཆེས་པར་བསྟན་པ་དང་གསུམ། དང་པོ་ནི། གསུམ་ལྡན་མར་བཅད་སྐྱོན་ཅན་ལུགས་ལ་ནི། །འགྱུར་མེད་ཡོངས་གྲུབ་སེམས་ཙམ་ཁོ་ནར་འདོད། །རང་བཞིན་གསུམ་ཀའང་སེམས་ཙམ་ཁོ་ན་ལའོ། །སྐྱོན་མེད་རྫོགས་ལྡན་དབུ་མའི་གཞུང་རྣམས་སུ། །ངོ་བོ་ཉིད་གསུམ་ཡང་ཡང་གསུང་ཕྱིར་དང༌། །སེམས་ཙམ་གཞུང་དུ་དེ་སྐད་མ་གསུངས་ཤིང༌། །དེ་ལ་གནོད་བྱེད་མང་པོ་ཡོད་པའི་ཕྱིར། །ངོ་བོ་ཉིད་གསུམ་དབུ་མ་ཁོ་ན་ཡི། །ཆོས་ལུགས་ཡིན་པར་རྫོགས་ལྡན་ལུགས་ལས་བྱུང༌། །རྩ་བར། གསུམ་ལྡན་མར་བཅད་སྐྱོན་ཅན་ལུགས་ལ་ནི། །ཞེས་པ་ནས། རྫོགས་ལྡན་ལུགས་ལས་བྱུང༌། ཞེས་པའི་བར་ཤོ་ལོ་ཀ་གཉིས་དང་རྐང་བ་གཅིག་བྱུང༌། དེའི་ཚིག་དོན་ནི། ཡང་གསུ༵མ་ལྡན༵་མར༵་བཅད༵་སྐྱོན༵་ཅན༵་གྱི་ལུག༵ས་ལ༵་ནི༵། འགྱུར༵་མེད༵་ཡོང༵ས་གྲུབ༵་ནི་སེམས་༵ཙམ༵་པ་ཁོ༷༷་ནའི༵་འདོ༵ད་པ་ཡིན་པར་འདོད་པ་དང༌། ཀུན་བཏགས་གཞན་དབང་ཡོངས་གྲུབ་སྟེ་རང༵་བཞིན༵་གསུམ༵་ག༵འ༵ང་སེམས༷་ཙམ༷་ཁོ༷༷་ནའི༷་འདོད་པའོ་༷ཞེས་འདོད་པ་མི་འཐད་དེ། སྐྱོན༵་མེད༵་རྫོགས༵་ལྡ༵ན་དབུ༵་མའི༵་གཞུང༵་ཡུམ་བར་མའི་བྱམས་ཞུས་ཀྱི་ལེའུ་ལས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་ལ་བཀའ་སྩལ་བ། བྱམས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་ཆོས་རབ་ཏུ་དབྱེ་བ་ལ་མཁས་པ་ལ་གནས་པའི་བྱང་ཆུབ་སེམས་དཔའ་རྣམ་པ་གསུམ་གྱིས་གཟུགས་རབ་ཏུ་དབྱེ་བ་གདགས་པ་རྗེས་སུ་ཤེས་པར་བྱའོ། །ཞེས་པ་ནས། འདི་ལྟར་འདི་ནི་ཡོངས་སུ་བརྟགས་པའི་གཟུགས་འདི་ནི་རྣམ་པར་བརྟགས་པའི་གཟུགས། འདི་ནི་ཆོས་ཉིད་ཀྱི་གཟུགས་སོ། །ཞེས་པ་ལ་སོགས་པ་དེ་རྣམ༵ས་སུ་ངོ༵་བོ༵་ཉིད༵་གསུམ༵་ཡང༵་ཡང༵་གསུང༷ས་པའི་ཕྱིར༵་དང༵༌། སེམས༵་ཙམ༵་པའི་གཞུ༵ང་དུ༵་རྫོགས་ལྡན་ཆོས་མཆོག་གི་ཆོས་ལས་ངོ་བོ་ཉིད་གསུམ་གསུངས་པ་དེ༵་སྐད༵་མ༵་གསུངས༵་ཤིང༵