དགེ་སློང་མའི་སོ་སོར་བཤགས་པ།

དགེ་སློང་མའི་སོ་སོར་བཤགས་པར་བྱ་བ།

བཞི་བ་དགེ་སློང་མའི་སོ་སོར་བཤགས་པར་བྱ་བ་བཅུ་གཅིག་འཆད་པ་ལ་སྤྱིའིདོན་དང༌།

སོ་སོའི་དོན་དང་གཉིས། དང་པོ་ལ་གཉིས་ཏེ། དགེ་སློང་ཕའི་རྣམ་འབྱེད་ཀྱིས་བརྗོདཔ་རྣམས་དགེ་སློང་མ་ལ་ཅིར་འགྱུར་དང༌། དགེ་སློང་མའི་རྣམ་འབྱེད་ཀྱིས་བརྗོད་པ་རྣམས་དགེསློང་ཕ་ལ་ཅིར་འགྱུར་རོ། །དང་པོ་ནི་སོ་སོར་བཤགས་པར་བྱ་བ་ལས། བསླབ་པ་དྲལ་ཏེ་ཁྱིམདུ་འཇུག་པ་ནི་དགེ་སློང་ཕ་མ་གཉིས་ཀའི་ཐུན་མོང་བ་ཡིན་ལ། སོ་སོར་བཤགས་པར་བྱ་བདང་པོ་དང་གཉིས་པ་དང་བཞི་པ་ནི་མའི་སོ་སོར་ཐར་པ་དང་མའི་རྣམ་འབྱེད་དང་མདོ་རྩ་འགྲེལལས་མ་གསུངས་ཏེ། གཞུང་དེ་དག་ལྟར་ན་སོ་སོར་བཤགས་པར་བྱ་བ་དེ་གསུམ་ནི་དགེ་སློངམ་རྣམས་ཐུན་མོང་དུ་རྣམ་པར་མི་བཞག་གོ །འོན་ཀྱང་ལུང་ཞུ་བ་ལས་དེ་གསུམ་ཡང་དགེ་སློངམ་རྣམས་ལ་ཡོད་པར་གསུངས་ཏེ། སོ་སོར་བཤགས་པར་བྱ་བ་དང་པོའི་ཞུ་བ་ལས། དགེསློང་མས་ཉེ་དུ་མ་ལགས་པའི་དགེ་སློང་ལམ་སྲང་ན་མཆིས་པ་ལས་བསོད་སྙོམས་བླངས་ཏེ་འཚལ་ན་ཅིར་འགྱུར། སོ་སོར་བཤགས་པར་བྱ་བའོ། །ཞེས་གསུངས་སོ། །སོ་སོར་བཤགས་པར་བྱ་བ་གཉིས་པའི་ཞུ་བ་ལས། དགེ་སློང་མས་མ་བསྒོ་བའི་ཟས་འཚལ་ན་ཅིར་འགྱུར། སོ་སོར་བཤགས་པར་བྱའོ། །ཞེས་གསུངས་སོ། །སོ་སོར་བཤགས་པར་བྱ་བ་བཞི་པའི་ཞུ་བལས། དགེ་སློང་མས་རབ་ཏུ་ཡང་དག་པར་མ་བརྟགས་པའི་ནགས་ཀྱི་ཀུན་དགའ་རྭ་བའི་ནངདུ་བཅའ་བ་དང་བཟའ་བ་བླངས་ཏེ་འཚལ་ན་ཅིར་འགྱུར། སོ་སོར་བཤགས་པར་བྱ་བའོ། །ཞེས་གསུངས་སོ། །དེ་ལྟར་ན་སོ་སོར་བཤགས་པར་བྱ་བ་གསུམ་པོ་དེ་དག་ནི། མདོ་རྩ་བསོགས་ལས་མ་གསུངས་ཀྱང༌། ལུང་ཞུ་བ་ལས་ཁ་བསྐང་བར་བྱའོ། །

གཉིས་པ་དགེ་སློང་མའི་རྣམ་འབྱེད་ཀྱིས་བརྗོད་པ་རྣམས་དགེ་སློང་ཕ་ལ་ཅིར་འགྱུར་ནི།

འོ་མ་སློང་བ་ལ་སོགས་པ་ཐུན་མོང་མ་ཡིན་པ་བཅུ་པོ་འདི་དག་ནི། དགེ་སློང་ལ་ལྟུང་བའི་སྡེ་ཚན་གཞན་དུ་འགྱུར་བ་སྟེ། བསོད་པ་སློང་བའི་ལྟུང་བྱེད་དུ་འགྱུར་རོ། །

གཉིས་པ་སོ་སོའི་དོན་ནི། སོ་སོར་བཤགས་པར་བྱ་བ་བཅུ་གཅིག་ལ་ཚན་པ་གཉིསསུ་དབྱེ་སྟེ། ཐུན་མོང་མ་ཡིན་པ་བཅུར་དབྱེ་བ་དང་ཐུན་མོང་བ་མིང་ཙམ་དུ་བསྟན་པའོ། །དང་པོ་ནི། རྩ་བར། གཞན་གྱི་ཁྱིམ་ནས་བདག་གི་དོན་དུ་འོ་མ་བསླངས་ཏེ་འཐུངས་བ་ལས་སོ། །མི་ན་བས་སོ། །ཞེས་པ་ལ་སོགས་པའོ། །འདིའི་དོན་ལ་གསུམ་ལས། དང་པོ་འདི་རྣམས་ཀྱིགླེང་གཞི་ནི། བཅུ་གཉིས་སྡེ་རྣམས་ཀྱིས་གཞན་གྱི་ཁྱིམ་དག་ནས་འོ་མ་ལ་སོགས་པ་བཅུ་པོའདི་རྣམས་སྔ་མ་སྔ་མ་བཀག་པའི་ཚེ་ཕྱི་མ་ཕྱི་མ་བསླངས་ཏེ་དོན་ཉུང་བའི་དགེ་སློང་མ་རྣམསསྨོད་པར་བྱེད་པ་ལས་སོ། །གཉིས་པ་དགག་བྱ་ནི་ཁྱིམ་པའི་ལོངས་སྤྱོད་ལ་གནོད་པ་དང༌། ཟས་བཟང་པོ་ལ་རང་འདོད་ཆེས་པའོ། །གསུམ་པ་ངོ་བོ་ནི་དགེ་སློང་མས་རང་གི་ཉེ་དུ་ལསགཞན་པའི་ཉེ་དུ་མ་ཡིན་པའི་ཁྱིམ་ནས་བདག་གི་དོན་དུ་འོ་མ་ངག་གི་རིག་བྱེད་ཀྱིས་བསླངསྟེ་འཐུངས་པ་ལ་སོ་སོར་བཤགས་པར་བྱ་བའི་ལྟུང་བ་དངོས་གཞི་བསྐྱེད་པའོ། །ཞོ་དང་མར་དང་ཞུན་མར་དང་འབྲུ་མར་དང་སྦྲང་རྩི་དང་བུ་རམ་གྱི་དབུ་བ་དང་ཉ་ཤ་དང་ཤ་དང་ཤ་སྐམ་ལ་དེ་བཞིན་དུ་སྦྱར་རོ། །

གཉིས་པ་ཐུན་མོང་བ་མིང་ཙམ་དུ་བསྟན་པ་ནི། རྩ་བར། དམག་དཔོན་སེང་གེ་ལས་གྱུར་པའོ། །ཞེས་སོ། །

དགེ་སློང་མའི་སོ་སོར་བཤགས་པར་བྱ་བའི་རྣམ་པར་བཤད་པ་རྫོགས་སོ།། །།