གཉིས་པ་བླ་མའི་ཐུན་མོང་མ་ཡིན་པའི་མཚན་ཉིད།

གཉིས་པ་བླ་མའི་ཐུན་མོང་མ་ཡིན་པའི་མཚན་ཉིད་ནི།

སྔགས་དང་རྒྱུད་ཀྱི་སྦྱོར་བ་ཤེས། །སྙིང་བརྩེར་ལྡན་ཞིང་བསྟན་བཅོས་མཁས། །དེ་ཉིད་བཅུ་ནི་ཡོངས་སུ་ཤེས། །དཀྱིལ་འཁོར་འབྲི་བའི་ལས་ལ་མཁས། །སྔགས་བཤད་པ་ཡི་སྦྱོར་བ་ཤེས། །རབ་ཏུ་ཞི་ཞིང་དབང་པོ་དུལ། །ཞེས་རྩ་བའི་སྔ༷གས་ད༷ང་སྙིང་པོ་དང་ཉེ་སྙིང་དང་ལས་སྒྲུབ་པའི་སྔགས། དེ་དག་ཇི་ལྟར་སྒྲུབ་པའི་ཆོ་གའི་མངོན་པར་རྟོགས་པ་རྒྱུ༷ད་ནས་གསུངས་པ་རྣམས་ཀྱི༷་མན་ངག་གི་སྦྱོ༷ར་བ༷ས་མ་ནོར་བར་ཉམས་སུ་ལེན་ཤེ༷ས་པ།སྙིང་རྗེ་ནི་སྔར་བཤད་པ་ལྟར་ལས། སློབ་དཔོན་གྱི་ཐུན་མོང་མ་ཡིན་པའི་ཡོན་ཏན་ཡིན་པས། སྔ་མ་ལས་ཁྱད་པར་དུ་འཕགས་པ་རིགས་སུ་མ་ཆད་པ་ཅིག་དགོས་པའི་དོན་ཡིན་ལ། སྔ་ཕྱི་གཅིག་ཏུ་བཟློས་པ་ལྟ་བུ་ནི་རྒྱུད་སོ་སོ་ནས་བཤད་པའི་དོན་ཚན་བསྡུས་པའི་སྟོབས་ཀྱིས་ཡིན་ནོ། །གཞན་ལ་སྙི༷ང་བརྩེ༷ར་ལྡ༷ན་ཞི༷ང༌། བསྟ༷ན་བཅོ༷ས་ནི་ནང་རིག་གི་གནས་ལྔའི་གཞུང་ལུགས་རྣམས་ཡིན་ལ་དེ་རྣམས་ལ་མཁ༷ས་པ་དང༌། དེ་ཉིད་བཅུ་ནི་ཕྱི་ནང་གསང་བའི་དེ་ཉིད་བཅུ་ཡོད་པ་ལས། རབ་གནས་ཀྱི་རྒྱུད་དུ། ༼མདུན་སྐྱེད་༽དཀྱིལ་འཁོར་དང་ནི་༼བདག་སྐྱེད་༽ཏིང་འཛིན་མཆོག།༼དེ་དག་ལ་རྒྱས་འདེབས་པའི་ལས་ཀྱི་ཕྱག་རྒྱ་སོགས་༽ཕྱག་རྒྱ་སྟངས་སྟབས་གདན་༼དཀྱིལ་ཀྲུང་ལ་སོགས་པ་༽དང་ནི།།༼བསྙེན་པ་སོགས་༽བཟླས་བརྗོད་སྦྱིན་སྲེག་གཏོར་མ་དང། །༼སྡིག་པ་ཞི་བ་སོགས་༽ལས་ལ་སྦྱར་དང་༼གཤེགས་སུ་གསོལ་པ་སོགས་༽སླར་བསྡུ་བའོ། །རྒྱུད་སྡེ་འོག་མ་དང་ཐུན་མོང་ཕྱིའི་དེ་ཉིད་བཅུ། རྡོ་རྗེ་སྙིང་པོ་རྒྱན་གྱི་རྒྱུད་ལས། ཕྱིར་ཟློག་གཉིས་ཀྱི་ཆོ་ག་དང། །གསང་དང་ཤེས་རབ་ཡེ་ཤེས་༼དབང་བསྐུར་བ་༽དང། །༼ཡེ་ཤེས་པ་གཤེགས་སུ་གསོལ་༽ཁ་སྦྱོར་འབྱེད་པའི་ཆོ་ག་དང༌། །༼འཇིག་རྟེན་དང་འཇིག་རྟེན་ལས་འདས་པའི་༽གཏོར་མ་རྡོ་རྗེའི་བཟླས་པ་དང༌། །དྲག་ཤུལ་སྒྲུབ་པའི་ཆོ་ག་དང༌། །རབ་ཏུ་གནས་དང་༼ཕྱི་དང་ལུས་ཀྱི་༽དཀྱིལ་འཁོར་སྒྲུབ། །གསང་བའི་དེ་ཉིད་བཅུ་ཡིན་ནོ། །ཞེས་བླ་མེད་ནས་བཤད་པའི་ནང་ངམ་གསང་བའི་དེ༷་ཉི༷ད་བཅུ༷་འདི་རྣམས་ནི༷་མ་ཚང་བ་མེད་པ་ཡོ༷ངས་སུ༷་རྫོགས་པར་ཤེ༷ས་པ། དཀྱི༷ལ་འཁོ༷ར་ཐིག་གིས་བྲི་བ་དང་མཚོན་གྱིས་བྲི༷་བ༷འི་ལ༷ས་ལ༷་མཁ༷ས་པ། གསང་སྔ༷གས་ཀྱི་གཞུང་རྒྱུད་ཀྱི་ཚིག་དོན་གཞན་ལ་བཤ༷ད་པ༷་ཡི༷་ཚིག་སྦྱོ༷ར་བ་ལེགས་པར་ཤེ༷ས་པའི་སློབ་དཔོན་གྱི་འོས་སུ་གྱུར་པ་ནི་སྒོ་གསུམ་གྱི་ཉེས་པ་ཐམས་ཅད་སྤངས་ཞིང་སྐྱོན་དང་མ་འདྲེས་པས་ར༷བ་ཏུ༷་ད༷ང་ཞི༷ང་སླར་ཉེས་སྤྱོད་ཕྲ་མོ་ལ་ཡང་མི་འཇུག་པར་དབ༷ང་པོ༷་བསྡམས་ཏེ་དུ༷ལ་བར་གནས་པ་སྟེ། མཚན་ཉིད་ཐུན་མོང་མ་ཡིན་པ་བདུན་པོ་འདི་དག་དང༌། སྔར་སློབ་མ་དང་ཐུན་མོང་གི་མཚན་ཉིད་དྲུག་དང་བཅས་བཅུ་གསུམ་པོ་ཐམས་ཅད་ཚང་བ་ནི་བླ་མར་བྱ་བ་ཡིན་ལ། དེ་དག་ཐམས་ཅད་ཚང་བ་མ་རྙེད་ན་དཔལ་དོན་དམ་པའི་བསྙེན་པ་ལས། རྩོད་ལྡན་དབང་གིས་བླ་མ་སྐྱོན་དང་ཡོན་ཏན་འདྲེས། །རྣམ་པ་ཀུན་ཏུ་སྡིག་པ་མེད་པ་ཡོད་མ་ཡིན། །གང་ཞིག་ཡོན་ཏན་ལྷག་པ་ཡང་ནི་ལེགས་དཔྱད་ནས། །བུ་རྣམས་ཀྱིས་ནི་དེ་ལ་བསྟེན་པར་གྱུར་བའོ། །ཞེས་གསུངས་པ་ལྟར་ཡོན་ཏན་རྣམས་ཤས་ཆེ་བར་ཚང་བ་དང༌། གཙོ་ཆེ་བའི་ཡོན་ཏན་རྣམས་དང་ལྡན་ན་སྐྱོན་དུ་བཤད་པ་རྣམས་ལས་