མདོས་དབོན་རྒན་གྱི་ཡང་སྤྲུལ་ཤེར་གྲགས།
མདོས་དབོན་རྒན་གྱི་ཡང་སྤྲུལ་ཤེར་གྲགས་ནི།
ཡབ་རྨང་དགེ་བསོ་གཅེས་དང་ཡུམ་རྟུག་རྒྱ་བཟའ་ཨ་སྒྲོན་གཉིས་ཀྱི་སྲས་སུ་རབ་རྒྱལ་ས་སྟག་ལ་འཁྲུངས། མདོས་དབོན་སངས་རྒྱས་རྡོ་རྗེ་དང་བླ་མ་དམ་པ་བཤད་སྒྲུབ་དཔལ་རྣམ་གཉིས་ཀྱི་དྲུང་ནས་སྦྱོར་བ་ཡན་ལག་དྲུག་ལ་ཉམས་ལེན་གནད་ཁེལ་མཛད་ཀྱང་དུས་ཀྱི་འགྱུར་ལྡོག་གི་དབང་གིས་སྐུ་ཚེ་མཐའ་མ་འཁྱོལ་བས་སོ། ། མཐུ་སྟོབས་ནུས་པའི་མངའ་བདག་སྤྲུལ་སྐུ་བྱང་ཆུབ་དཔལ་ནི། རབ་རྒྱལ་མེ་གླང་ལ་འཁྲུངས། བླ་མ་དམ་པ་སངས་རྒྱས་རྡོ་རྗེ་ལས་ཟབ་ཆོས་རྣལ་འབྱོར་ཡན་ལག་དྲུག་གི་ཆོས་བཀའ་མཐའ་དག་ལེགས་པར་ཐུགས་ཉམས་སུ་བསྟར་བས་ཉམས་དང་རྟོགས་པའི་རྩལ་རྫོགས་ཤིང༌། ཀུན་གྱི་ནུས་མཐུ་ཆེ་བའི་ཚད་དུ་བརྩིས། རབ་རྒྱལ་ལྕགས་སྤྲེལ་ལོར་དགོན་པའི་གཙོ་འགན་བཞེས་ཏེ་བླ་མ་དམ་པ་བཤད་སྒྲུབ་དཔལ་གྱི་སྐུ་གདུང་ལྷ་ཁང་དང་བཅས་པ་བཞེངས། སྒྲོལ་མའི་མཆོད་རྟེན་སོགས་རྟེན་བཞེངས་གཞན་རྣམས་ཀྱི་འགོ་འཛིན་ཀྱང་མཛད། རབ་གནས་ལྕགས་སྟག་ལ་གཤེགས་སོ །