དྲི་བ་བཅུ་གཅིག་པ་ནི་རང་ལུགས་དང་གཞན་ལུགས་ཀྱི་རྟེན་འབྲེལ་མི་འདྲ་བར་འཇོག་ཚུལ་ཡོད་དམ་ཅི་ཞེས་པ།
དྲི་བ་བཅུ་གཅིག་པ་ནི་རང་ལུགས་དང་གཞན་ལུགས་ཀྱི་རྟེན་འབྲེལ་མི་འདྲ་བར་འཇོག་ཚུལ་ཡོད་དམ་ཅི་ཞེས་པའོ། །
དེའི་ལན་ནི། སྤྱིར་གཞན་ལུགས་ལ་དུ་མ་ཡོད་ཀྱང་དགེ་ལུགས་པའི་ལུགས་ལྟར་ན་རྟེན་ཅིང་འབྲེལ་འབྱུང་གི་དོན་ནི། རང་གི་ཆ་ཤས་སམ་གདགས་གཞིའམ་ཡན་ལག་ལ་ལྟོས་ནས་གྲུབ་པ་དེ་ཡིན་ལ། འདུས་བྱས་རྟེན་འབྱུང་ནི། རང་གི་རྒྱུ་རྐྱེན་ལ་ལྟོས་ནས་འབྱུང་བ་དེ་ཡིན་ལ། འདི་བས་གཞི་གྲུབ་ན་རྟེན་འབྲེལ་ཡིན་པས་ཁྱབ་པ་ཞལ་གྱིས་བཞེས་པས་རྟེན་འབྲེལ་ཡིན་ན་འདུས་བྱས་ཡིན་པས་མ་ཁྱབ་པོ། རང་ལུགས་ལ་ལྟོས་ནས་གྲུབ་པ་རྟེན་འབྲེལ་གྱི་དོན་ཡིན་ལ། དེ་ཡིན་ན་འདུས་བྱས་རྟེན་འབྲེལ་ཡིན་པས་ཁྱབ་ལ། རྩ་ཤེས་ལས། རང་བཞིན་གང་ཡིན་བཅོས་མིན་དང༌། །གཞན་ལ་ལྟོས་པ་མེད་པར་བཤད། །ཅེས་གསུངས་པ་ལྟར་དོན་དམ་བདེན་པ་ནི་རྟེན་འབྲེལ་མ་ཡིན་པར་འདོད་ཚུལ་རྣམས་སྔར་བདག་གིས་བཀའ་བསྡུ་བཞི་བའི་འགྲེལ་བར་བཤད་ཟིན་པས་དེར་ཤེས་པར་བྱའོ། །འོན་ཀྱང་ལུགས་འདི་གཉིས་ཀྱི་རྟེན་འབྲེལ་བཤད་ཚུལ་དགོངས་པ་འགལ་མེད་དུ་སྒྲུབ་ཚུལ་ཞིག་ཡོད་པར་སྣང་ཀྱང་རེ་ཞིག་མ་སྤྲོས་སོ། །རྟེན་འབྲེལ་གྱི་སྒྲ་བཤད་དམ་ངེས་ཚིག་ནི། ས་བཟང་གི་ཀུན་བཏུས་འགྲེལ་བ་ལས། ངེས་ཚིག་ནི། ས་སྡེ་ལས། མྱུར་དུ་འཇིག་པ་དང་ལྡན་པར་སྐྱེ་བས་ན་རྟེན་ཅིང་འབྲེལ་བར་འབྱུང་བའོ། །ཞེས་པ་ལ་སོགས་པར་གསུངས་ཤིང༌། མདོ་འགྲེལ་ལས། གསུང་པའི་དོན་ནི་ཡན་ལག་སྔ་མ་ལ་རྟེན་ཅིང་འབྲེལ་བར་ཕྱི་མ་རྣམས་འབྱུང་བ་ཡིན་ལ། ཚིག་གསལ་དང་མཛོད་འགྲེལ་དང་མཐུན་པར། པྲི་ཏི་ཏྱ་ཕྲད་ནས། ས་མུ་པཱ་ད་འབྱུང་བ་ཡིན་པས། རྒྱུ་དང་རྐྱེན་ཕྲད་ཅིང་ཚོགས་པ་ལ་ལྟོས་ནས་འབྲས་བུ་རྣམས་འབྱུང་བ་ནི་རྟེན་ཅིང་འབྲེལ་བར་འབྱུང་བའོ། །ཞེས་བསྟན་ཏོ། །ཞེས་དང༌། ཐེག་མཆོག་དབུ་མ་ལས།རྟེན་འབྲེལ་དོན་ནི་ཕྲད་ནས་འབྱུང་བ་སྟེ། །ཚོགས་ལ་ལྟོས་ནས་བཞག་གམ་བྱུང་ཞེས་པའོ། །ཡང་ན་སྔ་མ་ལ་རྟེན་ཕྱི་མར་འབྲེལ། །ཞེས་དང༌། དེའི་ཐད་ཀྱི་ཟིན་བྲིས་ལས། རྟེན་འབྲེལ་གྱི་སྐད་དོད་ལ། པྲ་ཏི་ཏྱ་སཾ་ཨུད་པཱ་ད་ན་བསྐྱེད་པ་སྟེ། འབྱུང་བའི་དོན་ཡིན་ལ། སཾ་ནི་ཉེར་བསྒྱུར་ཏེ་ཡང་དག་པར་བྱུང་བའམ། ངེས་པར་འབྱུང་བའི་དོན་ནོ། །དེ་ཡང་དངོས་པོ་གང་རྒྱུ་གཅིག་ལས་འབྲས་བུ་སྣ་ཚོགས་སྐྱེ་བ་ཡང་མི་སྲིད་ཅིང༌། རྒྱུ་སྣ་ཚོགས་པ་ལས་འབྲས་བུ་གཅིག་ཁོ་ན་སྐྱེ་བ་ཡང་མི་སྲིད་པས། རྒྱུུ་རྐྱེན་སྣ་ཚོགས་པས་ཕྲད་ཅིང་འཚོགས་པ་ལས་འབྲས་བུ་སྣ་ཚོགས་པ་བསྐྱེད་ཅིང་བྱུང་བས་ན་རྟེན་འབྲེལ་ཞེས་བྱ་ཞིང༌། ཞེས་པ་ནས།ཡང་ན་པྲ་ཏི་ཏྱ་ནི་དང་པོ་སྟེ་སྔ་མ་ཡིན་ལ། ཨུཏ་པཱ་ད་སྐྱེས་པ་ཡིན་ཡང་དེ་ཕྱི་མ་དང་འབྲེལ་བའི་ཚེ། འབྲེལ་བ་ཡང་འཇུག་པ་སྟེ། དཔེར་ན་སཾ་བནྡྷ་ཞེས་པའོ། །དེ་ལྟར་ན་ཕྱི་མ་འབྲས་བུ་སྟེ། སྔ་མ་རྒྱུ་ལ་བརྟེན་ནས་བྱུང་ཞིང་སྔ་ཕྱི་གཉིས་པོ་དེ་འབྲེལ་བར་བྱུང་པས་ན་རྟེན་ཅིང་འབྲེལ་བར་འབྱུང་བ་ཞེས་བྱའོ། །ཞེས་སོགས་གསུངས་སོ།། །།