གཉིས་པ་སྣང་ལ་མ་ངེས་པ་བཤད་པ་ལ།
གཉིས་པ་སྣང་ལ་མ་ངེས་པ་བཤད་པ་ལ།
དགག་བཞག་གཉིས་ལས། དང་པོ་ནི། ཁ་ཅིག་ན་རེ། སྣང་ལ་མ་ངེས་པའི་མཚན་ཉིད་ཀྱི་ཟུར་དུ་སྣང་ལ་མ་ངེས་པ་ཞེས་སྨྲས་པ་མི་འཐད་པར་ཐལ། དེ་ལྟར་ན་མངོན་སུམ་ཐམས་ཅད་སྣང་ལ་མ་ངེས་པའི་བློར་འགྱུར་པ་ཡིན་པའི་ཕྱིར། དེར་ཐལ། མངོན་སུམ་གྱིས་རང་ཡུལ་ངེས་པ་མེད་པའི་ཕྱིར། དེར་ཐལ། རང་འགྲེལ་ལས། མངོན་སུམ་ནི་གང་གིས་ཀྱང་ངེས་པར་བྱེད་པ་མ་ཡིན་ནོ། །ཞེས་གསུངས་པའི་ཕྱིར་ན་མ་ཁྱབ་སྟེ། ལུང་དེའི་དོན་ནི་མངོན་སུམ་རྟོག་བྲལ་ཡིན་པས་ངེས་ཤེས་ངེས་རྟོག་གིས་ངེས་མི་ནུས་ཞེས་པ་ལུང་དེའི་དོན་ཡིན་པའི་ཕྱིར། དེར་ཐལ། མཛོད་ལས། ངེས་པར་རྟོག་དང་རྗེས་དྲན་པའི། །རྣམ་པར་རྟོག་པའི་རྣམ་མི་རྟོག །ཅེས་གསུངས་པའི་ཕྱིར། གལ་ཏེ་དེ་ལྟར་མ་ཡིན་ན་སྡུག་བདེན་མི་རྟག་པ་མངོན་སུམ་དུ་རྟོགས་པའི་རྣལ་འབྱོར་མངོན་སུམ་ཆོས་ཅན། ཁྱོད་ཀྱིས་སྡུག་བདེན་མི་རྟག་པ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་མངོན་སུམ་དུ་མ་ངེས་པར་ཐལ། ཁྱོད་མངོན་སུམ་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། རྣལ་འབྱོར་མངོན་སུམ་ལ་སོ་སྐྱེ་ལྟར་རང་ཡུལ་སྣང་ལ་མ་ངེས་པ་གཅིག་མེད་པའི་ཕྱིར། དེར་ཐལ། རྣལ་འབྱོར་མངོན་སུམ་ཡིན་ན་རང་ཡུལ་དེ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་མངོན་སུམ་དུ་ངེས་པས་ཁྱབ་པའི་ཕྱིར། རྟགས་གྲུབ་སྟེ། རྣམ་འགྲེལ་ལས། བློ་གྲོས་ཆེན་པོས་མཐོང་ཉིད་ནས། །རྣམ་པ་ཐམས་ཅད་ངེས་པར་བྱེད། །ཅེས་གསུངས་པའི་ཕྱིར། དེ་ལ་ཁ་ཅིག་ན་རེ། རང་ཡུལ་དུ་གྱུར་བའི་འདུས་བྱས་མངོན་སུམ་དུ་མཐོང་བའི་མངོན་སུམ་ཡིན་ན་རང་ཡུལ་དེ་དང་གྲུབ་བདེ་དབྱེར་མེད་ཀྱི་རྫས་གཅིག་པ་མཐའ་དག་མངོན་སུམ་དུ་རྟོགས་པས་ཁྱབ་པར་ཐལ། རྣམ་འགྲེལ་ལས། བློ་གྲོས་ཆེན་པོས་མཐོང་ཉིད་ནས། །ཞེས་སོགས་གསུངས་པའི་ཕྱིར་ན་མ་ཁྱབ་སྟེ། བློ་གྲོས་ཆེན་པོ་རྣལ་འབྱོར་མངོན་སུམ་གྱི་དབང་དུ་བྱས་པའོ། །ཁ་ཅིག་ན་རེ། རང་ཡུལ་དུ་གྱུར་བའི་འདུས་བྱས་མངོན་སུམ་དུ་མཐོང་བའི་མངོན་སུམ་ཡིན་ན། རང་ཡུལ་དེ་དང་གྲུབ་བདེ་དབྱེར་མེད་གྱི་རྫས་གཅིག་པ་ཐམས་ཅད་མངོན་སུམ་དུ་རྟོགས་པས་ཁྱབ་པར་ཐལ། རྣམ་འགྲེལ་ལས། ཚད་མ་གཞན་གྱིས་བརྟག་བྱ་གང༌། །མ་མཐོང་ཆ་གཞན་ཅི་ཞིག་ཡོད། །ཅེས་གསུངས་པའི་ཕྱིར་མ་ཁྱབ་སྟེ། ཆོས་དེ་མངོན་སུམ་དུ་མཐོང་ན་མངོན་སུམ་དུ་རྟོགས་པས་མ་ཁྱབ་པའི་ཕྱིར། དེར་ཐལ། གྲངས་ཅན་པའི་སྒྲ་འཛིན་དབང་ཤེས་ཀྱིས་སྒྲ་མི་རྟག་པ་མངོན་སུམ་དུ་མཐོང་ཀྱང་མངོན་སུམ་དུ་མ་རྟོགས་པའི་ཕྱིར་རོ། །
གཉིས་པ་རང་ལུགས་བཞག་པ་ལ། མཚན་ཉིད། དབྱེ་བ་གཉིས། དང་པོ་ནི། རང་གི་འཇུག་ཡུལ་གསལ་བར་སྣང་བ་ཡང་ཡིན། རང་ཡུལ་མ་ངེས་པ་ཡང་ཡིན་པའི་གཞི་མཐུན་པར་གྱུར་པའི་མ་འཁྲུལ་བའི་རིག་པ་དེ། སྣང་ལ་མ་ངེས་པའི་བློའི་མཚན་ཉིད། སྣང་ལ་མ་ངེས་པའི་བློ་ནི། མེད་པ་གསལ་སྣང་ཅན་གྱི་རྟོག་མེད་ལོག་ཤེས་ལྟ་བུ་མ་ཡིན་པར་རང་གི་འཇུག་ཡུལ་ཏེ་བཟུང་བྱའི་ཡུལ་བུམ་པ་སོགས་གསལ་བར་སྣང་བ་ཡང་ཡིན། དེ་གསལ་བར་སྣང་ཡང་རང་ཡུལ་དེ་མ་ངེས་པའམ་མ་རྟོགས་པའི་བློ་ཡིན་པའི་གཞི་མཐུན་པའི་རིག་པ་དེ་ཡིན་ནོ། །
གཉིས་པ་དབྱེ་བ་ནི།
རང་ཡིན་པར་གྱུར་བའི་དབང་མངོན་དང༌། ཡིད་མངོན་དང༌། རང་རིག་མངོན་སུམ་གསུམ་ཡོད་ལ། སྣང་ལ་མ་ངེས་པར་གྱུར་བའི་རྣལ་འབྱོར་མངོན་སུམ་མེད་དོ། །རྣལ་འབྱོར་མངོན་སུམ་ལ་གང་སྣང་ངེས་པས་ཁྱབ་པའོ། །དང་པོ་སྣང་ལ་མ་ངེས་པར་གྱུར་བའི་དབང་པོའི་མངོན་སུམ་ནི། མིག་གིས་གཟུགས་ཡིད་འོང་མཐོང་བ་ལ་ལྷག་པར་ཆགས་པའི་གནས་སྐབས་ཀྱི་རྣ་བས་སྒྲ་ཆེན་པོ་ཐོས་པའི་སྒྲ་འཛིན་དབང་མངོན་ལྟ་བུ་ཡིན་ཏེ། རྣམ་འགྲེལ་ལེའུ་གསུམ་པ་ལས། ཡིད་གཅིག་ཡིན་ཕྱིར་གཞན་ལ་ནི། །ཆགས་པ་གཞན་ལ་མི་འགྲོའི་ཕྱིར། །ཤེས་གཞན་མི་སྐྱེ་ཞེ་ན་མིན། །ལ་ལར་ཅིག་ཅར་འབྱུང་ཕྱིར་རོ། །འཇུག་པ་མཚུངས་ལ་མཚུངས་པའི་ཕྱིར། །ཐམས་ཅད་ཚེ་གཞན་རྟོགས་མི་འགྱུར། །ཞེས་གསུངས་པའི་ཕྱིར་རོ། །སྣང་ལ་མ་ངེས་པའི་ཡིད་མངོན་ནི། སོ་སྐྱེས་ཀྱི་རྒྱུད་ཀྱི་དུས་མཐའི་སྐད་ཅིག་མ་གཅིག་གི་དབང་དུ་བྱས་པའི་ཡིད་མངོན་ལྟ་བུའོ། །སྣང་ལ་མ་ངེས་པའི་རང་རིག་ནི། སོ་སྐྱེས་ཀྱི་རྒྱུད་ཀྱི་དུས་མཐའི་སྐད་ཅིག་མ་གཅིག་གི་དབང་དུ་བྱས་པའི་རང་རིག་དང་རྒྱང་འཕེན་པའི་རྒྱུད་ཀྱི་རྗེས་དཔག་ཉམས་མྱོང་གི་རང་རིག་ལྟ་བུའོ། །