ཟིལ་ཁྲོམ་གསང་ཡུམ།
ཟིལ་ཁྲོམ་གསང་ཡུམ་ཐབས་བཞུགས། ཧཱུྃ། རིག་འཛིན་རྡོ་རྗེ་ཐོད་ཕྲེང་གི། །དམ་ཚིག་ཕྱག་རྒྱ་མི་འདོར་བའི། །སྨན་བཙུན་རྒོད་ལྕམ་ཤེལ་རུ་སྨན། །འཁོར་དང་བཅས་པ་མྱུར་དུ་བྱོན། །རོ་བཅུད་དཔལ་གྱི་གཏོར་མ་ཟངས་སེ་ཟང་། །ཇ་ཆང་འོ་སྐོལ་བཏུང་བ་མེ་རེ་རེ། །བཟང་ཤིང་དྲི་ཞིམ་ངད་པ་ཆི་ལི་ལི། །སྔགས་དང་ཕྱག་རྒྱས་བྱིན་གྱིས་རླབས་ནས་ཀྱང་། །སྨན་བཙུན་ཆེན་མོ་འཁོར་དང་བཅས་ལ་འབུལ། །དགྱེས་བར་བཞེས་ནས་བསྟན་པ་སྲུང་དུ་གསོལ། ཀྱེ། སྨན་བཙུན་ཆེན་མོ་ཟིལ་ཁྲོམ་གསང་བའི་ཡུམ། །ཟླ་ལྟར་དཀར་བའི་ཞལ་མདངས་ཡ་ལ་ལ། །དེ་ལ་མཛེས་འཛུམ་དགའ་༢བའི་རྣམ་འགྱུར་ཅན། །དམར་སེར་མཐིང་ཁའི་ན་བཟའ་ལྷུབས་སེ་ལྷུབ། །དེ་ལ་རིན་ཆེན་གསེར་གྱི་རི་མོ་བཀྲ། །འགྱིང་ལ་ལྡེམ་ཆགས་འོང་དུ་སྤུངས་སེ་སྤུང་། །དེ་ལ་རིན་ཆེན་རྣམ་མང་རྒྱན་ཆ་ཅན། །ཕྱག་ན་འདོད་འབྱུང་རིན་ཆེན་ཟས་གཞོང་བསྣམས། །ཤིན་ཏུ་ཉེ་བའི་བྱན་མོ་གཉིས་དང་ལྡན། །སྐུ་མདོག་དམར་མཐིང་རྒྱན་ཆས་གཙོ་དང་མཚུངས། །ཡུལ་ལྷ་སྨན་མོ་ཀླུ་གཉན་ཚོགས་ཀྱིས་བསྐོར། །ཨོ་རྒྱན་རྗེ་དང་རྣལ་འབྱོར་ནུས་ལྡན་པ། །པདྨ་ཀུན་གྲོལ་རྣམ་རྒྱལ་བཀའ་བསྒོས་བཞིན། །རུ་དམ་དབལ་གྱི་གཙུག་ལགས་ཁངས་ཆེན་པོ། །བསྟན་དང་བསྟན་འཛིན་སྲུང་སྐྱོབ་མེལ་ཚེ་མཛོད། །བོད་དང་བོད་ཆེན་ལྗོངས་སུ་ཡོངས་གྲགས་པའི། །མཚན་སྙན་བ་དན་འཛིན་པའི་རྫོགས་ཆེན་པའི། །སྐུ་ཚེ་བརྟེན་ཅིང་ཕྲིན་ལས་རྒྱས་པར་མཛོད། །ཕྱི་ཡི་ཕྱུགས་འཚོས་ནང་གི་དཀོར་མཛོད་སྤེལ། །ཕྱོགས་བཅུའི་ཕྱ་གཡང་དཔལ་འབྱོར་ཐམས་ཅད་བསྡུས། །སྟོབས་འབྱོར་མངའ་ཐང་རྒྱས་པའི་ཕྲིན་ལས་འཛོད། །ཧཱུྃ་ཛ་མུ་ཏིག་ཤེལ་དུ་སྨན་བཙུན་ཆེན་མོ་དམ་ལ་ཤོག །བཛྲ་ས་མ་ཛཿ ཨེ་དམ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། །སྐྱབས་མགོན་རིན་པོ་ཆེ་ཁམས་པ་བརྫོགས་ཆེན་བ་གསུམ་པས་སྨན་བཙུན་ཆེན་མོའི་གསོལ་མཆོད་ཉུང་བསྡུས་དགོས་གསུང་བ་ལྟར་ལས་རབ་རྩལ་གྱིས་སྦྱར་བའོ།། །།དགེའོ།། མངྒ་ལཾ།