གཉིས་པ་མཐའ་རགས་ཙམ་དཔྱད་པ།

གཉིས་པ་མཐའ་རགས་ཙམ་དཔྱད་པ་ལ།

ཉ་ཊཱིཀ་ལས། འདི་སངས་རྒྱས་དང་མ་ཕྲད་ན་རང་རྒྱལ་དགྲ་བཅོམ་ཚོགས་སྤྱོད་དུ་འགྱུར་བར་སློབ་དཔོན་ཐོགས་མེད་ཀྱིས་དགོངས་འགྲེལ་འགྲེལ་བར་གསུངས་སོ། །ཞེས་གསུངས་པ་རང་རྒྱལ་དགྲ་བཅོམ་པ་ཡིན་ན་བསྐལ་བ་བརྒྱའི་ཚོགས་བསགས་མི་དགོས་པར་འགྱུར་བ་ཡིན་མིན་དཔྱད། དེའི་སྲིད་པ་ཐ་མའི་ཚེ་གཟུང་དོན་རྟོག་པ་སྤངས་ནུས་པ་ཡིན་མིན་སོགས་དཔྱད་དགོས་ཏེ། ཉ་ཊཱིཀ་ལས།སྒོམ་སྤང་ཁམས་གསུམ་གྱི་ཤེས་སྒྲིབ་གཟུང་རྟོག་དང་བསམ་གཏན་བཞི་བ་ཡན་ཁམས་གོང་གི་ཉོན་སྒྲིབ་དགུར་དྲིལ་ཏེ་སྤོང་ངོ༌། །ཞེས་དང༌། དེ་གསུམ་ཅར་ཡང་བསྐལ་བ་བརྒྱར་ཚོགས་བསགས་དགོས་ཏེ། ཞེས་སོགས་ཀྱིས་དཔྱད། སྐབས་གཉིས་པར་སླར་དཔྱད་པར་འགྱུར་རོ། །ཡང་ཉ་ཊཱིཀ་ལས། མདོ་སྡེ་བ་ན་རེ། འོ་ན་གང་ཟག་ལྟ་བ་ཕུན་སུམ་ཚོགས་པ་སྲིད་པ་བརྒྱད་འགྲུབ་པ་གནས་མེད་ཅེས་མདོ་ལས་བཤད་པ་དང་འགལ་ཞེ་ན། དེ་འགྲོ་བ་གཅིག་ཏུ་དགོངས་སོ། །སྒྲ་ཇི་བཞིན་པར་བྱས་ན་བར་སྲིད་ཡང་མེད་པར་འགྱུར་རོ། །འོ་ན་གོང་འཕོ་གཟུགས་སུ་སྐྱེ་བ་བཅུ་དྲུག་ལེན་པར་བཤད་པ་དང་འགལ་ལོ་ཞེ་ན། རྒྱུན་ཞུགས་བརྒྱད་མི་འགྲུབ་པའི་སྐབས་འདིར་འདོད་ཁམས་ལ་དགོངས་པས་སྐྱོན་མེད་དོ། །ཞེས་གསུངས་པ་ལ། དེ་མི་རིགས་པར་ཐལ། སྲིད་པ་ལན་བདུན་པ་དང་རྒྱུད་གཅིག་ཏུ་གྱུར་བའི་སྲིད་པ་བདུན་པའི་རྟེན་ལ་མྱང་འདས་མ་ཐོབ་པའི་སྔར་བསད་པ་ཡོད་པའི་ཕྱིར། དེར་ཐལ། དགྲ་བཅོམ་པ་བསད་པའི་ཚད་མེད་པའི་ལས་ཡོད་པས་དེ་གཉིས་མཚུངས་པའི་ཕྱིར་ཟེར་ན་སྤྱིར་བཏང་དམིགས་བསལ་གྱི་ཁྱད་ཡོད་དམ་དཔྱད། ཡང་ཉ་ཊཱིཀ་ལས། ཁ་ཅིག་ལན་བདུན་པ་འདི་ཡང་ལན་བདུན་ལེན་པའི་ངེས་པ་མེད་ལ་གོང་འཕོ་གཉིས་ཡང་འོག་མིན་དང་སྲིད་རྩེར་འགྲོ་བའི་ངེས་པ་མེད་དེ། རྒྱལ་བུ་སྲས་སུ། གོང་དུ་འཕོ་བ་འོག་མིན་གྱི་མཐར་ཐུག་པར་འགྲོ་བ་དང༌། སྲིད་པའི་རྩེ་མོའི་མཐར་ཐུག་པར་འགྲོ་བ་ཡང༌། འོག་མིན་དང་སྲིད་པའི་རྩེ་མོར་མ་ཞུགས་པར་བར་སྐབས་སུ་མྱ་ངན་ལས་འདའ་བར་རུང་བར་བལྟ་སྟེ། ཞེས་དང༌། འོག་མིན་དང་སྲིད་པའི་རྩེ་མོའི་མཐར་ཐུག་པ་ཉིད་ནི་དེ་ཕན་ཆད་དུ་འགྲོ་བ་མེད་པའི་ཕྱིར་ཏེ། འོག་མིན་དང་སྲིད་པའི་རྩེ་མོ་ལས་གོང་དུ་འགྲོར་མེད་པའི་ཕྱིར་རོ། །དཔེར་ན། རྒྱུན་དུ་ཞུགས་པ་མཆོག་ཏུ་ཐོགས་ན་ལན་བདུན་པ་ཉིད་བཞིན་ཏེ། དེ་ལ་སྲིད་པ་གཉིས་སམ་གསུམ་མངོན་པར་གྲུབ་ནས་ཡོངས་སུ་མྱ་ངན་ལས་འདའ་བ་མི་སྲིད་པ་མ་ཡིན་མོད་ཀྱི་དེ་ཕན་ཆད་སྲིད་པ་བརྒྱད་པ་མངོན་པར་འགྲུབ་པར་མི་བྱེད་པས་མཆོག་ཏུ་ཐོགས་ན་ལན་བདུན་པ་ཞེས་བཤད་དོ་ཞེས་འབྱུང་ངོ་ཟེར་རོ། །དོན་མ་གོ་བ་སྟེ། ཕྱིར་མི་འོང་ལྔའི་ནང་གི་ལྔ་བ་གོང་འཕོ་དེ་འོག་མིན་སྲིད་རྩེའི་མཐར་ཐུག་པར་འགྲོ་ཞེས་པའི་དོན་ཡང་གོང་དུ་འཕོ་བའི་ཕྱིར་མི་འོང་དེ།དེ་གཉིས་གང་རུང་དུ་ངེས་པར་འགྲོ་མི་དགོས་དེ་ཚུན་ཆད་དུ་ཡང་འདར་རུང་ཡང་དེ་གཉིས་ཕན་ཆད་དུ་འགྲོར་མེད་པས་དེ་སྐད་བརྗོད་པ་སྟེ། དཔེར་ན་སྒོམ་སྤང་མ་སྤངས་པའི་རྒྱུན་ཞུགས་དེ་ཡང་ཐོགས་ན་སྲིད་པ་ལན་བདུན་ལེན་པར་བཤད་པ་བཞིན་ཏེ། སྒོམ་སྤང་མ་སྤངས་པའི་རྒྱུན་ཞུགས་དེ་ལ་སྲིད་པ་གཉིས་སམ་གསུམ་གྲུབ་ནས་ཀྱང་འདའ་བ་ཡོད་མོད་བརྒྱད་ཕན་མི་ལེན་པས་དེ་སྐད་བརྗོད་ཅེས་པ་སྟེ། གངས་ཅན་དུ་དོན་འདི་སྔར་ཤེས་པ་བྱུང་བ་མི་འདྲ་སྟེ་ཁོ་བོ་གཅིག་པུའོ། །ཞེས་གསུངས་པ་ལ། གོང་དུ་འཕོ་བ་འོག་མིན་གྱི་མཐར་ཐུག་པར་འགྲོ་བ་དང༌། སྲིད་པའི་རྩེ་མོའི་མཐར་ཐུག་པར་འགྲོ་བ་ཡང༌། འོག་མིན་དང་སྲིད་པའི་རྩེ་མོར་མ་ཞུགས་པར་བར་སྐབས་སུ་མྱ་ངན་ལས་འདའ་བར་རུང་བར་བལྟ་སྟེ། ཞེས་པས་འོག་མིན་དང་སྲིད་རྩེར་འགྲོ་གཉིས་ཁྱད་གཞི་བཟུང་ནས་གསུངས་པ་ཡིན་ནམ་མིན། ཡིན་ན་དེ་ལྟར་འགྲེལ་ཚུལ་མེད་དམ་ཅི། མ་ཡིན་ན་དེ་འདྲའི་འགྲེལ་ཚུལ་འབྲེལ་མེད་དུ་འགྱུར་རམ་དཔྱད། ཡང་གོང་དུ། རྒྱུན་དུ་ཞུགས་པ་མཆོག་ཏུ་ཐོགས་ན་ལན་བདུན་པ་ཉིད་བཞིན་ཏེ། དེ་ལ་སྲིད་པ་གཉིས་སམ་གསུམ་མངོན་པར་གྲུབ་ནས་ཡོངས་སུ་མྱ་ངན་ལས་འདའ་བ་མི་སྲིད་པ་མ་ཡིན་མོད་ཀྱི། ཞེས་པའི་དེ་སྒྲ་འཇུག་གཞི་གང་ཡིན་དང༌། མཛོད་རང་འགྲེལ་ལས། མཆོག་ཏུ་ཐོགས་ན་ལན་བདུན་པ་གཞན་ཡང་ཡོད་མོད་ཀྱི་མ་ངེས་པས་མི་བརྗོད། ཅེས་སོགས་ལ་དཔྱད་རྒྱུ་ཅུང་ཟད་སྣང་ངོ༌། །ཡང་ཉ་ཊཱིཀ་ལས། རིམ་གྱིས་པའི་རྒྱུན་ཞུགས་སྲིད་པ་ལན་བདུན་པའི་མཚན་ཉིད་ལ། འདོད་པར་ལྷ་མིའི་སྐྱེ་བ་བདུན་ནམ་བཅུ་བཞི་གང་རུང༌། ཞེས་གང་རུང་གསུངས་པའི་དགོས་པ་ལ་དཔྱད། ཡང་ཉ་ཊཱིཀ་ལས། ལམ་རིམ་གྱིས་པའི་རྒྱུན་ཞུགས་ཁྱད་པར་ཅན་རིགས་ནས་རིགས་སྐྱེའི་མཚན་ཉིད་ནི། ལམ་རིམ་གྱིས་པའི་རྒྱུན་ཞུགས་འབྲས་གནས་ཁྱད་པར་ཅན་གང་ཞིག འདོད་པའི་ལྷའམ་མི་གང་རུང་རེ་རེ་ཚེ་གཉིས་ཡན་མཐུད་ནས་ལེན་པ། ཞེས་དང༌། ཁ་ཅིག་འདི་དག་ཡང་གཉིས་ཡན་ལེན་པའི་ངེས་པ་མེད་དེ། རང་འགྲེལ་དུ། སྐྱེ་བ་ནི་གལ་ཏེ་གོང་མའི་སྐལ་བ་དང་ལྡན་པའི་ཕྱིར་ཆེས་ཉུང་ངུར་ཡང་འགྱུར་བས་དེའི་ཕྱིར་སྨོས་སོ། །ཞེས་པས་སོ་སྙམ་ན། མིན་ཏེ། ཞེས་ཚེ་གཉིས་ཡན་མཐུད་ནས་ལེན་གསུངས་པ་ལ་དཔྱད། ཡང་རིགས་ནས་རིགས་སྐྱེ་ལ་ཚེ་གཉིས་ལེན་མི་དགོས་པར་ཐལ། མདོ་ལུགས་མ་ལས། སྐྱེ་བ་ལས་ཚེ་གཅིག་གམ་གཉིས་ལུས་པའི་ཕྱིར་རོ། །ཞེས་གསུངས་སོ་ཞེ་ན་དཔྱད་དགོས་སོ། །ཡང་མཛོད་ལས། འདོད་པར་ཚེ་ཡོངས་གྱུར་པའི་འཕགས། །ཁམས་གཞན་དུ་ནི་འགྲོ་བ་མེད། །ཅེས་གསུངས་པ་ལ་འདོད་པར་ཚེ་ཡོངས་འགྱུར་གྱི་འཕགས་པ་ཁམས་གོང་མ་སྐྱེ་བ་ཡོད་པར་ཐལ། དེ་འདྲའི་འདོད་པར་ཚེ་ཡོངས་འགྱུར་འཕགས་པ་དེ་དགྲ་བཅོམ་མ་ཐོབ་གོང་དུ་བསད་པ་སོགས་མེད་པར་འགྱུར་ཕྱིར་དང༌། བརྒྱ་བྱིན་གྱིས་འདོད་པར་འཕགས་ཆོས་ལན་གཉིས་བརྟེན་ནས་ཁམས་གོང་མར་མྱང་འདས་ལ་ཐོབ་པ་སྨོན་ལམ་གནང་བའི་ཕྱིར་ཏེ། བརྒྱ་བྱིན་གྱི་མདོ་ལས། འདི་ནས་ཤི་འཕོས་མི་གྱུར་རྟེན་ལ་མི་འདའ་ཡིས། །བདག་ནི་ཐ་མར་ཉམས་ན་ལྷ་གང་འོག་མིན་ཞེས། །རྣམ་པར་གྲགས་པ་དེར་ནི་སྐྱེ་བར་འགྱུར་བར་ཤོག །བཅོམ་ལྡན་བདག་ནི་རྒྱུན་ཞུགས་བདེ་གཤེགས་རྒྱུན་ཞུགས་ཏེ། །ཞེས་གསུངས་པ་སོགས་ཀྱིས་དཔྱད་དོ། །ཡང་བརྒྱ་བྱིན་རྒྱུན་ཞུགས་ཡིན་ན་ཤེར་ཕྱིན་གྱི་མདོ་གསུངས་སྐབས་ཀྱི་འཁོར་ལ་ཀུན་དགའ་བོ་མ་གཏོགས་ཐམས་ཅད་དགྲ་བཅོམ་པ་ཤ་སྟག་ཡིན་པར་གསུངས་པ་འགལ་ལམ་ཅི། དེའི་ཚེ་དེའི་འཁོར་ན་བརྒྱ་བྱིན་ཡོད་དགོས་ཏེ། ཡུམ་མདོ་ན་བརྒྱ་བྱིན་གྱི་ལེའུ་ཡོད་པ་དང་བརྒྱ་བྱིན་དང་དྲི་བ་དྲིས་ལན་གྱིས་ཚུལ་དུ་གསུངས་པ་ཡོད་པས་སོ། །གཉིས་པ་འབྲས་བུ་རིམ་གྱིས་པའི་ཕྱིར་འོང་སྐོར་ལ། སྤྱི་དོན་དང་མཐའ་རགས་ཙམ་དཔྱད་པ་དང་གཉིས། དང་པོ་ནི། འབྲས་བུ་རིམ་གྱིས་པའི་ཕྱིར་འོང་ཞུགས་པའི་མཚན་ཉིད། ཕྱིར་འོང་ཞུགས་པ་གང་ཞིག