རྩལ།
(༢) གཉིས་པ་ལ་གསུམ་སྟེ། རྩལ་དང་རྒྱན་དང་རོལ་པ་བསྟན་པའོ། །དང་པོ་ལའང་ལྔ་ལས། དང་པོ་གཞི་ནི། ཀུན་གསལ་ལས། ངོ་བོ་ནི། མ་འགགས་པའོ། །ངེས་ཚིག་ནི། འབྱུང་བའི་སྟོབས་དང་ལྡན་པས་ན་རྩལ་ལོ། །དབྱེ་བ་ནི། འཁྲུལ་སྣང་འཁོར་བར་སྣང་བ་དང་། རྟོགས་ཏེ་མྱ་ངན་ལས་འདས་པར་སྣང་བ་སྟེ་རིག་པ་རང་ཉིད་འཁོར་འདས་གཉིས་སུ་སྣང་བའོ། །དཔེ་ནི། ཉི་མ་གཅིག་ཉི་མ་དུ་མར་སྣང་བའམ། ཉི་མ་ལས་འོད་ཟེར་མི་འགག་པའམ། བཙན་དུག་སྔགས་ཀྱིས་ཟིན་མ་ཟིན་ནམ། ག་པུར་རམ། གློག་འགྱུ་བ་ལྟ་བུའོ། །ཞེས་སོ། །ལྔ་པ་ནི། ནང་གསལ་འཆར་རུང་ངམ་འཆར་ནུབ་ཙམ་དུ་རིག་པ་སྟོང་པ་ཤེལ་གོང་ལྟ་བུའི་ནང་ན། ཡེ་ཤེས་ལྔའི་རང་གདངས་འོད་ལྔ་གསལ་བའི་རང་རྩལ་ལས་ཕྱི་གསལ་དུ་ཤར་བའི་སྣང་བ་སྐུ་དང་ཡེ་ཤེས་གསལ་བ་ལ་མ་རྟོགས་གཟུང་འཛིན་གྱི་འཁོར་བའི་རྩལ་འཁྲུལ་སྣང་དུ་རང་ཤར། རྟོགས་པ་ཡེ་ཤེས་ཀྱི་མྱ་ངན་ལས་འདས་པའི་
རྩལ་དག་སྣང་གཟུགས་སྐུ་གཉིས་སུ་ཤར་ཏེ། བཤད་རྒྱུད་ལས། ཆོས་སྐུ་གཅིག་ལས་ཐ་དད་སྣང་། །རིག་པའི་རྩལ་དུ་ཤར་ལུགས་གསུངས། །དེ་ནས་སྟོན་པས་བཀའ་སྩལ་པ། །རིག་པ་དངོས་མེད་ཟང་ཐལ་ནི། །སྟོང་པ་འགག་མེད་དབྱེར་མི་ཕྱེད། །དེར་ཤེས་ཐོགས་པ་མེད་པ་ནི། །ཡེ་ཤེས་ལྔ་རུ་རང་ཤར་ཡིན། །ཆོས་དབྱིངས་ཡེ་ཤེས་རང་གདངས་ནི། །སྟོང་པའི་ངང་དུ་མཐིང་གར་གསལ། །མེ་ལོང་ཡེ་ཤེས་རང་གདངས་ནི། །འགག་མེད་ངང་ན་དཀར་པོ་གསལ། །མཉམ་ཉིད་ཡེ་ཤེས་རང་གདངས་ནི། །དབྱེར་མེད་ངང་ན་སེར་པོ་གསལ། །ཀུན་རྟོགས་ཡེ་ཤེས་རང་གདངས་ནི། །དེར་ཤེས་ངང་ན་དམར་པོ་གན༷ས་{གས༵ལ}། །བྱ་བ་གྲུབ་པའི་རང་གདངས་ནི། །ཐོགས་མེད་ཀློང་ན་ལྗང་གུ་གསལ། །དེ་ལྔ་ཆོས་ཉིད་ཀློང་དུ་ཤར། །ཡེ་ཤེས་འོད་དུ་ཤར་ཅེས་བྱ། །རྟོགས་པས་སྐུ་དང་ཡེ་ཤེས་སྣང་། །མ་རྟོགས་སྣོད་བཅུད་གཉིས་སུ་སྣང་། །དཔེར་ན་མེ་ལོང་དག་པ་ལ། །གང་འཕྲད་རྐྱེན་གྱིས་སྣང་མོད་ཀྱང་། །སྣང་བའི་དུས་ན་གོས་པ་མེད། །གོས་པ་མེད་ཀྱང་དེ་ལྟར་སྣང་། །དེ་བཞིན་རིག་པ་ཆོས་སྐུ་ལ། །ཡོན་ཏན་མ་འགགས་སྣ་ཚོགས་ཤར། །ཤར་ཀྱང་རང་རིག་གཅིག་པུར་གནས། །གཅིག་པུར་གནས་ལ་དུ་མ་མེད། །དུས་དང་གནས་སྐབས་ཐམས་ཅད་དུ། །དངོས་མེད་དག་པ་ཆེན་པོར་གནས། །སྒྲིབ་མེད་གསལ་བ་ཟང་ཐལ་གནས། །གཟུགས་སྐུ་གཉིས་པོའི་སྣང་བ་ཡང་། །རང་སྣང་མ་འགག་རྣམ་པར་དག །ཅེས་སོ། །