གཉིས་པ་མཐའ་རགས་ཙམ་དཔྱད་པ།
གཉིས་པ་མཐའ་རགས་ཙམ་དཔྱད་པ་ལ།
མདོ་ལུགས་མ་ལས། ཕྱིར་མི་འོང་བ་ལ་ཞུགས་གནས་གཉིས་ལས་ཞུགས་པ་ནི། སྔར་གྱི་བར་ཆད་གཅིག་པ་དེ་ཉིད་དོ། །ཞེས་དང༌། ཉ་ཊཱིཀ་ལས། ལམ་རིམ་གྱིས་པའི་ཕྱིར་འོང་འབྲས་གནས་ཁྱད་པར་ཅན་བར་ཆད་གཅིག་པའི་མཚན་ཉིད། རིམ་གྱིས་པའི་དེ་འབྲས་གནས་གང་ཞིག འདོད་པའི་སྒོམ་སྤང་གི་ཉོན་མོངས་བདུན་པ་སྤོང་བར་བརྩོན་པའམ་བདུན་བརྒྱད་གང་རུང་སྤངས་པ་ཡིན་པ། ཞེས་འདོད་ཉོན་བདུན་པ་སྤོང་བ་ལ་བརྩོན་པ་དེ་བར་ཆད་གཅིག་པ་གསུངས་པ་ལ་བརྟག་དགོས་ཏེ། མདོ་ལུགས་མའི་ལུང་སྔར་བཀོད་པ་དང༌། ཉ་ཊཱིཀ་ལས། རྒྱུ་གསུམ་གྱིས་བར་ཆད་གཅིག་པ་སྟེ། ཉོན་མོངས་པའི་རྣམ་པ་བདུན་ནམ་བརྒྱད་སྤངས་པའི་ཕྱིར་དང༌། ཞེས་སོགས་ཀྱིས་འདོད་ཉོན་བདུན་ཟད་པ་དགོས་པར་གསུངས་སོ། །ཡང་མདོ་ལུགས་མ་ལས།མྱ་ངན་འདས་ལ་ཚེ་གཅིག་གིས་ཆོད་པའི་ཕྱིར་རམ་འབྲས་བུ་གསུམ་པ་ལ་ཉོན་མོངས་པ་གཅིག་གིས་ཆོད་པའི་ཕྱིར་ཚེ་གཅིག་བར་ཆད་གཅིག་པའོ། །ཞེས་དང༌། ཉ་ཊཱིཀ་ལས། བདུན་བརྒྱད་སྤངས་པ་གཉིས་ཀའང་ཚེ་གཅིག་པ་ཡིན་ལ་བདུན་སྤངས་ཙམ་དེ་ཉོན་མོངས་གཅིག་གི་བར་ཆད་གཅིག་པ་མིན་ནོ། །ཞེས་གསུངས་པའི་དགོངས་པ་ཡང་འདོད་ཉོན་བདུན་པ་ཙམ་སྤངས་པ་དེ་ཕྱིར་མི་འོང་གི་འབྲས་བུ་ལ་ཉོན་མོངས་གཉིས་ཀྱིས་ཆོད་ཀྱང་གཙོ་བོ་འདོད་ཉོན་དགུ་བས་ཆོད་པས་ན་ཉོན་མོངས་གཅིག་གིས་ཆོད་ཅེས་གསུངས་ན་ཆོག་གམ་སྙམ་མོ། །ཡང་མདོ་ལུགས་མ་ལས། འདོད་པའི་ཁམས་སུ་ཚེ་ཡོངས་སུ་གྱུར་པའི་འཕགས་པ་ལ་ནི་གོང་དུ་འགྲོ་བའི་དབྱེ་བ་འདི་མེད་དེ། ཚེ་དེ་ཉིད་ལ་ཕྱིར་མི་འོང་གི་འབྲས་བུ་ཐོབ་ནས་མྱ་ངན་ལས་འདའ་བའི་ཕྱིར། ཞེས་གསུངས་པ་ལ། འོ་ན་འདོད་པར་ཚེ་ཡོངས་གྱུར་ཡིན་ན་ཚེ་དེར་དགྲ་བཅོམ་ཐོབ་པས་ཁྱབ་པར་ཐལ། ལུང་དེའི་ཕྱིར། འདོད་ན། རྒྱུན་ཞུགས་སྲིད་པ་ལན་བདུན་པའི་ཚེ་གཉིས་པ་སོགས་ཀྱིས་མ་ངེས་ལ། དེས་ན་ལུང་དེ་ཚེ་དེར་ཕྱིར་མི་འོང་ཐོབ་པའི་འདོད་པར་ཚེ་ཡོངས་གྱུར་གྱི་འཕགས་པ་ལ་དགོངས་པར་སྣང་ངོ༌། །