འབྲས་བུ་བཞི་རིམ་གྱིས་ཐོབ་པའི་རིགས་ཅན་གྱི་དགེ་འདུན་དེ་ཡིན་ཏེ། ཉ་ཊཱིཀ་ལས། རྣམ་པ་ལྔ་ཡི་བར་བཅོམ་པ། །གཉིས་པ་ལ་ནི་ཞུགས་པའང་ཡིན། །ཞེས་པས་དེ་འདྲ་དེ་ཉིད་འབྲས་བུ་གཉིས་པ་ཕྱིར་འོང་ལ་ཞུགས་པའང་ཡིན་ལ་དྲུག་པ་སྤོང་བའི་བར་ཆད་མེད་ལམ་པའང་ཡིན་ནོ། །རིམ་གྱིས་པའི་ཕྱིར་འོང་ཞུགས་པའི་མཚན་ཉིད། ལམ་རིམ་གྱིས་པའི་རྒྱུན་ཞུགས་འབྲས་གནས་གང་ཞིག ཕྱིར་འོང་ཐོབ་ཕྱིར་བརྩོན་པ།ཞེས་གསུངས་སོ། །འབྲས་བུ་རིམ་གྱིས་པའི་ཕྱིར་འོང་འབྲས་གནས་ཀྱི་མཚན་ཉིད། ཕྱིར་འོང་འབྲས་གནས་གང་ཞིག འབྲས་བུ་བཞི་རིམ་གྱིས་ཐོབ་པའི་རིགས་ཅན་གྱི་དགེ་འདུན། མཚན་གཞི་ནི། རྒྱུན་ཞུགས་ཀྱིས་ཐོབ་པའི་ཕྱིར་འོང་འབྲས་གནས་ལྟ་བུའོ། ། དབྱེ་ན། རང་ཡིན་གྱི་འབྲས་གནས་ཙམ་པོ་བ་དང་ཁྱད་པར་ཅན་གཉིས་སོ། །དང་པོའི་མཚན་ཉིད།འབྲས་བུ་རིམ་གྱིས་པའི་ཕྱིར་འོང་འབྲས་གནས་གང་ཞིག ཕྱིར་མི་འོང་གི་འབྲས་བུ་ཐོབ་ཕྱིར་དུ་མི་བརྩོན་པའི་རབ་ཏུ་ཕྱེ་བས་དགེ་འདུན་ཡིན་ཏེ། ཉ་ཊཱིཀ་ལས། རྣམ་པ་དྲུག་པ་ཟད་གྱུར་པ། །དེ་ནི་ལན་ཅིག་ཕྱིར་འོང་བ། །ཞེས་ཏེ། འདོད་པའི་སྒོམ་སྤང་གི་ཉོན་མོངས་དྲུག་པ་སྤངས་ཤིང་དེ་ཡན་མ་སྤངས། སྤོང་བའི་སྦྱོར་བ་ལའང་མི་བརྩོན་པ་ཞིག་གོ །དེ་ལ་འདོད་པའི་ཉོན་མོངས་ཆུང་ངུ་གསུམ་ལུས་ཤིང་དེས་འདོད་པར་ལན་གཅིག་ལས་སྐྱེ་མི་སྲིད་པས་སོ། །དེ་ཡང་འདོད་ལྷར་ལན་གཅིག་སོང་ནས་མིར་ལན་གཅིག་འོང་སྟེ། སྐྱེ་བ་རིས་འདྲ་གཅིག་ལས་མི་ལེན་པས་ལན་ཅིག་ཕྱིར་འོང་དུ་བཞག་གོ །ཞེས་གསུངས་སོ། ། མཚན་གཞི་ནི། ཕྱིར་འོང་གི་འབྲས་བུ་ཐོབ་མ་ཐག་གི་འདོད་ཉོན་དྲུག་པ་སྤངས་པའི་རྣམ་གྲོལ་ལམ་ལ་གནས་པའི་གང་ཟག་ལྟ་བུའོ། །གཉིས་པ་འབྲས་བུ་རིམ་གྱིས་པའི་ཕྱིར་འོང་འབྲས་གནས་ཁྱད་པར་ཅན་གྱི་མཚན་ཉིད། འབྲས་བུ་རིམ་གྱིས་པའི་ཕྱིར་འོང་འབྲས་གནས་གང་ཞིག