རྒྱལ་དབང་ཨོ་རྒྱན་ཆེན་པོར་བསྟོད་པའི་ཀ་ཕྲེང་ཕན་བདེའི་དཔལ་སྟེར།
༄༅། རྒྱལ་དབང་ཨོ་རྒྱན་ཆེན་པོར་བསྟོད་པའི་ཀ་ཕྲེང་ཕན་བདེའི་དཔལ་སྟེར་ཞེས་བྱ་བ་བཞུགས།
ཀ་དག་རང་བྱུང་གདོད་མའི་མགོན་པོ་སིནྡྷུའི་དྭངས་མཚོར་པད་སྡོང་རྩེར། །ཁ་བ་ཅན་སོགས་གདུལ་དཀའི་འགྲོ་བ་ཐབས་ཀྱི་མཛད་པས་འདུལ་བའི་ཕྱིར། །ག་དར་སྤྲུལ་པའི་ཟློས་གར་བསྒྱུར་བ་རང་བྱུང་ལྷུན་གྲུབ་རྡོ་རྗེའི་སྐུ། །ང་ཅག་རྗེས་འཇུག་ལྷག་པའི་ལྷ་མཆོག་མཚོ་སྐྱེས་བླ་མར་སྙིང་ནས་འདུད། །ཅ་རེ་མིག་གིས་མཐོང་བའི་ཡུལ་མིན་རྔ་ཡབ་ཟངས་མདོག་དཔལ་གྱི་རིར། །ཆ་ལུགས་རྫུ་འཕྲུལ་ཅིར་ཡང་བསྒྱུར་བའི་རིག་འཛིན་དཔའ་བོ་དཔའ་མོའི་ཚོགས། །ཇ་རིལ་རུས་རྒྱན་སིལ་ཁྲོལ་གཡོ་ཞིང་བདེ་སྟོང་རོ་བརྒྱའི་ལང་ཚོས་སྒེག །ཉ་ཟླ་བྱེ་བའི་གཟི་མདངས་འཕྲོག་མཛད་བརྟུལ་ཞུགས་རྡོ་རྗེའི་གར་ལ་འདུད། །ཏ་ན་ག་ནའི་དགོངས་སྤྱོད་ཟབ་མོས་འབྲེལ་ཚད་རིག་འཛིན་ས་ལ་སྦྱོར། །ཐ་མལ་འགྲོ་བའི་མོས་ངོ་རྣམས་སུ་སྤྲུལ་པ་ཡང་སྤྲུལ་དེར་སྣང་སྟོན། །ད་ལྟའི་དུས་འདིར་ཉིད་ཀྱི་ཐུགས་རྗེ་བྱིན་རླབས་དེ་ནི་ལྷག་པར་མྱུར། །ན་རཀ་ངན་སོང་སྡུག་བསྔལ་ལ་སོགས་འགྲོ་བའི་གདུང་སེལ་ཁྱེད་ལ་འདུད། །པ་པཾ་མི་དགེའི་ལས་ཀྱི་མཐུས་ནོན་སྣང་ཞིང་སྲིད་པའི་ལྷ་མ་སྲིན། །ཕ་རོལ་རྒོལ་བ་ལྷག་མེད་གཞིལ་ནས་བསྟན་དང་འགྲོ་བའི་བདེ་སྐྱིད་ནི། །བ་དན་དཀར་པོ་མཁའ་ལ་སྒྲེང་བཞིན་ལྷུན་པོའི་སྤོ་ལ་ངོམ་མཛད་པ། །མ་བཅོས་རང་བྱུང་པདྨ་རྒྱལ་པོའི་གསང་གསུམ་ཡོན་ཏན་དེ་ལ་འདུད། །ཙ་རི་ཏྲ་སོགས་སྒྲུབ་གནས་དབེན་གནས་ཟབ་མོའི་གཏེར་ཁ་བྱེ་བས་བཀང་། །ཚ་ཟེར་འོད་སྣང་སྤྲོ་བསྡུ་ཇི་བཞིན་སྤྲུལ་པ་དུ་མས་ཟབ་ཁྱད་འདོན། །ཛ་ཡ་ཐུབ་དབང་བསྟན་པ་དང་ནི་འཛམ་གླིང་འགྲོ་བ་སྐྱོབ་པའི་ཕྱིར། །ཝ་སྤྱང་ཚོགས་རྣམས་གདོང་ལྔས་མཐར་བཞིན་ཤ་ཟ་སྲིན་པོ་འདུལ་ལ་འདུད། །ཞ་ལོང་ལ་སོགས་རྐྱེན་གྱིས་གདུང་བའི་འཇིགས་པ་མ་ལུས་སེལ་བར་མཛད། །ཟ་བྱེད་དྲེགས་པའི་སྡེ་ཚོགས་འདུལ་ལ་ལྷ་ཁྱོད་མཐུ་སྟོབས་རྨད་དུ་བྱུང་། །
འ་འུར 
་རྒྱུན་དུ་གསོལ་འདེབས་བུ་ལ་གཡེལ་མེད་ཐུགས་བརྩེས་ཉེ་བར་དགོངས། །ཡ་མཚན་ཆེ་བའི་མ་ཧཱ་གུ་རུ་པདྨ་ཐོད་ཕྲེང་རྩལ་ལ་འདུད། །ར་བའི་ལྗོངས་འདིའི་སྐལ་བཟང་སྐྱེས་བུ་ལས་དང་སྨོན་ལམ་ལྡན་པ་རྣམས། །ལྭ་དཀར་རས་རྐྱང་གོས་ཀྱིས་འཚོ་བའི་གཏུམ་མོའི་འོད་གསལ་ལ་བརྟེན་ནས། །ཤ་ཁྲག་གདོས་བཅས་ཚེ་ལུས་གཅིག་ལ་འོད་སྐུར་དེངས་བའི་ཐབས་མཆོག་ལམ། །ས་སྟེང་བསྟན་འགྲོར་ཐུན་མོང་མ་ཡིན་ཐུན་མིན་སྟོན་མཛད་དེ་ལ་འདུད། །ཧི་མ་ལ་དང་ཚནྡྷོ་ཧ་སོགས་ཉེ་དང་འདུ་བའི་ཉེ་གནས་སུ། །ཧེ་རུ་ཀ་པའི་བརྟུལ་ཞུགས་སྤྱོད་པའི་རིག་འཛིན་རྒྱ་མཚོའི་སྤྲོ་གཞི་ཆེ། །ཨུ་མ་དེ་ཝ་གཙོ་འཁོར་ལ་སོགས་མཁའ་འགྲོ་བྱེ་བའི་ཚོགས་དཔོན་མཆོག །ཨོ་ཊི་ཡ་ན་རང་བྱུང་རྡོ་རྗེ་གར་གྱི་དབང་ཕྱུག་དེ་ལ་འདུད།། ཅེས་པའང་ཙི་ནའི་སྤྲུལ་མིང་པས་སོ།།