དྲི་བ་བཅུ་གསུམ་པ་ནི། མིང་ཡིན་ན་སྡུག་བདེན་ཡིན་པས་ཁྱབ་མ།
དྲི་བ་བཅུ་གསུམ་པ་ནི། མིང་ཡིན་ན་སྡུག་བདེན་ཡིན་པས་ཁྱབ་མ་ཁྱབ་དང༌།
མིང་ཡིན་ན་སྡུག་བདེན་ཡིན་པས་ཁྱབ་མ་ཁྱབ་དང༌། ཀུན་རྫོབ་ཀྱི་ཆོས་ཡིན་ན་ཆོས་ལྔའི་རྒྱུ་མཚན་ཡིན་པས་ཁྱབ་བམ་ཅི་ཞེས་པའོ། །དེའི་ལན་ནི། ཐེག་མཆོག་དབུ་མའི་ཟིན་བྲིས་ལས། མིང་ནི་སྡུག་བསྔལ་བདེན་པ་ཁོ་ནས་བསྡུས་པས་མིང་ཡིན་ན་སྡུག་བསྔལ་བདེན་པ་ཡིན་པས་ཁྱབ་ཀྱང༌། སྡུག་བདེན་ཡིན་ན་མིང་ཡིན་པས་ནི་མ་ཁྱབ་པོ། །ཞེས་གསུངས་ཟིན་ལ་མིང་ཡིན་ན་སྡུག་བདེན་ཡིན་པས་ཁྱབ་ཅེས་གསུངས་ཀྱང༌། མིང་ལ་སྡུག་བདེན་ཡོད་ཀྱང་མིང་ཡིན་ན་སྡུག་བདེན་ཡིན་པས་མ་ཁྱབ་སྙམ་སྟེ། སྔོན་མེད་ལེགས་བཤད་ལས། གཞུང་དེ་ཡང་རྣམ་པ་གསུམ་ཡོད་དེ། ཞེས་པ་ནས་གཞན་འཕགས་པ་དང་སོ་སོ་སྐྱེ་བོ་རྣམས་ཀྱི་ཡིད་ལ་སྒྲ་སྤྱིའི་རྣམ་པར་ཤར་བའི་མིང་ཚིག་ཡི་གེའི་ཚོགས་པ་ཐེག་ཆེན་གྱི་མདོ་སྡེ་ནི་གཞུང་གཉིས་པའོ། །དེ་དང་མཐུན་པར་ངག་ཏུ་བརྗོད་པའི་སྒྲ་ནི་གཞུང་ཤེར་ཕྱིན་གསུམ་པ་སྟེ། ཞེས་པའི་གཞུང་ཤེར་ཕྱིན་གྱི་གཞུང་ཚིག་ཏུ་གྱུར་བའི་སྒྲ་སྤྱིའི་མིང་ནི་སྡུག་བདེན་ཡིན་པའི་གནས་མེད་དོ། །དེས་ན་ཐེག་མཆོག་དབུ་མར། མིང་ནི་སྡུག་བསྔལ་བདེན་པ་ཁོ་ནས་བསྡུས། །ཞེས་པའི་དགོངས་པ་ནི་མིང་ལ་སྡུག་བདེན་མ་ཡིན་པའི་བདེན་པ་གསུམ་པོ་གང་ཡང་མེད་པའི་དོན་དུ་འཆད་དགོས་པར་སྣང་ངོ༌། །མྀང་ལ་ཀུན་འབྱུང་ཡོད་མེད་དཔྱད། སྔར་བདག་གིས་གཞན་སྟོང་བགྲོ་གླེང་ཐེངས་གཉིས་པའི་དྲིས་ལན་གྱི་སྐབས་སུ་མིང་དང་ནམ་མཁའ་གཉིས་སྡུག་བདེན་ཡིན་མིན་གྱི་ཁྱད་ཡོད་པར་བཤད་པ་དེ་སྡུག་བདེན་གྱུར་བའི་མིང་ཡིན་པར་ཤེས་དགོས་སོ། །ཆོས་ལྔའི་རྒྱུ་མཚན་ལ་ཀུན་རྫོབ་ཀྱི་ཆོས་རྣམས་བཞག་དགོས་པར་སྣང་སྟེ། རྒྱུ་མཚན་ལ། ཐེག་མཆོག་དབུ་མ་ལས། རྒྱུ་མཚན་རྣམ་བཞག་བདེན་པ་བཞི་ཆར་ལ། །ཞེས་གསུངས་པ་དང༌། འཛིན་ཆ་དང་གཟུང་ཆ་སོགས་ཟིན་བྲིས་ལས་གསུངས་ཚུལ་ཞིག་ན་ཀུན་རྫོབ་ཀྱི་ཆོས་ཡིན་ན་སྐབས་འདིའི་རྒྱུ་མཚན་ཡིན་པས་ཁྱབ་དགོས་སོ། །འོན་ཀྱང་འདི་དག་ལ་རིགས་པའི་སྒོ་བརྒྱ་ཡངས་བའི་མཁས་པ་རྣམས་ཀྱིས་སླར་དཔྱད་པར་བྱའོ། །