༌། དེས་ན་རང་བཞིན་གསུམ་སོགས་སེམས་ཙམ་ཁོ་ནའི་ཆོས་སྐད་ཡིན་པར་འདོད་པ་དེ༵་ལ༵་གནོ༵ད་བྱེད༵་མང༵་པོ༵་ཡོད༵་པའི༵་ཕྱིར༵། དེས་ན་ངོ༵་བོ༵་ཉིད༵་གསུམ༵་དབུ༵་མ༵་ཁོ༵་ན༵་ཡི༵་ཆོས༵་ལུག༵ས་ཡིན༵་པར༵་རྫོག༵ས་ལྡན༵་ལུགས༵་ལས༵་བྱུང༵་བ་ཡིན་ནོ། །ངོ་བོ་ཉིད་གསུམ་དབུ་མ་ཁོ་ནའི་ཆོས་སྐད་ཡིན་ཡང་སེམས་ཙམ་པས་ཁོ་རང་གི་ལུགས་ཀྱི་ཀུན་བཏགས་གཞན་དབང་ཡོངས་གྲུབ་གསུམ་མམ་མཚན་ཉིད་གསུམ་འདོད་པའི་ཕྱིར་རོ། །གཞན་ཡང་ངོ་བོ་ཉིད་གསུམ་དབུ་མ་ཁོ་ནའི་ཆོས་ཡིན་ཞེས་པ་ནི་འགྱུར་མེད་ཡོངས་གྲུབ་དང་སེམས་ཙམ་གྱི་གྲུབ་མཐའ་འགལ་བ་ཡིན་ཏེ། སེམས་ཙམ་པ་ནི་རྣམ་ཤེས་སྐད་ཅིག་མ་དོན་དམ་དུ་བདེན་པར་འདོད་ཅིང༌། འགྱུར་མེད་ཡོངས་གྲུབ་ནི་རྣམ་ཤེས་དང་སྐད་ཅིག་མ་ལས་འདས་པ་དོན་དམ་འདུས་མ་བྱས་ཀྱི་དབྱིངས་རིག་དབྱེར་མེད་ཡིན་པའི་ཕྱིར་དང༌། རྣམ་ཤེས་སྐད་ཅིག་མ་ནི་འདུས་བྱས་མི་རྟག་པ་བཅོས་མ་གློ་བུར་བ་མཐའ་མའི་ཆོས་ཡིན་པའི་ཕྱིར་ཞེས་ཆོས་རྗེ་ཀུན་མཁྱེན་གྱིས་གསུངས་སོ། །ཡང་རི་ཆོས་ངེས་དོན་རྒྱ་མཚོ་ལས། ངོ་བོ་ཉིད་གསུམ་སྟོན་པའི་རྒྱུ་མཚན་གྱིས་སེམས་ཙམ་གྱི་རང་གཞུང་དུ་མི་འགྱུར་ཏེ། དབུ་མ་ཆེན་པོའི་གཞུང་ལུགས་ཡུམ་རྒྱས་པ་དང་བར་མ་དང་ཁྲི་བརྒྱད་སྟོང་བ་རྣམས་འགྲེལ་བ་དང་འབུམ་པ་རྒྱ་ཆེར་བཤད་པ་ལ་སོགས་པ་གཞན་དང་གཞན་མང་བོར་ཡང་ངོ་བོ་ཉིད་གསུམ་གྱི་རྣམ་བཞག་ཡང་དང་ཡང་དུ་གསུངས་ཤིང་ཞེས་སོགས་རྒྱ་ཆེར་གསུངས་པ་དང༌། གཞན་སྟོང་དབུ་མའི་རྒྱན་ལས། མཚན་ཉིད་གསུམ་དང་བདེན་གཉིས་འདོད་མི་འདོད། །དེ་དག་སེམས་ཙམ་དབུ་མའི་ཁྱད་པར་མིན། །གྲུབ་མཐའ་བཞི་ཀའི་བདེན་གཉིས་རྣམ་བཞག་བྱས། །མཚན་ཉིད་གསུམ་པོ་ཤེར་ཕྱིན་ལས་ཀྱང་བསྟན། །འཕགས་པའི་བྱང་ཆུབ་སེམས་འགྲེལ་དུ་ཡང་གསུངས། །ཞེས་སོགས་གསུངས་པས་རྒྱས་པར་གཞུང་དེ་དག་ལས་ཤེས་པར་བྱའོ། །