འགའ་ཞིག་ཡོད་ཀྱང་རང་ལ་ཕན་ཐོགས་ན་བསྟེན་པར་བྱ་བ་ཡིན་ཞིང༌། སྐྱོན་ཡོན་མཉམ་པ་ཡང་དེ་བཞིན་དུ་བསྟེན་པ་ཡིན་ལ། སྐྱོན་དེ་དག་ཤས་ཆེ་ཞིང་ཡོན་ཏན་གྱི་གཙོ་བོ་རྣམས་མེད་པ་ནི་སྤང་བར་བྱ་བ་ཡིན་ནོ། །དེ་ལྟར་ལྷན་ཐབས་ལས། དེ་ལྟར་སློབ་མ་དང་བླ་མའི་མཚན་ཉིད་རགས་པ་བསྟན་ཟིན་ནས། དུས་ཀྱི་སྐྱོན་གྱིས་སྐྱོན་ཀུན་སྤངས་ཡོན་ཏན་ཀུན་རྫོགས་ཚང་བའི་སློབ་དཔོན་རང་ཡང་རྙེད་དཀའ་བ་དང༌། རྙེད་དུ་ཟིན་ཀྱང་རང་གི་བློ་མ་དག་ན་ཡོན་ཏན་དང་ལྡན་པ་ལ་ཡོན་ཏན་ཡོད་པར་མི་མཐོང༌། སྐྱོན་མེད་པ་ལ་སྐྱོན་དུ་མཐོང༌། སྐྱོན་ཡིན་པ་སྐྱོན་དུ་མི་མཐོང༌། ཡོན་ཏན་མ་ཡིན་པ་ཡོན་ཏན་དུ་མཐོང༌། ཡོན་ཏན་མེད་ཅིང་སྐྱོན་དང་ལྡན་པ་རྣམས་སྐྱེས་བུ་མཆོག་ཏུ་མཐོང་བར་འགྱུར་ཏེ། སྐྱེ་བ་སྔ་མར་ལས་ངན་བསགས་ཤིང་སྐལ་བ་དམན་པའི་དབང་གིས་སོ། །དེ་ལྟར་ཡང༌། མཁས་རྣམས་ཡོན་ཏན་ལ་གུས་ཀྱི། །སངས་རྒྱས་དབང་ཕྱུག་སོགས་ལ་མིན། །ཡོན་ཏན་མེད་ལ་གང་གུས་པ། །དེ་བླུན་མི་དགེའི་ལས་ལས་སྐྱེས། །ཞེས་གསུངས། ཡོན་ཏན་རྫོགས་པ་མ་རྙེད་ན། གོང་དུ་སྨོས་པ་ལྟར་མེད་མི་རུང་གི་མཚན་ཉིད་ཚང་བ་འཚོལ་དགོས། ཞེས་གསུངས་པ་ལྟར་སྙིགས་དུས་འདིར་བླ་སློབ་གཉིས་ཀའི་ངོས་ནས་མཚན་ཉིད་ཡོངས་སུ་ཚང་བ་དཀའ་ལ། དེར་མ་ཟད་བླ་མ་ཡོན་ཏན་ཀུན་རྫོགས་ཡིན་ཡང་ལས་སྣང་མ་དག་པའི་དབང་གིས་སྐྱོན་ཀུན་ཟད་དང་ཡོན་ཏན་ཀུན་ལྡན་མཐོང་དཀའ་སྟེ། འཕགས་པ་ཐོགས་མེད་ཀྱིས་རྗེ་བཙུན་བྱམས་པ་མགོན་པོ་ལོ་བཅུ་གཉིས་སུ་བསྒྲུབས་ནས་ཁྱི་མོ་སྨད་ཁོག་འབུས་གཞིག་པའི་རྣམ་པ་ལས་མ་མཐོང་བའི་ཚུལ་མཛད་པའི་དགོས་དོན་གྲུབ་པའི་ཕྱིར་རོ། །