ཤར་ཚུལ་དངོས།
ཤར་ཚུལ་དངོས་ནི། རིག་པའི་རྩལ་ཡེ་ཤེས་ལྔར་ཤར། དེའི་རྩལ་ལས་འོད་
ཟེར་ལྔ་ལས་འབྱུང་བ་ལྔར་ཤར། དེའི་རྩལ་ལས་སྣོད་ཀྱི་འབྱུང་གཟུགས་སུ་ཤར། དེའི་རྩལ་ལས་སོ་སོའི་མེ་ཏོག་ལེགས་པར་ཤར་། ཐིག་ལེ་འོད་ལྔ་ལས་ལུས་ཀྱི་འབྱུང་ལྔ་རྩལ་དུ་ཤར། དེ་ལས་ཕུང་པོ་ཁམས་དང་སྐྱེ་མཆེད་ལ་སོགས་པར་བཤད་དོ། །ཡང་རྟོགས་པས་མྱང་འདས་ཀྱི་རྩལ། སྐུ་ལྔ་ཡེ་ཤེས་ལྔ་ཕྲིན་ལས་དང་བཅས་པར་ཤར་ཏེ། ཡོན་ཏན་མ་འགགས་པར་རང་བྱུང་བ་ནི། དེ་ཉིད་ལས། ངས་བསྟན་རྒྱུད་ལུང་ཐམས་ཅད་དུ། །རྩལ་ཞེས་བྱུང་ན་འདི་སྐད་བཤད། །རིག་པའི་རྩལ་ནི་ཡེ་ཤེས་ལྔ། །དེ་ཡི་རྩལ་ནི་འོད་ཟེར་ལྔ། །འོད་ལྔའི་རྩལ་ནི་འབྱུང་བ་ལྔ། །འབྱུང་ལྔའི་རྩལ་ནི་སོ་སོར་ཤར། །ནམ་མཁའི་རྩལ་དུ་སྤྲིན་དང་རླུང་། །ཡངས་དང་སྐབས་དབྱེ་དེ་བཞིན་ནོ། །རླུང་གི་རྩལ་དུ་འུར་སྒྲ་དང་། །ཡང་དང་བསྐྱོད་པ་དེ་བཞིན་ནོ། །ཆུ་ཡི་རྩལ་དུ་ཤྭ་སྒྲ་དང་། །རླན་ཞིང་བསྡུད་པ་དེ་བཞིན་ནོ། །ས་ཡི་རྩལ་དུ་གཟུགས་རྣམས་སྣང་། །སྲ་དང་བརྟན་པ་དེ་བཞིན་ནོ། །མེ་ཡི་རྩལ་དུ་ཚ་ཞིང་བསྲེག །སྨིན་ཞིང་རྫོགས་པ་དེ་འདྲ་འོ། །འབྱུང་བ་འདུས་པའི་རང་རྩལ་དུ། །རྩི་ཤིང་ནགས་ཚལ་སྨན་སྤོས་དང་། །མེ་ཏོག་ལོ་ཏོག་འབྲས་བུར་སྣང་། །འོད་ལྔའི་རྩལ་དུ་ཕྱི་ལྟར་ཤར། །ཐིག་ལེའི་རྩལ་དུ་ནང་ལྟར་བསྟན། །དཀར་པོ་དག་ལས་ཤ་རུས་སྣང་། །སེར་པོ་དག་ལས་ཆུ་སེར་སྣང་། །དམར་པོ་དྲོད་དུ་དེ་བཞིན་སྣང་། །ལྗང་གུ་དབུགས་སུ་སྣང་བ་ཡིན། །མཐིང་ཁ་ལུས་ཀྱི་གོ་སྐབས་ཀྱི། །གཟུགས་ཀྱི་ཕུང་པོ་དེ་བཞིན་སྣང་། །དེ་ནི་རྩལ་དུ་སྣང་བ་ཡིན། །
ཕུང་པོ་ལྔ་དང་དུག་ལྔར་སྣང་། །དབང་པོ་ལྔ་བརྟེན་རྣམ་ཤེས་ཡུལ། །དེ་ལྟར་སྣང་ནུས་སྟོབས་སུ་བཤད། །དེ་ལྟར་སྣང་བས་འབྱུང་བ་འོ། །གཞན་ལས་མ་བྱུང་རང་བྱུང་བས། །ཡོན་ཏན་འབྱུང་བས་རང་བྱུང་ཡིན། །དེ་ལྟར་ཤར་བས་རང་ཤར་ཡིན། །ཡོན་ཏན་ཞེས་ཀྱང་དེ་ལ་བྱ། །ཐམས་ཅད་འབྱུང་དང་ཀུན་འབྱུང་དང་། །མང་པོ་རིག་པས་འབྱུང་བ་རྣམས། །རིག་པར་ཤར་བས་འདི་བཞིན་སྣང་། །སྐུ་ལྔ་སྣང་དང་ཡུལ་ལྔར་སྣང་། །དེ་ལྟར་སེམས་དཔའ་སེམས་མར་ཤར། །དེ་བཞིན་ཐུགས་རྗེའི་མཛད་སྤྱོད་སྣང་། །དེ་མཚུངས་སྣང་བ་སྣ་ཚོགས་ཤར། །སྒྱུ་མ་ལྟ་བུར་གསུངས་པ་དང་། །སྣང་ལ་རང་བཞིན་མེད་པ་དང་། །གསལ་ལ་རྟོག་མེད་ཅེས་བྱུང་ན། །རྩལ་ལ་རང་བཞིན་མེད་པར་ཤར། །ཐམས་ཅད་རང་སྣང་རང་ཤར་ཡིན། །ཞེས་སོ། །