བཞི་པ་བཀོལ་བ་སྦྱར་མི་སྦྱར་གྱི་འཐད་པ།

བཞི་པ་བཀོལ་བ་སྦྱར་མི་སྦྱར་གྱི་འཐད་པ་ནི།

བར་ཆད་རྣམས་ལ་མུ་གསུམ་ཡོད་པ་ལས། རབ་ཏུ་འབྱུང་བ་དང་བསྙེན་པར་རྫོགས་པ་གཉིས་ཀའི་བར་ཆད་ཐུན་མོང་ཡིན་ལ་དྲི་བ་ཡང་ཐུན་མོང་ཡིན་པའི་མུ་ནི་མ་བསད་པ་ལྟ་བུའོ། །བར་ཆད་ཀྱང་ཐུན་མོང་མ་ཡིན་ལ་དྲི་བ་ཡང་ཐུན་མོང་མ་ཡིན་པའི་མུ་ནི་ལོ་ཉི་ཤུ་མ་ལོན་པ་ལྟ་བུའོ། །བར་ཆད་ཐུན་མོང་ཡིན་ཡང་དྲི་བ་ཐུན་མོང་མ་ཡིན་པའི་མུ་ནི་ལག་རྡུམ་ལ་སོགས་པའོ། །རབ་བྱུང་གི་ཚེ་ལག་རྡུམ་མ་ཡིན་ནམ་ཞེས་དྲི་དགོས་ལ་བསྙེན་རྫོགས་ཀྱི་ཚེ་མི་དགོས་སོ། ། དེ་ལྟར་མུ་གསུམ་ལས། དང་པོ་ལ་ནི། གཞུང་དུ་བཀོལ་བ་སྦྱར་བ་འདི་རིགས་པས་འཐད་དེ། མིང་ཅན་དྲུག་ལ་ལྟོས་པའི་ཚིག་ཚོགས་བསྐྱུང་བའི་དགོས་པ་ཡོད་པའི་ཕྱིར་རོ། །མུ་གཉིས་པ་དང་གསུམ་པ་ལ་ནི། གཞུང་དུ་བཀོལ་པ་མ་སྦྱར་བ་འདི་རིགས་པས་འཐད་དེ། བཀོལ་བའི་མིང་ཅན་དྲུག་མ་ཚང་བའི་ཕྱིར་རོ། །ལྔ་པ་བཀོལ་བའི་སྒྲ་བཤད་པ་ནི། མདོ་སྔ་མ་ལས་མུ་སྟེགས་ཅན་ཞེས་པ་དེ་ལོགས་ཤིག་ཏུ་བཀོལ་ཞིང༌། མདོ་ཕྱི་མ་ལས་ཤཱཀྱ་དང་མེ་པ་རལ་པ་ཅན་དང་སེམས་མགུ་བར་མ་གྱུར་པའི་མུ་སྟེགས་ཅན་དང་གསུམ་བཀོལ་ཏེ། མུ་སྟེགས་ཅན་ལ་སོགས་པ་བཞི་པོ་དེ་དག་ལོགས་ཤིག་ཏུ་བཀོལ་བའི་ལྷག་མ་ཉིད་ཡིན་པས་ན་བཀོལ་བ་ཞེས་བྱ་སྟེ། ཊཱི་ཀ་ལས། མུ་སྟེགས་ཅན་ཞེས་བྱ་བའི་སྒྲ་དེ་དག་བཀོལ་བའི་ལྷག་མ་ནི་བཀོལ་བ་ཞེས་བྱ། ཞེས་སོ། །རྩ་བར། ལས་ཀྱིས་གནས་པ་བྱིན་ལ་ཞེས་པ་འདིའི་དོན་ལ་ལྔ་ལས། དང་པོ་དགོས་པའི་དོན་ནི། དངོས་ཀྱི་དགོས་པ་དགེ་འདུན་རྣམས་ཐུགས་མཐུན་པར་འགྱུར་བ་དང༌། བརྒྱུད་པའི་དགོས་པ་སེམས་མགུ་བ་དེ་བརྟན་མི་བརྟན་རྟོགས་པའོ། །གཉིས་པ་ཡུལ་གང་ལ་སྦྱིན་པ་ནི་ཆོས་བཅུ་ལྡན་ཏེ། སྔོན་མུ་སྟེགས་ཅན་ཡིན་པ་དང༌།ཤཱཀྱ་དང་མེ་པ་རལ་པ་ཅན་མ་ཡིན་པ་དང༌། སེམས་མགུ་བ་ཡིན་པ་དང༌། ད་ལྟ་དགེ་བསྙེན་ཉིད་ཡིན་པ་དང༌། རབ་ཏུ་འབྱུང་བར་འདོད་པ་དང༌། །ཚོགས་སུ་མ་ལོངས་པ་དང༌། རང་གིས་ལན་གསུམ་གསོལ་བ་འདེབས་པ་དང༌། སྔར་ལས་ཀྱིས་གནས་པ་བྱིན་པ་ད་ལྟར་གྱི་གནས་པ་བྱིན་པ་དང་མ་འབྲེལ་བ་དང༌། ཐ་སྙད་དང་ལྡན་པ་དང༌། ལུས་ཐ་མལ་པར་གནས་པའོ། །

གསུམ་པ་རྟེན་གང་གིས་སྦྱིན་པ་ནི།

དགེ་འདུན་མཚན་ཉིད་བཞི་ལྡན་གྱིས་ཏེ། བཞི་ཡན་ཆད་ཀྱི་གྲངས་ཚང་བ་དང༌། ལས་ཀྱི་ཁ་སྐོང་བར་འོས་པ་དང༌། མི་མཐུན་པ་གཉིས་ཀྱིས་མི་མཐུན་པ་མེད་པ་དང༌། ལས་བྱེད་པ་པོ་རང་མཚན་པ་དང་བཅས་པའོ། །