ཕྱིར་མི་འོང་གི་འབྲས་བུ་ཐོབ་ཕྱིར་དུ་བརྩོན་པའི་རབ་ཏུ་ཕྱེ་བའི་དགེ་འདུན། མཚན་གཞི་ནི། ཕྱིར་འོང་གི་འབྲས་བུ་ཐོབ་ནས་འདོད་ཉོན་བདུན་པའི་དངོས་གཉེན་ལ་གནས་པའི་འཕགས་པ་ལྟ་བུའོ། །དེ་ལ་དབྱེ་ན་ཕྱིར་འོང་ཚེ་གཅིག་བར་ཆད་གཅིག་པ་ཡིན་པ་དང་མིན་པ་གཉིས་སོ། །འདོད་པར་སྐྱེ་སྲིད་གཅིག་ལེན་ནས་རྟེན་དེ་ལ་མྱང་འདས་ཐོབ་པའི་འདོད་ཉོན་བདུན་ནམ་བརྒྱད་སྤངས་པའི་ཕྱིར་འོང་འབྲས་གནས་ཁྱད་པར་ཅན་གྱི་དགེ་འདུན་དེ། འབྲས་བུ་རིམ་གྱིས་པའི་ཕྱིར་འོང་ཚེ་གཅིག་བར་ཆད་གཅིག་པའི་མཚན་ཉིད་ཡིན་ཏེ། ཀུན་བཏུས་ས་འགྲེལ་ལས། བར་ཆད་གཅིག་པ་གང་ཞེ་ན། ལན་གཅིག་ཕྱིར་འོང་བའི་འབྲས་བུ་ལ་གནས་པ་ཉིད་འདོད་པའི་སྒོམ་སྤང་བདུན་ནམ་བརྒྱད་སྤངས་ཏེ་ཕྱིར་མི་འོང་འབྲས་བུ་ལ་རིམ་གྱིས་འཇུག་ཅིང༌། ཕྱི་མ་ལ་འདོད་པའི་ལྷ་རྣམས་ཀྱི་ནང་དུ་སྐྱེ་བ་གཅིག་བླངས་ནས་གང་སྡུག་བསྔལ་ཟད་པ་ཉིད་ཀྱི་ཐ་མ་མྱ་ངན་ལས་འདས་པ་ཐོབ་པར་བྱེད་པ་སྟེ། ཕྱིར་མི་འོང་འབྲས་གནས་ལ་ཉོན་མོངས་པ་གཅིག་གིས་བར་ཆོད་པས་སམ། དགྲ་བཅོམ་ཐོབ་པ་ལ་ཚེ་གཅིག་གིས་བར་ཆོད་པས་ན་བར་ཆད་གཅིག་པ་ཞེས་བྱའོ། །ཞེས་གསུངས་སོ། །དེ་ལ་རྒྱུ་མཚན་གསུམ་ཚང་དགོས་ཏེ། མདོ་ལུགས་མ་ལས། ཡང་ལན་གཅིག་ཕྱིར་འོང་བ་དེ་ཉིད་རྒྱུ་གསུམ་གྱིས་བར་ཆད་གཅིག་པ་ཡིན་ཏེ། ཉོན་མོངས་བདུན་ནས་བརྒྱད་སྤངས་པ་དང༌། དེའི་གཉེན་པོ་ཟག་མེད་ཀྱི་དབང་པོ་ཐོབ་པ་དང༌། ཚེ་གཅིག་ལུས་པའི་ཕྱིར་རོ། །དེ་ནི་འབྲས་བུ་གསུམ་པ་ལ་ཞུགས་པ་ཡང་ཡིན་ནོ། །ཇི་སྐད་དུ། ཉེས་ཆ་བདུན་དང་བརྒྱད་ཟད་པ། །ཚེ་གཅིག་བར་ཆད་གཅིག་པ་དང༌། །གསུམ་པ་ལ་ནི་ཞུགས་པའང་ཡིན། །ཞེས་གསུངས་པས་སོ། །