བླ་མའི་གསོལ་འདེབས་མ་རིག་མུན་སེལ།
བླ་མའི་གསོལ་འདེབས་མ་རིག་མུན་སེལ་ཞེས་བྱ་བ་བཞུགས་སོ། །
ཀུན་བཟང་རྡོར་སེམས་པདྨ་འབྱུང་གནས་དང་། །བི་མ་མི་ཏྲ་ནམ་མཁའི་སྙིང་པོ་སོགས། །སྐུ་གསུམ་རྒྱལ་བ་ཡོངས་ཀྱི་རྣམ་སྤྲུལ་མཆོག །སངས་རྒྱས་རྡོ་རྗེའི་ཞབས་ལ་ཕྱག་འཚལ་ལོ། །རབ་བྱུང་བཅོ་ལྔ་ཆུ་མོ་གླང་གི་ལོར། །ཡར་ངོའི་ཚེས་བཅུར་ཐབས་ཤེས་པདྨ་དང་། །བསོད་ནམས་མཚོ་ལས་ངོ་མཚར་བལྟས་བཅས་བལྟམས། །ཁྲོ་རྒྱལ་རྡོ་རྗེའི་ཞབས་ལ་གསོལ་བ་འདེབས། །ཆུང་ངུའི་
དུས་ནས་བྱམས་དང་སྙིང་རྗེ་སོགས། །ཐེག་ཆེན་རིགས་ཀྱི་མཚན་ཉིད་ཡང་དག་དང་། །སྤྱན་དང་མངོན་ཤེས་རྫུ་འཕྲུལ་སྟོབས་མངའ་བའི། །ཁྲོ་རྒྱལ་རྡོ་རྗེའི་ཞབས་ལ་གསོལ་བ་འདེབས། །དེ་ནས་རིམ་བཞིན་ཨ་བསྭེ་བིས་སྤྲུལ་དང་། །ཆོས་ཀྱི་བློ་གྲོས་ཀོང་སྤྲུལ་དགེ་རྩེ་དང་། །སི་ཏུ་པཎ་ཆེན་ཡེ་ཤེས་རྡོ་རྗེ་སོགས། །སྤྲུལ་པའི་སྐུ་ལས་བཀའ་གཏེར་མན་ངག་གསན། །ཨོ་རྒྱན་བསྟན་འཕེལ་
ལེགས་བཤད་འབྱོར་ལྡན་དང་། །ནུས་ལྡན་བློ་གྲོས་ནོར་བུ་དབང་རྒྱལ་དང་། །ངག་དབང་ནོར་བུ་མཁན་པོ་བློ་གྲོས་སོགས། །མཁན་ཆེན་རྣམས་ལས་མདོ་སྔགས་རིག་གནས་ཞུས། །དགེ་ལེགས་རྒྱ་མཚོ་རིན་ཆེན་དར་རྒྱས་དང་། །པདྨ་སི་ལོ་ཀརྨ་དོན་གྲུབ་དང་། །ཧ་ཤུར་ཆོས་གྲགས་ཁྲ་སྐྱ་དཔལ་ལྡན་སོགས། །བླ་མ་རྣམས་ལས་མན་ངག་ཕྱག་ལེན་གསན། །ཁྱད་པར་མཁན་ཆེན་ངག་དབང་དཔལ་བཟང་དང་། །སེ་ར་མཁའ་འགྲོ་བདེ་བའི་རྡོ་རྗེ་ལས། །རྫོགས་པ་ཆེན་པོའི་སྙན་བརྒྱུད་མན་ངག་སོགས། །བུམ་པ་གང་བྱོས་ཚུལ་དུ་ཉམས་བཞེས་མཛད། །མདོར་ན་མདོ་སྔགས་རིག་གནས་མན་ངག་རྣམས། །བཤེས་གཉེན་བཅུ་ཕྲག་བཞི་ལས་གསན་སྦྱང་དང་། །སྒོམ་པ་ཉམས་ལེན་མཐར་ཕྱིན་མཛད་པ་ཡིས། །རྩོད་མེད་མཁས་གྲུབ་ཆེན་པོར་ཕྱག་འཚལ་ལོ། །དེ་ནས་རིམ་བཞིན་འགྲོ་དོན་དུས་བབ་ཚེ། །ཁ་བ་ཅན་
དང་རྒྱ་གར་བལ་ཡུལ་དང་། །འབྲུག་དང་འབྲས་ལྗོངས་ངེས་མེད་གནས་རྣམས་སུ། །སྒྲུབ་པའི་སྡེ་བཙུགས་བསྟན་པའི་རྒྱལ་མཚན་འཛིན། །ཁྱད་པར་སྙིང་རྗེའི་ཡུལ་གྱུར་སེམས་ཅན་རྣམས། །ཚེ་སྲོག་བླུ་ཞིང་ཕན་བདེའི་སར་བཀོད་ནས། །ཁམས་གསུམ་འཁོར་བ་སྟོང་པའི་རྒྱུར་གྱུར་པའི། རླབས་ཆེན་གཞན་ཕན་སྒྲུབ་མཁས་ཁྱེད་གཅིག་པུ། །ཐུན་མོང་གདུལ་བྱ་ཐར་པའི་ལམ་སྒྲུབ་ཕྱིར། །ཚུལ་ཁྲིམས་བསླབ་པ་དམ་ཚིག་སྲོག་ལྟར་འཛིན། །བག་མེད་ཆང་དང་ཐ་མ་ཁ་ལ་སོགས། །ལེགས་ཉེས་བླང་དོར་སྟོན་ལ་ཕྱག་འཚལ་ལོ། །ཁྱད་པར་གུ་རུ་མཁའ་འགྲོའི་ལུང་བསྟན་བཞིན། །དམ་ལྡན་སྒྲུབ་པ་སྙིང་པོར་བྱེད་པ་ལ། །མན་ངག་སྙན་བརྒྱུད་འཕོང་མེད་སྟོན་མཛད་པ། །པདྨ་འབྱུང་གནས་ཁྱེད་ལ་ཕྱག་འཚལ་ལོ། །འཇིག་རྟེན་ཁམས་སུ་འབྱུང་བཞིའི་གནོད་པ་དང་། །བདུད་
དང་རྒྱལ་འགོང་དམ་སྲིའི་ཆོ་འཕྲུལ་སོགས། །ཕྱི་ནང་གསང་བའི་བར་ཆད་ཞི་མཛད་པ། །རྡོ་རྗེ་གྲོ་ལོད་གཉིས་པར་ཕྱག་འཚལ་ལོ། །སྙིགས་དུས་འགྲོ་ལ་ལྷག་པར བརྩེ་བ་ཡིས། །སྦས་ཡུལ་གངས་རར་གནས་སྒོ་གསར་ཕྱེ་ནས། །སྙན་བརྒྱུད་མན་ངག་མདོ་སྔགས་ལོ་རྒྱུས་སོགས། །བཀའ་པོད་རྣམ་ལྔ་མཛད་ལ་ཕྱག་འཚལ་ལོ། །ངེས་མེད་གནས་སུ་ཏིང་འཛིན་སྒྲུབ་པ་མཛད། །མ་དང་མཁའ་འགྲོས་འཚོ་བ་ཡོ་བྱད་སྦྱར། །སྟག་སེང་དུག་སྤྲུལ་བརྩེ་བས་ལམ་དུ་བཀོད། །གུ་རུ་ཡིད་བཞིན་ནོར་བུར་གསོལ་བ་འདེབས། །སྲོག་གཅོད་སྤངས་པས་ཚེ་ཡི་དངོས་གྲུབ་ཐོབ། །མ་སྦྱིན་ལེན་སྤངས་ཁམས་གསུམ་ཡོངས་ལ་མངའ། །མི་ཚངས་སྤྱོད་སྤངས་བདེ་སྟོང་ཡེ་ཤེས་སྐྱེས། །རྣམ་དག་རྡོ་རྗེའི་སྐུ་ལ་ཕྱག་འཚལ་ལོ། །རྫུན་ནི་སྤངས་པས་གཡོ་སྒྱུ་ངོ་བསྲུང་བྲལ། །ཕྲ་མ་ཟད་པས་མི་མཐུན་གྲོགས་སུ་སྦྱོར། །
ཚིག་རྩུབ་མེད་པས་བྱ་དང་རི་དྭགས་འཁོར། །ངག་འཁྱལ་བྲལ་བས་སྒྲར་གྲགས་སྔགས་སུ་ཤར། །རྣམ་དག་རྡོ་རྗེའི་གསུང་ལ་ཕྱག་འཚལ་ལོ། །བརྣབ་སེམས་ཟད་པས་བྱ་བཏང་རྣལ་འབྱོར་པ། །གནོད་སེམས་ཟད་པས་སྙིང་རྗེའི་དབང་ཕྱུག་མཆོག །ལོག་ལྟ་བྲལ་བས་ཡེ་ཤེས་ལྔའི་བདག་ཉིད། །རྣམ་དག་རྡོ་རྗེའི་ཐུགས་ལ་ཕྱག་འཚལ་ལོ། །གུ་རུ་ཁྱེད་ཀྱི་ཐུགས་བརྩེ་སྨོན་ལམ་དང་། །བྱིན་བརླབ་བཀའ་དྲིན་གཞན་ལས་ལྷག་པས་ན། །འཛམ་གླིང་ཕྱོགས་མཐའ་ཀུན་ཏུ་ཁྱེད་ཀྱི་མཚན། །སྙན་གྲགས་ཐོས་གྲོལ་ཆེན་པོར་ཕྱག་འཚལ་ལོ། །གུ་རུའི་ལུང་བཞིན་ཚེ་ལ་དབང་གྱུར་ནས། །སྐུ་ཚེའི་འདུ་བྱེད་གཡོ་བ་མེད་པ་རུ། །ལོ་བརྒྱ་ལྷག་བཞུགས་ཚེ་དཔག་མེད་པ་དང་། །དབྱེར་མེད་སངས་རྒྱས་རྡོ་རྗེར་ཕྱག་འཚལ་ལོ། །གཞན་ཕན་བྱང་ཆུབ་སེམས་ཀྱི་ནུས་པ་དང་། །བདུད་བཞིའི་གཡུལ་ལས་
རྒྱལ་བའི་མཐུ་སྟོབས་ཀྱིས། །འཆི་བའི་སེམས་ཅན་སླར་ཡང་གསོ་ནུས་པའི། །ཡེ་ཤེས་མཚོ་རྒྱལ་སྐུ་བརྙེས་ཁྱེད་ལ་འདུད། །རྟག་འཛིན་ཅན་རྣམས་ཆོས་ལ་བསྐུལ་བའི་ཕྱིར། །ཡང་ལེ་ཤོད་ཀྱི་གནས་མཆོག་དམ་པ་རུ། །བོད་ཟླ་བཅུ་གཅིག་ཚེས་གྲངས་ཉི་ཤུའི་ཉིན། །གཞོན་ནུ་བུམ་སྐུའི་བཙན་ས་ཟིན་དེར་འདུད། །འབྲེལ་ཚད་དོན་ལྡན་རྩ་བའི་བླ་མ་མཆོག །འདི་ནས་བྱང་ཆུབ་སྙིང་པོ་མཆིས་ཀྱི་བར། །སྐྱབས་དང་རེ་ས་ཁྱེད་ལས་གཞན་མེད་པས། །རྟག་ཏུ་ཐུགས་རྗེས་གཟིགས་ཤིག་བླ་མ་མཁྱེན། །དཔལ་ལྡན་བླ་མའི་རྣམ་པར་ཐར་པ་ལ། །དད་དང་མོས་གུས་བཀའ་དྲིན་དྲན་པ་ཡིས། །གསོལ་འདེབས་སྨོན་ལམ་སྙིང་ནས་བཏབ་པའི་མཐུས། དཔལ་ལྡན་བླ་མའི་གོ་འཕང་མྱུར་ཐོབ་ཤོག །ཞེས་པའང་ཕྱི་ལོ༢༠༡༦ཕྱི་ཟླ་༡ ཚེས༩ཉིན་དངོས་སློབ་ཐ་ཤལ་བ་འདུ་ཤེས་གསུམ་པ་བིདྱ་དྷརས་སྨོན་པ་དགེའོ།